Sila Nagpaabot sa Mesiyas

“Ang mga tawo nagpaabot, ug ang tanan naghunahuna kon si Juan ba mao ang Mesiyas.”—LUC. 3:15, THE EMPHATIC DIAGLOTT.

 1. Unsay gipahibalo sa manulonda ngadto sa mga magbalantay?

MITIKYOP na ang kagabhion. Ang mga magbalantay didto sa kapatagan uban sa ilang mga karnero. Sila nakugang sa dihang may manulonda ni Jehova nga mibarog sa duol ug midan-ag ang himaya sa Diyos! Ang manulonda maikagong nagpahibalo: “Ayaw kahadlok, kay, tan-awa! Ako nagapahayag kaninyo ug maayong balita sa dakong kalipay nga mabatonan sa tanang tawo, tungod kay natawo kaninyo karong adlawa ang usa ka Manluluwas, nga mao ang Kristo nga Ginoo,” ang Mesiyas. Makaplagan nila ang maong masuso diha sa usa ka pasungan sa duol nga lungsod. Sa kalit, “usa ka dakong pundok sa langitnong panon” ang nagdayeg kang Jehova: “Himaya sa Diyos sa kahitas-an, ug sa yuta pakigdait taliwala sa mga tawo nga iyang gikahimut-an.”—Luc. 2:8-14.

 2. Unsay kahulogan sa “Mesiyas,” ug sa unsang paagi siya mailhan?

² Siyempre, ang Hudiyong mga magbalantay nahibalo nga ang “Mesiyas,” o “Kristo,” mao ang “Usa nga Dinihogan.” (Ex. 29:5-7) Apan unsaon nila pagkahibalog dugang ug pagkombinsir sa uban nga ang masuso nga gihisgotan sa manulonda mao ang tinudlo ni Jehova nga mahimong Mesiyas? Pinaagi sa pagsusi kon ang Mesiyanikong mga tagna sa Hebreohanong Kasulatan natuman ba sa kinabuhi sa maong bata.

Nganong Nagpaabot ang mga Tawo?

3, 4. Sa unsang paagi nato sabton ang Daniel 9:24, 25?

³ Sa dihang si Juan Bawtista nagsangyaw mga katuigan sa ulahi, may mga tawong naghunahuna nga siya na tingali ang Mesiyas. (Basaha ang Lucas 3:15.) Posible nga ang pipila nakasabot sa tagna bahin sa Mesiyas nga naghisgot sa “kapitoan ka semana.” Busa, ilang matino kon kanus-a motungha ang Mesiyas. Usa ka bahin sa tagna nag-ingon: “Sukad sa paggula sa sugo sa pagpasig-uli ug sa pagtukod pag-usab sa Jerusalem hangtod sa Mesiyas nga Pangulo, adunay pito ka semana, ingon man kan-umag-duha ka semana.” (Dan. 9:24, 25) Ang mga eskolar sa Bibliya nagkauyon nga kini maoy mga semana sa mga tuig. Pananglitan, ang Revised Standard Version nag-ingon: “Kapitoan ka semana nga katuigan mao ang gitagal.”

⁴ Nasabtan sa mga alagad ni Jehova karon nga ang 69 ka semana, o 483 ka katuigan, sa Daniel 9:25 nagsugod sa 455 W.K.P. sa dihang ang Persianong Haring Artajerjes mitugot kang Nehemias sa pagtukod pag-usab sa Jerusalem. (Neh. 2:1-8) Ang 69 ka semana natapos 483 ka tuig sa ulahi, sa 29 K.P., sa dihang si Jesus nga taga-Nasaret gibawtismohan ug gidihogan sa balaang espiritu, sa ingon nahimong Mesiyas.—Mat. 3:13-17.a

 5. Unsang mga tagna ang atong hisgotan?

⁵ Tagdon nato karon ang pipila ka tagna bahin sa Mesiyas nga natuman kang Jesus—iyang pagkahimugso, sayong bahin sa iyang kinabuhi, ug ministeryo. Kini makapalig-on sa atong pagtuo sa Bibliya ug magpamatuod usab nga si Jesus mao ang dugay nang gipaabot nga Mesiyas.

Mga Tagna sa Sayong Bahin sa Iyang Kinabuhi

 6. Sa unsang paagi natuman ang Genesis 49:10?

⁶ Ang Mesiyas matawo sa tribo ni Juda. Sa hapit nang mamatay, si Jacob mitagna: “Ang setro dili mobiya gikan kang Juda, ni ang sungkod sa komandante gikan sa taliwala sa iyang mga tiil, hangtod nga moabot si Shilo; ug kaniya ang pagkamasinugtanon sa mga katawhan maiya.” (Gen. 49:10) Gituohan sa daghang karaang Hudiyong eskolar nga kana nagtumong sa Mesiyas. Sugod sa paghari ni David, ang setro (katungod sa paghari) ug ang sungkod sa komandante (katungod nga mohatag ug mando) nagpabilin sa tribo ni Juda. Ang “Shilo” nagpasabot nga “Iya Kini; Siya ang Tag-iya Niini.” Ang harianong banay ni Juda matapos diha kang “Shilo” ingong permanenteng Manununod sa trono, kay ang Diyos miingon kang Zedekias, ang kataposang hari gikan sa tribo ni Juda, nga ang pagmando ihatag sa usa nga may legal nga katungod. (Ezeq. 21:26, 27) Sunod kang Zedekias, si Jesus ang bugtong kaliwat ni David nga gisaaran sa pagkahari. Sa wala pa matawo si Jesus, ang manulondang Gabriel miingon kang Maria: “Ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Luc. 1:32, 33) Ang Shilo mao si Jesu-Kristo, nga kaliwat ni Juda ug David.—Mat. 1:1-3, 6; Luc. 3:23, 31-34.

 7. Diin natawo ang Mesiyas, ug nganong makahuloganon kini?

⁷ Ang Mesiyas matawo sa Betlehem. Si propeta Miqueas misulat: “Ikaw, Oh Betlehem Eprata, nga gamay kaayo aron mahiapil taliwala sa linibo sa Juda, gikan kanimo mogula alang kanako ang usa nga mahimong magmamando sa Israel, kansang kagikan maoy gikan pa sa unang kapanahonan, gikan sa mga adlaw sa panahong walay tino.” (Miq. 5:2) Ang Mesiyas matawo sa Betlehem, usa ka lungsod sa Juda nga gitawag kanhig Eprata. Si Maria nga inahan ni Jesus ug ang iyang amaama nga si Jose nagpuyo sa Nasaret, apan tungod sa Romanong balaod bahin sa pagparehistro, sila nangadto sa Betlehem diin si Jesus natawo niadtong 2 W.K.P. (Mat. 2:1, 5, 6) Natuman gayod ang tagna!

8, 9. Unsay gitagna bahin sa pagkatawo sa Mesiyas ug sa mga panghitabo human niana?

⁸ Ang Mesiyas ipanganak sa usa ka ulay. (Basaha ang Isaias 7:14.) Ang Hebreohanong pulong sa “ulay” maoy bethu·lahʹ. Apan ang laing pulong (ʽal·mahʹ) gigamit diha sa Isaias 7:14. Kini nagtagna nga ang usa ka “dalaga [ha·ʽal·mahʹ]” manganak ug usa ka anak lalaki. Ang pulong ʽal·mahʹ gigamit sa paghubit sa dalagang si Rebeca sa wala pa siya maminyo. (Gen. 24:16, 43) Ubos sa inspirasyon, si Mateo migamit sa Gregong pulong (par·theʹnos) alang sa “ulay” sa pagpakita nga ang Isaias 7:14 natuman maylabot sa pagkatawo ni Jesus. Ang mga magsusulat nga si Mateo ug Lucas nag-ingon nga si Maria usa ka ulay nga namabdos pinaagi sa balaang espiritu sa Diyos.—Mat. 1:18-25; Luc. 1:26-35.

⁹ Human matawo ang Mesiyas, ang mga bata pagapatyon. Nahitabo ang susama niana kasiglohan kanhi, sa dihang gisugo ni Paraon sa Ehipto nga ang tanang bag-ong natawo nga Hebreohanong batang lalaki ilabay sa Suba sa Nilo. (Ex. 1:22) Apan matikdi ang Jeremias 31:15, 16, diin si Raquel naghilak tungod sa iyang mga anak lalaki nga gidala ngadto sa “yuta sa kaaway.” Ang iyang paghilak nadungog sa halayong Rama, sa teritoryo ni Benjamin, amihanan sa Jerusalem. Gipakita ni Mateo nga natuman ang tagna ni Jeremias sa dihang gisugo ni Haring Herodes nga patyon ang mga batang lalaki sa Betlehem ug sa kasikbit nga mga dapit. (Basaha ang Mateo 2:16-18.) Makapasubo gayod nga hitabo!

10. Isaysay kon sa unsang paagi ang Oseas 11:1 natuman kang Jesus.

¹⁰ Sama sa mga Israelinhon, ang Mesiyas pagatawgon gikan sa Ehipto. (Os. 11:1) Sa wala pa ipapatay ni Herodes ang mga bata, gisugo sa usa ka manulonda si Jose nga iyang dad-on si Maria ug Jesus sa Ehipto. Sila nagpuyo didto “hangtod sa pagkamatay ni Herodes, aron matuman ang gisulti ni Jehova pinaagi sa iyang manalagna [Oseas], nga nag-ingon: ‘Gikan sa Ehipto gitawag ko ang akong anak.’” (Mat. 2:13-15) Siyempre, dili mahimong si Jesus ang nagmaniobra sa iyang pagkatawo ug sa sayong bahin sa iyang kinabuhi.

Ang Mesiyas Nagsugod sa Iyang Ministeryo!

11. Sa unsang paagi giandam ang dalan alang sa Usa nga Dinihogan ni Jehova?

¹¹ Ang dalan andamon alang sa Usa nga Dinihogan sa Diyos. Si Malaquias mitagna nga si “Elias nga manalagna” maoy mobuhat niini, nga andamon ang kasingkasing sa mga tawo alang sa pag-abot sa Mesiyas. (Basaha ang Malaquias 4:5, 6.) Si Jesus mismo nag-ingon nga si Juan Bawtista mao si “Elias.” (Mat. 11:12-14) Ug si Marcos miingon nga ang pagwali ni Juan nagtuman sa tagna ni Isaias. (Isa. 40:3; Mar. 1:1-4) Si Jesus wala magsugo kang Juan nga andamon ang dalan alang kaniya. Ang Diyos maoy nagpili kang Juan sa pagbuhat sa buluhatong sama sa kang Elias aron mailhan ang Mesiyas.

12. Unsang buluhatona ang magpaila sa Mesiyas?

¹² Usa ka espesyal nga buluhaton ang magpaila sa Mesiyas. Sa sinagoga sa Nasaret, diin siya nagdako, si Jesus nagbasa sa basahon ni Isaias ug miingon nga kini nagtumong kaniya: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos, siya nagpadala kanako aron sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta, aron sa pagpalakat sa mga dinaogdaog uban ang kagawasan, aron sa pagwali sa dalawatong tuig ni Jehova.” Kay siya ang tinuod nga Mesiyas, si Jesus makaingon gayod: “Karong adlawa kining kasulatan nga bag-o lang ninyo nga nadungog natuman.”—Luc. 4:16-21.

13. Sa unsang paagi gitagna ang publikong ministeryo ni Jesus sa Galilea?

¹³ Ang publikong ministeryo sa Mesiyas sa Galilea gitagna. Bahin “sa yuta sa Zabulon ug sa yuta sa Neptali . . . ang Galilea sa mga nasod,” si Isaias misulat: “Ang katawhan nga naglakaw sa kangitngit nakakita ug dakong kahayag. Kon bahin niadtong mga nagapuyo sa yuta sa mabagang kangiob, ang kahayag mismo misidlak diha kanila.” (Isa. 9:1, 2) Si Jesus nagsugod sa iyang ministeryo sa Galilea, sa lungsod sa Capernaum. Nagtudlo sab siya sa Zabulon ug Neptali, diin daghan ang nadan-agan sa espirituwal nga kahayag nga iyang gidala. (Mat. 4:12-16) Sa Galilea, si Jesus nagpahayag sa makapaikag nga Wali sa Bukid, nagpili sa mga apostoles, naghimo sa unang milagro, ug nagpakita sa mga 500 ka tinun-an human sa iyang pagkabanhaw. (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6) Busa, iyang natuman ang tagna ni Isaias pinaagi sa pagsangyaw “sa yuta sa Zabulon ug sa yuta sa Neptali.” Siyempre, nagsangyaw sab si Jesus sa mensahe sa Gingharian sa ubang dapit sa Israel.

Ubang Tagna Bahin sa Mesiyas

14. Sa unsang paagi gituman ni Jesus ang Salmo 78:2?

¹⁴ Ang Mesiyas mogamit ug mga sambingay, o mga ilustrasyon. Si salmistang Asap miawit: “Pagabukhon ko ang akong baba sa usa ka panultihon.” (Sal. 78:2) Nganong nahibalo kita nga kini nagtumong kang Jesus? Si Mateo nagtug-an niana. Human iasoy ang mga ilustrasyon diin ang Gingharian gipakasama ni Jesus sa liso sa mustasa ug sa lebadura, si Mateo miingon: “Kon walay sambingay [si Jesus] dili mosulti kanila; aron matuman ang gisulti pinaagi sa manalagna nga miingon: ‘Pagabukhon ko ang akong baba uban ang mga sambingay, imantala ko ang mga butang tinago sukad sa pagkatukod [sa kalibotan].’” (Mat. 13:31-35) Ang mga panultihon, o mga sambingay nahilakip sa epektibong mga paagi sa pagpanudlo ni Jesus.

15. Sa unsang paagi natuman ang Isaias 53:4?

¹⁵ Ang Mesiyas mag-ayo sa mga masakiton. Si Isaias mitagna: “Sa pagkatinuod ang atong mga sakit mao ang iyang gidala; ug kon bahin sa atong mga kasakit, iyang gipas-an kini.” (Isa. 53:4) Si Mateo miingon nga human ayoha ang ugangang babaye ni Pedro, si Jesus nag-ayo usab sa uban aron “matuman ang gisulti pinaagi ni Isaias nga manalagna, nga nag-ingon: ‘Gikuha niya ang atong mga sakit ug gipas-an ang atong mga balatian.’” (Mat. 8:14-17) Usa lamang kini sa daghang narekord nga pagpang-ayo ni Jesus.

16. Sa unsang paagi gipakita ni apostol Juan nga gituman ni Jesus ang Isaias 53:1?

¹⁶ Bisan sa tanang maayong buhat sa Mesiyas, daghan ang dili motuo kaniya. (Basaha ang Isaias 53:1.) Gipakita ni apostol Juan nga natuman ang maong tagna ug siya misulat: “Bisan tuod nakahimo [si Jesus ug] daghan kaayong mga ilhanan sa ilang atubangan, wala sila magbutang ug pagtuo kaniya, sa ingon natuman ang pulong ni Isaias nga manalagna nga iyang giingon: ‘Jehova, kinsa ang nagbutang ug pagtuo sa mga butang nga among nadungog? Ug kon bahin sa bukton ni Jehova, kang kinsa kini gipadayag?’” (Juan 12:37, 38) Usab, sa nagsangyaw si apostol Pablo sa maayong balita, diyutay lang ang mituo nga si Jesus ang Mesiyas.—Roma 10:16, 17.

17. Sa unsang paagi natuman ang Salmo 69:4?

¹⁷ Ang Mesiyas dumtan nga walay pasikaranan. (Sal. 69:4) Si apostol Juan mikutlo sa mga pulong ni Jesus: “Kon wala pa nako himoa sa [katawhan] ang mga buhat nga walay laing nakahimo, wala unta silay sala; apan karon sila nakakita na ug nagdumot kanako ingon man sa akong Amahan. Apan kini maoy aron matuman ang pulong nga nahisulat sa ilang Balaod, ‘Sila nagdumot kanako nga walay pasikaranan.’” (Juan 15:24, 25) Sagad, ang “Balaod” nagtumong sa tibuok Kasulatan. (Juan 10:34; 12:34) Ang mga asoy sa Ebanghelyo nagpamatuod nga si Jesus gidumtan, ilabina sa Hudiyong mga relihiyosong lider. Dugang pa, si Kristo miingon: “Ang kalibotan walay katarongan sa pagdumot kaninyo, apan kini nagdumot kanako, tungod kay gipamatud-an ko nga ang mga buhat niini daotan.”—Juan 7:7.

18. Unsay dugang hisgotan nga makapalig-on sa atong pagtuo nga si Jesus mao ang Mesiyas?

¹⁸ Ang unang siglong mga sumusunod ni Jesus nakatino nga siya ang Mesiyas, kay iyang natuman ang mga tagna sa Hebreohanong Kasulatan bahin sa Mesiyas. (Mat. 16:16) Sa ato nang nakita, ang pipila niini natuman sa sayong bahin sa kinabuhi ni Jesus nga taga-Nasaret ug sa iyang ministeryo. Ang dugang tagna bahin sa Mesiyas hisgotan sa sunod artikulo. Ang atong pagpamalandong niana makapalig-on sa atong pagtuo nga si Jesu-Kristo mao ang Mesiyas nga gitudlo sa atong langitnong Amahan, si Jehova.

[Footnote]

Unsay Imong Tubag?

• Unsang mga tagna bahin sa pagkatawo ni Jesus ang natuman?

• Sa unsang paagi giandam ang dalan alang sa Mesiyas?

• Unsang mga tagna sa Isaias kapitulo 53 ang natuman kang Jesus?