Mga Pangutana Gikan sa mga Magbabasa
Sa unsang paagi ang mga benepisyo sa pag-alagad ni Kristo Jesus ingong hataas nga saserdote, nga gihisgotan sa Hebreohanon 4:15, 16, mapadapat sa “ubang mga karnero” karon?
Bisan tuod ang katungdanan ni Jesus ingong Hataas nga Saserdote hinungdanon kaayo niadtong mahiuban kaniya sa langit, ang mga Kristohanon nga adunay yutan-ong paglaom makabenepisyo bisan karon gikan sa pag-alagad ni Jesus ingong saserdote.
Sukad kang Adan, ang katawhan nabug-atan sa sala. Kita nag-antos gumikan sa napanunod nga pagkadili-hingpit, sama sa mga Israelinhon. Sila midangop sa taas nga linya sa hataas nga mga saserdote ug kaubang mga saserdote, nga naghalad alang sa ilang kaugalingong mga sala maingon man niadtong sa mga tawo. Ngadtongadto, si Jesus nadihogan ingong saserdote “sumala sa paagi ni Melchizedek.” Human mabanhaw, si Jesus miatubang kang Jehova sa pagtanyag sa bili sa iyang hingpit tawhanong halad.—Salmo 110:1, 4.
Unsay kahulogan niini alang kanato karong adlawa? Sa iyang sulat ngadto sa mga Hebreohanon, si Pablo naghisgot sa pag-alagad ni Jesus ingong Hataas nga Saserdote. Sa Hebreohanon 5:1, atong mabasa: “Ang matag hataas nga saserdote nga gikuha gikan sa taliwala sa mga tawo gitudlo alang sa mga tawo diha sa mga butang maylabot sa Diyos, aron siya makatanyag ug mga gasa ug mga halad alang sa mga sala.” Unya, sa bersikulo 5 ug 6, gipakita ni Pablo nga si Jesus nahimong hataas nga saserdote, nga mahimong motultol ngadto sa mga benepisyo alang kanato.
Sa unsang paagi? Si Pablo misulat: “Bisan tuod siya Anak, siya nakakat-on sa pagkamasinugtanon gikan sa mga butang nga iyang giantos; ug human siya nahimong hingpit siya nahimong responsable alang sa walay-kataposang kaluwasan niadtong tanan nga nagasugot kaniya.” (Hebreohanon 5:8, 9) Sa sinugdan, kanang bersikuloha mahimong magpahunahuna kanato kon sa unsang paagi kita makabenepisyo sa bag-ong kalibotan, sa dihang kadtong maunongon sa Diyos ug kang Jesus mahigawas sa ilang makasasalang kahimtang ug makabaton ug walay-kataposang kinabuhi. Kana maoy balidong palaabuton, nga gipasikad sa nagalukat nga bili sa halad ni Jesus ug sa iyang pag-alagad ingong Hataas nga Saserdote.
Hinunoa, sa pagkatinuod, kita makabenepisyo karong panahona gikan sa iyang katungdanan o pag-alagad ingong Hataas nga Saserdote. Matikdi ang Hebreohanon 4:15, 16: “Kita adunay ingong hataas nga saserdote, dili usa nga dili makasimpatiya sa atong mga kaluyahon, apan usa nga nasulayan sa tanang paagi sama kanato, hinuon walay sala. Busa, manuol kita uban ang kagawasnon sa pagsulti ngadto sa trono sa dili-takos nga kalulot, aron kita makabaton ug kaluoy ug makakaplag ug dili-takos nga kalulot ingong tabang sa hustong panahon.” Kanus-a kanang “hustong panahon”? Kana maoy sa dihang kita nagkinahanglan ug kaluoy ug dili-takos nga kalulot. Kitang tanan, tungod sa atong pagkadili-hingpit, kinahanglang mobati niining maong panginahanglan karon.
Ang Hebreohanon 4:15, 16 nagpunting nga si Jesus—nga karon usa ka saserdote sa langit—nahimo usab nga tawo, busa siya mahimong mabination. Ngadto kang kinsa? Nganhi kanato. Kanus-a? Karon. Sa dihang siya usa ka tawo, si Jesus nakasinati ug mga kapit-os nga komon sa mga tawo. Usahay, si Jesus gigutom ug giuhaw. Ug bisan tuod hingpit, siya gikapoy. Kana makapalig-on kanato. Ngano? Tungod kay si Jesus nakasinati ug kinaiyanhong kakapoy, siya nahibalo kon unsay subsob natong bation. Hinumdomi, usab, nga si Jesus kinahanglang makigbisog sa masinahong pag-awayay taliwala sa iyang mga apostol. (Marcos 9:33-37; Lucas 22:24) Oo, siya adunay mga kahigawad. Dili ba maghatag kana kanato ug pagsalig nga siya makasabot sa dihang kita mahigawad, mawad-ag kadasig? Tino gayod.
Sa dihang ikaw mawad-ag kadasig, unsay imong mahimong buhaton? Miingon ba si Pablo nga ikaw maghulat hangtod nga, sa bag-ong kalibotan, ang imong Hataas nga Saserdote, si Jesus, makatabang kanimo nga mahimong hingpit sa hunahuna ug lawas? Dili. Si Pablo miingon: “Kita makabaton ug kaluoy ug makakaplag ug dili-takos nga kalulot ingong tabang sa hustong panahon,” ug kana naglakip sa presenteng panahon. Dugang pa, sa dihang tawo pa si Jesus, nakasinati siyag mga pag-antos ug mga kalisdanan, nga “nasulayan sa tanang paagi sama kanato.” Busa sa dihang nag-atubang kita nianang mga butanga, siya andam nga motabang kanato, pinasikad sa iyang pagsabot sa kon unsay atong nasinati. Dili ba makapasuod kana kanimo ngadto kaniya?
Karon matikdi ang bersikulo 16. Si Pablo nag-ingon nga kita—ug kini naglakip sa mga dinihogan ug niadtong ubang mga karnero—makaduol sa Diyos uban ang kagawasnon sa pagsulti. (Juan 10:16) Ang apostol wala magpasabot nga kita samtang mag-ampo makasulti sa bisan unsa nga buot nato, bisan sa masuk-anon, dili-matinahurong mga butang. Hinunoa, pinasikad sa halad ni Jesus ug sa iyang katungdanan ingong Hataas nga Saserdote, kita makaduol sa Diyos bisan pa sa atong pagkamakasasala.
Ang laing paagi nga kita makabenepisyo bisan karon sa pag-alagad sa atong Hataas nga Saserdote, si Jesu-Kristo, naglangkit sa atong mga sala, o mga kalapasan. Siyempre dili kita magdahom nga sa presenteng sistema si Jesus magpadapat kanato sa bug-os nga bili sa iyang halad. Bisan pag buhaton niya kana, dili gihapon kita makabaton ug kinabuhing walay kataposan. Nahinumdom ka ba sa kahimtang nga nasulat sa Lucas 5:18-26, nga naglangkit sa tawong may paralisis kansang higdaanan gitunton agi sa lungag sa atop? Giingnan siya ni Jesus: “Lalaki, ang imong mga sala gipasaylo.” Wala kana magpasabot ug pipila ka tinong sala nga nagpahinabo sa paralisis. Nagpasabot gayod kana sa kasal-anan sa tawo sa linangkob, ug sa usa ka sukod maglangkit kana sa iyang napanunod nga pagkadili-hingpit, nga nagpahinabog mga pag-antos.
Pinasikad sa halad nga iyang itanyag, si Jesus makapahilayo sa mga sala gikan sa katawhan, maingon nga ang kanding alang kang Azazel nagdala sa halayo sa mga sala sa Israel sa Adlaw sa Pagtabon sa Sala. (Levitico 16:7-10) Bisan pa niana, ang giparalisis tawo sa gihapon. Siya nakasala pag-usab, ug ngadtongadto siya namatay, ingon nga maoy mahitabo gayod sa mga makasasala. (Roma 5:12; 6:23) Ang giingon ni Jesus wala magpasabot nga ang tawo nakadawat dayon ug kinabuhing walay kataposan. Apan ang lalaki gipanalanginan ug usa ka sukod sa pagpasaylo niadtong panahona.
Karon tagda ang atong kahimtang. Sanglit dili hingpit, kita makasala adlaw-adlaw. (Santiago 3:2) Unsay atong mahimo bahin niana? Aw, sa langit kita adunay maluluy-ong Hataas nga Saserdote pinaagi kang kinsa makaduol kita kang Jehova diha sa pag-ampo. Oo, sumala sa gisulat ni Pablo, kitang tanan makaduol “uban ang kagawasnon sa pagsulti ngadto sa trono sa dili takos nga kalulot [sa Diyos], aron kita makabaton ug kaluoy ug makakaplag ug dili-takos nga kalulot ingong tabang sa hustong panahon.” Ingong sangpotanan, ang tanan karong adlawa nga sakop sa ubang mga karnero sa pagkatinuod nakabaton gayod ug kahibulongang mga kaayohan, lakip sa hinlong konsensiya, gikan sa pag-alagad ni Kristo ingong hataas nga saserdote.
Ang tanang Kristohanon nga adunay yutan-ong paglaom makalaom ug mas dagkong mga benepisyo sa nagasingabot nga bag-ong kalibotan. Unya ang atong langitnong Hataas nga Saserdote magpadapat sa bug-os sa bili sa iyang halad, nga motultol ngadto sa bug-os nga kapasayloan sa sala. Magahatag usab siya ug mas dakong mga benepisyo pinaagi sa pag-atiman sa pisikal ug espirituwal nga panglawas sa mga tawo. Ug si Jesus magpakaylap pag-ayo sa edukasyon sa katawhan sa Diyos sa yuta, sanglit ang pagtudlo sa Kasugoan maoy dakong responsibilidad sa mga saserdote sa Israel. (Levitico 10:8-11; Deuteronomio 24:8; 33:8, 10) Nan, bisan tuod kita nakabenepisyo na karon gikan sa pag-alagad ni Jesus ingong saserdote, mas daghan pa ang nagapaabot kanato!