Kinabuhi ug Ministeryo ni Jesus

Gipangutana Mahitungod sa Pagpuasa

MILABAY ang halos usa ka tuig sukad sa pagtambong ni Jesus sa Paskuwa sa 30 K.P. Sa maong panahon, si Juan Bawtista nabilanggo na sa ubay-ubay nga bulan. Bisan tuod gusto niyang ang iyang mga tinun-an mahimong mga sumusunod ni Kristo, dili tanan kanila ang nahimong ingon.

Karon ang pipila sa maong mga tinun-an sa nabilanggong si Juan nangadto kang Jesus ug nangutana: “Ngano ba nga kami ug ang mga Pariseo nagapuasa man apan ang imong mga tinun-an wala magpuasa?” Ang mga Pariseo nagpuasa kaduha sa usa ka semana ingong rituwal sa ilang relihiyon. Ug tingali ang mga tinun-an ni Juan nagsunod sa susamang batasan. Mahimo usab nga sila nagpuasa sa pagbangotan sa pagkabilanggo ni Juan ug nahibulong nganong ang mga tinun-an ni Jesus wala moduyog kanila sa maong ekspresyon sa kagul-anan.

Ingong tubag si Jesus mipatin-aw: “Ang mga higala sa pamanhonon walay katarongan nga magbangotan samtang ang pamanhonon uban pa kanila, dili ba? Apan moabot ang mga adlaw nga ang pamanhonon pagakuhaon gikan kanila, ug unya sila magpuasa.”

Ang mga tinun-an ni Juan angay mahinumdom nga si Juan mismo naghisgot kang Jesus ingong Pamanhonon. Busa, samtang diha pa si Jesus, dili isipon ni Juan nga nahiangay ang pagpuasa, ug mao usab ang mga tinun-an ni Jesus. Sa ulahi, sa namatay si Jesus, ang iyang mga tinun-an nagbangotan ug nagpuasa. Apan dihang siya mabanhaw ug mokayab ngadto sa langit, wala na silay dugang hinungdan sa masulob-ong pagpuasa.

Sunod, si Jesus misugilon niining mga ilustrasyona: “Walay magatapak sa wala pa mokulo nga panapton sa usa ka daan nga sinina; kay ang bug-os nga kalig-on niini mobira sa sinina ug mosamot ang gisi. Ang mga tawo dili magasulod ug bag-ong bino sa daang mga sudlanan nga panit; apan kon magasulod sila, nan ang mga sudlanan nga panit mobusisi ug ang bino mobuhagay ug madaot ang mga sudlanan nga panit. Apan ang mga tawo magasulod ug bag-ong bino sa bag-ong mga sudlanan nga panit.” Unsay kalabotan sa maong mga ilustrasyon sa pagpuasa?

Gibuligan ni Jesus ang mga tinun-an ni Juan sa pag-ila nga walay mausa ang angay magdahom nga ang iyang mga sumusunod mosunod sa daang mga batasan sa Hudaismo, sama sa pagpuasa ingong rituwal. Siya wala moanhi sa pagtapak ug pagpatunhay sa daang gubang mga sistema sa pagsimba nga andam nang ilabay. Ang Kristiyanidad dili angay pasundon sa Hudaismo niadtong panahona uban sa mga tradisyon sa mga tawo. Dili, kadto dili mahimong sama sa bag-ong panapton nga itapak sa daang sinina o sa bag-ong bino nga isulod sa daang sudlanan nga panit. Mateo 9:14-17; Marcos 2:18-22; Lucas 5:33-39; Juan 3:27-29.

◆ Kinsay naghimo sa pagpuasa, ug alang sa unsang katuyoan?

◆ Nganong ang mga tinun-an ni Jesus wala magpuasa samtang siya nag-uban pa kanila, ug sa kaulahian sa unsang paagi ang hinungdan sa pagpuasa sa wala madugay nawala?

◆ Unsang mga ilustrasyon ang gisugilon ni Jesus, ug unsay kahulogan niana nila?