Pakigsuod sa Diyos
Ang Usa nga Makabuhi sa mga Patay
NAMATYAN ka na bag minahal sa kinabuhi? Kon mao, nakasinati ka na kon unsa ka sakit ang mamatyan. Ang atong Maglalalang nakasabot sa imong gibating kaguol. Gawas pa niana, siya makahimo usab sa pagwagtang sa mga epekto sa kamatayon. Sa Bibliya, iyang gipasulat alang kanato ang mga asoy sa nahitabong pagkabanhaw aron ipakita nga dili lang siya Maghahatag ug kinabuhi kondili ang Usa nga makahimo usab sa pagpasig-uli niana. Iyang gihatagan ug gahom ang iyang Anak, si Jesu-Kristo, sa pagbanhaw sa mga patay. Atong hisgotan ang usa sa mga pagbanhaw nga gihimo ni Jesus nga natala sa Lucas 7:11-15.
Tuig 31 K.P. kadto. Si Jesus mipanaw paingon sa siyudad sa Nain sa Galilea. (Bersikulo 11) Lagmit kilumkilom na sa dihang siya miabot sa utlanan sa siyudad. Ang Bibliya nagtaho: “Sa duol na siya sa ganghaan sa siyudad, tan-awa! dihay giyayongan paingon sa gawas nga usa ka patayng tawo, ang bugtong anak nga lalaki sa iyang inahan. Gawas pa, siya balo. Ang usa ka dakong panon sa katawhan gikan sa siyudad nag-uban usab kaniya.” (Bersikulo 12) Mahanduraw ba nimo ang kaguol nga gibati sa nabalong inahan? Sa pagkamatay sa iyang bugtong anak, siya nawad-an na usab ug minahal nga maoy iyang gisaligan nga makaatiman ug makapanalipod kaniya.
Wala mobulag ang panan-aw ni Jesus sa nagbangotang inahan, nga lagmit naglakaw duol sa giyayongan nga andas. Ang asoy nag-ingon: ‘Sa nakita siya sa Ginoo, siya giabot ug kaluoy kaniya, ug siya miingon kaniya: “Ayaw na paghilak.”’ (Bersikulo 13) Natandog pag-ayo ang kasingkasing ni Jesus sa pagkakita sa makaluluoyng kahimtang sa balo. Tingali naghunahuna siya sa iyang inahan, nga lagmit nabalo na niadtong higayona ug sa dili madugay magbangotan usab tungod kaniya.
Si Jesus miduol—dili aron mokuyog sa prosesyon sa lubong. Iyang “gihikap ang andas” ug gipahunong ang panon sa mga tawo. Dayon, kay may gahom ibabaw sa kamatayon, siya kusog nga miingon: “‘Dong, ingnon ko ikaw, Bangon!’ Ug ang patay nga tawo milingkod ug misugod sa pagsulti, ug iyang gihatag siya ngadto sa iyang inahan.” (Bersikulo 14, 15) Ang maong batan-on gisakmit sa kamatayon gikan sa iyang inahan. Busa sa dihang “gihatag siya ngadto sa iyang inahan,” sila nagkauban pag-usab. Ang tumang kaguol nga gibati sa inahan nahulipan ug mga luha sa kalipay.
Nangandoy ka ba nga masinati usab kana nga kalipay—nga makauban pag-usab ang imong namatay nang minahal? Makasalig ka nga ang Diyos naluoy gayod kanimo. Ang kaluoy ni Jesus sa nagbangotan nga balo nagpakita sa pagkamabination mismo sa Diyos, tungod kay hingpit nga gibanaag ni Jesus ang mga hiyas sa iyang Amahan. (Juan 14:9) Ang Bibliya nagtudlo kanato nga ang Diyos nagtinguha sa pagbuhi sa mga patay nga gitipigan diha sa iyang panumdoman. (Job 14:14, 15) Ang iyang Pulong, ang Bibliya, naghatag kanatog makalilipayng paglaom nga mabuhi sa usa ka paraisong yuta ug makita ang pagbanhaw unya sa atong patay nang mga minahal. (Lucas 23:43; Juan 5:28, 29) Nganong dili mosusi ug dugang bahin sa Usa nga makapasig-uli sa kinabuhi ug kon unsay buhaton aron mahuptan ang maong paglaom?
[Hulagway sa panid 23]
“Ang patay nga tawo milingkod ug misugod sa pagsulti, ug iyang gihatag siya ngadto sa iyang inahan”