Kinabuhi ug Ministeryo ni Jesus
Ang Mapahitas-on ug ang Mapaubsanon
TAPOS naghisgot sa maayong mga hiyas ni Juan Bawtista, mibali si Jesus sa iyang pagtagad ngadto sa mapahitas-on, mabalhinong mga tawo sa iyang palibot. “Kining kaliwatana,” siya miingon, “sama sa mga bata nga managlingkod sa mga baligyaanan nga managsinggit ngadto sa ilang kauban sa dula, nga manag-ingon, ‘Gipatokahan bitaw namo kamog plawta, apan wala kamo mosayaw; nagminatay kami, apan wala ninyo hampasa ang inyong kaugalingon tungod sa kasubo.’”
Unsay gipasabot ni Jesus? Siya mibatbat: “Si Juan mianhi nga wala mokaon ni moinom, apan ang mga tawo nag-ingon, ‘Kana siya giyawaan’; ang Anak sa tawo mianhi nga nagakaon ug nagainom, apan ang mga tawo nag-ingon, ‘Tan-awa! Usa ka tawong ulitan ug palahubog, ug higala sa mga maniningil sa buhis ug mga makasasala.’”
Imposibleng mapatagbaw ang mga tawo. Walay butang nga makapahimuot kanila. Si Juan nagkinabuhing simple nga naghikaw sa kaugalingon ingong Nazareo, sa pagsunod sa pahayag sa manulonda nga “siya kinahanglang dili moinom ug bino ug maisog nga ilimnon.” Bisan pa ang mga tawo miingon nga siya giyawaan. Sa laing bahin, nagkinabuhi si Jesus sama sa ubang mga tawo, wala magabatasan sa pagdaginot, ug siya gisumbong nga mapatuyangon.
Pagkalisod nga pahimut-an ang mga tawo! Sila sama sa mga kauban sa dula, diin ang pipila mibalibad sa pagsayaw dihang ang ubang mga bata nagpatokar sa plawta kun nasubo dihang nanagtuaw ang ilang mga kauban. Bisan pa, si Jesus miingon: “Ang kaalam ginamatarong pinaagi sa mga binuhatan niini.” Oo, ang pamatuod—ang mga binuhatan—nagpadayag nga bakak ang mga sumbong batok kang Juan ug Jesus.
Mipadayon si Jesus sa pagsaway sa mga siyudad sa Corazin, Betsaida, ug Capernaum, diin dinhi daghan siyag nahimong gamhanang mga buhat. Kon nahimo pa niya kini sa mga siyudad sa Phoenicia nga Tiro ug Sidon, si Jesus miingon, kining mga siyudara naghinulsol unta nga managsul-ob ug sako ug managlubog sa mga abo. Gitunglo ang Capernaum, nga tingali maoy iyang paulianan sa panahon sa iyang ministeryo, si Jesus miingon: “Maarang-arang pa ang yuta sa Sodoma sa Adlaw sa Paghukom kay kanimo.”
Unsay gipasabot ni Jesus niini? Tingali iyang gipakita nga, sa panahon sa Adlaw sa Paghukom dihang banhawon ang mga mapahitas-on sa Capernaum, mas malisod alang kanila ang pagdawat sa ilang mga sayop ug sa pagdawat kang Kristo kay sa niadtong pagabanhawong karaang mga taga Sodoma ug sa mapaubsanong maghinulsol ug sa pagtuon sa pagkamatarong.
Sunod gihimaya ni Kristo atubangan sa katilingban ang iyang langitnong Amahan. Napukaw siya sa pagbuhat niini tungod kay gitago sa Diyos ang bililhong espirituwal nga mga kamatuoran gikan sa mga maalamon ug sa mga makinaadmanon apan gipadayag kining katingalahang mga butang ngadto sa mga mapaubsanon, sa mga bata, pagaingon pa.
Sa kataposan, gihatag ni Jesus kining madanihong pagdapit: “Umari kamo kanako, kamong tanang nabudlayan ug nabug-atan, ug pagapahulayon ko kamo. Isangon ninyo ang akong yugo diha kaninyo ug pagtuon kamo gikan kanako, kay ako maaghop ug mapaubsanon, ug makakaplag kamog pahulay alang sa inyong mga kalag. Kay masayon ang akong yugo ug magaan ang akong luwan.”
Sa unsang paagi nakatanyag si Jesus ug pahulay? Iyang gihimo kini pinaagi sa pagtaganag kagawasan gikan sa nakapaulipong mga tradisyon nga gipabug-at sa relihiyosong mga lider diha sa mga katawhan, lakip, pananglitan, sa mapig-otong mga reglamento sa pagsunod sa Igpapahulay. Dugang pa, iyang gipakita ang dalan sa kahupayan alang niadtong mibati nga nabug-atan sa pagmando sa politikal nga mga awtoridad ug niadtong nabug-atan sa ilang mga kasal-anan tungod sa pagtulisok sa tanlag. Iyang gipadayag ngadto niining mga sinakit kon sa unsang paagi ang ilang mga kasal-anan mapasaylo ug kon unsaon nila sa pagtagamtam sa bililhong relasyon uban sa Diyos.
Ang masayon nga yugo nga gitanyag ni Jesus mao kanang bug-os nga pagpahinungod sa Diyos, aron makaalagad sa atong may kahangawa, maluloy-on langitnong Amahan. Ug ang magaan nga luwan nga gitanyag ni Jesus alang niadtong moduol kaniya mao kanang pagsunod sa mga kinahanglanon sa Diyos sa kinabuhi, Iyang mga sugo, nga dili gayod mabug-at. Mateo 11:16-30; Lucas 1:15; 7:31-35; 1 Juan 5:3.
◆ Sa unsang paagi ang kaliwatan ni Jesus sama sa mga bata?
◆ Sa unsang paagi nga mas maarang-arang pa ang Sodoma kay sa Capernaum?
◆ Sa unsang paagi nabug-atan ang mga tawo, ug unsang kapahulayan ang gitanyag ni Jesus?