“Nakita Nako ang Ginoo!”

Si Maria Magdalena mihangad sa langit, nga namahid sa iyang luha. Ang iyang minahal nga Ginoo nagbitay sa estaka. Mga alas 12 sa udto kadto panahon sa tingpamulak, pero “mingitngit ang tibuok yuta”! (Lucas 23:44, 45) Iyang gikupo ang iyang sinina ug midutdot siya sa mga babaye duol niya. Imposible nga gipahinabo sa usa ka solar nga eklipse kining tulo ka oras nga kangitngit, kay ang solar nga eklipse dangtan lag pipila ka minutos. Tingali si Maria ug ang uban nga nagtindog duol kang Jesus nakadungog sa tingog sa mga mananap nga sagad madunggan lang sa gabii. Ang pipila ka tawo nga nakakita sa panghitabo “nahadlok pag-ayo ug miingon: ‘Siya gayod ang Anak sa Diyos.’” (Mateo 27:54) Ang mga sumusunod ni Jesus ug ang uban naghunahuna tingali nga ang maong hitabo nagpakita nga si Jehova naguol ug nasuko pag-ayo sa bangis nga pagtratar sa mga tawo sa iyang Anak.

Si Maria Magdalena dili makaako sa pagtan-aw kang Jesus, pero dili pod siya makabiya. (Juan 19:25, 26) Seguradong grabe ang kasakit nga gibati ni Jesus. Ang inahan ni Jesus nagkinahanglan sab ug paghupay ug pagpalig-on.

Agig balos sa tanang nahimo ni Jesus, gusto ni Maria nga himoon ang tanan niyang maarangan. Kaniadto siya miserable ug tinamay, pero gibag-o ni Jesus kanang tanan. Tungod kang Jesus, nakabaton siyag dignidad, ug may katuyoan na ang iyang kinabuhi. Nakabaton sab siyag dakong pagtuo. Sa unsang paagi? Ug unsay atong makat-onan sa iyang pagtuo?

Sa Bibliya, ang estorya ni Maria Magdalena nagsugod sa usa ka gasa. Si Jesus naghatag niyag kagawasan gikan sa makalilisang nga pagkaulipon. Niadtong panahona, kaylap ang impluwensiya sa mga demonyo, ug daghang tawo ang giatake nianang daotang mga espiritu. Ang pipila gisudlan ug gikontrolar pa ganig mga demonyo. Wala ta mahibalo sa epekto sa mga demonyo diha kang Maria Magdalena; ato lang nahibaloan nga siya gisudlag pito ka bangis, sadista nga demonyo. Maayo na lang kay gipalayas silang tanan ni Jesu-Kristo!—Lucas 8:2.

Kay napahigawas na ug nahupayan pag-ayo, bag-o na ang kinabuhi ni Maria. Unsaon niya pagpakita ang iyang pagkamapasalamaton? Nahimo siyang maunongong sumusunod ni Jesus. Milihok sab siya dihang nakita niya nga may panginahanglan. Si Jesus ug ang mga apostoles nagkinahanglag pagkaon, sinina, ug katulgan. Dili sila dato, ug wala silay sekular nga trabaho niadtong panahona. Aron makapokus sila sa pagsangyaw ug pagpanudlo, nagkinahanglan silag materyal nga tabang.

Si Maria ug ang pipila pa ka babaye mitabang sa pagtagana sa maong panginahanglan. Ang mga babaye “nag-alagad kanila pinaagi sa ilang mga kabtangan.” (Lucas 8:1, 3) Ang pipila tingali kanila dato. Ang Bibliya wala mag-ingon kon sila ba naglutog pagkaon, nanglaba sa mga sinina, o naghikay ug mga katulgan diha sa mga baryo. Pero kinabubut-on nilang gisuportahan si Jesus ug ang iyang mga kauban, nga posibleng mga 20 tanan. Ang paghago sa maong mga babaye seguradong nakatabang kang Jesus ug sa iyang mga apostoles sa pagpokus sa buluhatong pagsangyaw. Siyempre, nahibalo si Maria nga dili gyod niya mabayran si Jesus sa tanang nabuhat niini alang kaniya—pero nalipay kaayo siyang mahimo ang iyang maarangan!

Gipakamenos sa daghan karon kadtong mohimog ubos nga trabaho para sa uban. Pero dili ingon niana ang gibati sa Diyos. Imadyina ang iyang kalipay nga makita si Maria nga naghimo sa maarangan niini sa pagsuportar kang Jesus ug sa mga apostoles! Karon, daghan pong matinumanong Kristohanon ang malipayng mohimog ubos nga mga trabaho para sa uban. Usahay ang usa ka praktikal nga tabang o bisan ang mabinationg pulong dakog epekto. Giapresyar kana ni Jehova.—Proverbio 19:17; Hebreohanon 13:16.

Si Maria Magdalena maoy usa sa daghang babaye nga mikuyog kang Jesus ngadto sa Jerusalem para sa Paskuwa sa 33 C.E. (Mateo 27:55, 56) Dihang nabalitaan niya nga si Jesus gidakop ug gihusay panahon sa kagabhion, seguradong nabalaka siya pag-ayo. Ug misamot ka daotan ang balita. Si Gobernador Poncio Pilato, nga nadala sa presyur gikan sa Hudiyong mga lider sa relihiyon ug sa panon nga naimpluwensiyahan nila, nagsentensiya kang Jesus ug sakit nga kamatayon diha sa estaka. Tingali nakita ni Maria ang iyang Agalon, nagkadugo ug luya na, nga naglisod ug guyod sa taas nga estaka diin siya patyon.—Juan 19:6, 12, 15-17.

Sa dapit diin gilansang si Jesus, dihang mingitngit panahon sa kaudtohon, si Maria Magdalena ug ang ubang babaye nagtindog “duol sa estaka sa pagsakit ni Jesus.” (Juan 19:25) Si Maria, nga miunong hangtod sa kataposan, nakakita ug nakadungog nga gisalig ni Jesus ang pag-atiman sa iyang inahan ngadto sa iyang minahal nga apostol, si Juan. Nadungog ni Maria ang pagtuaw ni Jesus sa iyang Amahan. Ug nadungog niya ang kataposang mga pulong nga gilitok ni Jesus una siya mamatay: “Natuman na.” Naguol kaayo siya. Pero bisag patay na si Jesus, dayag nga didto gihapon si Maria. Sa ulahi, nagpabilin siya duol sa bag-ong lubnganan nga maoy gibutangan ni Jose nga taga-Arimatea sa lawas ni Jesus.—Juan 19:30; Mateo 27:45, 46, 57-61.

Ang ehemplo ni Maria nagpahinumdom kon unsay atong mahimo dihang ang atong mga igsoon mag-atubag grabeng kalisdanan. Tingali dili ta makapugong sa trahedya o makawagtang sa kasakit sa mga biktima. Pero, makapakita tag kaluoy ug kaisog. Ang presensiya sa usa ka matinabangong higala dako na kaayog mahimo dihang ang usa anaa sa kalisdanan. Ang maunongong pagtabang nato sa usa ka higala nagpakita sa atong dakong pagtuo ug kini makapahupay pag-ayo kaniya.—Proverbio 17:17.

Dihang napahiluna na ang lawas ni Jesus sa lubnganan, usa si Maria sa mga babaye nga mipalit ug dugang humot nga mga yerba aron ihaplas sa lawas ni Jesus. (Marcos 16:1, 2; Lucas 23:54-56) Dayon mimata siyag sayo human sa adlaw sa Igpapahulay. Imadyina siya nga naglakaw diha sa ngitngit nga kadalanan uban sa pipila ka babaye, nga nagpaingon sa lubnganan ni Jesus. Samtang naglakaw, naghunahuna tingali sila kon unsaon nila pagligid ang bug-at nga bato nga gitabon sa entrada. (Mateo 28:1; Marcos 16:1-3) Pero, nagpadayon gihapon sila. Dayag nga ang ilang pagtuo nagpalihok nila nga himoon ang ilang maarangan ug isalig ang tanan kang Jehova.

Tingali si Maria nakaunag abot sa lubnganan. Nakahunong siya ug nakurat. Ang bato giligid na—ug ang lubnganan wala nay sulod! Milihok dayon si Maria, ug midagan siya aron ibalita kang Pedro ug Juan ang iyang nakita. Imadyina siya nga naghangos samtang nagsulti: “Ilang gikuha ang Ginoo gikan sa lubnganan, ug wala mi mahibalo kon diin nila siya gibutang”! Si Pedro ug Juan nagdalidalig adto sa lubnganan, ug nakita nila nga kini wala gyoy sulod, dayon namauli sila.a—Juan 20:1-10.

Pagbalik ni Maria sa lubnganan, nagpabilin siya didto nga nag-inusara. Tungod kay walay sulod ang lubnganan ug hilom kaayo ang palibot sa sayo nga kabuntagon, wala na siya makapugong sa iyang gibati ug mihilak siya. Milili siya sa lubnganan kay dili gihapon siya makatuo nga wala na ang Ginoo, ug nakurat siya sa iyang nakita. Duha ka anghel ang naglingkod didto! “Nganong naghilak ka?” sila nangutana. Kay naglibog, iyang gisulti kanila ang giingon niya sa mga apostoles: “Ilang gikuha ang akong Ginoo, ug wala ko mahibalo kon diin nila siya gibutang.”—Juan 20:11-13.

Milingi siya, ug dihay tawo nga nagtindog sa iyang luyo. Wala siya makaila niini, busa abi niyag hardinero ni nianang dapita. Ang tawo mabinationg nangutana kaniya: “Babaye, nganong naghilak ka? Kinsay imong gipangita?” Si Maria mitubag: “Senyor, kon imo siyang gikuha, sultihi ko kon diin nimo siya gibutang kay kuhaon nako siya.” (Juan 20:14, 15) Hunahunaa ra ang iyang gisulti. Siya nga usa ka babaye, makahimo kaha sa pag-alsa sa lawas ni Jesu-Kristo, kinsa usa ka kusgan nga lalaki sa wala pa mamatay? Wala na maghunahuna niana si Maria. Ang iya lang gihunahuna mao ang pagbuhat kon unsay iyang mahimo.

Dihang makasinati tag kagul-anan ug kalisdanan nga morag dili nato makaya, masundog ba nato si Maria Magdalena? Kon magpokus ta sa atong mga kaluyahon ug limitasyon, mahimong madaog ta sa kahadlok ug pagduhaduha. Pero kon determinado ta nga buhaton ang tanan natong maarangan ug mosalig sa atong Diyos, posible nga mahimo nato ang labaw pa sa atong gihunahuna. (2 Corinto 12:10; Filipos 4:13) Labaw sa tanan, atong mapalipay si Jehova. Napalipay gyod ni Maria si Jehova, ug gigantihan siya ni Jehova sa talagsaon kaayong paagi.

Ang tawo nga nagtindog atubangan ni Maria dili hardinero. Kanhi siya panday, dayon magtutudlo, ug unya minahal nga Ginoo ni Maria. Pero wala makaila si Maria kaniya, ug mitalikod si Maria. Wala tingali mahunahunai ni Maria ang kamatuoran: si Jesus nabanhaw na ingong gamhanang espiritu. Nagpakita siya kang Maria ingong tawo pero dili sa samang lawas nga iyang gihalad. Sa makapalipayng mga adlaw human sa pagkabanhaw ni Jesus, sagad dili siya mailhan bisan niadtong nakaila kaayo kaniya.—Lucas 24:13-16; Juan 21:4.

Giunsa pagpahibalo ni Jesus kang Maria kon kinsa siya? Gihimo niya kana sa paagi sa iyang pagtawag: “Maria!” Si Maria milingi ug iyang nabungat ang pamilyar nga Hebreohanong pulong nga way duhaduhang kadaghan niya gamita sa pagtawag kang Jesus—“Rabboni!” Ang iyang minahal nga Magtutudlo diay kadto! Puwerte niyang lipaya. Gikuptan niya si Jesus ug dili niya kini gustong buhian.—Juan 20:16.

Si Jesus nahibalo sa gihunahuna ni Maria. “Ayaw kog kupti,” si Jesus miingon. Maimadyin nato nga gisulti kini ni Jesus sa mabinationg paagi, tingali inubanan pag pahiyom. Ug iya kining gipasaligan: “Wala pa ko makasaka sa Amahan.” Dili pa to ang panahon nga mosaka siya sa langit. May buluhaton pa siya sa yuta, ug gusto niya nga motabang si Maria. Siyempre, naminaw pag-ayo si Maria. Si Jesus miingon: “Adtoa ang akong mga igsoon ug ingna sila, ‘Ako mosaka sa akong Amahan ug sa inyong Amahan ug sa akong Diyos ug sa inyong Diyos.’”—Juan 20:17.

Pagkanindot nga asaynment gikan sa iyang Agalon! Si Maria ang unang tinun-an nga nakapribilehiyong makakita kang Jesus human kini mabanhaw, ug karon gihatagan siyag pribilehiyo sa pagsulti sa uban sa maayong balita. Tungod sa iyang kalipay ug kahinam, gipangita niya ang mga tinun-an. Imadyina siya nga naghangos sa pagsulti sa mga pulong nga nagpabilin sa iyang hunahuna ug sa hunahuna sa ubang tinun-an: “Nakita nako ang Ginoo!” Eksayted kaayo siyang nagsulti kanila sa tanang giingon ni Jesus. (Juan 20:18) Ang iyang gisulti nakadugang sa nabalitaan sa mga tinun-an gikan sa ubang babaye nga miadto sa wala nay sulod nga lubnganan ni Jesus.—Luc. 24:1-3, 10.

Unsay reaksiyon sa mga lalaki? Sa primero, nagduda sila. Atong mabasa: “Para nila dili katuohan ang gisulti sa mga babaye, mao nga wala sila motuo.” (Lucas 24:11) Wala silay daotang intensiyon. Nagdako lang gyod sila sa lugar diin ang mga tawo sagad walay pagsalig sa mga babaye. Sumala sa gitudlo sa mga rabbi, ang babaye dili puwedeng motestigos sa korte. Tingali wala maamgohi sa mga apostoles nga naimpluwensiyahan diay sila sa ilang kultura. Pero si Jesus ug ang iyang Amahan walay ingon niana nga pagpihig. Pagkadakong pribilehiyo ang gihatag nila nianang matinumanong babaye!

Seguradong wala ra mahiubos si Maria sa reaksiyon sa mga lalaki. Nahibalo siya nga may pagsalig kaniya ang iyang Agalon, ug igo na kana. Ang tanang sumusunod ni Jesus gihatagan sab ug pribilehiyo nga magdalag mensahe sa uban. Kana nga mensahe gitawag sa Bibliya ug “maayong balita sa Gingharian sa Diyos.” (Lucas 8:1) Wala magsaad si Jesus sa iyang mga sumusunod nga ang tanang tawo motuo kanila o makaapresyar sa ilang buluhaton. (Juan 15:20, 21) Busa maayong hinumdoman sa mga Kristohanon si Maria Magdalena. Bisag wala dayon motuo ang pipila ka tinun-an, wala ni makawala sa iyang kalipay sa pagsulti sa maayong balita bahin sa nabanhawng si Jesus!

Sa ngadtongadto, si Jesus nagpakita sa iyang mga apostoles ug unya sa uban pang sumusunod. Sa usa ka higayon niana, nagpakita siya sa kapig 500 ka tinun-an! (1 Corinto 15:3-8) Seguradong nag-anam ka lig-on ang pagtuo ni Maria sa matag higayon nga nagpakita si Jesus, aktuwal man niya kining nakita o nabalitaan lang. Tingali usa si Maria Magdalena sa mga babaye nga giingon sa Bibliya nga mitambong sa tigom sa Jerusalem sa adlaw sa Pentekostes dihang ang balaang espiritu gibubo diha sa nagtigom nga mga sumusunod ni Jesus.—Buhat 1:14, 15; 2:1-4.

Bisan unsa pa man, daghan tag rason nga makaseguro niini: Nahuptan ni Maria Magdalena ang iyang pagtuo hangtod sa kamatayon. Hinaot nga mao pod nay determinasyon sa matag usa kanato! Masundog nato ang pagtuo ni Maria Magdalena kon kita magpakitag pagkamapasalamaton sa tanang nahimo ni Jesus para kanato ug mapainubsanong mag-alagad sa uban samtang nagsalig sa tabang sa Diyos.