Tahora ang Kaminyoon Ingong Gasa sa Diyos
“Mao nga ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.”—GEN. 2:24.
1. Nganong si Jehova takos nga tahoron?
SI Jehova nga Diyos, ang Tagmugna sa kaminyoon, takos nga pagatahoron. Ingong atong Maglalalang, Soberano, ug langitnong Amahan, siya haom nga gitawag nga Maghahatag sa “matag maayong gasa ug matag hingpit nga regalo.” (Sant. 1:17; Pin. 4:11) Kini maoy pasundayag sa iyang dakong gugma. (1 Juan 4:8) Ang tanan niyang gitudlo, gisugo, ug gihatag kanato maoy para sa atong kaayohan.—Isa. 48:17.
2. Unsang mga instruksiyon ang gihatag ni Jehova sa unang magtiayon?
2 Ang Bibliya nagpahayag nga ang kaminyoon usa sa “maayong” mga gasa sa Diyos. (Ruth 1:9; 2:12) Sa dihang gihimo ni Jehova ang unang kasal, gihatagan niya si Adan ug Eva ug mga instruksiyon aron sila magmalamposon. (Basaha ang Mateo 19:4-6.) Kon ila pang gisunod ang Diyos, matagamtam unta nila ang dumalayong kalipay. Apan, kay ilang gisupak ang sugo sa Diyos, sila nag-antos.—Gen. 3:6-13, 16-19, 23.
3, 4. (a) Unsay nagpakita nga daghan karon ang wala magtahod sa kaminyoon ug kang Jehova nga Diyos? (b) Unsang mga pananglitan ang atong hisgotan niining artikuloha?
3 Sama kang Adan ug Eva, daghang magtiayon karon mohimog mga desisyon nga walay pagtagad sa sugo ni Jehova. Ang pipila supak sa kaminyoon, samtang ang uban nagtuis niini aron ipasibo sa ilang gusto, sama sa pagminyo sa kaparehas nilag sekso. (Roma 1:24-32; 2 Tim. 3:1-5) Wala nila isipa ang kaminyoon ingong gasa sa Diyos, ug kay wala man sila magtahod niana, wala sab sila magtahod sa Maghahatag niana, si Jehova nga Diyos.
4 Usahay, bisan ang pipila ka alagad sa Diyos malimot sa panghunahuna ni Jehova sa kaminyoon. Ang pipila ka magtiayon magbulag o magdiborsiyo nga way Kasulatanhong basehanan. Sa unsang paagi kini malikayan? Sa unsang paagi ang sugo sa Diyos sa Genesis 2:24 makatabang sa mga magtiayon sa pagpalig-on sa ilang kaminyoon? Ug sa unsang paagi kadtong nagplanong magminyo makapangandam alang niini? Atong susihon ang tulo ka malamposong kaminyoon diha sa Bibliya nga nagpakita nga ang pagtahod kang Jehova maoy usa ka hinungdanong yawi sa malungtarong kaminyoon.
Ugmara ang Pagkamaunongon
5, 6. Unsang kahimtang ang lagmit nagsulay kang Zacarias ug Elisabet? Sa unsang paagi gigantihan ang ilang pagkamaunongon?
5 Si Zacarias ug Elisabet nakahimog hustong mga desisyon. Sila nagpilig hamtong-sa-espirituwal nga kapikas. Si Zacarias nagmatinumanon sa iyang mga buluhaton ingong saserdote, ug silang duha nagsunod gayod sa Balaod sa Diyos. Daghan silag rason nga magmapasalamaton. Apan kon nakaadto ka sa ilang balay sa Juda, imong mamatikdan nga may kulang. Wala silay anak. Si Elisabet baog, ug silang duha tigulang na.—Luc. 1:5-7.
6 Sa karaang Israel, dinayeg kaayo ang pagbatog mga anak, ug sagad dagko ang pamilya. (1 Sam. 1:2, 6, 10; Sal. 128:3, 4) Mahimong maluibong diborsiyohan sa usa ka Israelinhon kaniadto ang iyang asawa nga dili makaanak. Apan, si Zacarias miunong kang Elisabet. Wala siya mangitag paagi aron taposon ang ilang kaminyoon, mao sab ang iyang asawa. Bisag nasubo sila nga walay anak, sila matinumanong nag-alagad kang Jehova. Sa milagrosong paagi, sila gigantihan ni Jehova ug anak nga lalaki bisag tigulang na.—Luc. 1:8-14.
7. Unsay laing paagi nga si Elisabet nagpakitag pagkamaunongon sa iyang bana?
7 Si Elisabet nagpakitag talagsaong pagkamaunongon sa laing paagi. Sa natawo ang ilang anak nga si Juan, si Zacarias dili makasulti kay naamang siya tungod sa pagkuwestiyon niya sa manulonda sa Diyos. Apan sa usa ka paagi, napahibalo ni Zacarias ang iyang asawa nga ang manulonda ni Jehova nagsugo kaniya nga ang bata nganlag “Juan.” Gusto sa ilang mga silingan ug paryente nga ang bata nganlan sa ngalan sa iyang amahan. Apan maunongong gisunod ni Elisabet ang direksiyon sa iyang bana. Siya miingon: “Dili gayod! apan paganganlan siyag Juan.”—Luc. 1:59-63.
8, 9. (a) Sa unsang paagi ang pagkamaunongon makapalig-on sa kaminyoon? (b) Unsa ang pipila ka paagi nga ikapakita sa bana ug asawa ang pagkamaunongon?
8 Sama kang Zacarias ug Elisabet, ang mga magtiayon karon nagsagubang ug mga kapakyasan ug problema. Kon dili magmaunongon, ang panagtiayon dili magdugay. Ang pagbirigbirig, pornograpiya, pagpanapaw, ug ubang kapeligrohan sa kaminyoon makawagtang sa pagsalig sa magtiayon. Ug kon walay pagsalig, ang gugma mabugnaw. Ang pagkamaunongon samag koral sa balay nga manalipod sa pamilya batok sa mga daotan ug kapeligrohan. Busa, kon magmaunongon ang bana ug asawa, ang ilang panagtiayon molig-on ug sila makapahayag sa ilang mga hunahuna ug pagbati sa usag usa—sa ingon molalom ang ilang gugma. Oo, hinungdanon gayod ang pagkamaunongon.
9 Si Jehova miingon kang Adan: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa.” (Gen. 2:24) Unsay ipasabot niana? Kinahanglang menosan na ang pagpakig-uban sa mga higala ug paryente. Ang ilang kapikas mao na ang una nilang hatagag panahon ug atensiyon. Ang mga higala ug mga paryente dili na maoy ilang palabihon nga mapasagdan na ang kapikas; ni tugotan nga ang ilang mga ginikanan mangilabot sa ilang mga desisyon ug di-pagsinabtanay. Ang magtiayon kinahanglang mag-unongay sa usag usa. Kana ang sugo sa Diyos.
10. Unsay makatabang sa mga magtiayon aron maugmad ang pagkamaunongon?
10 Bisan sa panimalay nga may lainlaing relihiyon, may mga benepisyo ang pagkamaunongon. Usa ka sister nga may di-magtutuong bana miingon: “Mapasalamaton kaayo ko kang Jehova nga gitudloan ko niya nga magpasakop ug magpakitag lalom nga pagtahod sa akong bana. Ang resulta niana mao ang 47 ka tuig nga panagtiayon nga may gugma ug pagtahod sa usag-usa.” (1 Cor. 7:10, 11; 1 Ped. 3:1, 2) Busa paningkamoti nga ang imong kapikas dili magduhaduha sa imong gugma kaniya. Pinaagi sa pulong ug buhat, ipakita nga siya ang labing importante kanimo. Kutob sa mahimo, ayaw tugoti si bisan kinsa o ang bisan unsa nga makapabulag kaninyo. (Basaha ang Proverbio 5:15-20.) Si Ron ug Jeannette, usa ka malipayong magtiayon sa kapig 35 ka tuig, nag-ingon, “Tungod sa among pagkamaunongon sa Diyos, kami adunay malipayon ug malamposong kaminyoon.”
Panaghiusa Makapalig-on sa Kaminyoon
11, 12. Sa unsang paagi si Aquila ug Prisca nagtinabangay sa (a) balay, (b) trabahoan, ug (c) ministeryo?
11 Sa dihang naghisgot si apostol Pablo sa iyang mga higala nga si Aquila ug Prisca, ang ngalan nilang duha kanunayng nag-uban. Kining nagkausa nga magtiayon maoy maayong ehemplo sa gipasabot sa Diyos nga ang bana ug asawa mahimong “usa ka unod.” (Gen. 2:24) Kauban sila pirme sa balay, trabahoan, ug sa ministeryo. Pananglitan, sa unang pag-abot ni Pablo sa Corinto, giimbitar siya ni Aquila ug Prisca nga moestar sa ilang balay, nga nahimong panukaran sa iyang mga kalihokan sulod sa usa ka yugto. Sa ulahi, sa Efeso, gipagamit nila ang ilang balay ingong tigomanan sa kongregasyon ug nagtambayayongay sa pagtabang sa mga bag-ohan, sama kang Apolos aron mouswag sa espirituwal. (Buh. 18:2, 18-26) Dayon, kining masibotong magtiayon miadto sa Roma, diin gipagamit na usab nila ang ilang balay alang sa panagkatigom. Sa ulahi sila namalik sa Efeso, nga nagpalig-on sa mga igsoon.—Roma 16:3-5.
12 May panahon nga si Aquila ug Prisca nanggamag tolda uban ni Pablo. Atong makita na usab nga ang magtiayon nagtinabangay, wala magkompetensiyahay o mag-away. (Buh. 18:3) Tino nga ang ilang pag-ubanay sa Kristohanong mga buluhaton nakatabang kanila nga mahuptan ang lig-on ug malipayong kaminyoon. Bisag sa Corinto, Efeso, o Roma, ilado sila nga “mga isigkamagbubuhat diha kang Kristo Jesus.” (Roma 16:3) Sila nagtinabangay sa pagpalambo sa buluhaton sa Gingharian bisan diin sila nag-alagad.
13, 14. (a) Unsang mga kahimtang ang makadaot sa panaghiusa sa magtiayon? (b) Unsay mahimo sa magtiayon aron mapalig-on ang ilang relasyon ingong “usa ka unod”?
13 Sa pagkatinuod, ang pagbatog samang mga tumong ug pag-ubanay sa mga kalihokan makapalig-on sa kaminyoon. (Eccl. 4:9, 10) Ikasubo, daghang magtiayon karon ang dili kanunayng magkauban. Sila naggugol ug daghang oras sa ilang tagsatagsa ka trabaho. Ang uban magsigeg biyahe tungod sa ilang trabaho o manarbaho sa laing nasod aron makasuportar sa pamilya. Bisan diha sa balay, ang pipila ka magtiayon dili magkauban tungod sa oras nga ilang gigugol sa TV, kalingawan, esports, video game, o Internet. Kana ba ang inyong kahimtang? Kon mao, mausab ba ninyo ang inyong kahimtang aron magkauban mo kanunay? Unsa kaha kon mag-uban mo sa mga buluhaton sa balay sama sa pagluto, paghugas, o paglimpiyo? Mahimo bang mag-uban mo sa pag-atiman sa inyong mga anak o sa tigulang ninyong mga ginikanan?
14 Labaw sa tanan, angay nga regular mong mag-uban sa espirituwal nga mga kalihokan. Ang paghisgot sa inadlawng teksto ug ang pamilyahanong pagsimba maoy maayong kahigayonan nga magkahiusa ang panghunahuna ug tumong sa inyong pamilya. Angay usab nga mag-uban mo sa ministeryo. Kon mahimo, sulayi nga magdungan mog payunir, bisag usa ka bulan o usa ka tuig. (Basaha ang 1 Corinto 15:58.) Usa ka sister nga nagpayunir uban sa iyang bana miingon: “Ang ministeryo maoy usa sa mga paagi nga kami magkauban ug magkaestoryahay. Kay pareho man mig tumong nga mao ang pagtabang sa uban sa espirituwal, akong gibati nga nag-teamwork mi. Ako mas nasuod kaniya dili lang ingong akong bana kondili suod usab nga higala.” Samtang mag-uban mo sa mapuslanong mga buluhaton, inanay nga magkauyon ang inyong mga interes, prioridad, ug mga batasan hangtod, sama kang Aquila ug Prisca, kamo maghunahuna, mobati, ug molihok ingong “usa ka unod.”
Unaha ang Diyos sa Inyong Kaminyoon
15. Unsa ang yawi sa malamposong kaminyoon? Isaysay.
15 Si Jesus nahibalo nga importante nga unahon ang Diyos diha sa kaminyoon. Siya nakakita sa dihang gihimo ni Jehova ang unang kasal. Iyang nakita nga nagmalipayon si Adan ug Eva samtang sila nagsunod sa sugo sa Diyos, ug nakita niya mismo ang kadaot nga miresulta sa dihang ilang gilapas kana. Busa sa dihang nagtudlo si Jesus sa uban, iyang gipahayag ang sugo sa iyang Amahan nga anaa sa Genesis 2:24. Siya usab midugang: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:6) Busa, ang lalom nga pagtahod kang Jehova usa gihapon ka yawi sa malipayon ug malamposong kaminyoon. Niining bahina, ang tawhanong ginikanan ni Jesus nga si Jose ug Maria maoy talagsaong ehemplo.
16. Unsay nagpakita nga si Jose ug Maria mahunahunaon sa espirituwalidad sa ilang pamilya?
16 Si Jose maluloton ug matinahoron kang Maria. Sa dihang nasayran niya nga mabdos si Maria, dili niya buot nga pakaulawan siya, bisan sa wala pa ipatin-aw kaniya sa manulonda sa Diyos ang nahitabo kang Maria. (Mat. 1:18-20) Isip magtiayon, sila nagsunod sa sugo ni Cesar ug nagtuman sa Moisesnong Balaod. (Luc. 2:1-5, 21, 22) Ug bisan mga lalaki lang ang gisugo nga motambong sa dagkong pista sa Jerusalem, ang tibuok banay ni Jose ug Maria tigtambongan matag tuig. (Deut. 16:16; Luc. 2:41) Niini ug sa ubang paagi, kining diyosnong magtiayon naningkamot sa pagpahimuot kang Jehova ug nagpakitag lalom nga pagtahod sa espirituwal nga mga butang. Dili ikatingala nga sila ang gipili ni Jehova sa pag-atiman sa iyang Anak dinhi sa yuta.
17, 18. (a) Sa unsang mga paagi ikapakita sa magtiayon nga giuna nila ang Diyos diha sa ilang pamilya? (b) Unsay kaayohan niini?
17 Giuna ba ninyo ang Diyos diha sa inyong pamilya? Pananglitan, sa paghimog importanteng mga desisyon, mosusi ba una mo sa mga prinsipyo sa Bibliya, moampo, ug unya magpatambag sa usa ka hamtong nga igsoon? O sulbaron ba lamang ninyo ang inyong problema base sa inyong gibati, o nianang sa inyong pamilya ug mga higala? Naningkamot ba mo sa pagpadapat sa daghang sugyot sa matinumanong ulipon bahin sa kaminyoon ug pamilyahanong kinabuhi? O nagsunod ba lamang mo sa mga kostumbre o popular nga mga tambag? Kamo ba regular nga nag-uban sa pag-ampo ug pagtuon, nagbatog espirituwal nga mga tumong, ug naghisgot sa mga prioridad sa inyong pamilya?
18 Bahin sa ilang 50 ka tuig nga malipayong panagtiayon, si Ray miingon, “Wala pay problema nga wala namo masulbad, kay giisip namo kanunay si Jehova ingong bahin sa among ‘tulo ka bakukon nga pisi.’” (Basaha ang Ecclesiastes 4:12.) Miuyon niana si Danny ug Trina. Sila miingon: “Samtang nag-uban mi sa pag-alagad sa Diyos, mas nalig-on ang among kaminyoon.” Sila malipayon sa ilang kaminyoon sa kapig 34 na ka tuig. Kon kanunay ninyong unahon si Jehova diha sa inyong kaminyoon, siya motabang kaninyo nga molampos ug dagayang magpanalangin kaninyo.—Sal. 127:1.
Padayong Tahora ang Gasa sa Diyos
19. Nganong ang Diyos naghatag sa gasa sa kaminyoon?
19 Daghan karon ang naghunahuna lamang sa kaugalingong kalipay. Apan lahi ang panghunahuna sa mga alagad ni Jehova. Sila nahibalo nga gihatag sa Diyos ang gasa sa kaminyoon alang sa katumanan sa iyang katuyoan. (Gen. 1:26-28) Kon gitahod pa ni Adan ug Eva ang maong gasa, ang tibuok yuta mahimo untang paraiso nga puno sa malipayon ug matarong nga mga alagad sa Diyos.
20, 21. (a) Nganong atong isipon nga sagrado ang kaminyoon? (b) Unsang gasa ang atong hisgotan sunod semana?
20 Labaw sa tanan, giisip sa mga alagad sa Diyos ang kaminyoon ingong kahigayonan sa paghimaya kang Jehova. (Basaha ang 1 Corinto 10:31.) Ingon sa atong nasabtan, ang pagkamaunongon, panaghiusa, ug pag-una sa Diyos diha sa kaminyoon makapahimuot kang Jehova ug makapalig-on sa kaminyoon. Busa kita man nangandam, nagpalig-on, o naningkamot sa pagsalbar sa atong kaminyoon, kinahanglan una natong isipon nga ang kaminyoon maoy gasa sa Diyos ug sagrado. Ang paghinumdom niana magtukmod kanato nga ipasukad sa Pulong sa Diyos ang atong mga desisyon kutob sa atong maarangan. Sa ingon niana, kita nagtahod dili lang sa gasa sa kaminyoon kondili sa Maghahatag usab niana, si Jehova nga Diyos.
21 Siyempre, ang kaminyoon dili ang bugtong gasa nga gihatag ni Jehova; ni kini lamang ang maghatag ug kalipay sa kinabuhi. Sa sunod artikulo, atong hisgotan ang laing bililhong gasa sa Diyos—ang pagkatagsaanon.
Unsay Imong Tubag?
• Unsay epekto sa pagkamaunongon diha sa magtiayon?
• Nganong makapalig-on sa kaminyoon ang pagbuhat nga magkauban?
• Sa unsang mga paagi ikapakita sa mga magtiayon nga ilang giuna ang Diyos?
• Sa unsang paagi ikapakita nato ang pagtahod kang Jehova, ang Tagmugna sa kaminyoon?
[Mga hulagway sa panid 15]
Ang pagbuhat nga magkauban makapahiusa sa magtiayon