Gituman Nila ang Kabubut-on ni Jehova

Usa ka Samaritano Napamatud-an nga Maayong Silingan

SA ADLAW ni Jesus, ang tatawng kayugot naglungtad tali sa mga Hudiyo ug mga Hentil. Miabot ang panahon, ang Hudiyohanong Mishnah naglakip na ngani sa balaod nga nagdili sa Israelinhong mga babaye sa pagpanabang sa mga dili-Hudiyo, tungod kay makabulig lamang kini sa pagpatungha ug laing Hentil nganhi sa kalibotan.​—Abodah Zarah 2:1.

Ang mga Samaritano mas suod nga nalangkit sa mga Hudiyo kay sa mga Hentil, sa relihiyoso ug rasanhong paagi. Apan, sila usab gilantaw ingong mga sinalikway. “Ang mga Judio wala may pagpakiglabot sa mga Samaritano,” misulat si apostol Juan. (Juan 4:9) Sa pagkatinuod, ang Talmud nagtudlo nga “ang usa ka pirasong tinapay nga hinatag sa usa ka Samaritano mas hugaw pa kay sa karne sa baboy.” Ang ubang mga Hudiyo naggamit pa ngani sa terminong “Samaritano” ingong ekspresyon sa pagtamay ug pagsaway.​—Juan 8:48.

Tungod niining kahimtanga, ang mga pulong ni Jesus ngadto sa tawo nga sinati sa Hudiyohanong balaod matulon-anon kaayo. Ang tawo miduol kang Jesus ug nangutana: “Magtutudlo, pinaagig pagbuhat sa unsa nga mapanunod ko ang kinabuhing walay-kataposan?” Sa pagtubag, gidala ni Jesus ang iyang pagtagad sa Mosaikong Balaod, nga nagsugo sa ‘paghigugma kang Jehova sa tibuok mong kasingkasing, kalag, kusog, ug kaisipan,’ ug sa ‘paghigugma sa imong silingan ingon sa imong kaugalingon.’ Dayon gisukna sa abogado si Jesus: “Kinsa sa pagkatinuod ang akong silingan?” (Lucas 10:25-29; Levitico 19:18; Deuteronomio 6:5) Sumala sa mga Pariseo, ang terminong “silingan” mapadapat lamang niadtong nagsunod sa Hudiyohanong mga tradisyon​—dili gayod ngadto sa mga Hentil o mga Samaritano. Kon kining masukitsukitong abogado naghunahuna nga paluyohan ni Jesus ang maong panglantaw, siya sa dili madugay matingala.

Usa ka Maluluy-ong Samaritano

Gitubag ni Jesus ang pangutana sa tawo pinaagi sa pag-asoy ug usa ka sambingay.a “Dihay usa ka tawo,” siya miingon, “nga milugsong gikan sa Jerusalem ngadto sa Jerico.” Ang kalay-on tali sa Jerusalem ug Jerico maoy halos 23 kilometros. Ang dalan nga nagdugtong niining duha ka siyudad adunay likoon kaayong mga kurbada ug tag-as nga mga bato, nga nagpasayon sa mga kawatan sa pagtago, pag-atake, ug pag-ikyas. Ingon sa nahitabo, ang biyahedor sa sambingay ni Jesus “nahulog sa mga tulisan, nga naghukas kaniya ug nagbun-og kaniya, ug namahawa, nga nagbiya kaniyang himalatyon.”​—Lucas 10:30.

“Naatol,” si Jesus nagpadayon, “nga may usa ka saserdote nga milugsong niana nga dalan, apan, dihang iyang nakita siya, siya miagi sa pikas daplin. Sa susama, usa ka Levita usab, sa pag-abot niya sa maong dapit ug nakakita kaniya, miagi sa pikas daplin.” (Lucas 10:31, 32) Ang mga saserdote ug mga Levita maoy mga magtutudlo sa Balaod​—lakip sa balaod bahin sa gugma sa silingan. (Levitico 10:8-​11; Deuteronomio 33:1, 10) Sa pagkatinuod, labaw kay ni bisan kinsa sila angay gayod untang matukmod sa pagtabang sa nabun-og nga biyahedor.

Si Jesus mipadayon: “Dihay usa ka Samaritano nga nagapanaw diha sa dalan nga nahiabot nganha kaniya.” Ang paghisgot sa usa ka Samaritano sa walay duhaduha nagpadako sa kamausisahon sa abogado. Uyonan ba ni Jesus ang negatibong panglantaw niining rasaha? Sa kasukwahi, sa pagkakita sa makaluluoyng biyahedor, ang Samaritano “natukmod sa kaluoy.” Si Jesus miingon: “Busa iyang giduol siya ug gibugkosan ang iyang mga samad, nga nagabubo ug lana ug bino diha niini. Unya iyang gisakay siya sa iyang kaugalingong mananap ug gidala siya ngadto sa usa ka balay-abotanan ug nag-atiman kaniya.b Ug sa sunod adlaw siya nagkuhag duha ka denario, mihatag niini sa magbalantay sa balay-abotanan, ug miingon, ‘Atimana siya, ug bisan unsay imong magasto gawas niini, akong bayran kini sa dihang ako mobalik na dinhi.’”​—Lucas 10:33-​35.

Gisukna karon ni Jesus ang nagpakisayod kaniya: “Kinsa niining tulo sa imong hunahuna ang naghimo sa iyang kaugalingon nga silingan sa maong tawo nga nahulog sa mga tulisan?” Nasayod ang abogado sa tubag, apan daw nagpanuko siya sa pag-ingong “ang Samaritano.” Hinuon, siya yanong mitubag: “Ang usa nga milihok sa pagkamaluluy-on ngadto kaniya.” Dayon si Jesus miingon: ‘Lakaw ug buhata ang ingon.’—Lucas 10:36, 37.

Leksiyon Alang Kanato

Ang tawo nga misukna kang Jesus nagbuhat niadto sa paningkamot nga ‘pamatud-an ang iyang kaugalingon nga matarong.’ (Lucas 10:29) Tingali naghunahuna siya nga dayegon ni Jesus ang iyang makuting pagsunod sa Mosaikong Balaod. Apan kining hambogirong indibiduwal kinahanglang makakat-on sa kamatuoran sa proverbio sa Bibliya: “Ang tagsatagsa ka dalan sa tawo matarong sa iyang kaugalingong mga mata, apan si Jehova nagatimbang sa mga kasingkasing.”​—Proverbio 21:2.

Gipakita sa sambingay ni Jesus nga ang tinuod nga matul-id nga tawo mao ang usa kinsa dili lamang nagasunod sa mga balaod sa Diyos kondili usab nagasundog sa iyang mga hiyas. (Efeso 5:1) Pananglitan, ang Bibliya nag-ingon kanato nga “ang Diyos dili mapihigon.” (Buhat 10:34) Gisundog ba nato ang Diyos niining bahina? Ang talagsaong sambingay ni Jesus nagpakita nga ang atong pagkasilingan kinahanglang mobuntog sa nasodnon, kultural, ug relihiyosong mga babag. Sa pagkatinuod, ang mga Kristohanon gibaoran nga ‘buhaton ang maayo ngadto sa tanan’​—dili lamang ngadto sa mga tawo sa samang hut-ong sa katilingban, rasa, o nasod ug dili lamang ngadto sa kaubang mga magtutuo.​—Galacia 6:10.

Ang mga Saksi ni Jehova naningkamot sa pagsunod niining pahimangnoa sa Kasulatan. Pananglitan, sa dihang mohampak ang kinaiyanhong mga katalagman, ilang ipaabot ang makitawhanong hinabang ngadto sa kaubang mga magtutuo maingon man ngadto sa mga dili-Saksi.c Dugang pa, tingob silang naggahin ug kapin sa usa ka bilyong oras matag tuig nga nagtabang sa mga tawo nga makadangat sa mas maayong kahibalo sa Bibliya. Naningkamot sila sa pag-abot sa tanan dala ang mensahe sa Gingharian, kay ang kabubut-on sa Diyos mao nga “ang tanang matang sa mga tawo maluwas ug makadangat sa tukmang kahibalo sa kamatuoran.”​—1 Timoteo 2:4; Buhat 10:35.

[Mga footnote]