Ang Adlaw nga Pagahandomon

“Gisulti ko kining mga butanga kaninyo aron nga pinaagi kanako kamo makabatog kalinaw. Sa kalibotan kamo adunay kasakitan, apan magmaisogon! Gidaog ko ang kalibotan.”​—JUAN 16:33.

 1, 2. Unsang usa ka adlaw sa kasaysayan ang malahi sa tanan ubang adlaw, ug ngano?

ANG kalibotan karon daghag ikasulti mahitungod sa kalinaw. Pagkatapos sa Gubat sa Kalibotan II, ang kalinaw gilangkit sa V-E Day ug sa V-J Day.a Matag tuig, ang Pasko magpahunahuna sa mga tawo mahitungod sa ‘pakigdait sa yuta.’ (Lucas 2:14) Apan dunay usa ka adlaw sa tibuok kasaysayan sa tawo nga labaw sa tanang ubang adlaw. Kini ang adlaw nga si Jesu-Kristo misulti sa mga pulong nga gikutlo sa itaas. Sa duha ka milyon ug labaw pang mga adlaw nga ang katawhan naglungtad dinhi sa yuta, kini ang usa ka adlaw nga bug-os nag-usab sa dalan sa tawo alang sa iyang walay-kataposang kaayohan.

² Kadtong hinungdanon kaayong adlaw mao ang Nisan 14 sa Hudiyong kalendaryo. Sa tuig 33 sa atong Komung Panahon, ang Nisan 14 nagsugod sa pagsalop sa adlaw sa Abril 1. Atong hatagan ug pagtagad ang mga panghitabo niadtong makahimog kasaysayan nga adlaw.

Nisan 14!

 3. Giunsa paggamit ni Jesus ang maong kataposang mga takna?

³ Sa pagtikyop sa kagabhion, misubang ang nindot takdol nga bulan ingong pahinumdom nga si Jehova maoy magatino sa mga panahon ug mga yugto sa panahon. (Buhat 1:7) Ug unsay nahitabo didto sa itaas nga lawak diin si Jesus ug iyang 12 ka apostoles nagtigom aron saulogon ang tinuig nga Paskuwa sa mga Hudiyo? Samtang nangandam si Jesus nga ‘mopahawa niining kalibotan aron moadto sa Amahan, siya nagpakita ug gugma alang sa mga iya hangtod sa kataposan.’ (Juan 13:1) Giunsa niya pagbuhat kadto? Pinaagi sa binaba ug sa panig-ingnan, si Jesus mipadayon sa pagsilsil diha sa iyang mga tinun-an sa mga hiyas nga motabang nila sa pagdaog sa kalibotan.

Pagsul-ob sa Pagpaubos ug Gugma

 4. (a) Giunsa pagpasundayag ni Jesus ngadto sa iyang mga tinun-an ang usa ka paninugdang hiyas? (b) Sa unsang paagi nahibaloan nato nga si Pedro nakakat-on sa kahinungdanon sa pagpaubos?

⁴ Kinahanglang wagtangon pa sa mga apostoles ang usa ka sukod sa ambisyosong pagkasinahan ug garbo. Mao nga si Jesus nagbakos sa tuwalya ug naghugas sa ilang mga tiil. Kadto dili usa ka pasundayag sa pagpulopaubos, sama sa ginahimo didto sa Roma sa papa sa Kakristiyanohan matag tuig. Dili, dili gayod! Ang matuod nga pagpaubos maoy ang pagtugyan sa kaugalingon nga nagsumikad sa ‘pagpaubos sa hunahuna nga nagaisip sa uban nga labaw.’ (Filipos 2:2-5) Sa sinugdan, si Pedro wala makasabot sa punto, nga mibalibad nga si Jesus maghugas sa iyang mga tiil. Sa dihang gitul-id, iyang gihangyo si Jesus sa paghugas sa tibuok niyang lawas. (Juan 13:1-10) Bisan pa niana, si Pedro nakakat-on ug leksiyon. Katuigan sa ulahi, siya nagtambag na sa uban sa tukmang paagi. (1 Pedro 3:8, 9; 5:5) Pagkahinungdanon nga kitang tanan karon magpaulipon alang kang Kristo nga mapainubsanon!​—Tan-awa usab ang Proverbio 22:4; Mateo 23:8-12.

 5. Unsang sugo ni Jesus nagpakita sa kahinungdanon sa lain pang paninugdang hiyas?

⁵ Usa sa 12 wala makabatog kaayohan sa tambag ni Jesus. Kadto mao si Judas Iskariote. Samtang nagpadayon ang pagkaon sa Paskuwa, si Jesus naguol diha sa espiritu, nagpaila kang Judas ingon nga iyang magbubudhi, ug nagpagawas niya. Human lang niadto nga giingnan ni Jesus ang iyang 11 ka matinumanong tinun-an: “Ako nagahatag kaninyo ug usa ka bag-ong sugo, nga kamo maghigugmaay sa usag usa; maingon nga ako nahigugma kaninyo, kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Kini sa pagkamatuod usa ka bag-ong sugo, sumala sa gihulagway sa kinalabwang panig-ingnan ni Jesus mismo! Samtang nagsingabot ang takna sa iyang haladnong kamatayon, gipasundayag ni Jesus ang talagsaong gugma. Gigamit niya ang matag bililhong minuto sa pagtudlo ug paglig-on niadtong mga tinun-an. Sa ulahi, gipasiugda niya ang kahinungdanon sa gugma, nga miingon: “Kini ang akong sugo, nga kamo maghigugma sa usag usa maingon nga ako naghigugma kaninyo. Walay mausa ang may gugma nga labaw pa niini, nga ang usa ka tawo magatugyan sa iyang kalag alang sa iyang mga higala.”​—Juan 15:12, 13.

“Ang Dalan ug ang Kamatuoran ug ang Kinabuhi”

 6. Unsang tumong ang gipadayag ni Jesus atubangan sa iyang suod nga mga tinun-an?

⁶ Giingnan ni Jesus ang matinumanon nga 11: “Ayaw kamo kaguol sa inyong mga kasingkasing. Tumoo kamo sa Diyos, tumoo usab kamo kanako. Sa balay sa akong Amahan adunay daghang puluy-anan. Kay kon wala pa, ako unta magaingon kaninyo, ako moadto aron sa pag-andam ug usa ka dapit alang kaninyo.” (Juan 14:1, 2) Kining dapita maoy didto “sa gingharian sa mga langit.” (Mateo 7:21) Gipahayag ni Jesus sa unsang paagi kining suod nga pundok sa maunongong mga tinun-an makakab-ot sa ilang tumong. Siya miingon: “Ako ang dalan ug ang kamatuoran ug ang kinabuhi. Walay makaadto sa Amahan gawas nga pinaagi kanako.” (Juan 14:6) Kini mapadapat usab niadtong mga tawo nga makabaton ug kinabuhing walay kataposan sa yuta.​—Pinadayag 7:9, 10; 21:1-4.

 7-9. Nganong gibatbat ni Jesus nga siya mao “ang dalan ug ang kamatuoran ug ang kinabuhi”?

⁷ Si Jesus mao “ang dalan.” Ang bugtong lamang duolanan sa Diyos diha sa pag-ampo maoy pinaagi kang Jesu-Kristo. Si Jesus mismo nagpasalig sa iyang mga tinun-an nga igahatag sa Amahan ang bisan unsa nga ilang pangayoon diha sa ngalan ni Jesus. (Juan 15:16) Ang mga pag-ampo nga itumong ngadto sa mga larawan o relihiyosong “mga santos” o kompleto sa mga Ave Maria ug mga pagsumaysumay​—kini dili dunggon ug dawaton sa Amahan. (Mateo 6:5-8) Dugang pa, mahitungod kang Jesus, atong mabasa sa Buhat 4:12: “Walay laing ngalan sa silong sa langit ang gikahatag na taliwala sa mga tawo nga pinaagi niana kita maluwas.”

⁸ Si Jesus mao “ang kamatuoran.” Si apostol Juan mipahayag mahitungod kaniya: “Ang Pulong nahimong unod ug mipuyo sa atong taliwala, ug atong nakita ang iyang himaya, usa ka himaya nga iya sa bugtong-inanak nga anak gikan sa usa ka amahan; ug siya puno sa dili-takos nga kalulot ug kamatuoran.” (Juan 1:14) Si Jesus nahimong kamatuoran sa ginatos ka tagna diha sa Hebreohanong Kasulatan pinaagi sa pagtuman kanila. (2 Corinto 1:20; Pinadayag 19:10) Iyang gipahibalo ang kamatuoran sa pagpakigsulti ngadto sa iyang mga tinun-an ug sa mga panon nga nagpatalinghog, sa iyang pakig-ergo sa salingkapawng klero, ug pinaagi sa iyang panig-ingnan sa pagkinabuhi.

⁹ Si Jesus mao “ang kinabuhi.” Ingong Anak sa Diyos, si Jesus miingon: “Siya nga motuo sa Anak adunay kinabuhing walay kataposan; siya nga dili masinugtanon sa Anak dili makakitag kinabuhi, apan ang kapungot sa Diyos magapabilin diha kaniya.” (Juan 3:36) Ang pagtuo nga gibutang diha sa halad ni Jesus mosangpot sa kinabuhing walay kataposan​—sa dili-mamatay nga kinabuhi sa langit alang sa “gamayng panon” sa dinihogang mga Kristohanon ug sa kinabuhing walay kataposan sa usa ka paraisong yuta alang sa dakong panon sa “ubang mga karnero.”​—Lucas 12:32; 23:43; Juan 10:16.

Pag-antos sa Paglutos

10. Nganong kinahanglang atong ‘dag-on ang kalibotan,’ ug unsang pagpalig-on ang gihatag ni Jesus maylabot niini?

¹⁰ Kadtong nagalaom nga mopuyo sa bag-ong sistema ni Jehova kinahanglang makigbisog sa usa ka kalibotang “nahiluna diha sa gahom sa usang daotan,” si Satanas nga Yawa. (1 Juan 5:19) Nan, pagkamakapalig-on ang mga pulong ni Jesus sa Juan 15:17-19! Siya nagpahayag: “Kining mga butanga akong ginasugo kaninyo, nga kamo maghigugma sa usag usa. Kon ang kalibotan nagadumot man kaninyo, hibaloi nga kini nagdumot na kanako sa wala pa kini magdumot kaninyo. Kon kamo bahin sa kalibotan, ang kalibotan mahigugma sa mga iya. Karon tungod kay kamo dili bahin sa kalibotan, apan gipili ko kamo gikan sa kalibotan, tungod niini ang kalibotan nagadumot kaninyo.” Ang tinuod nga mga Kristohanon gidumtan hangtod ning tuig 1992, ug nagakalipay kitag dako sa maayong mga panig-ingnan niadtong si kinsa nagapadayon sa pagbarog nga lig-on, nga mapaubsanong nakakaplag ug kusog ubos sa gamhanang kamot sa Diyos! (1 Pedro 5:6-10) Kitang tanan makaantos sa mga pagsulay pinaagi sa pagtuo kang Jesus, kinsa nagtapos sa iyang pagpahayag pinaagi niining makapalipay nga mga pulong: “Sa kalibotan kamo may kasakitan, apan magmaisogon! gidaog ko ang kalibotan.”​—Juan 16:33.

Pagpailaila sa Usa ka Bag-ong Tugon

11. Unsay gitagna ni Jeremias mahitungod sa usa ka bag-ong tugon?

¹¹ Niadtong gabhiona, tapos sa pagsaulog sa Paskuwa, si Jesus mihisgot mahitungod sa usa ka bag-ong tugon. Gitagna kini ni propetang Jeremias kasiglohan nga abante, nga miingon: “‘Tan-awa! Ang mga adlaw moabot,’ nagaingon si Jehova, ‘ug ako magabuhat ug usa ka pakigtugon uban sa balay sa Israel ug uban sa balay ni Juda . . . Ibutang ko ang akong kasugoan sa ilang kahiladman, ug isulat ko kini diha sa ilang kasingkasing. Ug ako mamahimong ilang Diyos, ug sila mismo mahimong akong katawhan. . . . Akong pasayloon ang ilang kasal-anan, ug ang ilang sala dili ko na pagahinumdoman.’” (Jeremias 31:31-34) Sa Nisan 14, 33 K.P., ang halad nga magapalig-on niining bag-ong tugon pagahimoon!

12. Giunsa ni Jesus pagbuhat ang bag-ong tugon, ug unsay nahimo niini?

¹² Gisultihan ni Jesus ang matinumanon nga 11 nga siya dakog tinguha sa pagkaon sa maong Paskuwa uban kanila. Dayon mikuha siyag tinapay, nagpasalamat, nagputolputol niana, ug mihatag niini kanila, nga miingon: “Kini nagkahulogan sa akong lawas nga akong igahatag alang kaninyo. Ipadayon kini sa pagbuhat sa paghandom kanako.” Sa samang paagi, iyang gipasa ang kopa sa mapulang bino ngadto kanila, nga miingon: “Kining kopa nagkahulogan sa bag-ong tugon sa gahom sa akong dugo, nga igabubo alang kaninyo.” (Lucas 22:15, 19, 20) Ang bag-ong tugon gipalihok pinaagi sa “mahal nga dugo” ni Jesus, nga labaw pag bili kay sa dugo sa hayop nga giwisikwisik sa pagpalig-on sa tugon sa Kasugoan sa Israel! (1 Pedro 1:19; Hebreohanon 9:13, 14) Kadtong gipasulod sa bag-ong tugon nagapahimulos ug bug-os nga kapasayloan sa mga sala. Busa, sila mahimong takos nga mahiapil sa 144,000, kinsa magadawat ug walay-kataposang panulondon ingong espirituwal nga Israel.​—Galacia 6:16; Hebreohanon 9:15-18; 13:20; Pinadayag 14:1.

“Sa Paghandom Kanako”

13. (a) Unsa ang atong palandongon panahon sa Memorial? (b) Kinsa lamang ang angay moambit sa mga emblema, ug ngano?

¹³ Ang ika-1,960ng tinuig nga Memorial sa pagkamatay ni Jesus mahulog sa Abril 17, 1992. Samtang nagsingabot ang maong petsa, maayo nga mamalandong kita sa tanan nga nahimo sa hingpit nga halad ni Jesus. Kining kahikayana nagabayaw sa kaalam ni Jehova ug sa iyang halalom nga gugma alang sa katawhan. Ang walay-ikasaway nga integridad ni Jesus, bisan hangtod sa masakit nga kamatayon, nagabayaw kang Jehova batok sa pagbiaybiay ni Satanas nga ang Iyang tawhanong linalang may kasaypanan ug mapakyas kon ipailalom sa pagsulay. (Job 1:8-11; Proverbio 27:11) Pinaagi sa iyang haladnong dugo, gipataliwad-an ni Jesus ang bag-ong tugon, ang paagi ni Jehova sa pagpili sa “usa ka pinili nga banay, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.” Samtang dinhi sa yuta, kini sila “nagapahayag sa halayo sa mga kahalangdon” sa ilang Diyos, si Jehova, kinsa ‘nagtawag kanila gikan sa kangitngitan ngadto sa iyang kahibulongang kahayag.’ (1 Pedro 2:9; itandi ang Exodo 19:5, 6.) Sa tukma, sila lamang ang moambit sa mga emblema sa Memorial kada tuig.

14. Sa unsang paagi ang minilyong maniniid napatugob?

¹⁴ Sa Memorial sa miaging tuig, 10,650,158 mitambong sa tibuok yuta, apan taliwala nila 8,850​—walay ikapulo nga bahin sa 1 porsiento​—ang miambit sa mga emblema. Nan, unsay kapuslanan, sa maong pagsaulog alang sa minilyong maniniid? Dakong kapuslanan! Bisan tuod dili moambit, sila sa espirituwal matugob tungod sa maong pagpakig-uban sa dako kaayong kapunongan sa kaigsoonan, samtang ilang mapatalinghogan ang tanang kahibulongang mga butang nga ginahimo ni Jehova pinaagi sa halad sa iyang Anak.

15. Sa unsang paagi ang uban gawas sa mga dinihogan makabatog kaayohan gikan sa halad ni Jesus?

¹⁵ Dugang pa, ang apostol nagpahibalo kanato sa 1 Juan 2:1, 2: “Kita adunay usa ka magtatabang uban sa Amahan, si Jesu-Kristo, ang usang matarong. Ug siya usa ka halad-pasig-uli alang sa atong mga sala, apan dili lamang alang sa atoa kondili alang usab sa tibuok nga kalibotan.” Oo, ang halad ni Jesus, samtang maghatag kaayohan una sa matang Juan nga gipasulod sa bag-ong tugon, nagatagana usab alang sa kapasayloan sa mga sala sa “tibuok kalibotan.” Kini “usa ka halad-pasig-uli” alang sa mga sala sa tanan nga uban sa kalibotan sa katawhan nga nagbutang ug pagtuo diha sa inula nga dugo ni Jesus, nga nagabukas alang kanila sa malipayong kalaoman nga kinabuhing dayon sa usa ka paraisong yuta.​—Mateo 20:28.

“Sa Gingharian sa Akong Amahan”

16. (a) Unsa ang morag giambitan karon ni Jesus ug sa iyang kaubang mga manununod? (b) Unsay gikinahanglan karon gikan sa dinihogang nahibilin ug sa dakong panon?

¹⁶ Sa pagpadayon sa paglig-on sa iyang mga apostoles, gipunting ni Jesus ang adlaw sa dihang sa simbolikong paagi pagaimnon niya pag-usab ang bunga sa parras uban sa iyang mga tinun-an diha sa Gingharian sa iyang Amahan. (Mateo 26:29) Iyang giingnan sila: “Kamo ang nagpabilin uban kanako sa akong mga pagsulay; ug pagabuhaton ko ang usa ka tugon uban kaninyo, maingon nga ang akong Amahan nagbuhat sa usa ka tugon uban kanako, alang sa usa ka gingharian, aron kamo magakaon unta ug magainom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka banay sa Israel.” (Lucas 22:28-30) Sukad nagbaton si Jesus ug gahom sa Gingharian sa mga langit niadtong 1914, kita makahinapos nga ang ubay-ubay sa kaubang mga manununod ni Jesus, nga natigom latas sa kasiglohan, nabanhaw na, aron “magalingkod sa mga trono” uban kaniya. (1 Tesalonica 4:15, 16) Ang adlaw tuling nagsingabot aron pagabuhian sa mga manulonda “ang upat ka hangin” sa “dakong kasakitan”! Sa maong panahon, ang pagtimri sa 144,000 sa espirituwal nga Israel ug pagtigom sa minilyon sa dakong panon matapos na. Kini silang tanan kinahanglang maghupot sa integridad, sama sa gihimo ni Jesus, aron makadawat sa ganti sa kinabuhing walay kataposan.​—Pinadayag 2:10; 7:1-4, 9.

17 ug kahon. (a) Kon ang usa ka dinihogan igasalikway ingong di-maunongon, sa kamakataronganon kinsay makapuli kaniya? (b) Ang mga artikulo sa Watchtower niadtong 1938 mihatag ug unsang makaiikag nga kahayag bahin sa pagtukod ug sa ulahi pagpadako sa teokratikanhong organisasyon sa yuta?

¹⁷ Unsa man kon ang pila ka dinihogan mapakyas sa paghupot sa integridad? Niining ulahing takna, sa walay duhaduha diyutay ra ang maong mga dili maunongon. Makataronganon, ang kapuli moabot, dili gikan sa taliwala sa bag-ong mga bawtismado, kondili gikan sa taliwala niadtong nagpabilin uban kang Jesus sa iyang mga pagsulay latas sa daghang katuigan sa matinumanong pag-alagad. Ang mga masilakong kidlap sa espirituwal nga kahayag nga miabot pinaagi sa The Watchtower sa katuigang 1920 ug 1930 nagpaila nga ang pagtigom sa nahibilin sa mga dinihogan halos kompleto na niadtong yugtoa. Kadtong ‘naglaba sa ilang mga biste ug nagpaputi kanila diha sa dugo sa Kordero’ sukad niadto dunay lain makapalipay nga paglaom. Pinaagi ni Kristo, ang espiritu ni Jehova nagagiya kanila ngadto sa “mga tuboran sa mga tubig sa kinabuhi” diha sa Paraisong yuta.​—Pinadayag 7:10, 14, 17.

Usa ka Labing Tim-os nga Pag-ampo

18. Unsang gamhanang mga pagtulon-an ang atong makat-onan gikan sa pag-ampo ni Jesus sa Juan kapitulo 17?

¹⁸ Gitapos ni Jesus ang iyang Memorial nga pakigtigom uban sa iyang mga tinun-an pinaagi sa pagtanyag sa tim-os nga pag-ampo nga nahitala sa Juan 17:1-26. Siya miampo una nga ang iyang Amahan maghimaya unta kaniya samtang iyang huptan ang iyang integridad hangtod sa kataposan. Niining paagiha si Jehova pagahimayaon usab, nga ang iyang ngalan mabalaan​—nga mahinloan sa tanang pakaulaw. Kay, sa pagkamatuod, ang hingpit nga tawong si Jesus nagapamatuod gayod nga ang tawhanong linalang sa Diyos mahimong walay-ikasaway, bisan ubos sa kinagrabehang pagsulay. (Deuteronomio 32:4, 5; Hebreohanon 4:15) Dugang pa, ang haladnong kamatayon ni Jesus nagbukas ug dakong higayon alang sa mga anak ni Adan. Matud ni Jesus: “Kini nagkahulogan sa kinabuhing walay kataposan, ang ilang pagbatog kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” Pagkakinahanglanon ang pagbatog tukmang kahibalo kang Jehova nga Diyos ug sa iyang Anak, ang Kordero sa Diyos, kinsa mihatag sa iyang kinabuhi alang sa kabayawan ni Jehova ug sa kaluwasan sa katawhan! (Juan 1:29; 1 Pedro 2:22-25) Gipabilhan mo ba kanang labing mahigugmaong halad sa gidak-ong gipahinungod nimo ang imong bug-os nga kaugalingon kang Jehova ug sa iyang bililhong pag-alagad?

19. Sa unsang paagi ang nahibilin ug ang dakong panon makapahimulos ug bililhong panaghiusa?

¹⁹ Dugang pa, si Jesus miampo ngadto sa iyang Balaang Amahan nga Iyang pagabantayan ang mga tinun-an samtang pamatud-an nila nga sila dili bahin sa kalibotan, mosunod sa Iyang pulong ingong kamatuoran, ug huptan ang bililhong pakig-usa sa Amahan ug sa Anak. Dili ba kining pag-ampoa kahibulongang gitubag hangtod ning adlawa samtang ang dinihogang nahibilin ug ang dakong panon sa kahiusa nagaalagad diha sa mga bugkos sa gugma, samtang nagahupot sa neyutralidad maylabot sa kalibotan, sa iyang kapintasan niini, ug sa pagkadaotan niini? Pagkabililhon ang hinapos nga mga pulong ni Jesus ngadto sa iyang Amahan, si Jehova! “Gipaila ko ang imong ngalan kanila ug igapaila ko pa,” matud ni Jesus, “aron nga ang gugma nga pinaagi niana ikaw nahigugma kanako maanaa kanila ug ako mahiusa kanila.”​—Juan 17:14, 16, 26.

20. Nganong ang Nisan 14, 33 K.P., sa pagkatinuod ang adlaw nga pagahandomon?

²⁰ Sa pag-adto sa tanaman sa Getsemane, nabatonan ni Jesus ang dugang hamubo, makapalig-ong pakig-uban sa iyang mga tinun-an. Dayon ang iyang mga kaaway nakaapas na niya! Ang mga pulong mapakyas sa pagbatbat sa mga kasakit nga lawasnon ni Jesus, sa iyang makagun-ob-sa-kasingkasing nga kasubo tungod sa pakaulaw nga gidala diha kang Jehova, ug sa iyang talagsaong integridad latas nianang tanan. Si Jesus miantos hangtod sa kataposan, lahos sa kagabhion ug latas sa kadaghanan sa mga takna sa maong adlaw. Tin-aw niyang gipasundayag nga ang iyang Gingharian dili bahin sa kalibotan. Ug uban sa kataposan niyang gininhawa, siya mituwaw: “Natapos na!” (Juan 18:36, 37; 19:30) Ang pagdaog niya sa kalibotan nahingpit na. Ang Nisan 14, 33 K.P., sa pagkatinuod mao ang adlaw nga pagahandomon!

[Footnote]

Unsaon Nimo Pagtubag?

◻ Unsay gitudlo ni Jesus mahitungod sa pagpaubos ug gugma?

◻ Sa unsang paagi si Jesus nahimong “ang dalan ug ang kamatuoran ug ang kinabuhi”?

◻ Unsa ang katuyoan sa bag-ong tugon?

◻ Unsang panaghiusa ug gugma ang giambitan sa dinihogang nahibilin ug sa dakong panon?

[Kahon sa panid 20]

Ang Kaalam sa Labawng Solomon

Ang mga artikulong nag-ulohang “Organisasyon” sa Hunyo 1 ug Hunyo 15, 1938, nga mga isyu sa The Watchtower nagtino sa pangunang teokratikanhong kahikayan nga gisunod sa mga Saksi ni Jehova hangtod ning adlawa. Kadto sila mao ang tayuktok sa talagsaong yugto sa doktrinal ug organisasyonal nga pagpasibo nga nagsugod sa 1919. (Isaias 60:17) Sa pagtandi nianang 20-anyos nga yugto ngadto sa 20 anyos nga nianang panahona gitukod ni Solomon ang templo ug ang balay sa hari sa Jerusalem, ang The Watchtower miingon: “Ang Kasulatan nagpakita nga, tapos sa kawhaan ka tuig nga pagpanukod ni Solomon . . . , gihimo niya ang tibuok-nasod nga pagpanukod. (1 Hari 9:10, 17-23; 2 Cron. 8:1-10) Dayon miabot ang rayna sa Sheba ‘gikan sa kinatumyang mga bahin sa yuta aron sa pagpatalinghog sa kaalam ni Solomon’. (Mat. 12:42; 1 Hari 10:1-10; 2 Cron. 9:1-9, 12) Kini nagpaila sa pangutana: Unsay anaa sa umaabot nga duol na alang sa katawhan ni Jehova sa yuta? Uban ang bug-os nga pagsalig kita magpaabot, ug atong tan-awon.” Ang maong pagsalig hustong pagkabutang. Ubos sa teokratikanhong organisasyon ang luag tibuok-kalibotang pagpanukod sa espirituwal nakatigom ug kapin sa upat ka milyon sa dakong panon. Sama sa rayna sa Sheba, kini sila nagagikan sa kinatumyang mga bahin sa yuta aron sa pagpatalinghog sa kaalam sa Labawng Solomon, si Kristo Jesus​—nga gipaabot kanila pinaagi sa “matinumanon ug maalamong ulipon.”​—Mateo 24:45-47.