Namatay Ninyong mga Minahal—Inyo ba Silang Makita Pag-usab?
SI John siyam lamang ka tuig sa dihang namatay ang iyang inahan. Sa ulahi, nahinumdom siya sa nahitabo diha sa punerarya: “Nagdrowing ako ug usa ka hulagway alang kaniya ug gisulatan kana ug diyutang mensahe nga naghangyo kaniya sa paghulat kanamong tanan sa langit. Gitunol ko kini kang Papa aron isulod sa lungon uban kaniya, ug bisan tuod siya patay na, malipay ako sa pagpalandong nga iyang nadawat kanang kataposang mensahe gikan kanako.”—How It Feels When a Parent Dies, ni Jill Krementz.
Walay duhaduha nga gihigugma gayod ni John ang iyang inahan. Human gibatbat ang iyang maayong mga hiyas, siya miingon: “Dili lang tingali nako gustong hinumdoman ang iyang negatibong mga hiyas, apan wala akoy mahunahunaang nakaapan kaniya. Siya mao ang kinaguwapahang babaye nga akong nakit-an sa tibuok nakong kinabuhi.”
Sama kang John, daghan ang may mahigugmaong mga panumdoman sa ilang namatay nga mga minahal ug midawat sa mga pagbati nga gusto silang makita pag-usab. Si Edith, kansang 26-anyos nga anak nga lalaki namatay sa kanser, miingon: “Kinahanglan kong motuo nga ang akong anak nga lalaki nabuhi sa laing dapit apan wala ako masayod kon diin. Makita pa kaha nako siya pag-usab? Wala ako masayod apan naglaom ako nga makita ra nako siya.”
Dayag, ang mahigugmaong Maglalalang sa tawo dili kay walay pagbati labot niining kinaiyanhong tinguha sa tawo. Maoy hinungdan kon nganong misaad siya nga moabot ang panahon sa dihang ang milyon-milyon magkauban pag-usab uban sa ilang namatay nga mga minahal. Ang Pulong sa Diyos naundan sa daghang reperensiya bahin niining maong saad labot sa umaabot nga pagkabanhaw sa mga patay.—Isaias 26:19; Daniel 12:2, 13; Oseas 13:14; Juan 5:28, 29; Pinadayag 20:12, 13.
Kinsay Banhawon Ngadto sa Langit?
Atong tagdon ang paglaom ni John nga ang iyang minahal nga inahan naghulat kaniya sa langit. Daghang magsisimba nakabaton niining maong paglaom o pagtuo. Sa paningkamot nga paluyohan ang maong mga hunahuna, ang mga klerigo ug pila ka tig-alagad sa katilingban sayop nga nagpadapat sa mga teksto gikan sa Bibliya.
Pananglitan, usa ka eksperto sa pagtabang sa namatyan, si Dr. Elisabeth Kübler-Ross, miingon diha sa iyang librong On Children and Death: “Ang pagkamatay nagkahulogan lamang nga isalibay nato ang atong lawas sa paagi sa atong pagbalibag sa usa ka daang amerikana, o pagsulod gikan sa usa ka kuwarto ngadto sa lain. Sa Ecclesiastes 12:7, atong mabasa: ‘Unya ang abog mobalik sa yuta diin kini nagagikan; ug ang espiritu mobalik ngadto sa Diyos nga maoy naghatag niini.’ Si Jesus miingon: ‘Ako molakaw sa pag-andam ug luna alang kaninyo aron nga kon diin ako atua usab kamo.’ Ug ngadto sa kawatan diha sa krus: ‘Karong adlawa adto ikaw sa paraiso uban kanako.’”
Ang mga teksto sa ibabaw nagkahulogan ba gayod nga ang namatay natong mga minahal buhi karon ug naghulat kanato sa langit? Atong tagdon pag-ayo ang mga teksto, sugod sa Ecclesiastes 12:7. Dayag, wala tuyoa sa maalamong tawo nga nagsulat sa maong mga pulong sa pagsupak sa iya nang gipahayag diha sa samang basahon sa Bibliya: “Ang mga buhi nahibalo nga sila mangamatay; apan bahin sa mga minatay, sila dili mahibalo sa bisan unsa.” (Ecclesiastes 9:5) Siya naghisgot sa kamatayon sa katawhan sa kinatibuk-an. Makataronganon ba ang pagtuo nga ang tanang nagaangkon nga walay-diyos ug banggiitang mga kriminal mobalik ngadto sa Diyos inigkamatay nila? Dili gayod. Sa pagkamatuod, kana dili mahimong ikasulti diha kang bisan kinsa kanato, bisag giisip man nato ang atong kaugalingon nga maayo o daotan. Sanglit walay mausa kanato ang nakauban sa Diyos didto sa langit, sa unsang paagi ikasulti nga kita mobalik ngadto kaniya?
Nan, unsa may gipasabot sa magsusulat sa Bibliya sa pag-ingon nga inigkamatay, ‘ang espiritu mobalik ngadto sa matuod nga Diyos’? Sa paggamit sa Hebreohanong pulong nga gihubad ug “espiritu,” siya wala magtumong sa usa ka butang talagsaon nga magpalahi sa usa ka tawo gikan sa lain. Hinunoa, sa Ecclesiastes 3:19, ang samang dinasig nga magsusulat sa Bibliya nagpatin-aw nga ang tawo ug mga mananap “tanan adunay usa lamang ka espiritu.” Dayag nga iyang gipasabot nga ang “espiritu” mao ang puwersa sa kinabuhi diha sa mga selula nga naglangkob sa pisikal nga mga lawas sa tawo ug mga mananap. Kita wala makadawat niining maong espiritu nga direkta gikan sa Diyos. Kini gipasa kanato pinaagi sa atong tawhanong mga ginikanan sa dihang gisamkon kita ug sa ulahi nahimugso. Dugang pa, kining maong espiritu sa literal dili mopanaw ngadto sa wanang ug mobalik sa Diyos inigkamatay. Ang ekspresyon, ‘ang espiritu mobalik ngadto sa matuod nga Diyos,’ maoy pulong nga pasumbingay nga nagkahulogan nga ang mga kalaoman sa umaabot nga kinabuhi sa usa ka tawong patay karon nagadepende sa Diyos. Anaa na kaniya ang pagdesisyon kon kinsa ang iyang hinumdoman ug sa kataposan pagabanhawon. Tan-awa sa imong kaugalingon kon unsa katin-aw nga kini gipakita sa Bibliya diha sa Salmo 104:29, 20.
Katuyoan ni Jehova nga Diyos nga limitado lamang nga gidaghanon sa matinumanon nga mga sumusunod ni Kristo, nga mikabat lamang ug 144,000, ang pagabanhawon ngadto sa langitnong kinabuhi ingong espirituhanong mga anak sa Diyos. (Pinadayag 14:1, 3) Kini ang maglangkob sa langitnong kagamhanan uban kang Kristo sa pagpanalangin sa katawhan sa yuta.
Ang unang nahibalo bahin niini mao ang matinumanong mga apostoles ni Jesus, nga ngadto kanila siya miingon: “Sa balay sa akong Amahan adunay daghang puy-anan. Kay kon dili pa ingon, gisultihan ko unta kamo, tungod kay ako molakaw aron sa pag-andam ug dapit alang kaninyo. Usab, kon ako molakaw ug mag-andam ug dapit alang kaninyo, ako moanhi pag-usab ug pagadawaton kamo ngadto sa akong kaugalingon, aron nga kon asa ako kamo usab maatua.” (Juan 14:2, 3) Kadtong mga apostoles ug ubang unang mga Kristohanon nangamatay ug kinahanglang maghulat nga walay kahibalo diha sa kamatayon hangtod sa pag-anhi ni Jesus sa pagganti kanila ug langitnong pagkabanhaw. Maoy hinungdan nga atong mabasa nga ang unang Kristohanong martir, nga si Esteban, “natulog sa kamatayon.”—Buhat 7:60; 1 Tesalonica 4:13.
Pagkabanhaw sa Kinabuhi sa Yuta
Apan komosta ang saad ni Jesus sa kriminal nga namatay tapad niya? Sama sa daghang Hudiyo niadtong panahona, kining tawhana nagtuo nga ang Diyos magpadala ug usa ka Mesiyas kinsa magtukod ug gingharian ug magpasig-uli sa kalinaw ug kasegurohan sa Hudiyonhong nasod sa yuta. (Itandi ang 1 Hari 4:20-25 uban sa Lucas 19:11; 24:21 ug Buhat 1:6.) Dugang pa, ang mamumuhat ug daotan nagpahayag ug pagtuo nga si Jesus mao gayod ang Usa nga gipili sa Diyos nga mahimong Hari. Bisan pa, niadtong maong yugto, ang nag-angat nga kamatayon ni Jesus ingong tawong hinukman naghimo niini nga daw dili mahitabo. Maoy hinungdan kon nganong gipasaligan ni Jesus ang kriminal pinaagi sa pagpresentar sa Iyang saad pinaagi niining mga pulonga: “Sa pagkamatuod ako magasulti kanimo karong adlawa, Ikaw mahiuban kanako sa Paraiso.”—Lucas 23:42, 43.
Ang mga hubad sa Bibliya nga nagsal-ot ug comma una sa pulong “karong adlawa” nakahatag ug suliran alang sa mga tawo nga gustong makasabot sa mga pulong ni Jesus. Si Jesus wala moadto sa bisan unsang paraiso niadto mismong adlawa. Hinunoa, siya walay kahibalo diha sa kamatayon sulod sa tulo ka adlaw hangtod nga siya gibanhaw sa Diyos. Bisan human sa pagkabanhaw ug pagkayab ni Jesus sa langit, siya naghulat pa sa tuong kamot sa iyang Amahan hangtod moabot ang panahon alang kaniya sa pagmando ingong Hari ibabaw sa katawhan. (Hebreohanon 10:12, 13) Sa dili madugay, ang pagmando ni Jesus sa Gingharian mohatag kahupayan sa katawhan ug himoon ang tibuok yuta nga usa ka paraiso. (Lucas 21:10, 11, 25-31) Dayon iyang tumanon ang iyang gisaad sa maong kriminal pinaagi sa pagbanhaw kaniya sa kinabuhi sa yuta. Ug si Jesus makauban sa lalaki sa diwa nga Siya motabang sa tanang panginahanglan sa tawo, lakip sa panginahanglan sa pagdala sa iyang estilo-sa-kinabuhi nga kaharmoniya sa matarong nga mga balaod sa Diyos.
Pagkabanhaw sa Daghan
Sama sa mahinulsolong kriminal, ang pagkabanhaw sa kadaghanang tawo mahitabo dinhi sa yuta. Kini nahiuyon sa katuyoan sa Diyos sa paglalang sa tawo. Ang unang lalaki ug babaye gibutang sa usa ka paraisong tanaman ug gisugo sa paggahom sa yuta. Kon sila nagpabiling masinugtanon sa Diyos, dili gayod unta sila matigulang ug mamatay. Sa tinudlong panahon sa Diyos, ang tibuok yuta pagagamhan, himoong tibuok-yutang paraiso ni Adan ug sa iyang hingpit nga mga kaliwat.—Genesis 1:28; 2:8, 9.
Ugaling, tungod kay si Adan ug si Eva kinabubut-ong nakasala, nakahatag silag kamatayon sa ilang kaugalingon ug sa ilang umaabot nga kaliwat. (Genesis 2:16, 17; 3:17-19) Maoy hinungdan kon nganong ang Bibliya nag-ingon: “Pinaagi sa usa ka tawo [Adan] ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.”—Roma 5:12.
Dihay usa lamang ka tawo nga gipanganak nga walay napanunod nga sala. Kadto mao ang hingpit nga Anak sa Diyos, si Jesu-Kristo, kansang kinabuhi gibalhin gikan sa langit ngadto sa tagoangkan sa Hudiyong ulay, si Maria. Si Jesus nagpabiling walay sala ug dili takos patyon. Busa, ang iyang kamatayon may bili nga makalukat alang sa “sala sa kalibotan.” (Juan 1:29; Mateo 20:28) Maoy hinungdan kon nganong si Jesus nakaingon: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.”—Juan 11:25.
Oo, busa maabiabi mo ang palaabuton nga mahiuban pag-usab sa imong minahal nga namatay, apan kini nagkinahanglan nga ikaw magpasundayag ug pagtuo kang Jesus ingong imong Maglulukat ug mosunod kaniya ingong gitudlong Hari sa Diyos. Sa dili madugay wagtangon sa Gingharian sa Diyos ang tanang kadaotan gikan niining yutaa. Ang tanang tawo nga modumili sa pagpasakop sa pagmando niini pagalaglagon. Apan, ang mga sakop sa Gingharian sa Diyos makalabang-buhi ug sila magmapuliki sa buluhaton sa paghimo niining maong yuta nga usa ka paraiso.—Salmo 37:10, 11; Pinadayag 21:3-5.
Dayon ang makalilipay nga panahon moabot aron masugdan ang pagkabanhaw. Atua ka ba unya didto sa pag-abi-abi sa mga patay? Kanang tanan magdepende kon unsay imong ginabuhat karon. Ang kahibulongang mga panalangin naghulat sa tanan nga nagapasakop karon sa pagmando sa Gingharian ni Jehova pinaagi sa iyang Anak, si Jesu-Kristo.