Mga Pagtulon-an Gikan sa mga Milagro ni Jesus

“KARON sa ikatulo ka adlaw nahitabo ang usa ka kombira sa kasal didto sa Cana sa Galilea . . . Gidapit usab ngadto sa kombira sa kasal si Jesus ug ang iyang mga tinun-an. Sa dihang nakulang ang bino ang inahan ni Jesus miingon kaniya: ‘Wala na silay bino.’” Kining maong hitabo maoy kahimtang sa kinaunahang milagro ni Jesus.​—Juan 2:1-3.

Dili ba ang maong suliran dili kaayo hinungdanon, ordinaryo ra kaayo, nga dalhon sa pagtagad ni Jesus? Misaysay ang usa ka eskolar sa Bibliya: “Ang pagkamaabiabihon sa Silangan maoy usa ka hinungdanon kaayong katungdanan . . . Ang tinuod nga pagkamaabiabihon, ilabina diha sa usa ka kombira sa kasal, nag-apil sa daghan kaayong pagkaon ug ilimnon. Kon mahurot ang pagkaon ug ilimnon sa usa ka kombira sa kasal, maulawan sa dayon ang pamilya ug ang batan-ong magtiayon.”

Busa milihok si Jesus. Nakakita siya ug “unom ka banga nga bato nga nahimutang sumala sa gikinahanglan sa lagda sa mga Judio sa paglunsay.” Ang rituwal nga paghugas una pa mangaon maoy kustombre taliwala sa mga Hudiyo, ug daghang tubig ang gikinahanglan sa pagtagana sa mga panginahanglan niadtong nanambong. “Pun-ag tubig ang mga banga,” mimando si Jesus niadtong nagsilbi sa mga dinapit. Si Jesus dili mao ang “tagdumala sa kombira,” apan misulti siya nga direkta ug may awtoridad. Sumala pa sa asoy: “Karon, sa dihang ang tagdumala sa kombira midimdim sa tubig, [kini] nahimong bino.”​—Juan 2:6-9; Marcos 7:3.

Mora tingalig katingad-an nga ang usa ka hitabo nga sama ka ordinaryo sa usa ka kasal maoy dapit diin gihimo ni Jesus ang unang milagro, apan dako ang gibutyag sa maong hitabo bahin kang Jesus. Siya usa ka tagsaanon, ug sa sunodsunod nga mga higayon iyang gihisgotan ang mga bentaha sa pagkatagsaanon uban sa iyang mga tinun-an. (Mateo 19:12) Apan, ang iyang pagtambong sa usa ka kombira sa kasal nagbutyag nga dili siya supak sa kaminyoon. Siya timbang, mapaluyohon sa kahikayan sa kaminyoon; iyang gilantaw kana ingong usa ka butang nga dungganon sa mga mata sa Diyos.​—Itandi ang Hebreohanon 13:4.

Si Jesus dili higpit nga tigdumili-sa-kaugalingon nga maoy paghulagway kaniya sa mga tigdibuho sa simbahan. Siya dayag nga nalingaw nga nakig-uban sa mga tawo ug dili supak sa pakighugoyhugoy. (Itandi ang Lucas 5:29.) Ang iyang kalihokan sa ingon nagpakita ug panig-ingnan sa iyang mga sumusunod. Si Jesus personal nga nagpasundayag nga sila dili mahimong hilabihan ka seryoso o masulob-on​—nga ingon ug ang pagkamatarong nagkahulogan ug kawalay-kalipay. Sa kaatbang, ang mga Kristohanon sa ulahi gisugo: “Pagmaya kanunay diha sa Ginoo.” (Filipos 4:4) Ang mga Kristohanon karong adlawa mag-amping nga magmakataronganon sa lingawlingaw. Makaplagan nila ang ilang kalipay diha sa pag-alagad sa Diyos, apan sa pagsunod sa panig-ingnan ni Jesus, sila usahay mangitag panahon nga maglingawlingaw diha sa usa ka salosalo.

Matikdi usab ang kalumo sa pagbati ni Jesus. Dili siya obligado nga mohimog milagro. Walay tagna niining bahina nga kinahanglang tumanon. Dayag, si Jesus natandog lamang sa kabalaka sa iyang inahan ug sa kalisod sa parisan nga magminyo. Nahangawa siya sa ilang bation ug buot nga makalingkawas sila sa kaulawan. Dili ba kana magpalig-on sa imong pagsalig nga si Kristo adunay tinuod nga interes kanimo​—bisan pa sa imong adlaw-adlaw nga mga suliran?​—Itandi ang Hebreohanon 4:14-16.

Sanglit ang matag banga “masudlan ug duha o tulo ka likidong sukod” sa tubig, ang milagro ni Jesus naglangkit ug daghan kaayong bino​—tingali 390 litros (105 ka galon)! (Juan 2:6) Nganong gikinahanglan ang daghan kaayo? Si Jesus wala magpasiugda ug paghuboghubog, usa ka butang nga gihukman sa Diyos. (Efeso 5:18) Hinunoa, siya nagpasundayag ug samag-diyos nga pagkamanggihatagon. Sanglit ang bino maoy komon nga ilimnon, ang bisan unsang sobra mahimong gamiton sa ubang mga okasyon.​—Itandi ang Mateo 14:14-20; 15:32-37.

Ang unang mga Kristohanon nagsundog sa panig-ingnan ni Jesus sa pagkamanggihatagon. (Itandi ang Buhat 4:34, 35.) Ug ang katawhan ni Jehova karong adlawa susamang gidasig nga “batasanon ang paghatag.” (Lucas 6:38) Apan, ang unang milagro ni Jesus aduna usab ing matagnaong importansiya. Kini nagpunting ngadto sa umaabot nga panahon sa dihang ang Diyos madagayaong magatagana ug “usa ka kombira sa matambok nga mga pagkaon, usa ka kombira sa bino nga pinalugdang,” nga bug-os magwagtang sa gutom.​—Isaias 25:6.

Apan, unsa na man ang daghang milagro nga gihimo ni Jesus nga nag-apil sa pisikal nga pagpang-ayo? Unsay atong makat-onan gikan niana?

Paghimo ug Maayo sa Igpapahulay

“Bangon, alsaha ang imong teheras ug lakaw.” Gipamulong kini ni Jesus ngadto sa usa ka tawo nga nasakit sulod sa 38 ka tuig. Ang asoy sa Ebanghelyo nagpadayon: “Niana ang tawo dihadiha nahimong maayo sa panglawas, ug iyang gialsa ang iyang teheras ug misugod sa paglakaw.” Katingad-an, dili ang tanan nahimuot sa kausaban sa kahimtang. Sumala sa asoy: “Ang mga Judio padayong milutos kang Jesus, tungod kay ginabuhat niya kining mga butanga panahon sa Igpapahulay.”​—Juan 5:1-9, 16.

Ang Igpapahulay gituyo ingong usa ka adlaw sa pagpahulay ug pagmaya alang sa tanan. (Exodo 20:8-11) Apan, sa adlaw ni Jesus kini nahimong kalibogan sa mapig-oton, hinimog-tawong mga lagda. Ang eskolar nga si Alfred Edersheim misulat nga sa tag-as nga mga seksiyon sa kasugoan sa Igpapahulay sa Talmud, “ang mga butang ugdang nga gihisgotan sumala sa relihiyosong importansiya, nga dili hunahunaon sa usa nga tagdon sa usa ka maalamong tawo.” (The Life and Times of Jesus the Messiah) Ang mga rabbi naghatag ug kinabuhi-kamatayong bili ngadto sa mga walay-pulos, mabuotbuotong mga lagda nga nagmando halos sa tanang bahin sa kinabuhi sa usa ka Hudiyo​—kasagaran uban sa dili-mabinationg way-pagtagad sa tawhanong pagbati. Ang usa ka lagda sa Igpapahulay nagmando: “Kon ang usa ka tawo malumpagan sa usa ka tinukod ug walay seguro kon atua siya didto o wala, o kon siya buhi o patay, o kon siya usa ka hentil o usa ka Israelinhon, mahimo nilang kuhaon ang mga gun-ob sa ibabaw niya. Kon nakaplagan nila siyang buhi mahimong kuhaon pa ang dugang gun-ob sa ibabaw niya; apan kon [siya] patay na, biyaan nila siya.”​—Tractate Yoma 8:7, The Mishnah, nga gihubad ni Herbert Danby.

Sa unsang paagi giisip ni Jesus ang maong hilabihang paglantugi sa dili-hinungdanong mga butang? Sa dihang gisaway tungod sa pagpang-ayo sa Igpapahulay, siya miingon: “Ang akong Amahan padayong nagabuhat hangtod karon, ug ako padayong nagabuhat.” (Juan 5:17) Si Jesus wala maghimog sekular nga trabaho aron magpadato sa iyang kaugalingon. Hinunoa, siya nagbuhat sa kabubut-on sa Diyos. Maingon nga ang mga Levihanon gitugotan sa pagpadayon sa ilang sagradong pag-alagad panahon sa Igpapahulay, si Jesus may katungod nga mohimo sa iyang tinudlog-Diyos nga mga katungdanan ingong Mesiyas nga wala magsupak sa Kasugoan sa Diyos.​—Mateo 12:5.

Ang pagpang-ayo ni Jesus sa adlaw nga Igpapahulay nagyagyag usab sa Hudiyong mga eskriba ug mga Pariseo ingong “sobrang nagpakamatarong”​—estrikto ug dili-timbang sa ilang panghunahuna. (Ecclesiastes 7:16) Tino, dili kabubut-on sa Diyos nga ang maayong mga binuhatan ilimite lamang sa pipila ka adlaw sa semana; ni katuyoan sa Diyos nga ang Igpapahulay maoy walay-pulos nga pagtuman sa lagda. Si Jesus miingon sa Marcos 2:27: “Ang igpapahulay napatungha tungod ug alang sa tawo, ug dili ang tawo tungod ug alang sa igpapahulay.” Gihigugma ni Jesus ang mga tawo, dili ang estriktong mga lagda.

Makaayo usab alang sa mga Kristohanon karong adlawa nga dili sobrang estrikto o gigamhan ug lagda sa ilang panghunahuna. Kadtong may awtoridad sa kongregasyon maglikay nga magpabug-at sa uban sa hilabihan ka daghang hinimog-tawong mga lagda ug mga polisa. Ang panig-ingnan ni Jesus nagdasig usab kanato nga mangitag mga kahigayonan sa paghimog maayo. Pananglitan, dili gayod mangatarongan ang usa ka Kristohanon nga ipakig-ambit lamang niya ang mga kamatuoran sa Bibliya kon siya pormal nga nakig-ambit sa balay-sa-balay nga ministeryo o sa dihang siya nagpakigpulong. Ang Kristohanon, sumala kang apostol Pedro, kinahanglang “kanunay andam sa paghimo ug depensa atubangan sa tanan nga mangayo kaninyo ug katarungan sa paglaom nga anaa kaninyo.” (1 Pedro 3:15) Ang pagbuhat ug maayo walay mga restriksiyon sa panahon.

Usa ka Pagtulon-an sa Pagkamabination

Ang laing talagsaong milagro nasulat sa Lucas 7:11-17. Sumala sa asoy, si Jesus “mipanaw ngadto sa usa ka siyudad nga gitawag Nain, ug ang iyang mga tinun-an ug usa ka dakong panon sa katawhan nanagpanaw uban kaniya.” Hangtod karong adlawa, ang mga lubnganan makita sa habagatan-silangan sa modernong Arabianhong balangay sa Nein. “Sa dihang duol na siya sa ganghaan sa siyudad,” nakahibalag siya ug masaba nga esena. “O, tan-awa! may giyayongan pagawas nga usa ka patayng tawo, ang anak nga lalaking bugtong-gianak sa iyang inahan. Gawas pa, usa siya ka balo. Dakodakong panon sa katawhan gikan sa siyudad uban usab kaniya.” Si H. B. Tristram miingon nga “ang naandang paagi sa paglubong wala pa mausab” gikan sa karaang kapanahonan, nga midugang: “Nakakita ako ug mga babaye nga mag-una sa yayongan sa lungon, nga gipangunahan sa sinuholang mga babayeng tigbakho. Ilang iwarawara ang ilang mga bukton, labnoton ang ilang buhok, uban sa bisan unsang mga lihok nga timailhan sa kasubo, ug mosinggit sa ngalan sa namatay.”​—Eastern Customs in Bible Lands.

Taliwala nianang masaba nga kaguliyang naglakaw ang usa ka nagbangotan nga babayeng balo kansang dagway nagbanaag gayod sa tumang kasakit. Sanglit nabalo na, giisip niya ang iyang anak lalaki ingon nga, sa mga pulong sa awtor nga si Herbert Lockyer, “ang sungkod sa iyang pagkatigulang, ug ang kahupayan sa iyang kamingaw​—ang tukod ug haligi sa panimalay. Sa pagkamatay sa iyang bugtong anak lalaki, nahanaw ang kataposang sangga.” (All the Miracles of the Bible) Unsa ang sanong ni Jesus? Sa larinong mga pulong ni Lucas, “sa dihang nalantawan siya sa Ginoo, siya natukmod sa kaluoy kaniya, ug giingnan niya siya: ‘Hunong na sa paghilak.’” Ang pamulong nga “natukmod sa kaluoy” gikuha sa Gregong pulong nga sa literal nagkahulogang “tinai.” Kini nagkahulogang “pagkatandog sa galamhan.” (Vine’s Expository Dictionary of Old and New Testament Words) Oo, natandog pag-ayo ang galamhan ni Jesus.

Ang kaugalingong inahan ni Jesus lagmit usa ka balo niining panahona, busa lagmit nasayod siya sa kasakit sa pagbangotan sa pagkamatay sa iyang amaama, si Jose. (Itandi ang Juan 19:25-27.) Dili na kinahanglang mangaliyupo pa ang babayeng balo kang Jesus. Dihadiha, “siya miduol ug gihikap ang yayonganan sa patay,” bisan pa sa kamatuoran nga ilalom sa Moisesnong Kasugoan ang paghikap sa patayng lawas makapahugaw sa usa. (Numeros 19:11) Pinaagi sa iyang milagrosong gahom, si Jesus makawagtang sa mismong hinungdan sa kahugawan! “Siya miingon: ‘Batan-ong lalaki, ako magaingon kanimo, Bangon!’ Ug ang patay nga tawo milingkod ug misugod sa pagsulti, ug gihatag niya siya sa iyang inahan.”

Pagkamakapatandog nga pagtulon-an sa pagkamabination! Ang mga Kristohanon kinahanglang dili mosundog sa walay-gugma, dili-matinagdanong mga tinamdan nga napadayag sulod niining “kataposang mga adlaw.” (2 Timoteo 3:1-5) Sa kaatbang, ang 1 Pedro 3:8 nagtambag: “Sa kataposan, pagbaton kamong tanan sa samang panghunahuna, nga magapakitag pagbati nga alang sa isigkaingon, nga magabaton ug inigsoong pagmahal, sa kalumo mabination.” Sa dihang usa ka kaila namatyan o grabeng nasakit, dili kita makahimo sa pagbanhaw o pag-ayo sa masakiton. Apan kita makatanyag ug praktikal nga tabang ug kahupayan, tingali pinaagi sa atong pagduaw ug paghilak uban kanila.​—Roma 12:15.

Kining kulbahinam nga pagbanhaw nga gihimo ni Jesus nagpunting usab sa umaabot​—usa ka panahon sa dihang “kadtong tanan nga anaa sa handomanang mga lubnganan makadungog sa iyang tingog ug managpanggula”! (Juan 5:28, 29) Sa tibuok yuta, ang mga nanagbangotan sa personal makasinati sa kamabination ni Jesus sa dihang ang mitaliwan nga mga inahan, mga amahan, mga anak, ug mga higala mabanhaw!

Ang mga Pagtulon-an sa mga Milagro

Nan, tin-aw nga ang mga milagro ni Jesus labaw pa kay sa makapaukyab lamang nga mga pasundayag sa gahom. Kini sila naghimaya sa Diyos, nga nagpakita ug panig-ingnan alang sa mga Kristohanon nga giawhag sa ‘paghimaya sa Diyos.’ (Roma 15:6) Sila gidasig sa paghimo ug maayo, sa pagpakita ug kamanggihatagon, sa pagpasundayag ug pagkamabination. Labi pang hinungdanon, kini sila nagsilbing pasiuna sa gamhanang mga buhat nga pagahimoon panahon sa Milenyal nga Pagmando ni Kristo.

Samtang dinhi sa yuta, si Jesus mihimo sa iyang gamhanang mga buhat sulod lamang sa usa ka gamay nga dapit. (Mateo 15:24) Ingong hinimayang Hari, ang iyang teritoryo molukop sa tibuok yuta! (Salmo 72:8) Sa dinhi pa sa yuta, kadtong milagrosong gipang-ayo ug gipamanhaw niya sa ngadtongadto nangamatay. Ilalom sa iyang langitnong paghari, ang sala ug kamatayon bug-os nga hanawon, nga maghimong posible sa walay-kataposang kinabuhi. (Roma 6:23; Pinadayag 21:3, 4) Oo, ang mga milagro ni Jesus nagpunting sa dalan ngadto sa usa ka mahimayaong umaabot. Ang mga Saksi ni Jehova nakatabang na sa minilyon sa pag-ugmad ug tinuod nga paglaom nga mahimong bahin niana. Hangtod moabot kanang panahona, pagkakahibulongang pasiuna sa mahitabo unya ang gitagana sa mga milagro ni Jesu-Kristo!

[Hulagway sa panid 7]

Ang tubig gihimo ni Jesus nga bino