Kinabuhi ug Ministeryo ni Jesus

Gitugyan ug Gipapatay

DIHANG si Pilato, natandog sa kahalangdon sa gisakit nga si Jesus, gisulayan na usab niya ang pagbuhi kaniya, ang pangulong mga saserdote nasuko pag-ayo. Sila determinado nga walay makababag sa ilang daotang katuyoan. Busa sila misinggit na usab: “Ilansang siya! Ilansang siya!”

“Kuhaa ninyo siya ug ilansang siya,” mitubag si Pilato sa kayugot. Sukwahi sa ilang unang pangangkon, ang mga Hudiyo may awtoridad sa pagsilot sa mga kriminal alang sa relihiyosong kasaypanan nga may igong gibug-aton. Unya, sa labing menos lima ka beses, si Pilato mideklarar nga si Jesus inosente, nag-ingon: “Wala akoy nakitang sala kaniya.”

Ang mga Hudiyo, sa pagkakitang ang ilang politikanhong mga sumbong napakyas sa pagpatunghag mga resulta, mibali sa relihiyosong sumbong sa pagpasipala sa mga oras nga mas una pa sa paghusay kang Jesus atubangan sa Sanhedrin. “Kami adunay balaod,” sila miingon, “ug sumala sa balaod siya angayng mamatay, tungod kay gihimo niya ang iyang kaugalingon nga anak sa Diyos.”

Kining sumbonga maoy bag-o kang Pilato, ug kini dugang nagpahadlok kaniya. Karon naamgohan na niya nga si Jesus dili ordinaryong tawo, bisan diha sa damgo sa iyang asawa ug ang talagsaong kalig-on sa personalidad ni Jesus nagpaila. Apan “anak sa Diyos”? Si Pilato nahibalo nga si Jesus gikan sa Galilea. Apan, siya ba posibleng nabuhi kaniadto? Gidala siyag balik ngadto sa palasyo, si Pilato misukna: “Diin ka ba gikan?”

Si Jesus nagpakahilom. Sayo pa giingnan niya si Pilato nga siya usa ka hari, apan ang iyang Gingharian maoy dili bahin niining kalibotana. Wala nay dugang pagpatin-aw karon ang gikinahanglan pa. Hinunoa, natandog ang garbo ni Pilato sa dili pagtubag, ug siya misinghag kang Jesus uban sa mga pulong: “Dili ka ba makigsulti kanako? Wala ba nimo hibaloi nga ako may awtoridad sa pagpagawas kanimo ug may awtoridad sa pagpalansang kanimo?”

“Wala kay awtoridad gayod kanako gawas kon kini ikatugot kanimo gikan sa itaas,” matinahorong mitubag si Jesus. Siya nagpunting sa paghatag ug awtoridad sa Diyos ngadto sa tawhanong mga magmamando aron sa pagpadapat sa yutan-ong mga kalihokan. Si Jesus midugang: “Kini maoy hinungdan nga ang tawong nagtugyan kanako diha kanimo sad-an ug dako.” Sa pagkamatuod, ang hataas nga saserdote nga si Caipas ug ang iyang mga kauban ug si Judas Iscariote nagpas-an ug bug-at nga kaakohan kay kang Pilato tungod sa dili makataronganong pagtagad kang Jesus.

Nakadayeg ug dugang kang Jesus ug nahadlok nga Siya may balaang gigikanan, si Pilato naningkamot na usab sa pagpagawas Kaniya. Ang mga Hudiyo, hinunoa, misanta kang Pilato. Ilang giusab ang ilang politikanhong sumbong, malansisong naghulga: “Kon imong buhian kining tawhana, dili ka higala ni Cesar. Ang bisan kinsang tawo nga naghimo sa iyang kaugalingong usa ka hari nakigbatok kang Cesar.”

Bisan pa sa makahahadlok nga mga implikasyon, gidala sa makausa pa ni Pilato si Jesus sa gawas. “Tan-awa! Ang inyong hari!” siya misangpit pa pag-usab.

“Patya siya! Patya siya! Ilansang siya!” mao ang tubag.

“Ilansang ko ba ang inyong hari?” may kasubong misukna si Pilato.

Ang mga Hudiyo may kaligotgot ubos sa pagmando sa mga Romano. Ngani, ilang gitamay ang pagpanakop sa Roma! Apan, sa pagkasalingkapaw, ang pangulong mga saserdote miingon: “Kami walay hari gawas kang Cesar.”

Kay nahadlok sa iyang politikanhong baroganan ug reputasyon, si Pilato sa kataposan nadaog ubos sa walay hunong, mahulgaong mga pangangkon. Iyang gitugyan si Jesus. Ang mga sundalo naghukas kang Jesus sa iyang pulang kupo ug nagsul-ob pag-usab kaniya sa iyang kaugalingong mga bisti. Samtang gidala si Jesus aron ilansang, siya gipadala sa iyang kaugalingong kahoy sa pagsakit.

Karon magtungatunga na sa buntag sa Biyernes, Nisan 14; tingalig taliudto na. Si Jesus hapo na sukad pa sa sayo sa Huwebes sa buntag, ug siya nag-antos sa daghang makapahingutas nga kasinatian. Hisabtan, nga siya wala na makadaog sa pagpas-an sa kahoy. Busa ang usa ka lumalabay, si Simon sa Cerene sa Aprika, mitanyag sa iyang serbisyo sa pagpas-an niini alang kaniya. Samtang sila nagbaktas, usa ka dakong panon sa mga tawo ang misunod, apil ang daghang mga babaye kinsa namukpok sa ilang kaugalingon sa kasubo ug nagbakho kang Jesus.

Mitan-aw ngadto sa mga babaye, si Jesus miingon: “Anak nga mga babaye sa Jerusalem, hunong na sa paghilak kanako. Hinunoa, hilaki ang inyong kaugalingon ug ang inyong mga anak; tungod kay, tan-awa! ang mga adlaw moabot diin ang mga tawo magaingon, ‘Bulahan ang mga babayeng apuli, ug ang tagoangkan nga wala magsamkon ug ang mga dughan nga wala kasus-i!’ Unya sila mosugod sa pag-ingon sa mga bukid, ‘Tumpagi kami!’ ug ngadto sa mga bungtod, ‘Taboni kami!’ Tungod kay kon gibuhat nila kini sa dihang ang kahoy lunhaw pa, unsa kahay mahitabo kon kini laya na?”

Si Jesus nagpunting sa kahoy ngadto sa nasod sa mga Hudiyo, diin sa gihapon may kalunhaw pa sa kinabuhi niini tungod sa pagkaanaa ni Jesus ug sa paglungtad sa usa ka nahibilin nga nagatuo kaniya. Apan sa dihang kini mawala na sa nasod, ang patay sa espirituwal nga kahoy na lamang ang magpabilin, oo, usa ka nalayang nasodnong organisasyon. Oh, unsa ka dakong pagbalata unya sa dihang ang Romanong kasundalohan, nga nag-alagad ingong mga manlalaglag sa Diyos, maglaglag sa nasod sa mga Hudiyo! Juan 19:6-17; 18:31; Lucas 23:24-31; Mateo 27:31, 32; Marcos 15:20, 21.

◆ Unsay sumbong ang gihimo sa relihiyosong mga lider batok kang Jesus sa dihang ang ilang politikanhong mga sumbong napakyas sa pagpatunghag mga resulta?

◆ Nganong si Pilato tingali nahadlok pag-ayo?

◆ Kinsay nagpas-an ug dakong kasal-anan sa gidangatan ni Jesus?

◆ Giunsa sa mga saserdote pagkuha kang Pilato sa pagtugyan kang Jesus aron ipapatay?

◆ Unsay gisulti ni Jesus sa mga babaye nga mihilak alang kaniya, ug unsay iyang gipasabot sa pagpunting sa kahoy ingong “lunhaw” ug unya “nalaya”?