Nahibalo Ka Ba?
Duna bay rason nga mahadlok si Poncio Pilato kang Cesar?
Aron mapugos ang Romanong Gobernador nga si Poncio Pilato nga ipapatay si Jesus, ang Hudiyong mga lider miingon: “Kon imong buhian kining tawhana, dili ka higala ni Cesar.” (Juan 19:12) Ang “Cesar” nga gitumong dinhi mao ang Romanong Emperador nga si Tiberio. Duna bay rason nga mahadlok si Pilato niining maong Cesar?
Unsang matanga sa pagkatawo si Tiberio Cesar? Mga katuigan una pa sa paghusay kang Jesus, si Tiberio nailhan na nga usa ka “tawo nga interesado lamang sa iyang kaugalingong kaayohan ug [iyang] himoon ang tanang paagi aron makab-ot kini,” nag-ingon ang The New Encyclopædia Britannica. Tungod sa iyang pagkamatahapon iyang silotan o patyon ang bisan kinsa nga iyang gidudahang nagmaluibon. “Kon atong tuohan ang mga historyano nga nagkinabuhi sa maong panahon,” mitaho ang maong reperensiya, “ang iyang paboritong kalingawan maoy mapintas ug malaw-ay. . . . Mopatay siya bisan kinsa ug bisan kanus-a nga iyang gusto.”
Busa, tungod sa dili maayong kinaiya ni Tiberio, si Pilato napugos sa pagsugot sa hangyo sa Hudiyong mga lider nga patyon si Jesus.—Juan 19:13-16.
Nganong gihugasan ni Jesus ang tiil sa iyang mga apostoles?
Sa karaang Israel, daghang ordinaryong tawo ang magtiniil lang diha sa ilang adlaw-adlawng buluhaton. Ang uban naggamit ug sandalyas. Kini maoy sapin sa tiil nga dunay estrap nga ihikot diha sa tiil ug buolbuol. Sanglit abogon o lapokon ang ilang ginaagian, hugaw gayod ang tiil sa mga tawo.
Busa, ilang naandan nga huboon ang mga sandalyas una mosulod sa usa ka balay. Ang pag-abiabig bisita kaniadto naglakip sa paghugas sa ilang tiil. Kini himoon sa tagbalay o kaha sa usa ka sulugoon. Kini nga kostumbre gihisgotan diha sa Bibliya sa pipila ka beses. Pananglitan, si Abraham miingon sa iyang mga bisita: “Palihog, itugot nga magkuhag diyutayng tubig ug mahugasan ang inyong mga tiil. Unya lingkod kamo sa ilalom sa kahoy. Ug tugoti akong magkuhag usa ka buok nga tinapay, ug palagsikon ang inyong mga kasingkasing.”—Genesis 18:4, 5; 24:32; 1 Samuel 25:41; Lucas 7:37, 38, 44.
Kini nga impormasyon motabang kanato sa pagsabot kon nganong gihugasan ni Jesus ang tiil sa iyang mga tinun-an panahon sa iyang kataposang Paskuwa uban kanila. Sa maong okasyon, walay tagbalay o sulugoon nga mohimo sa maong buhat, ug dayag nga ang mga tinun-an wala moboluntaryo sa pagbuhat niana. Busa siya mikuhag palanggana ug gihugasan ang tiil sa iyang mga tinun-an, ug dayon gitrapohan niya kinig tualya. Si Jesus naghatag kanilag leksiyon bahin sa gugma ug pagkamapainubsanon.—Juan 13:5-17.