Dakong Espirituwal nga Templo ni Jehova

“Kita adunay hataas nga saserdote nga ingon niini, . . . usa ka publikong alagad sa balaang dapit ug sa matuod nga tolda, nga gipatindog ni Jehova, ug dili sa tawo.”​—HEBREOHANON 8:1, 2.

 1. Unsang mahigugmaong tagana ang gihimo sa Diyos alang sa makasasalang katawhan?

SI Jehova nga Diyos, tungod sa iyang dakong gugma alang sa katawhan, mitaganag usa ka halad aron pagpapas sa mga sala sa kalibotan. (Juan 1:29; 3:16) Kadto nagkinahanglan nga balhinon ang kinabuhi sa iyang panganayng Anak gikan sa langit ngadto sa tagoangkan sa usa ka Hudiyang ulay nga ginganlag Maria. Ang manulonda ni Jehova tin-awng misaysay kang Maria nga ang batang iyang ipanamkon “pagatawgong balaan, Anak sa Diyos.” (Lucas 1:34, 35) Si Jose, kinsa nakigsaad nga makigminyo kang Maria, gitug-anan bahin sa milagrosong kinaiyahan sa pagsamkon kang Jesus ug nahibalo nga kini siya ‘magaluwas sa iyang katawhan gikan sa ilang kasal-anan.’​—Mateo 1:20, 21.

 2. Unsay gihimo ni Jesus sa dihang siya mga 30 ka tuig sa edad, ug ngano?

² Samtang nagdako si Jesus, iyang nasabtan gayod ang pipila nianang maong mga kasayoran bahin sa iyang milagrosong pagkatawo. Nahibalo siya nga ang iyang langitnong Amahan dunay nagaluwas-ug-kinabuhi nga buluhaton nga iyang buhaton sa yuta. Busa, ingong hingkod nga tawo nga mga 30 anyos na, si Jesus miduol sa propeta sa Diyos nga si Juan aron magpabawtismo sa Subang Jordan.​—Marcos 1:9; Lucas 3:23.

 3. (a) Unsay gipasabot ni Jesus sa mga pulong, “Halad ug pahinungod wala nimo tinguhaa”? (b) Unsang talagsaong panig-ingnan ang gihatag ni Jesus alang sa tanan nga buot mahimong iyang mga tinun-an?

³ Si Jesus nag-ampo panahon sa iyang bawtismo. (Lucas 3:21) Tin-aw, sukad niadtong puntoha sa iyang kinabuhi, iyang gituman ang mga pulong sa Salmo 40:6-8, sumala sa gipaila sa ulahi ni apostol Pablo: “Halad ug pahinungod wala nimo tinguhaa, apan ikaw nag-andam ug lawas alang kanako.” (Hebreohanon 10:5) Sa ingon gipakita ni Jesus ang iyang kaamgohan nga ang Diyos ‘wala magtinguha’ nga ang paghalad ug mga hayop nga halad ipadayon diha sa templo sa Jerusalem. Inay hinuon, iyang naamgohan nga ang Diyos nag-andam ug hingpit nga tawhanong lawas alang kaniya, si Jesus, aron itanyag ingong usa ka halad. Kini magwagtang sa dugang panginahanglan sa mga hayop nga halad. Sa pagpakita sa iyang kinasingkasing nga tinguha sa pagbuhat sa kabubut-on sa Diyos, si Jesus mipadayon sa pag-ampo: “Tan-awa! Ako mianhi (sa linukot nga basahon kini nahisulat bahin kanako) aron buhaton ang imong kabubut-on, O Diyos.” (Hebreohanon 10:7) Pagkanindot nga panig-ingnan sa kaisog ug dili-mahakogong debosyon ang gihatag ni Jesus niadtong adlawa alang sa tanan nga sa ulahi mahimong iyang mga tinun-an!​—Marcos 8:34.

 4. Giunsa pagpakita sa Diyos ang iyang pag-uyon sa paghalad ni Jesus sa iyang kaugalingon?

⁴ Gipakita ba sa Diyos ang pag-uyon sa pag-ampo ni Jesus panahon sa pagbawtismo? Ipatubag nato sa usa sa piniling mga apostol ni Jesus: “Human bawtismohi mihaw-as gilayon si Jesus sa tubig; ug, tan-awa! nabuksan ang mga langit, ug iyang nakita nga nanaog sama sa usa ka salampati ang espiritu sa Diyos paingon diha kaniya. Tan-awa! Usab, dihay tingog gikan sa mga langit nga miingon: ‘Kini ang akong Anak, ang hinigugma, si kinsa akong giuyonan.’”​—Mateo 3:16, 17; Lucas 3:21, 22.

 5. Unsay gihulagwayan sa literal nga halaran sa templo?

⁵ Ang pagdawat sa Diyos sa pagtanyag sa lawas ni Jesus ingong halad nagpasabot nga, sa espirituwal nga diwa, ang usa ka halaran nga labaw pa kay sa iya sa templo sa Jerusalem napaila. Ang literal nga halaran diin ang mga hayop gitanyag ingong halad naglandong sa maong espirituwal nga halaran, nga sa pagkatinuod mao ang “kabubut-on” o kahikayan sa Diyos aron dawaton ang tawhanong kinabuhi ni Jesus ingong usa ka halad. (Hebreohanon 10:10) Kanay hinungdang si apostol Pablo nakasulat ngadto sa kaubang mga Kristohanon: “Kita adunay halaran nga gikan niana sila nga nagabuhat ug sagradong pag-alagad diha sa tolda [o, templo] walay awtoridad sa pagkaon.” (Hebreohanon 13:10) Sa laing mga pulong, ang matuod nga mga Kristohanon makabenepisyo gikan sa labi pang maayong nagatabon-sa-salang halad, nga gisalikway sa kadaghanang Hudiyong mga saserdote.

 6. (a) Unsay napaila sa panahon sa bawtismo ni Jesus? (b) Unsay kahulogan sa titulong Mesiyas, o Kristo?

⁶ Ang pagdihog kang Jesus sa balaang espiritu nagpasabot nga niadtong tungora ang Diyos nagpatungha sa iyang tibuok nga kahikayan sa espirituwal nga templo, uban kang Jesus nga nag-alagad isip nga Hataas nga Saserdote. (Buhat 10:38; Hebreohanon 5:5) Ang tinun-ang si Lucas nadasig sa pagpunting sa tuig niining halandumong hitabo ingong mao ang “ikanapulog-lima ka tuig sa paghari ni Tiberio Cesar.” (Lucas 3:1-3) Kana sibo sa tuig 29 K.P.​—eksaktong 69 ka semana sa mga tuig, o 483 ka tuig, sukad sa panahong si Haring Artajerjes naghatag sa sugo sa pagtukod pag-usab sa mga paril sa Jerusalem. (Nehemias 2:1, 5-8) Sumala sa tagna, ang “Mesiyas nga Pangulo” mopatim-aw nianang gitagnang tuig. (Daniel 9:25) Daghang Hudiyo ang dayag nga nasayod niini. Gitaho ni Lucas nga “nagmapaaboton ang mga tawo” sa pagpatim-aw sa Mesiyas, o Kristo, mga titulo nga naggikan sa Hebreohanon ug Gregong mga pulong nga adunay samang kahulogan, “usang dinihogan.”​—Lucas 3:15.

 7. (a) Kanus-a ang Diyos nagdihog sa “Balaan sa mga Balaan,” ug unsay gipasabot niini? (b) Unsa pay nahitabo kang Jesus sa panahon sa iyang bawtismo?

⁷ Sa panahon sa bawtismo ni Jesus, ang langitnong pinuy-anan sa Diyos nadihogan, o nagahin, isip ang “Balaan sa mga Balaan” diha sa dakong kahikayan sa espirituwal nga templo. (Daniel 9:24) “Ang matuod nga tolda [o, templo], nga gipatindog ni Jehova, ug dili sa tawo” naglihok na. (Hebreohanon 8:2) Dugang pa, pinaagi sa iyang bawtismo pinaagi sa tubig ug balaang espiritu, ang tawong si Jesu-Kristo gipanganak pag-usab ingong usa ka espirituwal nga Anak sa Diyos. (Itandi ang Juan 3:3.) Nagpasabot kini nga sa nahiangayng panahon ang Diyos magpabalik sa iyang Anak ngadto sa langitnong kinabuhi, diin siya mag-alagad diha sa tuong kamot sa iyang Amahan ingong Hari ug Hataas nga Saserdote “sa paagi nga sama kang Melquisedek hangtod sa hangtod.”​—Hebreohanon 6:20; Salmo 110:1, 4.

Ang Langitnong Labing Balaan

 8. Unsang bag-ong mga kinaiyahan ang nabatonan sa maong panahon sa trono sa Diyos sa langit?

⁸ Sa adlaw sa bawtismo ni Jesus, ang langitnong trono sa Diyos nakabaton ug bag-ong mga kinaiyahan. Ang tinong pagpaila sa Diyos nga ang usa ka hingpit tawhanong halad maoy magtabon sa mga sala sa kalibotan nagpasiugda sa pagkabalaan sa Diyos nga kasukwahi sa pagkamakasasala sa tawo. Ang kaluoy sa Diyos gipasiugda usab sa pagkaagi nga niadtong tungora iyang gipakita ang iyang kaandam nga mahupay, o mapuypoy. Sa ingon ang trono sa Diyos sa langit nahimong sama sa kinasulorang lawak sa templo, diin ang hataas nga saserdote misulod kas-a sa usa ka tuig nga may dugo sa hayop aron sa pagtabon sa sala sa mahulagwayong paagi.

 9. (a) Unsay gihulagwayan sa kurtina tali sa Balaan ug sa Labing Balaan? (b) Sa unsang paagi si Jesus misulod sa luyo sa kurtina sa espirituwal nga templo sa Diyos?

⁹ Ang kurtina nga nagbulag sa Balaan gikan sa Labing Balaan naghulagway sa unodnong lawas ni Jesus. (Hebreohanon 10:19, 20) Kadto ang babag nga nagpugong kang Jesus sa pagsulod ngadto sa presensiya sa iyang Amahan samtang siya tawo sa yuta. (1 Corinto 15:50) Panahon sa pagkamatay ni Jesus, “ang kurtina sa santuwaryo nagisi sa duha, gikan sa itaas ngadto sa ubos.” (Mateo 27:51) Kadto talagsaong nagpaila nga ang babag nga nagpugong kang Jesus sa pagsulod sa langit niadtong tungora giwagtang na. Tulo ka adlaw sa ulahi, gihimo ni Jehova nga Diyos ang usa ka talagsaong milagro. Gibangon niya si Jesus gikan sa kamatayon, dili ingong usa ka himalatyong tawo nga may unod ug dugo, kondili ingong usa ka mahimayaong espiritung linalang ‘nga nagapadayong buhi hangtod sa hangtod.’ (Hebreohanon 7:24) Kap-atan ka adlaw sa ulahi, si Jesus mikayab ngadto sa langit ug misulod sa tinuod nga “Balaan sa mga Balaan,” “aron moatubang karon sa persona sa Diyos alang kanato.”​—Hebreohanon 9:24.

10. (a) Unsay nahitabo human itanyag ni Jesus ang bili sa iyang halad ngadto sa iyang langitnong Amahan? (b) Unsay kahulogan sa pagdihog sa balaang espiritu alang sa mga tinun-an ni Kristo?

¹⁰ Gidawat ba sa Diyos ang bili sa giula nga dugo ni Jesus ingong tabon sa mga sala sa kalibotan? Sa tinuoray gidawat niya. Ang pamatuod niini miabot eksaktong 50 ka adlaw human sa pagkabanhaw ni Jesus, sa adlaw sa piyesta sa Pentekostes. Ang balaang espiritu sa Diyos gibubo ibabaw sa 120 ka tinun-an ni Jesus nga nagtigom sa Jerusalem. (Buhat 2:1, 4, 33) Sama sa ilang Hataas nga Saserdote, si Jesu-Kristo, sila niadtong panahona gidihogan sa pag-alagad ingong “usa ka balaang pagkasaserdote, aron magtanyag ug espirituwal nga mga halad” ubos sa kahikayan sa Diyos sa dakong espirituwal nga templo. (1 Pedro 2:5) Dugang pa, kining mga dinihogan nahimong usa ka bag-ong nasod, “balaan nga nasod” sa Diyos sa espirituwal nga Israel. Sukad niadto, ang tanang tagna sa maayong mga butang mahitungod sa Israel, sama sa “bag-ong pakigtugon” nga saad nga natala sa Jeremias 31:31, mapadapat ngadto sa dinihogang Kristohanong kongregasyon, ang matuod nga “Israel sa Diyos.”​—1 Pedro 2:9; Galacia 6:16.

Ubang mga Kinaiyahan sa Espirituwal nga Templo sa Diyos

11, 12. (a) Unsay gihulagwayan sa saserdotehanong sawang sa kahimtang ni Jesus, ug unsa ba kana sa kahimtang sa iyang dinihogang mga sumusunod? (b) Unsay gihulagwayan sa dulang sa tubig, ug sa unsang paagi kini ginagamit?

¹¹ Bisan pag ang Labing Balaan naghulagway sa “langit mismo,” diin ang Diyos naentrono, ang tanang ubang mga kinaiyahan sa espirituwal nga templo sa Diyos adunay kalabotan sa mga butang sa yuta. (Hebreohanon 9:24) Sa templo sa Jerusalem, dihay saserdotehanong sawang sa sulod nga may usa ka halaran alang sa halad ug usa ka dakong dulang sa tubig, diin ang mga saserdote nanghugas sa ilang kaugalingon una mohimo sa sagradong pag-alagad. Unsay gihulagwayan niining mga butanga diha sa kahikayan sa espirituwal nga templo sa Diyos?

¹² Sa kahimtang ni Jesu-Kristo, ang saserdotehanong sawang sa sulod naghulagway sa iyang way-sala nga kahimtang ingong hingpit nga tawhanong Anak sa Diyos. Pinaagi sa pagpakitag pagtuo sa halad ni Jesus, ang dinihogang mga sumusunod ni Kristo gipasidunggan sa pagkamatarong. Sa ingon, ang Diyos sa tukma makahimo sa pagpakiglabot kanila nga samag sila walay sala. (Roma 5:1; 8:1, 33) Busa, ang maong sawang naghulagway usab sa gipahinungod nga matarong nga tawhanong kahimtang nga gipahimuslan sa tinagsa ka mga membro sa balaang pagkasaserdote atubangan sa Diyos. Sa samang panahon, ang dinihogang mga Kristohanon dili pa gihapon hingpit ug makahimo pag sala. Ang dulang sa tubig diha sa sawang naghulagway sa Pulong sa Diyos, nga gigamit sa Hataas nga Saserdote sa paghinlo nga progresibo sa balaang pagkasaserdote. Pinaagi sa pagpailalom niining proseso sa paghinlo, ilang nabatonan ang halangdong dagway nga nagpasidungog sa Diyos ug nagdani sa mga tagagawas nganha sa iyang maputling pagsimba.​—Efeso 5:25, 26; itandi ang Malaquias 3:1-3.

Ang Balaan

13, 14. (a) Unsay gihulagwayan sa Balaan sa templo sa kahimtang ni Jesus ug sa iyang dinihogang mga sumusunod? (b) Unsay gihulagwayan sa bulawanong tangkawan?

¹³ Ang unang lawak sa templo naghulagway sa kahimtang nga labaw kay nianang sa sawang. Sa kahimtang sa hingpit nga tawong si Jesu-Kristo, kini naghulagway sa iyang pagkagipanganak pag-usab ingong espirituwal nga Anak sa Diyos nga destinado nga mobalik sa langitnong kinabuhi. Human ipahayag nga matarong pinasukad sa ilang pagtuo diha sa giula nga dugo ni Kristo, kining dinihogang mga sumusunod nakasinati usab niining linaing paglihok sa espiritu sa Diyos. (Roma 8:14-17) Pinaagi sa “tubig [nga mao, ilang bawtismo] ug espiritu,” sila ‘gipakatawo pag-usab’ ingong espirituwal nga mga anak sa Diyos. Sa pagkaingon, sila adunay paglaom nga pagabanhawon ngadto sa langitnong kinabuhi ingong espiritung mga anak sa Diyos, basta sila magpabiling matinumanon hangtod sa kamatayon.​—Juan 3:5, 7; Pinadayag 2:10.

¹⁴ Ang mga saserdote nga nag-alagad sulod sa Balaan sa yutan-ong templo wala makita sa mga magsisimba nga didto sa gawas sa templo. Sa samang paagi, ang dinihogang mga Kristohanon nakasinatig espirituwal nga kahimtang nga wala maambiti o bug-os hisabti sa kinabag-ang mga magsisimba sa Diyos, kansang paglaom maoy pagkinabuhing walay kataposan sa usa ka paraisong yuta. Ang bulawanong tangkawan sa tabernakulo naghulagway sa nalamdagan nga kahimtang sa dinihogang mga Kristohanon. Ang paglihok sa balaang espiritu sa Diyos, sama sa lana diha sa mga lamparahan, mosabwag ug kahayag diha sa Bibliya. Ang pagsabot nga maangkon sa mga Kristohanon ingong sangpotanan, dili nila tagoan sa ilang kaugalingon. Hinunoa, sila nagsugot kang Jesus, kinsa miingon: “Kamo ang kahayag sa kalibotan. . . . Palamdaga ang inyong kahayag atubangan sa mga tawo, aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.”​—Mateo 5:14, 16.

15. Unsay gihulagwayan sa tinapay diha sa lamesa sa pasundayag nga tinapay?

¹⁵ Aron magpabilin niining nalamdagan nga kahimtang, ang dinihogang mga Kristohanon kinahanglang regular nga mokaon diha sa gihulagwayan sa tinapay diha sa lamesa sa pasundayag nga tinapay. Ang ilang pangunang tinubdan ug espirituwal nga pagkaon mao ang Pulong sa Diyos, nga ilang gipaningkamotan nga basahon ug palandongon sa matag adlaw. Si Jesus misaad usab nga tagan-an silag “pagkaon sa hustong panahon” pinaagi sa iyang “kasaligan ug mabuot nga ulipon.” (Mateo 24:45) Ang maong “ulipon” mao ang tibuok nga pundok sa dinihogang mga Kristohanon sa yuta sa bisan unsang linaing panahon. Gigamit ni Kristo kining dinihogang pundok aron pagpatik ug impormasyon bahin sa pagkatuman sa mga tagna sa Bibliya ug sa paghatag ug tukma-panahong direksiyon bahin sa pagpadapat sa mga prinsipyo sa Bibliya diha sa modernong matag-adlawng kinabuhi. Busa, ang dinihogang mga Kristohanon sa pagkamapabilhon nagpahimulos nianang tanang espirituwal nga mga tagana. Apan ang pagsustento sa ilang espirituwal nga mga kinabuhi nagdepende dili lamang sa pagpasulod ug kahibalo bahin sa Diyos nganha sa ilang mga hunahuna ug mga kasingkasing. Si Jesus miingon: “Ang akong pagkaon mao ang pagbuhat ko sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Sa susama, ang dinihogang mga Kristohanon makasinatig katagbawan pinaagi sa pagkugi sa matag-adlaw sa pagbuhat sa gipadayag nga kabubut-on sa Diyos.

16. Unsay gihulagwayan sa pag-alagad diha sa halaran sa insenso?

¹⁶ Sa buntag ug sa gabii, ang usa ka saserdote naghalad ug insenso ngadto sa Diyos diha sa halaran sa insenso sa Balaan. Sa samang panahon, ang dili-saserdoteng mga magsisimba nag-ampo ngadto sa Diyos samtang nagtindog sa gawas nga mga sawang sa iyang templo. (Lucas 1:8-10) “Ang insenso,” mipatin-aw ang Bibliya, “nagakahulogan sa mga pag-ampo sa mga balaan.” (Pinadayag 5:8) “Hinaot ang akong pag-ampo maandam ingong insenso sa atubangan nimo,” misulat ang salmistang David. (Salmo 141:2) Gimahal usab sa dinihogang mga Kristohanon ang ilang pribilehiyo sa pagduol kang Jehova diha sa pag-ampo pinaagi ni Jesu-Kristo. Ang mainitong mga pag-ampo nga mogawas gikan sa kasingkasing maoy samag mahumot nga insenso. Ginadayeg usab sa dinihogang mga Kristohanon ang Diyos diha sa ubang mga paagi, nga ginagamit ang ilang mga ngabil aron pagtudlo sa uban. Ang ilang pag-agwanta atubangan sa mga kalisdanan ug ang ilang integridad ilalom sa pagsulay makapahimuot ilabina sa Diyos.​—1 Pedro 2:20, 21.

17. Unsay nalangkit sa katumanan sa matagnaong hulagway nga gitagna sa unang pagsulod sa hataas nga saserdote ngadto sa Labing Balaan sa Adlaw sa Pagtabon sa Sala?

¹⁷ Sa Adlaw sa Pagtabon sa Sala, ang hataas nga saserdote sa Israel kinahanglang mosulod sa Labing Balaan ug magsunog ug insenso diha sa bulawanong insensaryo nga may nagsigang mga baga. Kinahanglang buhaton kini una pa niya ipasulod ang dugo sa mga halad sa sala. Ingong katumanan niining matagnaong hulagway, ang tawong si Jesus naghupot ug absolutong integridad kang Jehova nga Diyos una pa ihalad ang iyang kinabuhi ingong usa ka malungtarong halad alang sa atong mga sala. Sa ingon gipasundayag niya nga ang usa ka hingpit nga tawo makahupot sa iyang integridad ngadto sa Diyos bisan unsa ang kapit-osang gipahamtang ni Satanas diha kaniya. (Proverbio 27:11) Sa dihang gisulayan, gipahimuslan ni Jesus ang pag-ampo “uban ang makusog nga mga pagtuaw ug mga luha, ug gidungog siya nga may pabor tungod sa iyang diyosnong kahadlok.” (Hebreohanon 5:7) Sa maong paagi iyang gihimaya si Jehova ingong ang matarong ug may-katungod nga Soberano sa uniberso. Gigantihan sa Diyos si Jesus pinaagi sa pagbanhaw kaniya gikan sa mga patay ngadto sa dili-mamatay langitnong kinabuhi. Sa maong hataas nga posisyon, si Jesus naghatag ug pagtagad sa ikaduhang katarongan sa iyang pag-anhi sa yuta, nga mao, nga magpasig-uli ang mahinulsolong tawhanong mga makasasala ngadto sa Diyos.​—Hebreohanon 4:14-16.

Ang Labaw nga Himaya sa Espirituwal nga Templo sa Diyos

18. Sa unsang paagi si Jehova nagdalag talagsaong himaya nganha sa iyang espirituwal nga templo?

¹⁸ “Labaw unya ang himaya niining ulahing balay kay nianang sa nahauna,” mitagna si Jehova. (Hageo 2:9) Pinaagi sa pagbanhaw kang Jesus ingong dili-mamatay nga Hari ug Hataas nga Saserdote, gipatungha ni Jehova ang talagsaong himaya ngadto sa iyang espirituwal nga templo. Si Jesus karon makaarang na sa pagdalag “walay-kataposang kaluwasan niadtong tanan nga nagasugot kaniya.” (Hebreohanon 5:9) Ang unang nagpakita sa maong pagkamasinundanon mao ang 120 ka tinun-an nga nakadawat ug balaang espiritu panahon sa Pentekostes sa 33 K.P. Ang basahong Pinadayag mitagna nga kining espirituwal nga mga anak sa Israel sa kataposan mokabat ug 144,000. (Pinadayag 7:4) Human mamatay, daghan kanila ang nagpabiling walay panimuot diha sa komong lubnganan sa katawhan, nga nagpaabot sa panahon sa presensiya ni Jesus nga may harianong gahom. Ang matagnaong kronolohiya nga anaa sa Daniel 4:10-17, 20-27 nagpunting sa 1914 ingong panahon aron mosugod si Jesus pagmando taliwala sa iyang mga kaaway. (Salmo 110:2) Sulod sa mga dekada nga abante, ang dinihogang mga Kristohanon maikagong nagpaabot nianang tuiga. Ang unang gubat sa kalibotan ug ang nag-ubang mga kaalaotan diha sa katawhan mihatag ug pamatuod nga si Jesus sa pagkatinuod naentrono na ingong Hari niadtong 1914. (Mateo 24:3, 7, 8) Wala madugay human niadto, kay ang panahon miabot na aron “magsugod ang paghukom diha sa balay sa Diyos,” gituman ni Jesus ang saad ngadto sa iyang dinihogang mga tinun-an nga natulog diha sa kamatayon: “Ako moanhi pag-usab ug pagadawaton kamo ngadto sa akong kaugalingon.”​—1 Pedro 4:17; Juan 14:3.

19. Sa unsang paagi ang nahibilin sa 144,000 nakasulod sa langitnong Labing Balaan?

¹⁹ Ang 144,000 nga mga membro sa balaang pagkasaserdote wala pa ngatanan makasinatig kataposang pagtimri ug natigom ngadto sa ilang langitnong pinuy-anan. Ang nahibilin kanila buhi pa sa yuta diha sa espirituwal nga kahimtang nga gihulagwayan sa Balaan, nga gibulag gikan sa balaang presensiya sa Diyos pinaagi sa “kurtina,” o babag, sa ilang unodnong mga lawas. Samtang kini sila mamatay nga matinumanon, sila dihadiha banhawon ingong dili-mamatay nga espirituwal nga mga linalang aron moduyog niadtong sakop sa 144,000 nga tua na sa langit.​—1 Corinto 15:51-53.

20. Unsang hinungdanong buluhaton ang ginahimo sa mga nahibilin sa balaang pagkasaserdote niining panahona, ug unsay mga sangpotanan?

²⁰ Tungod sa daghan kaayong mga saserdote nga nag-alagad duyog sa dakong Hataas nga Saserdote sa langit, ang espirituwal nga templo sa Diyos nakadawat ug dugang nga himaya. Kasamtangan, ang mga nahibilin sa balaang pagkasaserdote nagabuhat ug bililhong buluhaton sa yuta. Pinaagi sa ilang pagwali, ang Diyos ‘nagauyog sa tanang nasod’ pinaagi sa mga kapahayagan sa iyang paghukom, sumala sa gitagna sa Hageo 2:7. Sa samang panahon, ang minilyong magsisimba nga gibatbat ingong “ang tilinguhaong mga butang sa tanang nasod” nagahugop nganha sa yutan-ong mga sawang sa templo ni Jehova. Sa unsang paagi kini sila motakdo sa kahikayan sa Diyos sa pagsimba, ug unsang umaabot nga himaya ang atong madahom alang sa iyang dakong espirituwal nga templo? Kining mga pangutanaha pagasusihon sa sunod artikulo.

Mga Pangutana Agig Pagsubli

◻ Unsang talagsaong panig-ingnan ang gihatag ni Jesus sa 29 K.P.?

◻ Unsang kahikayan ang milihok sa 29 K.P.?

◻ Unsay gihulagwayan sa Balaan ug sa Labing Balaan?

◻ Sa unsang paagi ang dakong espirituwal nga templo gihimaya?

[Hulagway sa panid 17]

Sa dihang si Jesus nadihogan sa balaang espiritu sa 29 K.P., ang dakong espirituwal nga templo sa Diyos nagsugod paglihok