Mga Pangutana Gikan sa mga Magbabasa

◼ Unsay gitumong ni Jesus sa “niini” sa gisukna niya si apostol Pedro, “Gihigugma mo ba ako labaw pa niini?”

Ang gibanhaw nga Jesus didto sa Dagat sa Galilea. Atong mabasa: “Ug sa nakapamahaw na sila, si Jesus miingon kang Simon Pedro: ‘Simon nga anak ni Juan, gihigugma mo ba ako labaw pa niini?’ Siya miingon kaniya: ‘Oo, Ginoo, nasayod ka nga gihigugma ko ikaw.’ Siya miingon kaniya: ‘Pakan-a ang akong mga nating karnero.’”​—Juan 21:15.

Bisan tuod ang genero sa usa ka Gregong pronombre usahay nagapaila sa gihisgotan niini o subject, ang plural o tinagdaghan nga touʹton (“niini”) mahimong magbaton sa maskulino, peminino, o neuter nga subject. Busa, ang mga eskolar nagpaila sa tulo ka posibleng kahulogan sa mga pangutana ni Jesus:

1. Gihigugma mo ba ako labaw pa kay sa imong paghigugma niining ubang tinun-an?

2. Gihigugma mo ba ako labaw pa kay sa paghigugma kanako niining mga tinun-an?

3. Gihigugma mo ba ako labaw pa kay niining mga butanga, sama sa mga isda?

Mangatarongan kita niining tulo sa pagtino kon hain ang labing posible.

Numero 1. Sa prangka, pila ka Kristohanon ang maghunahuna nga si Kristo mangutana, ‘Gihigugma mo ba ako labaw sa imong paghigugma sa mga tinun-an?’ Siyempre angay labaw natong higugmaon siya! Morag katingad-anan gayod nga suknaon si Pedro nianang pangutanaha. Dili pa dugay nga siya didto sa sakayan uban sa unom pa ka ubang tinun-an, apan sa nailhan niya si Jesus didto sa baybay, gibiyaan ni Pedro ang mga tinun-an ug milangoy paingon sa baybay. Sa pagpakita sa susamang paghigugma, sa gisukna ni Kristo kon ang mga apostol buot bang molakaw uban niadtong nangapandol, si Pedro miinogn nga siya determinado nga mounong kang Jesus.​—Juan 6:66-69; 21:7, 8.

Numero 2. Unsa man ang posibilidad nga gipasabot ni Jesus, ‘Pedro, gihigugma mo ba ako labaw kay sa paghigugma sa ubang mga tinun-an?’ Gipaluyohan sa daghang komentarista kining hunahunaa, sanglit si Pedro sayosayo miangkon nga siya labaw nga maunongon kang Jesus kay sa uban. (Mateo 26:33-35) Apan, ang pagsabot sa Juan 21:15 niining paagiha nagkinahanglan nga gipasabot ang wala-ipahayag nga berbo, sama sa “Gihigugma mo ba ako labaw kay sa [paghigugma] niini?” Apan kanang ekstra nga berbo wala diha sa pangutana ni Jesus, ug kana nagahatag sa mga sulirang gramatikanhon. Dugang pa, mopatim-aw nga wala sa lugar nga suknaon ni Jesus si Pedro sa pagtandi sa gidak-on sa iyang gugma ngadto sa gidak-on sa gugma nga tingali mabatonan sa uban. Wala ba tul-ira ni Jesus ang mga apostol sa dihang sila nag-indigay?​—Marcos 9:33-37; 10:35-44; Lucas 22:24-27.

Nan, mahimo kaha nga ang Numero 3 mao ang gisukna ni Jesus, ‘Gihigugma mo ba ako labaw pa niining mga butanga sama sa mga isda?’ Kini nga posibilidad mohaom sa paagi sa pagkahan-ay sa pangutana diha sa Grego, kay si Pedro gipapili man tali sa duha ka butang (tali kang Jesus ug “niini”). Kanang pangutanaha haom usab tungod sa kagahapon ni Pedro. Siya usa sa unang mga tinun-an nga misunod kang Jesus. (Juan 1:35-42) Hinunoa, daw wala dayon mosunod si Pedro kang Jesus sa bug-os panahon. Hinuon, siya mibalik sa iyang pagpangisda. Busa, pila ka bulan sa ulahi gitawag ni Jesus si Pedro gikan niadtong dakong patigayon aron mahimong ‘mangingisda sa mga tawo.’ (Mateo 4:18-20; Lucas 5:1-11) Bisan pa niana, tapos sa pagkamatay ni Jesus, si Pedro nangunay sa pagbalik sa maong karera, nga nagsulti sa pipila sa mga tinun-an: “Ako mangisda.”​—Juan 21:2, 3.

Busa posible nga si Jesus nagpasabot kang Pedro nga kinahanglang himoon ang tinong desisyon. Unsa bay iyang ibutnag nga panguna sa kinabuhi​—ang pagkasumusunod ni Jesus o pagpangagpas sa usa ka karera, sumala sa gipaila sa mga isda nga napundok sa ilang atubangan? Unsa ka bililhon sa kasingkasing ni Pedro ang mga isda, ang mga pukot, ang mga sakayan, ug ang pakighugoy sa isigkamangingisda? Tinuod bang biyaan ni Pedro kining makalipay nga mga butang aron ibutang nga panguna ang gugma kang Kristo ug ang mosangpot nga pagpakaon sa “nating mga karnero” ni Jesus?​—Juan 21:17.

Makasukna kita sa atong kaugalingon sa susamang pangutana maylabot ‘niining mga butanga’ nga tingali makadani kanato, sama sa atong makaiikag nga trabaho o patigayon, atong pagkahimuot sa sekular nga edukasyon, atong balay, o, paboritong matanag sa kalingawan. Kita prangkang makapalandong: ‘Gihigugma ko ba si Jesus labaw kay sa bisan hain o tanan niining mga butanga?’ Gipakita ni Jesus nga kon ang atong tinong tubag maoy oo, atong ipakita kana pinaagi sa pagpakaon sa “nating mga karnero.”

[Picture Credit Line sa panid 31]

Pictorial Archive (Near Eastern History) Est.