Sundoga ang Ilang Pagtuo
Ang Agalon Nagtudlo Kaniya sa Pagpasaylo
SI Pedro wala malimot niadtong makapaguol nga higayon sa dihang nagsugat ang ilang panan-aw. Nakita ba niya sa mga mata ni Jesus ang kahigawad ug kasuko? Wala kita mahibalo; ang giingon lang sa inspiradong rekord mao nga “ang Ginoo milingi ug mitan-aw kang Pedro.” (Lucas 22:61) Apan nianang usa lang ka pagtan-aw, nakita ni Pedro ang kaseryoso sa iyang sayop. Siya nakaamgo nga iyang nabuhat ang mismong gitagna ni Jesus, ang butang nga gipangandakan ni Pedro nga dili gyod niya mabuhat—ang iyang paglimod sa iyang minahal nga Agalon. Naguol kaayo si Pedro, ug lagmit nga kadto ang labing makapasubong yugto sa iyang kinabuhi.
Apan wala kana magpasabot nga wala nay paglaom si Pedro. Kay siya may dakong pagtuo, siya mahimong makabangon sa iyang kasaypanan ug makakat-on sa usa sa kinadak-ang leksiyon nga gitudlo ni Jesus—ang pagpasaylo. Ang matag usa kanato kinahanglang makakat-on niana, busa atong susihon kon sa unsang paagi iyang nakat-onan kining mapait nga leksiyon.
Daghan Pa Siyag Angayng Makat-onan
Mga unom ka bulan una pa niadto sa ilang lungsod sa Capernaum, si Pedro miduol kang Jesus ug nangutana: “Ginoo, pila ka higayon nga ang akong igsoon makasala batok kanako ug ako magpasaylo kaniya? Hangtod ba sa makapito?” Naghunahuna tingali si Pedro nga mapinasayloon na kaayo siya. Total, ang relihiyosong mga lider sa iyang panahon nagtudlo nga kutob lang sa tulo ka beses ang pagpasaylo! Si Jesus mitubag: “Dili, Hangtod sa makapito, kondili, Hangtod sa kapitoag-pito.”—Mateo 18:21, 22.
Buot bang ipasabot ni Jesus nga ilista ni Pedro ang mga sala nga nahimo sa uban batok kaniya? Dili; hinunoa, pinaagi sa paghimo sa 7 nga 77, gipasabot ni Jesus nga walay kinutoban ang pagpasaylo. Gipakita ni Jesus nga si Pedro naimpluwensiyahan sa tig-a ug dili-mapinasayloong tinamdan nga kaylap kaayo niadtong panahona, nga daw naghimog listahan sa matag sayop nga nahimo sa uban. Apan ang pagpasaylo nga gipasukad sa mga sukdanan sa Diyos maoy dagaya.
Si Pedro wala mosupak kang Jesus. Apan nasilsil ba sa iyang kasingkasing ang maong leksiyon? Usahay mas makat-onan nato ang pagpasaylo kon kita mismo ang nanginahanglan niana. Busa atong balikan ang mga hitabo nga mitultol sa kamatayon ni Jesus. Sa maong malisod nga yugto, daghang higayon nga si Pedro nagkinahanglag pagpasaylo sa iyang Agalon.
Mas Dakong Panginahanglan sa Kapasayloan
Kadto maoy usa ka halandomong gabii—ang kataposang gabii ni Jesus dinhi sa yuta. Daghan pa ang angayng itudlo ni Jesus sa iyang mga apostoles, sama sa pagkamapaubsanon. Si Jesus naghatag ug panig-ingnan pinaagi sa paghugas sa ilang mga tiil, usa ka buluhaton nga sagad gihimo sa kinaubsang sulugoon. Sa sinugdan, gikuwestiyon ni Pedro ang gibuhat ni Jesus. Dayon iyang gidumilian kana. Human niana, siya miinsistir nga dili lang ang iyang mga tiil ang hugasan, kondili hasta sab ang iyang mga kamot ug ulo! Wala mawad-ig pailob si Jesus apan kalmadong mipatin-aw sa kahinungdanon ug sa kahulogan sa iyang gibuhat.—Juan 13:1-17.
Apan wala madugay, ang mga apostoles naglalis kon kinsa kanila ang kinalabwan. Seguradong lakip si Pedro sa maong makauulawng pagpasundayag sa garbo. Bisan pa niana, si Jesus malulutong nagtul-id kanila ug nagdayeg pa gani sa ilang maayong nabuhat—ang pag-unong nila sa ilang Agalon. Apan, siya nagtagna nga silang tanan mobiya kaniya. Si Pedro mitubag nga siya mounong kang Jesus bisan pa hangtod sa kamatayon. Sa kasukwahi, si Jesus nagtagna nga ilimod ni Pedro ang iyang Agalon sa tulo ka beses nianang gabhiona sa dili pa motuktugaok ug kaduha ang sunoy. Wala lamang mosupak si Pedro sa giingon ni Jesus, apan nanghambog pa gani nga mas magmatinumanon siya kay sa ubang mga apostoles!—Mateo 26:31-35; Marcos 14:27-31; Lucas 22:24-28.
Hapit na ba mawad-ig pailob si Jesus kang Pedro? Sa pagkatinuod, niining malisod nga kahimtang, si Jesus padayong nagtan-aw sa maayong mga hiyas sa iyang dili-hingpit nga mga apostoles. Siya nahibalo nga si Pedro magpakyas kaniya, apan siya miingon: “Nangamuyo ako alang kanimo nga unta ang imong pagtuo dili moangka; ug ikaw, sa mahibalik ka na, palig-ona ang imong mga igsoon.” (Lucas 22:32) Busa masaligon si Jesus nga si Pedro makabangon sa iyang kasaypanan ug makabalik sa matinumanong pag-alagad. Pagkamaluloton ug pagkamapinasayloon gayod ni Jesus!
Sa ulahi, didto sa tanaman sa Getsemane, si Pedro kinahanglang tul-iron dili lang makausa. Si Jesus naghangyo kaniya, maingon man kang Santiago ug Juan, nga padayong magbantay samtang Siya mag-ampo. Si Jesus naguol kaayo ug nagkinahanglag suporta, apan si Pedro ug ang uban pa pila ka beses nga nakatulog. Sa pagpakitag pagkamabination ug pagkamapasayloon, si Jesus miingon: “Hinuon, maikagon ang espiritu, apan maluya ang unod.”—Marcos 14:32-38.
Wala madugay, miabot ang panon sa mga tawo nga nagdalag mga sulo, espada, ug mga puspos. Sa maong panahon, gikinahanglan ang maalamon ug mainampingong paglihok. Apan si Pedro mitigbas dayon kang Malco, nga ulipon sa hataas nga saserdote, ug iyang naputol ang dalunggan niini. Kalmadong gitul-id ni Jesus si Pedro, giayo ang samad ni Malco, ug gipatin-aw ang prinsipyo bahin sa paglikay sa kapintasan nga nahimong giya sa iyang mga sumusunod hangtod karon. (Mateo 26:47-55; Lucas 22:47-51; Juan 18:10, 11) Si Pedro kadaghan nang makasala nga nagkinahanglag pagpasaylo sa iyang Agalon. Ang iyang kahimtang nagpahinumdom kanato nga “kitang tanan mangapandol sa makadaghan.” (Santiago 3:2) Kinsa kanato ang wala magkinahanglan sa kapasayloan sa Diyos sa matag adlaw? Apan alang kang Pedro, daghan pa ang mahitabo nianang gabhiona. Siya makahimog mas grabe pa nga kasaypanan.
Ang Kinadak-ang Sayop ni Pedro
Si Jesus miingon sa panon nga kon siya ang ilang gipangita, pasagdan nilang mobiya ang iyang mga apostoles. Si Pedro walay nahimo samtang gigapos sa mga tawo si Jesus. Dayon si Pedro mikalagiw sama sa ubang mga apostoles.
Lagmit si Pedro ug Juan miadto duol sa balay sa kanhing Hataas nga Saserdote nga si Anas, diin si Jesus unang gidala aron sukitsukiton. Sa dihang si Jesus gidala sa laing dapit, si Pedro ug Juan misunod apan midistansiyag diyutay. (Mateo 26:58; Juan 18:12, 13) Si Pedro dili talawan. Ang iyang pagsunod nagpakita nga siya dunay kaisog. Ang panon armado, ug nasamdan na ni Pedro ang usa kanila. Bisan pa niana, wala mapakita ni Pedro ang maunongong gugma nga iyang gipangandakan—ang pagkaandam mamatay uban sa iyang Agalon kon gikinahanglan.—Marcos 14:31.
Sama kang Pedro, daghan karon ang gustong mosunod kang Jesus apan nagpadistansiya lang—sa paagi nga sila dili mamatikdan. Apan sama sa giingon ni Pedro sa ulahi, ang bugtong paagi nga atong masunod si Kristo mao ang pagpaduol gayod kaniya kutob sa atong maarangan, pinaagi sa pagsundog sa iyang panig-ingnan bisag unsa pay mahitabo.—1 Pedro 2:21.
Sa kataposan si Pedro nakaabot sa ganghaan sa usa sa kinanindotang mansiyon sa Jerusalem. Kadto mao ang balay ni Caifas, ang adunahan ug impluwensiyadong hataas nga saserdote. Ang maong mga balay sagad adunay sawang sa tunga ug may ganghaan sa atubangan niini. Si Pedro nakaabot sa ganghaan apan wala pasudla. Si Juan nga didto na sa sulod migula aron hangyoon ang magbalantay nga pasudlon si Pedro. Mopatim-aw nga si Pedro wala monunot kang Juan; wala usab siya mosulod sa balay aron ubanan ang iyang Agalon. Siya nagpabilin sa sawang, diin ang ubang ulipon ug mga sulugoon nagpalabay sa tugnaw nga kagabhion atubangan sa siga sa kalayo, nga nagtan-aw sa pagsulod-gawas sa bakakong mga saksi samtang gihusay si Jesus.—Marcos 14:54-57; Juan 18:15, 16, 18.
Tungod sa dan-ag sa kalayo, ang babaye nga nagpasulod kang Pedro sa ganghaan nakaila na kaniya. Siya miakusar kang Pedro: “Ikaw, usab, kauban ni Jesus nga Galileanhon!” Kay nakalitan, gilimod ni Pedro nga siya nakaila kang Jesus ug konohay wala siya makasabot sa gisulti sa babaye. Siya miadto duol sa ganghaan aron dili mamatikdan, apan dihay laing babaye nga nakaila kaniya ug miingon usab: “Kining tawhana kauban ni Jesus nga Nasaretnon.” Si Pedro nanumpa: “Wala ako makaila nianang tawhana!” (Mateo 26:69-72) Lagmit nga human niining ikaduhang paglimod nga si Pedro nakadungog sa tuktugaok sa sunoy, apan siya balisa kaayo mao nga wala niya mahinumdomi ang gitagna ni Jesus pipila lang ka oras ang milabay.
Sa misunod nga mga gutlo, si Pedro naningkamot gihapon nga dili mamatikdan. Apan dihay grupo sa mga tawo nga nagtindog sa sawang nga miduol kaniya. Ang usa kanila paryente ni Malco, ang ulipon nga nasamdan ni Pedro. Siya miingon kang Pedro: “Dili ba nakita ko ikaw didto sa tanaman kauban niya?” Gibati ni Pedro nga kinahanglang kombinsihon niya sila nga sayop ang ilang hunahuna. Busa nanumpa siya nga matinunglo kon namakak siya. Pagkabungat niya sa maong mga pulong, ang sunoy mituktugaok—ang ikaduha nga nabatian ni Pedro nianang gabhiona.—Juan 18:26, 27; Marcos 14:71, 72.
Mao pay paggawas ni Jesus sa balkonahe nga nag-umbaw sa sawang. Nianang tungora, sumala sa gihisgotan sa sinugdanan, nag-abot ang ilang panan-aw ni Pedro. Naamgohan ni Pedro kon unsa ka grabe ang sayop nga iyang nahimo sa iyang Agalon. Si Pedro mibiya sa sawang nga nahugno pag-ayo tungod sa iyang sala. Siya mipaingon sa kadalanan sa siyudad, nga gidan-agan sa talisalop nang takdol nga bulan. Grabe kaayo ang iyang gibating kaguol ug siya mihilak sa hilabihan.—Marcos 14:72; Lucas 22:61, 62.
Niana nga kahimtang, dali kaayong makahunahuna ang usa ka tawo nga dili na gayod mapasaylo ang iyang mga sala. Lagmit nga ingon usab niana ang gihunahuna ni Pedro. Husto ba ang maong panghunahuna?
Dili na ba Mapasaylo si Pedro?
Lisod kaayong handurawon ang gibating kasakit ni Pedro pagkabuntag ug sa dihang iyang nakita ang mga panghitabo nianang adlawa. Lagmit mibati siyag grabeng pagbasol sa dihang namatay si Jesus pagkahapon human sa dugayng pagpaantos! Lagmit naguol kaayo si Pedro nga nakadugang siya sa kasakit sa iyang Agalon sa kataposang adlaw sa Iyang kinabuhi ingong tawo. Bisan pa sa grabeng kaguol, si Pedro wala magpadaog niana. Kita nahibalo niini tungod kay sa wala madugay siya nakig-uban na sa iyang mga igsoon sa pagtuo. (Lucas 24:33) Sa walay duhaduha ang tanang apostoles nagbasol sa ilang gibuhat sa maong gabii, ug ilang gihupay ang usag usa.
Dinhi atong nakita ang usa sa kinamaayohang desisyon nga nahimo ni Pedro. Sa dihang makasala ang usa ka alagad sa Diyos, ang labing hinungdanon dili ang kagrabe sa iyang sala, kondili ang kadako sa iyang determinasyon nga mobangon ug tul-iron ang nahimong kasaypanan. (Proverbio 24:16) Gipakita ni Pedro kon unsa ka lig-on ang iyang pagtuo pinaagi sa pagpakig-uban sa iyang mga isigkamagtutuo bisan pa sa iyang kaguol. Kon grabe ang kaguol sa usa, mahimong matental siya nga ilain ang kaugalingon apan kini peligroso. (Proverbio 18:1) Maalamon gayod nga makig-uban sa mga isigkamagtutuo ug palig-onon pag-usab ang pagtuo.—Hebreohanon 10:24, 25.
Tungod kay kauban ni Pedro ang iyang espirituwal nga mga igsoon, iyang nahibaloan ang makapakurat nga balita nga ang lawas ni Jesus wala na sa lubnganan. Si Pedro ug Juan midagan paingon sa gilubngan ni Jesus. Si Juan, nga tingali mas batan-on, maoy unang nakaabot. Sa pagkakita nga bukas na ang lubnganan, siya nagpanuko sa pagsulod. Apan lahi si Pedro. Bisag gikutasan pa, siya misulod dayon. Ang lubnganan wala nay sulod!—Juan 20:3-9.
Mituo ba si Pedro nga nabanhaw na si Jesus? Sa sinugdan wala, bisan pag ang matinumanong mga babaye nagtaho nga nagpakita kanila ang mga manulonda aron ipahibalo ang pagkabanhaw ni Jesus. (Lucas 23:55–24:11) Apan sa ulahing bahin nianang adlawa, nawala na ang kaguol ug pagduhaduha diha sa kasingkasing ni Pedro. Buhi si Jesus, ug siya usa na ka gamhanang espiritu! Siya mipakita sa tanan niyang apostoles. Apan una pa niana, diha siyay gihimo. Ang mga apostoles miingon nianang adlawa: “Sa pagkatinuod ang Ginoo gibangon ug siya mipakita kang Simon!” (Lucas 24:34) Sa susama, si apostol Pablo misulat sa ulahi bahin niadtong talagsaong adlaw nga si Jesus “nagpakita kang Cefas, unya ngadto sa napulog-duha.” (1 Corinto 15:5) Ang Cefas ug Simon maoy laing mga ngalan ni Pedro. Si Jesus mipakita kaniya nianang adlawa—dayag sa dihang nag-inusara si Pedro.
Wala isulti sa Bibliya kon unsay nahitabo nianang makapatandog nga panagkita ni Jesus ug ni Pedro. Ato lang mahanduraw ang kalipay ni Pedro sa dihang nakita niya pag-usab ang iyang Ginoo ug sa kahigayonan nga mapahayag niya ang iyang kaguol ug pagbasol. Wala siyay laing gitinguha kondili ang kapasayloan sa iyang sala. Kita makaingon nga siya gipasaylo ni Jesus sa madagayaon gayod. Angayng hinumdoman sa mga Kristohanon karon nga nahulog sa grabeng kasal-anan ang nahitabo kang Pedro. Dili gayod kita maghunahuna nga kita dili na mapasaylo sa Diyos. Si Jesus hingpit nga nagsundog sa iyang Amahan, kinsa “magpasaylo sa madagayaon gayod.”—Isaias 55:7.
Dugang Pamatuod nga Siya Gipasaylo
Giingnan ni Jesus ang iyang mga apostoles sa pag-adto sa Galilea, diin sila magkita pag-usab. Sa ilang pag-abot didto, nakahunahuna si Pedro nga mangisda sa Dagat sa Galilea. Dihay pipila nga mikuyog kaniya. Sa makausa pa, si Pedro anaa na usab sa lanaw diin iyang nagugol ang sayong bahin sa iyang kinabuhi. Ang pag-igot sa sakayan, ang tinapya sa mga balod, ug ang paggunit sa pukot pamilyar kaayo kaniya. Iya kahang napamalandong nianang gabhiona kon unsay iyang buhaton karon nga natapos na ang yutan-ong ministeryo ni Jesus? Nakahunahuna ba siya sa pagbalik sa pagpangisda? Wala kita mahibalo, apan nianang gabhiona sila walay kuha.—Mateo 26:32; Juan 21:1-3.
Apan sa pagbanagbanag, dihay tawo sa baybayon nga mitawag kanila ug miawhag sa pagtaktak sa ilang pukot sa pikas bahin sa sakayan. Sila misunod ug nakakuhag 153 ka dagkong isda! Si Pedro nakaila kon kinsa kadtong tawhana. Siya miambak sa sakayan ug milangoy paingon sa baybayon. Didto sa baybayon, gipakaon sila ni Jesus ug sinugbang isda. Ang iyang pagtagad nasentro kang Pedro.
Si Jesus nangutana kang Pedro kon siya nahigugma ba sa iyang Ginoo “labaw pa niini”—dayag nga nagpunting sa daghang isda nga nakuha. Sa kasingkasing ni Pedro, ang iya bang gugma sa pagpangisda mas labaw kay sa iyang gugma kang Jesus? Maingon nga gilimod ni Pedro ang iyang Ginoo sa tulo ka higayon, si Jesus naghatag kaniyag kahigayonan sa pagpamatuod sa iyang gugma sa tulo usab ka higayon atubangan sa iyang mga higala. Sa dihang gihimo kana ni Pedro, giingnan siya ni Jesus kon sa unsang paagi ikapakita ang maong gugma: pinaagi sa pag-una sa pag-alagad sa Diyos, sa pagpakaon ug pag-alima sa mga karnero ni Kristo, nga mao ang iyang matinumanong mga sumusunod.—Juan 21:4-17.
Busa gipasaligan ni Jesus si Pedro nga siya hinungdanon gihapon kaniya ug sa iyang Amahan. Si Pedro gisangonan ug dakong responsabilidad diha sa kongregasyon ubos sa pagdumala ni Kristo. Pagkadakong pamatuod sa bug-os nga pagpasaylo ni Jesus! Segurado nga natandog gayod si Pedro sa gipakitang kaluoy kaniya.
Matinumanong gituman ni Pedro ang iyang responsabilidad sulod sa daghang katuigan. Iyang gipalig-on ang iyang mga igsoon, nga maoy gisugo ni Jesus kaniya sa gabii una Siya mamatay. Si Pedro maluloton ug mapailobong nag-atiman ug nagpakaon sa mga sumusunod ni Kristo. Ang tawong ginganlag Simon nakatuman gayod sa kahulogan sa ngalan nga gihatag ni Jesus kaniya—ang Pedro, o Bato—pinaagi sa pagkahimong dili-matarog, lig-on, ug kasaligang impluwensiya sa kongregasyon. Ang ebidensiya niana makita diha sa duha ka personal nga sulat ni Pedro nga nahimong hinungdanong bahin sa mga basahon sa Bibliya. Ang maong mga sulat nagpakita usab nga si Pedro wala malimot sa leksiyon nga iyang nakat-onan gikan kang Jesus bahin sa pagpasaylo.—1 Pedro 3:8, 9; 4:8.
Hinaot nga kita usab nakakat-on sa maong leksiyon. Adlaw-adlaw ba kitang nangayog pasaylo sa Diyos tungod sa atong daghang kasal-anan? Ato bang gidawat ang maong pagpasaylo ug nagtuo sa gahom niini sa paghinlo kanato? Ug kita ba nagapasaylo usab sa uban? Kon mao, atong gisundog ang pagtuo ni Pedro—ug ang pagkamaluluy-on sa iyang Agalon.
[Blurb sa panid 22]
Si Pedro kadaghan makasala nga nagkinahanglag pagpasaylo sa iyang Agalon, apan kinsa ba kanato ang wala magkinahanglag pagpasaylo sa matag adlaw?
[Hulagway sa panid 23]
“Ang Ginoo milingi ug mitan-aw kang Pedro”
[Hulagway sa panid 24]
“Ang Ginoo . . . mipakita kang Simon!”