Sa Unsang Paagi Mabuhi Ka sa Walay Kataposan?
Tubag sa Bibliya
Ang Bibliya nagsaad: “Ang magbuhat sa kabubut-on sa Dios magpabiling buhi hangtod sa kahangtoran.” (1 Juan 2:17, Ang Bag-ong Maayong Balita Biblia) Unsay gusto sa Diyos nga imong himoon?
Pagkat-on bahin sa Diyos ug sa iyang Anak, si Jesus. Sa iyang pag-ampo sa Diyos, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Unsay nalangkit sa “pagkuha ug kahibalo” o pagkaila sa Diyos ug kang Jesus? Mailhan nato sila pinaagi sa pagtuon sa Bibliya ug pagpadapat sa mga gitudlo niini sa atong kinabuhi.a Gipadayag sa Bibliya ang hunahuna sa atong Maglalalang, si Jehova nga Diyos, nga mao ang Maghahatag sa kinabuhi. (Buhat 17:24, 25) Ang Bibliya naghisgot pod bahin sa iyang Anak, si Jesus, kinsa nagtudlo “mahitungod sa kinabuhing walay kataposan”—Juan 6:67-69.
Ipakita ang pagtuo sa halad lukat ni Jesus. Si Jesus mianhi sa yuta “aron sa pag-alagad ug sa paghatag sa iyang kalag [o, kinabuhi] nga usa ka lukat.” (Mateo 20:28) Ang halad lukat ni Jesus naghatag ug kahigayonan sa mga tawo nga mabuhi sa walay kataposan sa Paraiso nga yuta.b (Salmo 37:29) Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Matikdi nga dili igo ang pagtuo kang Jesus. Kinahanglan natong “magpasundayag ug pagtuo kaniya,” nga magkinabuhi uyon sa iyang mga gitudlo ug sa kabubut-on sa iyang Amahan.—Mateo 7:21; Santiago 2:17.
Palig-ona ang imong relasyon sa Diyos. Gusto sa Diyos nga masuod ta niya ug mahimong iyang higala. (Santiago 2:23; 4:8) Ang Diyos walay kataposan. Siya dili mamatay, ug gusto niya nga ang iyang mga higala mabuhi pod sa walay kataposan. Pinaagi sa iyang Pulong, ang Bibliya, gisulti sa Diyos kon unsay gusto niya para niadtong nangita niya: ‘Mabuhi unta kamo hangtod sa kahangtoran.’—Salmo 22:26.
Sayop nga mga Ideya Bahin sa Kinabuhing Walay Kataposan
Sayop nga ideya: Ang mga paningkamot sa tawo moresultag kinabuhing walay kataposan.
Ang tinuod: Bisag ang pag-uswag sa medisina nakatabang aron motaastaas ang kinabuhi sa tawo, kini dili moresultag kinabuhing walay kataposan. Ang Diyos lang ang makahatag natog kinabuhing walay kataposan, kay siya lang “ang tuboran sa kinabuhi.” (Salmo 36:9) Siya nagsaad nga iyang “lamyon . . . ang kamatayon hangtod sa kahangtoran.”—Isaias 25:8; 1 Juan 2:25.
Sayop nga ideya: Pipila lang ka rasa sa katawhan ang mabuhi sa walay kataposan.
Ang tinuod: Ang Diyos walay paboritismo. Gani, “sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Bisag unsa pay rasa ug kultura, ang tanang tawo nga nagmasinugtanon sa Diyos mabuhi sa walay kataposan.
Sayop nga ideya: Laay ang kinabuhing walay kataposan.
Ang tinuod: Ang nagtanyag sa kinabuhing walay kataposan mao ang Diyos, nga nahigugma kanato ug gusto nga magmalipayon ta. (Santiago 1:17; 1 Juan 4:8) Nahibalo siya nga aron magmalipayon ta, kinahanglang may katuyoan ang atong buluhaton. (Ecclesiastes 3:12) Ang Diyos nagsaad nga kadtong mabuhi sa yuta sa walay kataposan makabatog makapatagbaw ug mapuslanong buluhaton, nga makahatag ug kaayohan nila ug sa ilang mga minahal.—Isaias 65:22, 23.
Dugang pa, kadtong mabuhi sa walay kataposan padayong makakat-og bag-ong mga butang bahin sa Diyos ug sa iyang di maihap nga kalalangan. Iyang gibuhat ang tawo nga may tinguhang mabuhi sa walay kataposan ug mokat-on bahin kaniya, bisag sila “dili makatugkad sa buhat nga nahimo sa matuod nga Diyos sukad sa sinugdan hangtod sa kataposan.” (Ecclesiastes 3:10, 11) Busa, kadtong mabuhi sa walay kataposan dili mahutdag mga butang nga nindot kat-onon ug buhaton.
a Ang mga Saksi ni Jehova nagtanyag ug libreng pagtuon sa Bibliya. Para sa dugang impormasyon, tan-awa ang video nga Sa Unsang Paagi Ginahimo ang Bible Study?
b Tan-awa ang artikulong “Si Jesus Nagluwas Kanato—Sa Unsang Paagi?”