Ang Pulong ni Jehova Buhi
Mga Pangunang Punto Gikan sa Basahon ni Juan
SI Juan—“ang tinun-an nga gihigugma ni Jesus”—mao ang kataposang misulat sa inspiradong asoy bahin sa kinabuhi ug ministeryo ni Kristo. (Juan 21:20) Ang Ebanghelyo ni Juan gisulat sa mga 98 K.P., ug kini naghisgot sa mga detalye nga wala hisgoti sa laing tulo ka Ebanghelyo.
Gisulat ni apostol Juan ang iyang Ebanghelyo nga may tinong katuyoan. Mahitungod sa mga butang nga iyang gitala, siya miingon: “Kini nahisulat aron kamo motuo nga si Jesus mao ang Kristo nga Anak sa Diyos, ug aron nga, tungod sa pagtuo, makabaton kamo ug kinabuhi pinaagi sa iyang ngalan.” (Juan 20:31) Ang mensahe niini dako gayod ug kapuslanan kanato.—Heb. 4:12.
“TAN-AWA, ANG KORDERO SA DIYOS”
Sa pagkakita kang Jesus, si Juan Bawtista masaligong mipahayag: “Tan-awa, ang Kordero sa Diyos nga magakuha sa sala sa kalibotan!” (Juan 1:29) Samtang nagpanaw si Jesus sa Samaria, Galilea, Judea, ug sa silangang bahin sa Jordan nga nagsangyaw, nanudlo, ug naghimog gamhanang mga buhat, ‘daghang tawo ang nangadto ug mituo kaniya.’—Juan 10:41, 42.
Ang usa sa labing talagsaong mga milagro nga gihimo ni Jesus mao ang pagbanhaw kang Lazaro. Daghan ang mituo kaniya sa dihang nakita nilang nabanhaw ang usa ka tawo nga upat ka adlaw nang patay. Apan ang mga pangulong saserdote ug ang mga Pariseo nagsabotsabot sa pagpatay kang Jesus. Busa mipahawa si Jesus ug mipaingon “sa dapit nga duol sa kamingawan, sa usa ka siyudad nga gitawag Epraim.”—Juan 11:53, 54.
Tubag sa mga Pangutana Bahin sa Kasulatan:
1:35, 40—Gawas kang Andres, kinsa pa ang tinun-an nga nagtindog uban kang Juan Bawtista? Ang tig-asoy kanunayng nagtumong kang Juan Bawtista ingong “Juan” ug wala gayod magpaila sa iyang ngalan diha sa iyang Ebanghelyo. Busa ang wala nganli nga tinun-an lagmit mao ang magsusulat sa Ebanghelyo nga si Juan.
2:20—Unsang temploha ang “gitukod sulod sa kap-atag-unom ka tuig”? Ang gitumong sa mga Hudiyo mao ang templo ni Zorobabel nga gitukod pag-usab ni Haring Herodes sa Judea. Sumala sa historyano nga si Josephus, ang pagtukod pag-usab gisugdan sa ika-18 ka tuig nga pagmando ni Herodes, o sa 18/17 W.K.P. Walo ka tuig ang pagtukod sa sangtuwaryo sa templo ug sa ubang pangunang mga tinukod. Apan ang pagpanukod sa ubang mga estruktura duol sa templo nagpadayon saylo pa sa Paskuwa sa 30 K.P., dihang miingon ang mga Hudiyo nga gidangtan ug 46 ka tuig ang pagtukod niini.
5:14—Ang balatian ba maoy resulta sa sala nga nahimo? Dili. Ang tawo nga giayo ni Jesus nasakit sulod sa 38 ka tuig tungod sa napanunod nga pagkadili-hingpit. (Juan 5:1-9) Ang gipasabot ni Jesus mao nga tungod kay gipakitaan man ug kaluoy ang maong tawo, kinahanglan niyang subayon ang dalan sa kaluwasan ug dili na tuyoon ang pagpakasala, kay kon dili, siya makaagom ug labaw pa sa balatian. Siya mahimong sad-an nga dili na mapasaylo, nga takos sa kamatayon ug dili na mabanhaw.—Mat. 12:31, 32; Luc. 12:10; Heb. 10:26, 27.
5:24, 25—Kinsa ang mga “nakalabang na gikan sa kamatayon ngadto sa kinabuhi”? Si Jesus naghisgot bahin sa mga tawong patay sa espirituwal kaniadto apan sa pagkadungog sa iyang mga pulong sila mituo kaniya ug mihunong sa pagsubay sa ilang makasasalang dalan. Sila “nakalabang na gikan sa kamatayon ngadto sa kinabuhi” sa pagkaagi nga ang silot nga kamatayon gikuha gikan kanila ug gihatagan silag paglaom nga mabuhing walay kataposan tungod sa ilang pagtuo sa Diyos.—1 Ped. 4:3-6.
5:26; 6:53—Unsay kahulogan sa pagbaton ug “kinabuhi sa iyang kaugalingon”? Alang kang Jesu-Kristo, kini nagkahulogan sa pagdawat ug duha ka espesipikong katakos gikan sa Diyos—ang katakos sa paghatag sa mga tawo ug maayong baroganan uban kang Jehova ug ang gahom sa paghatag ug kinabuhi pinaagi sa pagbanhaw sa mga patay. Alang sa mga sumusunod ni Jesus, ang ‘pagbaton ug kinabuhi sa ilang kaugalingon’ nagkahulogan sa pagbaton ug kinabuhing walay kataposan. Mabatonan kana sa dinihogang mga Kristohanon sa dihang banhawon sila ngadto sa langitnong kinabuhi. Ang matinumanong mga tawo nga may yutan-ong paglaom makabatog kinabuhing walay kataposan human lamang sila makapasar sa kataposang pagsulay nga mahitabo human sa Usa ka Libo ka Tuig nga Pagmando ni Kristo.—1 Cor. 15:52, 53; Pin. 20:5, 7-10.
6:64—Nahibalo ba si Jesus sukad sa pagpili kang Judas Iskariote nga budhian siya niini? Lagmit wala. Hinuon, usa niana ka higayon sa tuig 32 K.P., giingnan ni Jesus ang iyang mga apostoles: “Usa kaninyo tigbutangbutang.” Lagmit niadtong panahona may namatikdan si Jesus bahin kang Judas Iskariote nga nagsugod na ang usa ka sayop nga dalan.—Juan 6:66-71.
Mga Leksiyon Alang Kanato:
2:4. Gipaila ni Jesus kang Maria nga kinahanglang sundon niya ang sugo sa iyang langitnong Amahan kay bawtismado na man siya nga dinihogang Anak sa Diyos. Bisan tuod mao pay pagsugod ni Jesus sa iyang ministeryo, siya bug-os nahibalo sa takna o panahon sa iyang buluhaton, lakip na sa iyang kamatayon ingong halad. Bisan ang usa ka suod nga membro sa pamilya dili makababag kaniya sa pagbuhat sa kabubut-on sa Diyos. Kinahanglang ingon usab niana ang atong determinasyon sa pag-alagad kang Jehova nga Diyos.
3:1-9. Ang panig-ingnan ni Nicodemo, nga usa ka magmamando sa mga Hudiyo, nagtudlo kanato ug duha ka leksiyon. Una, si Nicodemo nagpakitag pagkamapainubsanon, lalom nga pagsabot, ug kaamgohan sa kaugalingon niyang espirituwal nga panginahanglan, nga nag-ila sa ubos nga anak sa panday ingong magtutudlo nga gipadala sa Diyos. Ang pagkamapainubsanon gikinahanglan sa matuod nga mga Kristohanon karon. Ikaduha, si Nicodemo nagpanuko sa pagkahimong usa ka tinun-an sa dinhi pa si Jesus sa yuta. Lagmit tungod sa iyang kahadlok sa tawo, kabalaka sa iyang posisyon sa Sanhedrin, o sa iyang gugma sa iyang bahandi. Dinhi atong makat-onan ang usa ka hinungdanong leksiyon: Dili nato tugotan ang maong mga kiling sa pagpugong kanato ‘sa pagpas-an sa atong estaka sa pagsakit ug sa pagpadayon sa pasunod kang Jesus.’—Luc. 9:23.
4:23, 24. Aron dawaton sa Diyos ang atong pagsimba, kini kinahanglang mahiuyon sa kamatuoran nga gipadayag diha sa Bibliya ug magiyahan sa balaang espiritu.
6:27. Ang paghago alang sa “pagkaon nga magpabilin alang sa kinabuhing walay kataposan” nagpasabot nga maningkamot kita sa pagtagbaw sa atong espirituwal nga panginahanglan. Malipayon kita kon atong himoon kini.—Mat. 5:3.
6:44. Si Jehova personal nga nahingawa kanato. Iya kitang gikabig ngadto sa iyang Anak pinaagi sa pag-abot sa tagsatagsa kanato pinaagi sa buluhatong pagsangyaw ug pinaagi sa pagtabang kanato sa pagsabot sa mga kamatuoran diha sa Bibliya sa tabang sa Iyang balaang espiritu.
11:33-36. Ang pagpadayag sa atong gibati wala magpasabot nga kita mahuyang.
‘MAGPADAYON SA PAGSUNOD KANIYA’
Sa nagkaduol na ang Paskuwa sa 33 K.P., si Jesus mibalik sa Betania. Sa Nisan 9, siya miadto sa Jerusalem sakay sa usa ka nating asno. Sa Nisan 10, si Jesus mibalik pag-usab sa templo. Agig tubag sa iyang pag-ampo nga himayaon unta ang ngalan sa iyang Amahan, usa ka tingog gikan sa langit ang miingon: “Gihimaya ko na kini ug pagahimayaon ko kini pag-usab.”—Juan 12:28.
Samtang nangaon sila sa Paskuwa, gihatagan sila ni Jesus ug mahinungdanong tambag kay hapit na siyang mobiya ug nag-ampo siya alang kanila. Human sa pagdakop, paghusay, ug paglansang kaniya, si Jesus gibanhaw.
Tubag sa mga Pangutana Bahin sa Kasulatan:
14:2—Sa unsang paagi si Jesus ‘mag-andam ug dapit’ didto sa langit alang sa iyang matinumanong mga tinun-an? Kini naglakip sa pag-atubang ni Jesus sa Diyos ug pagpresentar sa bili sa iyang dugo ngadto Kaniya aron maaprobahan ang bag-ong pakigsaad. Ang pag-andam naglakip usab sa pagdawat ni Kristo sa harianong gahom, nga human niana magsugod ang langitnong pagpamanhaw sa iyang dinihogang mga sumusunod.—1 Tes. 4:14-17; Heb. 9:12, 24-28; 1 Ped. 1:19; Pin. 11:15.
14:16, 17; 16:7, 8, 13, 14—Sa pagtumong sa magtatabang, o sa espiritu sa kamatuoran, nganong gigamit ang pulong “kini” diha sa Juan 14:16, 17, samtang “siya” ug “niya” ang gigamit diha sa Juan 16:7, 8, 13, 14? Ang bugtong katarongan niini maoy gramatika. Sa Gregong pinulongan, nga gisulat ang Ebanghelyo ni Juan, ang pulong “magtatabang” gisulat sa masculine gender, apan ang pulong “espiritu” maoy neuter. Busa sa pagtala sa giingon ni Jesus, si Juan naggamit sa masculine pronoun, sama sa “siya” o “him” sa Iningles dihang nagtumong sa kon unsay himoon sa magtatabang. Ang neuter pronoun nga “kini” gigamit sa pagtumong sa kon unsay mapalampos sa espiritu sa kamatuoran.
19:11—Si Judas Iskariote bay gitumong ni Jesus sa dihang giingnan niya si Pilato bahin sa tawo nga nagtugyan Kaniya? Inay ipunting si Judas o si bisan kinsang tawo, lagmit ang gitumong ni Jesus mao ang tanang may bahin sa sala sa pagpapatay kaniya. Kini naglakip kang Judas, ‘sa pangulong mga saserdote ug sa tibuok Sanhedrin,’ ug bisan ‘sa mga panon sa katawhan’ nga nadani sa pagpangayo sa kagawasan ni Barabas.—Mat. 26:59-65; 27:1, 2, 20-22.
20:17—Nganong giingnan man ni Jesus si Maria Magdalena nga dili siya kuptan? Dayag nga gikuptan ni Maria si Jesus tungod kay nagtuo siya nga hapit nang mosaka si Jesus sa langit ug basig dili na niya siya igkita pag-usab. Aron makasalig siya nga dili pa mobiya si Jesus, giingnan siya ni Jesus nga dili na siya kuptan kondili sa paglakaw ug sultihan ang mga tinun-an ni Jesus bahin sa iyang pagkabanhaw.
Mga Leksiyon Alang Kanato:
12:36. Aron mahimong “mga anak sa kahayag,” o mga magbabanwag sa kahayag, kinahanglan kitang magkuhag tukmang kahibalo sa Pulong sa Diyos, ang Bibliya. Ug unya gamiton nato kanang kahibaloa aron mahigawas ang uban gikan sa espirituwal nga kangitngit ngadto sa kahayag sa Diyos.
14:6. Walay laing paagi nga kita uyonan sa Diyos kondili pinaagi lamang kang Jesu-Kristo. Pinaagi lamang sa pagtuo kang Jesus ug pagsunod sa iyang panig-ingnan nga kita makapakigsuod kang Jehova.—1 Ped. 2:21.
14:15, 21, 23, 24; 15:10. Ang pagsugot sa kabubut-on sa Diyos motabang kanato sa pagpabilin diha sa gugma sa Diyos ug sa gugma sa iyang Anak.—1 Juan 5:3.
14:26; 16:13. Ang balaang espiritu ni Jehova nagsilbing usa ka magtutudlo ug tigpahinumdom. Kini molihok usab aron sa pagbutyag sa mga kamatuoran. Busa, kini makatabang kanato nga mouswag sa kahibalo, kaalam, pagsabot, paghukom, ug katakos sa panghunahuna. Mao nga kinahanglan kitang magmalahutayon sa pag-ampo, nga espesipikong pangayoon ang maong espiritu.—Luc. 11:5-13.
21:15, 19. Gipangutana si Pedro kon iya bang gihigugma si Jesus labaw pa “niini,” o sa mga isda nga anaa sa ilang atubangan. Busa gipasiugda ni Jesus nga si Pedro kinahanglang mopili sa pagsunod kaniya nga bug-os panahon inay sa pagpangisda. Human matagad ang mga asoy sa Ebanghelyo, hinaot nadasig kita sa paghigugma kang Jesus nga labaw pa kay sa ubang mga butang nga makadani kanato. Dugang pa, kinahanglang bug-os kasingkasing kitang mopadayon sa pagsunod kaniya.
[Hulagway sa panid 31]
Unsay atong makat-onan gikan sa panig-ingnan ni Nicodemo?