Andam ka Bang Mamati sa Diyos?

KON mobasa kita sa Bibliya, ato dayong maamgohan nga ang kahimtang sa mga tawo sa unang siglo susama sa daghang paagi sa atoa karong adlawa. Dagaya ang imoralidad ug pagkalimbongan, ilabina taliwala sa malapasong mga silingan sa Israel, nga alang kanila ang imoralidad kasagaran maoy bahin sa relihiyon. Ang kinabuhi walay kapihoan alang sa mga tawong kabos, ug may politikanhong mga suliran. Sa pagkatuig 66 K.P., ang Israel ug ang Roma nagbugnoay sa dako nga gubat. Niadtong mga adlawa, sama karon, ang mga tawo nagakinahanglag tabang.

Sa relihiyosong paagi, daghan ang mga kaamgid niadtong mga adlawa ug sa atong panahon. Salingkapaw ang Hudiyong relihiyosong mga pangulo. (Mateo 23:15; Lucas 20:46, 47) Sa dili-Hudiyong kalibotan, nagkadaiya kaayo ang relihiyosong mga tinamdan gikan sa pagkamatahapon ngadto sa patuotuo ug panatikong relihiyosong kasibot. (Itandi ang Buhat 14:8-13; 19:27, 28.) Bisan sa bag-o pang Kristohanong kongregasyon, ang kahimtang dili maayo. Sa pagkatapos sa siglo, si apostol Juan nagpasidaan: “Daghang mga malimbongon ang nanungha sa kalibotan.” (2 Juan 7) Oo, niadto usab, daghang mini nga tambag gitanyag bahin sa ulohan sa relihiyon. Apan mabatonan ang kasaligang tabang.

Namati Ka ba Unta Kang Jesus?

Si Jesus naghatag ug maayong tambag niadtong mga adlawa. Maaghaton kaayo kadto nga mabasa nato ang epekto niini: “Ang mga panon natingala sa iyang paagi sa pagpanudlo.” (Mateo 7:28) Apan diyutay ra niadtong mga panon ang tinuod namati sa iyang gipamulong. Si Jesus mihimog milagrosong mga buhat ug mihatag sa maayong panig-ingnan sa diyosnong pagkinabuhi ug kagawian. Bisan pa niana, bisan ang giingong edukado-kaayong mga pangulo midumili sa pagsabot sa bili sa iyang gipamulong. Ngano?

Sa dakong sukod, kadto pagkamadapigon. Ang pipila mitamay kang Jesus tungod kay siya taga Nazareth. Ang uban nagsalikway kaniya tungod kay siya wala makatungha sa usa sa ilang mga tunghaan ug walay mga koneksiyon sa nagmandong matang. (Juan 1:46; 7:12, 15, 47, 48) Dugang pa, si Jesus wala magsulti kanunay sa butang gustong madunggan sa mga tawo. Ang matuod mao lamang ang iyang gisulti, ug ang mga Pariseo, pananglitan, kadaghanan nasilo sa iyang mga pulong. (Mateo 15:12-14) Sa pagkamatuod, tapos siya makasangyaw sa tulo ka tuig ug tunga, gipapatay siya sa Hudiyong relihiyosong mga pangulo. (Lucas 23:20-35) Dako kaayong higayon ang ilang nasayloan, sanglit si Jesus nagbaton sa “mga pulong sa kinabuhing walay kataposan”!​—Juan 6:68.

Kon nagpuyo ka sa Jerusalem niadtong panahona, mosunod ka kaha sa relihiyosong mga pangulo ug sa nahibilin sa panon? O ikaw kaha bukas-ug-kaisipan nga igo sa pagsabot sa gisulti ni Jesus? Kon mao, ikaw mahisama sa talagsaong babaye nga natagbo ni Jesus samtang siya diha sa iyang mga panaw.

Usa nga Namati

Natagbo niya kining bayhana samtang miagi siya sa Samaria. Milingkod siya tapad sa usa ka atabay aron mopahulay, ug ang babaye miabot aron mokalos ug tubig samtang siya didto. Wala kita masayod sa iyang ngalan, apan ang Bibliya nagatala nga si Jesus, bisan pag gikapoy, mipahimulos sa higayon sa pagsulti kaniya bahin sa relihiyon.​—Juan 4:5-15.

Karon, dihay daghang katarongan nganong kining bayhana basin dili magtagad sa pagduol ni Jesus. Siya sakop sa laing relihiyon​—ang Samarianhong paagi sa pagsimba lahi kay sa Hudiyonhon. Gawas pa, ang mga Hudiyo nagtamay sa mga Samarianhon ug wala makigbuylog kanila. Unya, ang Hudiyong mga lalaki kasagarang dili makigsulti sa mga babaye nga estranghero alang kanila. (Juan 4:9, 27) Dugang pa, ang Samarianhong babaye nagkinabuhig imoral nga kinabuhi, ug basin siya masuko kon sawayon o ibutyag ang iyang mga sala.—Juan 4:18.

Bisan pa niana, dili kana ang paagi sa iyang pagsanong. Hinunoa, nangutana siyag makataronganong mga pangutana ingong sanong sa mataktikanhon, makapukaw-interes nga pagduol ni Jesus. Samtang nagpadayon ang kabildo, siya mihisgot sa usa ka lisod nga ulohan, nga nagpaila sa relihiyosong kasungian nga naglungtad tali sa mga Hudiyo ug sa mga Samarianhon. Si Jesus mitubag nga maluluton apan prangka, nga nagsulti sa babaye: “Kamo nagasimba sa wala ninyo hiilhi; kami nagasimba sa among nailhan.” (Juan 4:19-22) Apan siya wala masilo. Ang iyang bukas nga kaisipan andam mamatig dugang.

Busa mipadayon si Jesus uban ang hinungdanong deklarasyon: “Bisan pa niana, ang takna nagasingabot, ug karon mao na, nga ang matuod nga mga magsisimba magasimba sa Amahan uban sa espiritu ug kamatuoran, kay, sa pagkamatuod, ang Amahan nagapangita sa maong mga tawo aron sa pagsimba kaniya. Ang Diyos usa ka Espiritu, ug kadtong nagasimba kaniya kinahanglang magasimba uban sa espiritu ug kamatuoran.” (Juan 4:23, 24) Sa ulahi, kining makataronganon nga babaye nagpakitag apresasyon pinaagi sa maikagong pagsulti sa iyang mga silingan kon unsay iyang nakat-onan. Sila, sa baylo, nangitag dugang impormasyon pinaagi sa pagpamati sa mga pulong ni Jesus.​—Juan 4:39-42.

Unsay atong makat-onan gikan niini? Aw, kon nagapuyo kita sa usa ka dapit diin anaay kusog nga rasanhon, nasodnon, o relihiyosong mga pagkamapihigon, unsay atong sanong kon duolon kita sa usa nga iya sa laing rasa, nasyonalidad, o relihiyon? Maghilom ba kita sa dihang hisgotan ang mga butang nga basin magpakita nga kita sayop? O kita ba, sama sa babayeng Samarianhon, labing menos andam nga makigsulti?

Namati Ka ba Unta Kang Pablo?

Ang lain nga mihatag ug maayong tambag sa unang siglo mao si apostol Pablo. Sa usa ka panahon si Pablo usab may siradong hunahuna. Siya misugid: “Sa nangagi ako usa ka tigpasipala ug usa ka maglulutos ug usa ka tawong walay batasan. Bisan pa niana, ako gipakitaan ug kaluoy, tungod kay ako walay alamag ug milihok nga walay pagtuo.” (1 Timoteo 1:13) Bisan pa niana, gidawat niya ang kamatuoran mahitungod ni Jesu-Kristo ug gihiklin ang iyang mga pagkamapihigon. Ang iyang panig-ingnan nagapakita nga ang kamatuoran sa Bibliya makatabang sa ‘pagbalit-ad sa kinutaan nga mga butang’ diha sa kasingkasing kon kanang mga butang makadaot kanato.​—2 Corinto 10:4.

Sa dihang siya nahimong Kristohanon, si Pablo maisogon nga mipakaylap sa maayong balita nga iyang nakat-onan. Ug sumala sa madahom, nakatagbo siya sa samang matang sa pagkasirado sa hunahuna nga iya mismong nabatonan sa nangagi​—apan dili sa tanang kaso. Sa Berea, sa amihanang Gresya, nakaplagan niya ang pila ka maaghopon ug kasingkasing nga maayong panig-ingnan kon unsaon sa pagpamati sa tambag. Kini sila nakaila sa tagingting sa kamatuoran sa mga pulong ni Pablo. Busa, “gidawat nila ang pulong uban ang kinadak-ang kaikag sa hunahuna.” Apan sila bukas ug kaisipan, dili kay daling-motuo. Ilang ‘gisusi pag-ayo ang Kasulatan sa matag adlaw sa pagsusi kon matuod ba kining mga butanga.’ (Buhat 17:11) Nagustohan nila ang ilang nadungog, bisan pag gisusi nila ang pagkatinuod niini sa Bibliya sa wala pa bug-os tuohi kini.

“Tinoa ang Tanang Butang”

Sa atong adlaw, ang mga Saksi ni Jehova nagagugol ug dako kaayong panahon sa paningkamot nga ipakig-ambit ang maayong balita sa Gingharian uban sa ilang mga silingan nga sakop sa laing mga relihiyon. Unsang sanong ang mabatonan sa mga Saksi? Daghan nga mahigalaong tawo ang malipay sa pagdawat nila. Apan ang ubay-ubay dili modawat, ug masuko pa kay nagaduaw ang mga Saksi.

Kini makapasubo, kay ang buot lamang ipakigsulti sa mga Saksi ni Jehova gitawag man nga “maayong balita” diha sa Bibliya. (Mateo 24:14) Dugang pa, ilang ginadasig ang tinamdan ni apostol Pablo, kinsa miingon: “Tinoa ang tanang butang; pangupti sa hugot ang maayo.” (1 Tesalonica 5:21) Bisan pag ang usa may kusganong mga opinyon, tino, nga sama sa mga taga-Berea ug sa babayeng Samarianhon, siya angay magbatog bukas nga kaisipan aron makigsulti sa uban bahin sa Diyos.

Nganong Magbatog Bukas nga Kaisipan?

Ikalipay, ginatos ka linibong tawo kada tuig nagabuhat gayod niana. Daghan ang nakakat-on sa pag-ila sa kaalam nga nahasulod sa Bibliya, ug ang resulta maoy tinuod, malungtarong mga kausaban sa ilang mga kinabuhi. Ang pipila sa nangagi maoy sama kang Janet, usa ka batan-ong babaye nga may taas nga kasaysayan sa droga ug pag-abusar sa alkohol ug sa kataposan naaghat sa pagsulay sa paghikog. Karong adlawa, si Janet maoy malipayong Kristohanon. Ang iyang pagtuon sa Bibliya mitabang niya sa pagbatog kusog sa pagsunod sa tambag ni Pablo: “Hinloan nato ang atong kaugalingon sa tanang kahugawan sa unod ug espiritu.”​—2 Corinto 7:1.

Si Vernon usa ka alkoholiko, ug ang iyang kaminyoon nameligro nga mabungkag. Apan ang pagsunod sa tambag sa Bibliya nakapaarang niya sa pagbuntog sa maong bisyo ug nakig-uli sa iyang asawa. (1 Corinto 6:11) Si Debra nagbatog kusog nga rasanhong pagkamapihigon. Apan ang pagtuon sa Bibliya ug pakig-uban sa Kristohanong katawhan nakatabang niya sa pagbag-o sa iyang panghunahuna. (Buhat 10:34, 35) Ug kinsa bay makatuo sa kausaban nga nahitabo sa kinabuhi sa usa ka batan-on nga pampam sa Netherlands sa dihang, usa ka adlaw, misugot siya sa pagtuon sa Bibliya uban sa mga Saksi ni Jehova? Sa wala madugay, siya usa na ka bawtismadong Kristohanon nga nagakinabuhing mahinlo ug nagaatiman nga ugdang sa iyang mga anak.

Ang maong mga kasinatian masubli sa makadaghan samtang ang mga tawo nagapamati sa ginasulti sa Bibliya. Ang ilang mga kinabuhi naarang-arang sa mga paagi nga wala hunahunaang posible sa daghan kanila. Labi pang hinungdanon, ilang nabatonan ang usa ka relasyon uban sa Diyos, mao nga sila makaampo kaniya sa sinsero ingong “Amahan namo sa mga langit.” (Mateo 6:9) Ug naangkon nila ang tino, dili-magun-ob nga paglaom sa umaabot samtang nasinati nila ang kamatuoran sa mga pulong ni Jesus: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug sa imong gipadala, si Jesu-Kristo.”​—Juan 17:3.

Kini ang matang sa impormasyon nga buot ihisgot sa mga Saksi ni Jehova sa ilang pagbuhat sa ilang ministeryo ug pagduaw sa ilang mga silingan. Lagmit, sila magaduaw na usab kanimo sa dili madugay. Ikaw kaha magbatog bukas nga kaisipan nga igo aron sa pagpamati kanila?

[Hulagway sa panid 7]

Ang babayeng Samarianhon wala motugot nga ang pagkamapihigon mopugong niya sa pagpamati kang Jesus. Ikaw ba may samang bukas nga kaisipan?