Sunda ang Kahayag sa Kalibotan
“Ang mosunod kanako . . . makabaton sa kahayag sa kinabuhi.”—JUAN 8:12.
1. Unsa ka hinungdanon ang kahayag?
UNSAY imong buhaton kon walay kahayag? Handurawa nga magmata sa matag adlaw sa tuig nganha sa 24-oras nga kangitngit. Handurawa ang usa ka kalibotan nga walay kolor, kay kon walay kahayag wala man ing kolor. Sa pagkatinuod, kon walay kahayag, kita usab dili mabuhi! Nganong dili man? Tungod kay, sa palakaw sa photosynthesis, ang lunhawng mga talamnon mogamit ug kahayag sa paggama sa kalan-on nga atong ginakaon—mga liso, mga utanon, ug mga prutas. Tinuod, usahay mokaon kitag karne sa mga hayop. Apan ang maong mga hayop nagkaon sa mga talamnon o ubang hayop nga nagkinabuhi sa mga talamnon. Busa, ang atong lawasnong mga kinabuhi bug-os nagdepende sa kahayag.
2. Unsang kusganong mga tinubdan sa kahayag ang anaa, ug unsay gitug-an niana kanato mahitungod kang Jehova?
2 Ang atong kahayag nagagikan sa adlaw, nga maoy usa ka bituon. Bisan tuod ang atong adlaw mohatag ug dako kaayong kahayag, kini usa ka bituon nga igoigo lang ang gidak-on. Ang daghan maoy labi pang dagko. Ug ang grupo sa kabituonan nga atong gipuy-an, ang Milky Way nga galaksiya, nasudlag kapin sa usa ka gatos ka bilyong kabituonan. Dugang pa, adunay dili-maihap bilyonbilyong mga galaksiya sa uniberso. Pagkadakong pasundayag sa kabituonan! Pagkalabihan kadako sa kahayag nga nagsumikad kanila! Pagkakusganong tinubdan sa kahayag si Jehova, nga naglalang nianang tanan! Ang Isaias 40:26 nagpahayag: “Iyahat ang inyong mga mata sa itaas ug tan-awa. Kinsay naglalang niining mga butanga? Mao Siya nga nagdala sa ilang panon sa tinagdaghan, nga nagtawag siya kanilang tanan pinaagi sa ngalan. Tungod sa pagkadako sa gahom, siya usab kusgan sa kagahom, walay mausa ang makulang kanila.”
Laing Matang sa Kahayag
3. Unsa ka hinungdanon ang espirituwal nga kahayag gikan ni Jehova?
3 Si Jehova mao usab ang Tinubdan sa laing matang sa kahayag, nga makapaarang nato sa pagbaton ug espirituwal nga panan-aw, sa espirituwal nga kalamdagan. Usa ka diksiyonaryo nagbatbat sa “paglamdag” niining paagiha: “Paghatag ug kahibalo: pagtudlo; paghatag ug espirituwal nga pagpasabot.” Kini nagbatbat sa “nalamdagan” nga: “nahigawas sa kawalay-kabangkaagan ug sayop nga impormasyon.” Ang espirituwal nga kalamdagan gikan kang Jehova gitagana pinaagi sa tukmang kahibalo mahitungod sa iyang Pulong, ang Bibliya. Kana maoy makapaarang nato sa pagkahibalo kon kinsa ang Diyos ug kon unsa ang iyang mga katuyoan. “Ang Diyos mao ang nag-ingon: ‘Pasidlaka ang kahayag gikan sa kangitngit,’ ug siya nagpasidlak diha sa atong mga kasingkasing aron sila malamdagan sa mahimayaong kahibalo sa Diyos pinaagi sa nawong ni Kristo.” (2 Corinto 4:6) Busa, ang kamatuoran diha sa Pulong sa Diyos magpagawas kanato gikan sa kawalay-kabangkaagan ug sayop nga impormasyon. Si Jesus miingon: “Kamo mahibalo sa kamatuoran, ug ang kamatuoran maghatag kaninyog kagawasan.”—Juan 8:32.
4, 5. Sa unsang paagi ang kahibalo gikan ni Jehova nagasilbing kahayag diha sa atong mga kinabuhi?
4 Si Jehova, ang Tinubdan sa tinuod espirituwal nga paglamdag, maoy “hingpit sa kahibalo.” (Job 37:16) Usab, ang Salmo 119:105 nagpahayag mahitungod sa Diyos: “Ang imong pulong maoy lamparahan sa akong tiil, ug kahayag sa akong alagianan.” Busa siya makapadan-ag sa espirituwal nga paagi dili lang sa sunod nga lakang sa atong mga kinabuhi apan usab sa dalan sa unahan. Kon wala kana, ang kinabuhi mahisama sa pagmanehog usa ka kotse subay sa naglikolikong karsada sa bukid sa mangitngit nga gabii nga walay suga sa kotse o sa bisan diin. Ang espirituwal nga kahayag gikan sa Diyos ikatandi sa kahayag nga ipadan-ag sa pangunahang mga suga sa kotse. Ang suga magalamdag sa dalan mao nga kita makakita nga tukma kon asa kita nagpadulong.
5 Ang tagna sa Isaias 2:2-5 nagpadayag nga sa atong panahon ang Diyos nagatigom gikan sa tanang nasod sa katawhan nga gustog espirituwal nga kalamdagan aron ilang hikat-onan ug ikapadapat ang tinuod nga pagsimba. Ang bersikulo 3 nagaingon: “Pagatudloan niya kita sa iyang mga dalan, ug manglakaw kita sa iyang mga alagianan.” Ang bersikulo 5 nagadapit sa mga nangita sa kamatuoran: “Umari kamo ug manglakaw kita diha sa kahayag ni Jehova.”
6. Sa kataposan asa kita pagatultolan sa kahayag gikan ni Jehova?
6 Busa, si Jehova mao ang tinubdan sa duha ka matang sa kahayag nga hinungdanon alang sa kinabuhi: ang pisikal ug espirituwal. Ang pisikal nga kahayag motabang sa atong pisikal nga mga lawas nga magpadayong buhi karon, tingalig mga 70 o 80 ka tuig o labaw pa. Apan ang espirituwal nga kahayag motultol sa kinabuhing dayon sa usa ka paraisong yuta. Kini maoy sumala sa giingon ni Jesus diha sa pag-ampo ngadto sa Diyos: “Kini nagkahulogan sa kinabuhing walay kataposan, ang ilang pagbaton ug kahibalo mahitungod kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.
Kalibotan Anaa sa Espirituwal nga Kangitngit
7. Nganong labaw nga gikinahanglan nato ang espirituwal nga kahayag karon kay sukad masukad?
7 Karong adlawa labaw nga gikinahanglan nato ang espirituwal nga kahayag kay sukad masukad. Ang mga tagna sama sa Mateo kapitulo 24 ug 2 Timoteo kapitulo 3 nagpakita nga haduol na kita sa kataposan niining sistemaha sa mga butang. Kini sila ug ubang mga tagna nagtagna sa makalilisang nga mga butang nga nagakahitabo sa atong panahon, nga nagpahibalo kanato nga kita ania na sa “kataposang mga adlaw.” Ingong katumanan nianang mga tagnaa, kining sigloha nakaagom sa sunodsunod nga mga katalagman. Ang krimen ug kabangisan mitubo sa makalilisang nga sukod. Ang mga gubat nagkalas sa kapig usa ka gatos ka milyong mga kinabuhi. Ang mga sakit, sama sa gikahadlokang AIDS, nagpanuop sa milyonmilyon, kay mga 160,000 ang namatay na gumikan sa AIDS diha lang sa Tinipong Bansa. Ang pamilyahanong kinabuhi nagun-ob ug ang seksuwal nga moralidad giisip nga kinaraan.
8. Unsang kahimtang ang giatubang karon sa katawhan, ug ngano?
8 Ang kanhing sekretaryo-heneral sa Hiniusang Kanasoran nga si Javier Pérez de Cuéllar miingon: “Ang kahimtang sa kalibotan naghatag ug nagbuntaog nga ebidensiya nga ang kakabos [nagaguba] sa pagkatagik sa mga katilingban.” Siya miingon nga “kapig usa ka bilyong katawhan karon nag-ilaid sa kakabos” ug nga “kini nakapagrabe sa mga hinungdan sa mabangisong panag-away.” Kanang “grabeng mga sakit,” matud pa niya, “dili mahupay sa mga tambal nga mahimong idapat sa mga gobiyerno.” Ug ang pangulo sa usa ka impluwensiyadong organisasyon miuyon: “Ang pangunang sulirang giatubang sa katilingban mao nga dili na kini mamandoan.” Pagkatinuod ang mga pulong sa Salmo 146:3: “Ayaw ibutang ang imong pagsalig sa mga tawong hamili, ni sa anak sa yutan-ong tawo, nga kaniya walay kaluwasan.”
9. Kinsay labing responsable sa kangitngitang milukop sa katawhan, ug kinsay makawagtang niining impluwensiyaha gikan kanato?
9 Ang kahimtang karong adlawa maoy sama sa gitagna sa Isaias 60:2: “Tan-awa! ang kangitngit mismo motabon sa yuta, ug ang mabagang kangiob sa nasodnong mga pundok.” Ang pagtabon sa maong kangitngit sa kinabag-an sa mga molupyo sa yuta maoy tungod sa dili nila pagsuhop sa espirituwal nga kahayag gikan ni Jehova. Ug ang lintunganayng hinungdan sa espirituwal nga kangitngit mao si Satanas nga Yawa ug iyang mga demonyo, ang pangunang mga kaaway sa Diyos sa kahayag. Sila mao “ang mga magmamando sa kalibotan niana nga kangitngitan.” (Efeso 6:12) Sumala sa giingon sa 2 Corinto 4:4, ang Yawa mao “ang diyos niining sistema sa mga butang,” kinsa “nagbuta sa mga hunahuna sa mga dili-magtutuo, aron nga ang kasanag sa mahimayaong maayong balita mahitungod kang Kristo, kinsa mao ang dagway sa Diyos, dili makasidlak.” Walay tawhanong pagmando ang makawagtang sa impluwensiya ni Satanas gikan sa kalibotan. Diyos lamang ang makawagtang.
“Usa ka Dakong Kahayag”
10. Giunsa pagtagna ni Isaias nga ang kahayag ipadan-ag diha sa katawhan sa atong adlaw?
10 Hinuon, samtang ang dakong kangitngit nagatabon sa kinabag-ang katawhan, ang Pulong sa Diyos mitagna usab sa Isaias 60:2, 3: “Diha kanimo si Jehova mosidlak, ug diha kanimo ang iyang kaugalingong himaya makita. Ug ang mga nasod manganha gayod sa imong kahayag.” Nahiuyon kini sa Isaias kapitulo 2, nga misaad nga ang nalamdagan, matuod nga pagsimba ni Jehova pagatukoron niining kataposang mga adlaw ug, sumala sa giingon sa mga bersikulo 2 ug 3, “nganha niana ang mga nasod moganayan. Ug daghang mga katawhan mangadto ug moingon: ‘Umari kamo, kamong katawhan, ug manungas kita ngadto sa bukid ni Jehova,’” nga mao, ngadto sa iyang binayaw matuod nga pagsimba. Busa bisan tuod ang kalibotan gimandoan ni Satanas, ang kahayag gikan sa Diyos ginapadan-ag ug nagapagawas sa kapid-ang mga tawo gikan sa kangitngit.
11. Kinsay labing ilado nga nagpadan-ag sa kahayag ni Jehova, ug giunsa siya pagpaila ni Simeon?
11 Ang tagna sa Isaias 9:2 mitagna nga may ipadala ang Diyos sa kalibotan aron sa pagdan-ag sa iyang kahayag. Kini nagaingon: “Ang mga tawo nga naglakaw sa kangitngit nakakita ug dakong kahayag. Alang niadtong nagpuyo sa yuta sa mabagang landong, ang kahayag mismo misidlak diha kanila.” Kining “dakong kahayag” mao ang Tigpamaba ni Jehova, si Jesu-Kristo. Si Jesus miingon: “Ako mao ang kahayag sa kalibotan. Siya nga mosunod kanako dili gayod maglakaw sa kangitngit, apan makabaton sa kahayag sa kinabuhi.” (Juan 8:12) Ang uban nahibalo niini bisan sa dihang bata pa si Jesus. Ang Lucas 2:25 nag-ingon nga ang usa ka lalaking ginganlag si Simeon maoy “matarong ug matinahoron” ug “ang balaang espiritu diha kaniya.” Sa nakita ni Simeon ang batang si Jesus, siya miingon ngadto sa Diyos diha sa pag-ampo: “Ang akong mga mata nakakita na sa imong paagi sa kaluwasan nga imong giandam sa panan-aw sa tanang mga katawhan, usa ka kahayag sa pagkuha sa tabon gikan sa mga nasod.”—Lucas 2:30-32.
12. Kanus-a ug giunsa ni Jesus pagsugod pagkuha sa tabon sa kangitngit nga mitabon sa katawhan?
12 Si Jesus nagsugod sa pagkuha sa tabon sa kangitngit gikan sa katawhan wala madugay human sa pagbawtismo kaniya. Ang Mateo 4:12-16 nagtug-an kanato nga kini nagtuman sa Isaias 9:1, 2, nga naghisgot mahitungod sa “dakong kahayag” nga mosugod sa pagsidlak diha sa katawhang nagalakaw sa espirituwal nga kangitngit. Ang Mateo 4:17 nag-ingon: “Sukad niadtong panahona si Jesus nagsugod sa pagwali ug pag-ingon: ‘Paghinulsol kamo, kay ang gingharian sa mga langit nagkahiduol na.’” Pinaagi sa pagwali mahitungod sa maayong balita sa Gingharian sa Diyos, si Jesus naglamdag sa katawhan mahitungod sa mga katuyoan sa Diyos. Siya “naghatag ug kahayag diha sa kinabuhi ug pagkadili-madunoton pinaagi sa maayong balita.”—2 Timoteo 1:10.
13. Giunsa pagbatbat ni Jesus ang iyang kaugalingon, ug nganong siya nakahimo niana sa tinong paagi?
13 Si Jesus nagmatinumanon sa pagdan-ag sa kahayag sa Diyos. Siya miingon: “Ako miabot ingon nga kahayag nganhi sa kalibotan, aron ang matag usa nga magabutang ug pagtuo kanako dili makapabilin sa kangitngitan. . . . Wala ako magsulti sa akong kaugalingong pagbuot, apan ang Amahan nga nagpadala kanako naghatag kanako ug usa ka sugo mahitungod sa kon unsay ipahayag ug isulti. Usab, ako nahibalo nga ang iyang sugo nagkahulogan sa kinabuhing walay kataposan.”—Juan 12:44-50.
“Pinaagi Kaniya ang Kinabuhi”
14. Sa unsang paagi gipaila si Jesus diha sa Juan 1:1, 2?
14 Oo, gipadala ni Jehova ang iyang Anak nganhi sa yuta aron mahimong kahayag sa pagpakita sa mga tawo sa dalan ngadto sa kinabuhing walay kataposan. Matikdi giunsa kini pagpadayag diha sa Juan 1:1-16. Ang mga bersikulo 1 ug 2 mabasa: “Sa sinugdan mao ang Pulong, ug ang Pulong uban sa Diyos, ug usa ka diyos ang Pulong. Kini siya sa sinugdan uban sa Diyos.” Dinhi si Juan nagtawag sa una-tawhanong Jesus pinaagi sa titulong “Pulong.” Nagpaila kini sa katungdanang iyang gituman ingong Tigpamaba ni Jehova nga Diyos. Ug sa dihang si Juan nag-ingon nga “sa sinugdan mao ang Pulong,” kini nagkahulogan nga ang Pulong mao ang sinugdan sa mga gilalang ni Jehova, “ang sinugdan sa kalalangan sa Diyos.” (Pinadayag 3:14) Ang iyang labawng posisyon taliwala sa mga linalang sa Diyos naghatag ug tinuod nga pasikaranan sa pagtawag kaniyang “usa ka diyos,” usa nga gamhanan. Ang Isaias 9:6 nagtawag kaniyang “Diyos nga Gamhanan,” apan dili Diyos nga Labing Gamhanan.
15. Unsang dugang impormasyon ang gihatag kanato sa Juan 1:3-5 mahitungod kang Jesus?
15 Ang Juan 1:3 nagpahayag: “Ang tanang butang naglungtad pinaagi kaniya, ug gawas kaniya walay bisan usa ka butang ang naglungtad.” Ang Colosas 1:16 nag-ingon nga “pinaagi kaniya ang tanang ubang mga butang nalalang sa mga langit ug sa yuta.” Ang Juan 1:4 nag-ingon nga “pinaagi kaniya mao ang kinabuhi, ug ang kinabuhi mao ang kahayag sa mga tawo.” Busa pinaagi sa Pulong, nalalang ang tanang ubang matang sa kinabuhi; pinaagi usab sa iyang Anak, gipahinabo sa Diyos nga ang makasasala, himalatyong mga tawo makabaton ug kinabuhing walay kataposan. Sa pagkamatuod si Jesus mao ang usang gamhanan si kinsa gitawag sa Isaias 9:2 nga “usa ka dakong kahayag.” Ug ang Juan 1:5 nag-ingon: “Ang kahayag nagdan-ag diha sa kangitngit, apan ang kangitngit wala makabuntog niana.” Ang kahayag naghawas sa kamatuoran ug pagkamatarong, nga kaatbang sa kangitngit, nga naghawas sa sayop ug pagkadili-matarong. Sa ingon gipadayag ni Juan nga ang kahayag dili mabuntog sa kangitngit.
16. Giunsa pagpunting ni Juan Bawtista ang gidak-on sa buluhaton ni Jesus?
16 Si Juan karon nangatarongan diha sa mga bersikulo 6 ngadto sa 9: “Dihay mitungha nga usa ka tawo nga gipadala ingong usa ka hawas sa Diyos: ang iyang ngalan maoy Juan [ang Bawtista]. Kining tawhana mianhi alang sa usa ka pamatuod, aron sa pagpamatuod mahitungod sa kahayag, aron ang katawhan sa tanang matang motuo pinaagi kaniya. Siya [Juan] dili mao ang maong kahayag, apan siya mianhi sa pagpamatuod mahitungod sa maong kahayag [Jesus]. Ang tinuod nga kahayag nga nagaiwag sa tanang matang sa tawo hapit nang moabot sa kalibotan.” Si Juan mipunting sa umaabot nga Mesiyas ug mipaliso sa iyang mga sumusunod ngadto Niya. Sa nahaigong panahon, ang tanang matang sa katawhan nahatagag higayon sa pagdawat sa kahayag. Busa si Jesus wala moanhi alang sa kaayohan sa mga Hudiyo lamang kondili sa kaayohan sa tanang tawo—dato o pobre, walay sapayan sa rasa.
17. Unsay gitug-an kanato sa Juan 1:10, 11 mahitungod sa espirituwal nga kahimtang sa mga Hudiyo sa adlaw ni Jesus?
17 Ang mga bersikulo 10 ug 11 nagpadayon: “Siya diha sa kalibotan, ug ang kalibotan milungtad pinaagi kaniya, apan ang kalibotan wala makaila kaniya. Siya miabot sa iyang kaugalingong dapit, apan ang iyang kaugalingong katawhan wala modawat kaniya.” Si Jesus, sa iyang una-tawhanong paglungtad, mao ang usa nga pinaagi kaniya nalalang ang kalibotan sa katawhan. Hinuon, sa dinhi siya sa yuta, gisalikway siya sa kadaghanan sa iyang kaugalingong katawhan, ang mga Hudiyo. Dili nila buot mayagyag ang ilang pagkadaotan ug pagkasalingkapaw. Gipalabi nila ang kangitngit kay sa kahayag.
18. Giunsa pagpakita sa Juan 1:12, 13 nga ang pipila mamahimong mga anak sa Diyos nga may espesyal nga panulondon?
18 Si Juan nag-ingon diha sa mga bersikulo 12 ug 13: “Apan, ang daghan nga midawat kaniya, siya mihatag kanila ug pagbulot-an nga mahimong mga anak sa Diyos, tungod kay sila nagbutang ug pagtuo diha sa iyang ngalan; ug sila nangatawo, dili gumikan sa dugo o gumikan sa pagbuot sa unod o gumikan sa pagbuot sa tawo, kondili sa Diyos.” Gipakita niining mga bersikuloha nga sa sinugdan, ang mga sumusunod ni Jesus dili mga anak sa Diyos. Una pa si Kristo moanhi sa yuta, ang maong pagkaanak o ang langitnong paglaom wala buksi alang sa mga tawo. Apan tungod sa merito sa halad lukat ni Kristo nga ilang gituohan, ang pila ka tawo gisagop aron mahimong mga anak ug nakabaton sa paglaom sa pagkinabuhi ingong mga hari uban ni Kristo diha sa langitnong Gingharian sa Diyos.
19. Nganong si Jesus ang labing makaarang sa pagpadan-ag sa kahayag sa Diyos, sumala sa gipakita sa Juan 1:14?
19 Ang bersikulo 14 nangatarongan: “Busa ang Pulong nahimong unod ug mipuyo sa among taliwala, ug among nakita ang iyang himaya, himaya nga iya sa bugtong anak gikan sa amahan.” Sa dinhi sa yuta, gipadan-ag ni Jesus ang himaya sa Diyos ingong mapadan-ag lamang sa panganay nga Anak sa Diyos. Busa, sa talagsaong paagi, siya labing kuwalipikado sa pagpadayag sa Diyos ug sa Iyang mga katuyoan ngadto sa katawhan.
20. Sumala sa nahitala sa Juan 1:15, unsay gitug-an kanato ni Juan Bawtista mahitungod kang Jesus?
20 Sunod, si apostol Juan nagsulat diha sa bersikulo 15: “Si Juan [Bawtista] nagpamatuod mahitungod kaniya, oo, siya misinggit gayod—kini mao ang usa nga nag-ingon niini—nga miingon: ‘Ang usa nga moabot sunod kanako nag-una sa akong atubangan, tungod kay siya naglungtad nga una kanako.’” Si Juan Bawtista natawong unom ka bulan nga una kang Jesus. Apan labi pang daghang binuhatan ang gibuhat ni Jesus kay kang Juan, mao nga siya nag-una sa atubangan ni Juan sa tanang paagi. Ug giila ni Juan nga si Jesus naglungtad nga una kaniya, sanglit si Jesus nagbaton ug una-tawhanong kinabuhi.
Mga Gasa Gikan ni Jehova
21. Nganong ang Juan 1:16 nag-ingon nga kita nakadawat ug “dili-takos nga kalulot human sa dili-takos nga kalulot”?
21 Ang Juan 1:16 nangatarongan: “Kaming tanan nanagpakadawat gikan sa iyang kahupnganan, bisan ang dili-takos nga kalulot human sa dili-takos nga kalulot.” Bisan tuod ang mga tawo natawo sa sala tungod kay nakapanunod niana gikan ni Adan, katuyoan ni Jehova nga pagalaglagon kining daotang sistema, pagaluwason ang milyonmilyon ngadto sa bag-ong kalibotan, pagabanhawon ang mga patay, ug pagawagtangon ang sala ug kamatayon, nga mosangpot sa kinabuhing dayon sa usa ka paraisong yuta. Kining tanang panalangin maoy dili takos, dili hinagoan sa makasasalang mga tawo. Sila maoy mga gasa gikan kang Jehova pinaagi ni Kristo.
22. (a) Unsay gipaposible sa kinadak-ang gasa sa Diyos? (b) Unsang pagdapit ang gihatag kanato diha sa kataposang basahon sa Bibliya?
22 Unsa ang kinadak-ang gasa nga nagpaposible niining tanan? “Gihigugma pag-ayo sa Diyos ang kalibotan [sa katawhan] nga iyang gihatag ang iyang bugtong Anak, aron ang tanan nga motuo kaniya dili unta malaglag kondili makabaton ug kinabuhing walay kataposan.” (Juan 3:16) Sa ingon, ang tukmang kahibalo sa Diyos ug sa iyang Anak, “ang Pangulong Ahente sa kinabuhi,” hinungdanon alang niadtong gustog espirituwal nga kahayag ug kinabuhing walay kataposan. (Buhat 3:15) Kana ang hinungdang gidapit sa kataposang basahon sa Bibliya ang tanang nahigugma sa kamatuoran ug gustog kinabuhi: “‘Umari ka!’ Ug siya nga nagapatalinghog paingna: ‘Umari ka!’ Ug ang giuhaw paaria; ang may tinguha paimna sa walay-bayad nga tubig sa kinabuhi.”—Pinadayag 22:17.
23. Unsay pagabuhaton sa samag-karnero nga katawhan inigduol nila sa kahayag?
23 Ang mapaubsanon, samag-karnerong mga tawo dili lamang moduol sa kahayag sa kalibotan kondili mosunod sa maong kahayag: “Ang mga karnero nagsunod kaniya, tungod kay ilang nailhan ang [tagingting sa kamatuoran diha sa] iyang tingog.” (Juan 10:4) Sa pagkatinuod, sila nagkalipay “sa pagsunod pag-ayo sa iyang mga lakang” tungod kay nahibalo sila nga ang pagbuhat niana magkahulogan ug kinabuhing dayon alang kanila.—1 Pedro 2:21.
Unsaon Nimo sa Pagtubag?
◻ Unsang duha ka matang sa kahayag ang nagagikan kang Jehova?
◻ Nganong ang espirituwal nga kalamdagan hinungdanon kaayo karong adlawa?
◻ Sa unsang paagi si Jesus “usa ka dakong kahayag”?
◻ Unsay gitug-an kanato sa Juan kapitulo 1 mahitungod kang Jesus?
◻ Unsang mga gasa ang moabot niadtong nagsunod sa kahayag sa kalibotan?
[Hulagway sa panid 10]
Si Simeon nagtawag kang Jesus nga “usa ka kahayag sa pagkuha sa tabon gikan sa mga nasod”