Kinabuhi ug Ministeryo ni Jesus

Ang Ikaduhang Milagro sa Cana

DIHANG mibalik si Jesus sa iyang pinuy-anang teritoryo tapos sa dugay nga pagsangyaw sa Judea, kadto dili aron mopahulay. Hinunoa, gisugdan niya ang labi pang dakong pag-alagad sa Galilea, ang yuta diin didto siya nagdako. Apan ang iyang mga tinun-an, inay mouban kaniya, namauli sa ilang mga pamilya ug ilang kanhing mga trabaho.

Unsang mensahe ang gisugdan ni Jesus sa pagsangyaw? Kini: “Ang gingharian sa Diyos haduol na. Maghinulsol kamo, kamong katawhan, ug tuohi ninyo ang maayong balita.” Ug ang sanong? Gidawat si Jesus sa mga taga-Galilea. Siya gipasidunggan sa tanan. Ugaling, sa linain kadto dili tungod sa iyang mensahe, hinunoa, tungod kay daghan kanila ang didto sa Paskuwa sa Jerusalem sa mga bulang nangagi ug nakakita sa talagsaong mga milagro nga iyang gibuhat.

Lagmit gisugdan ni Jesus ang iyang dakong pag-alagad sa Galilea didto sa Cana. Sayosayo niana, inyong mahinumdoman, sa paghibalik niya gikan sa Judea, gihimo niyang bino ang tubig sa usa ka kombira sa kasal didto. Niadtong ikaduhang higayon masakiton kaayo ang anak sa usa ka opisyal sa kagamhanan ni Haring Herodes Antipas. Sa pagkadungog nga si Jesus nahiabot sa Cana gikan sa Judea, ang opisyal mipanaw sa tibuok nga gilay-on gikan sa iyang balay sa Capernaum sa pagpangita kaniya. Siya, nga nagsubo, miawhag: ‘Adto dayon intawon sa dili pa mamatay ang akong anak.’

Mitubag si Jesus: ‘Lumakaw ka. Ang imong anak naayo na!’ Mituo ang opisyal ni Herodes ug misugod sa hataas nga panaw pauli. Sa dalan gisugat siya sa iyang mga sulugoon, nga nagdali sa pagsulti kaniya nga maayo ang tanan​—naayo ang iyang anak lalaki! ‘Kanus-a man siya naayo?’ siya nangutana.

‘Gahapon sa ala una,’ sila mitubag.

Naamgohan sa opisyal nga kadto ang takna mismo sa miingon si Jesus, ‘Ang imong anak naayo na!’ Human niana, ang tawo ug ang tibuok niyang panimalay nahimong mga tinun-an ni Kristo.

Sa ingon ang Cana gipaboran ingong dapit diin, nga nagpahibalo sa iyang paghibalik gikan sa Judea, si Jesus kaduha mihimog milagro. Hinuon, kini dili mao lamang ang mga milagrong iyang gibuhat hangtod sa maong panahon, apan sila makahuloganon kay sila nagtimaan sa iyang paghibalik sa Galilea.

Si Jesus nagpaingon sa Nazareth. Unsay nagpaabot kaniya didto? Juan 4:43-54; Marcos 1:14, 15; Lucas 4:14, 15.

◆ Sa mibalik si Jesus sa Galilea, unsay nahitabo sa iyang mga tinun-an, ug giunsa siya pagdawat sa katawhan?

◆ Unsang milagro ang gibuhat ni Jesus, ug unsay epekto niadto sa mga nalangkit?

◆ Sa ingon sa unsang paagi gipaboran ni Jesus ang Cana?

[Bug-os panid nga Letrato sa panid 8]