Si Kristo—Ang Gipunting sa mga Tagna

“Ang pagpamatuod bahin kang Jesus maoy nagdasig sa pagpanagna.”—PINADAYAG 19:10.

1, 2. (a) Sugod sa 29 K.P., unsang desisyon ang giatubang sa Israel? (b) Unsay hisgotan niining artikuloha?

TUIG 29 K.P. kadto. Ang mga molupyo sa Israel mahinamong nag-estoryahanay bahin sa gisaad nga Mesiyas. Ang ministeryo ni Juan Bawtista nakapasamot sa ilang kahinam. (Lucas 3:15) Wala mangangkon si Juan nga siya ang Kristo. Hinunoa, nagtudlo kang Jesus nga Nasaretnon, siya miingon: “Ako nagpamatuod nga kini siya mao ang Anak sa Diyos.” (Juan 1:20, 34) Sa wala madugay, ang mga panon sa katawhan misunod kang Jesus aron mamati sa iyang pagpanudlo ug aron ayohon niya.

² Sa misunod nga mga bulan, si Jehova nagtagana ug daghan kaayong pamatuod mahitungod sa iyang Anak. Kadtong nakatuon sa Kasulatan ug naniid sa mga buhat ni Jesus adunay lig-ong pasikaranan nga motuo kaniya. Apan, ang katawhang may pakigsaad sa Diyos sa katibuk-an wala motuo. Pipila lamang ang miila nga si Jesus mao ang Kristo, ang Anak sa Diyos. (Juan 6:60-69) Unsa kahay imong buhaton kon nagkinabuhi ka pa niadtong panahona? Matukmod ka ba sa pagdawat kang Jesus ingong Mesiyas ug mahimong iyang matinumanong sumusunod? Tagda ang pamatuod nga gihatag ni Jesus mismo bahin sa kon kinsa siya sa dihang giakusar siya nga milapas sa Igpapahulay, ug matikdi ang ulahing mga pamatuod nga iyang gihatag aron palig-onon ang pagtuo sa iyang maunongong mga tinun-an.

Si Jesus Mismo Naghatag sa Pamatuod

 3. Unsang mga sirkumstansiya ang nagtukmod kang Jesus sa paghatag ug pamatuod kon kinsa gayod siya?

³ Panahon kadto sa Paskuwa sa 31 K.P. Didto si Jesus sa Jerusalem. Bag-o pa niyang giayo ang usa ka tawo nga nagmasakiton sulod sa 38 ka tuig. Apan, ang mga Hudiyo naglutos kang Jesus tungod sa pagbuhat niana panahon sa Igpapahulay. Giakusar usab nila siya nga nagpasipala ug nagtinguha sila sa pagpatay kaniya tungod kay gitawag niya ang Diyos nga iyang Amahan. (Juan 5:1-9, 16-18) Ang pagdepensa ni Jesus sa iyang kaugalingon naghatag ug tulo ka puwersadong mga katarongan nga makapakombinsir ni bisan kinsang matinud-anog-kasingkasing nga Hudiyo kon kinsa gayod si Jesus.

4, 5. Unsay katuyoan sa ministeryo ni Juan, ug unsa kana ka epektibo?

⁴ Una, gipunting ni Jesus ang gihatag nga pamatuod sa nag-una kaniya, si Juan Bawtista, nga nag-ingon: “Nagpadala kamog mga tawo ngadto kang Juan, ug siya nagpamatuod sa kamatuoran. Kanang tawhana usa ka nagsiga ug nagdan-ag nga lampara, ug sulod sa mubong panahon buot ninyo nga magmaya sa hilabihan diha sa iyang kahayag.”—Juan 5:33, 35.

⁵ Si Juan Bawtista maoy “nagsiga ug nagdan-ag nga lampara” sa diwa nga una pa sa dili-makataronganong pagbilanggo ni Herodes kaniya, gituman niya ang sugo sa Diyos nga andamon ang dalan alang sa Mesiyas. Si Juan miingon: “Ang hinungdan nga ako mianhi nga nagbawtismo sa tubig maoy aron nga mapadayag [ang Mesiyas] sa Israel. . . . Nakita ko ang espiritu nga mikunsad ingon sa salampati gikan sa langit, ug kini mipabilin diha kaniya. Bisan ako wala makaila kaniya, apan ang Usa mismo nga nagpadala kanako sa pagbawtismo sa tubig nag-ingon kanako, ‘Siya nga makit-an mo nga kaniya ang espiritu mokunsad ug magpabilin, kini siya mao ang magbawtismo sa balaang espiritu.’ Ug nakita ko kini, ug ako nagpamatuod nga kini siya mao ang Anak sa Diyos.”a (Juan 1:26-37) Si Jesus espesipikong gipaila ni Juan ingong Anak sa Diyos—ang gisaad nga Mesiyas. Tungod sa klaro kaayo nga pagpamatuod ni Juan, mga walo ka bulan human sa iyang kamatayon, daghang matinud-anog-kasingkasing nga mga Hudiyo ang miangkon: “Tinuod ang tanan nga giingon ni Juan bahin niining tawhana.”—Juan 10:41, 42.

 6. Nganong ang mga buhat ni Jesus angay unta nga makapakombinsir sa mga tawo nga gipaluyohan siya sa Diyos?

⁶ Sunod, gigamit ni Jesus ang laing pangatarongan sa pagpamatuod nga siya ang Mesiyas. Iyang gipunting ang iyang maayong mga buhat ingong pamatuod nga gipaluyohan siya sa Diyos. “Ako adunay pamatuod nga labaw pa nianang kang Juan,” matod pa niya, “kay ang mga buhat nga gitudlo kanako sa akong Amahan nga buhaton, ang mga buhat nga akong ginabuhat, magpamatuod bahin kanako nga ang Amahan nagpadala kanako.” (Juan 5:36) Bisan ang mga kaaway ni Jesus dili makalimod niining maong pamatuod, nga naglakip ug daghang milagro. “Unsay atong buhaton, tungod kay kining tawhana nagbuhat ug daghang ilhanan?” adunay nangutana sa ulahi. (Juan 11:47) Apan, ang uban maayog pagsanong ug miingon: “Sa dihang ang Kristo moabot, himoon ba kaha niya ang mas daghang ilhanan kay sa gihimo niining tawhana?” (Juan 7:31) Ang mga mamiminaw ni Jesus adunay maayong kahigayonan nga makita ang mga hiyas sa Amahan diha sa Anak.—Juan 14:9.

 7. Sa unsang paagi ang Hebreohanong Kasulatan nagpamatuod bahin kang Jesus?

⁷ Sa kataposan, gihisgotan ni Jesus ang usa ka dili-malalis nga pamatuod. ‘Ang Kasulatan mismo ang nagapamatuod bahin kanako,’ siya miingon, nga midugang: “Kon mituo kamo kang Moises motuo unta kamo kanako, kay siya misulat man bahin kanako.” (Juan 5:39, 46) Siyempre, si Moises maoy usa lamang sa daghang una-Kristohanong mga saksi nga misulat bahin kang Kristo. Ang ilang mga sinulat naglakip sa gatosan ka tagna ug detalyadong mga talaan sa mga kagikan, nga ang tanan nagpunting sa Mesiyas. (Lucas 3:23-38; 24:44-46; Buhat 10:43) Ug komosta ang Moisesnong Balaod? “Ang Balaod nahimong atong magtutudlo nga nagatultol ngadto kang Kristo,” misulat si apostol Pablo. (Galacia 3:24) Oo, “ang pagpamatuod bahin kang Jesus maoy nagdasig [o, mao gayod ang intensiyon, tumong, ug katuyoan] sa pagpanagna.”—Pinadayag 19:10.

 8. Nganong daghang Hudiyo ang wala motuo sa Mesiyas?

⁸ Dili ba kining tanang pamatuod—ang klarong pagpamatuod ni Juan, ang gamhanang mga buhat ug diyosnong mga hiyas ni Jesus, ug ang daghan kaayong pamatuod sa Kasulatan—makapakombinsir kanimo nga si Jesus mao ang Mesiyas? Si bisan kinsa nga adunay tiunayng gugma alang sa Diyos ug sa iyang Pulong makasabot dayon niini ug magpasundayag ug pagtuo kang Jesus ingong gisaad nga Mesiyas. Apan, ang maong gugma kasagarang wala maglungtad diha sa Israel. Sa iyang mga magsusupak, si Jesus miingon: “Nahibalo ako pag-ayo nga wala kamo makabaton sa gugma sa Diyos diha kaninyo.” (Juan 5:42) Inay ‘tinguhaon ang himaya nga gikan sa bugtong nga Diyos,’ sila ‘nagadawat sa himaya gikan sa usag usa.’ Mao diay nga dili sila magkauyon ni Jesus, kinsa sama sa iyang Amahan nag-ayad sa maong panghunahuna!—Juan 5:43, 44; Buhat 12:21-23.

Gipalig-on sa Matagnaong Panan-awon

9, 10. (a) Nganong tukma sa panahon ang ilhanan nga gihatag ngadto sa mga tinun-an ni Jesus? (b) Unsang talagsaong butang ang gisaad ni Jesus sa iyang mga tinun-an?

⁹ Kapin sa usa ka tuig ang milabay sukad nga gihatag ni Jesus ang nahisgotang pamatuod sa iyang pagka-Mesiyas. Natapos na ang Paskuwa sa tuig 32 K.P. Daghan nga nagtuo kaniya ang wala na mosunod kaniya, tingali tungod sa paglutos, materyalismo, o sa mga kabalaka sa kinabuhi. Ang uban tingali naglibog o nahigawad tungod kay gisalikway ni Jesus ang mga paningkamot sa mga tawo nga himoon siyang hari. Sa dihang gihagit sa Hudiyong mga lider sa relihiyon, wala siya mohatag ug nagahimaya-sa-kaugalingon nga ilhanan gikan sa langit. (Mateo 12:38, 39) Ang iyang pagdumili lagmit nakapalibog sa pipila. Dugang pa, misugod si Jesus sa pagpadayag ngadto sa iyang mga tinun-an sa usa ka butang nga lisod kaayo nilang masabtan—“siya kinahanglang moadto sa Jerusalem ug mag-antos sa daghang butang gikan sa mga ansiyano ug sa pangulong mga saserdote ug sa mga eskriba, ug pagapatyon.”—Mateo 16:21-23.

¹⁰ Mga siyam ngadto sa napulo ka bulan gikan niana, panahon na nga “[si Jesus] mobiya niining kalibotana ug moadto sa Amahan.” (Juan 13:1) Kay nahingawa pag-ayo sa iyang maunongong mga tinun-an, gisaaran ni Jesus ang pipila kanila sa samang butang nga wala niya ipakita sa dili-matinuohong mga Hudiyo—usa ka ilhanan gikan sa langit. “Sa pagkatinuod ako magaingon kaninyo,” matod ni Jesus, “nga adunay pipila niadtong nagabarog dinhi nga dili gayod makatilaw ug kamatayon hangtod nga makita una nila ang Anak sa tawo nga moabot diha sa iyang gingharian.” (Mateo 16:28) Dayag nga si Jesus wala moingon nga ang pipila sa iyang mga tinun-an mabuhi hangtod matukod ang Mesiyanikong Gingharian sa 1914. Naghunahuna si Jesus nga iyang ipakita ngadto sa tulo sa iyang kinasuorang mga tinun-an ang usa ka talagsaong panan-awon sa iyang himaya sa dihang maghari na siya sa Gingharian. Kining maong panan-awon gitawag ug transpigurasyon o pagkausab sa dagway.

11. Hubita ang panan-awon sa transpigurasyon.

¹¹ Unom ka adlaw sa ulahi, gidala ni Jesus si Pedro, Santiago, ug Juan ngadto sa hataas nga bukid—lagmit sa usa ka tagaytay sa Bukid sa Hermon. Didto, ‘nausab ang dagway ni Jesus sa ilang atubangan, ug misidlak ang iyang nawong ingon sa adlaw, ug ang iyang panggawas nga mga besti migilaw ingon sa kahayag.’ Nakita usab nila ang mga manalagnang si Moises ug Elias nga nakig-estorya kang Jesus. Kining makapahinganghang hitabo lagmit nahitabo sa gabii, busa kini klaro kaayo. Gani, kay tinuod kaayo kadtong tan-awon, si Pedro mitanyag nga magpatindog ug tulo ka tolda—tagsa ka tolda para kang Jesus, Moises, ug Elias. Samtang nagsulti pa si Pedro, usa ka hayag nga panganod ang milandong kanila ug dihay tingog gikan sa panganod nga nag-ingon: “Kini mao ang akong Anak, ang hinigugma, kinsa akong giuyonan; patalinghogi ninyo siya.”—Mateo 17:1-6.

12, 13. Unsay epekto sa panan-awon sa transpigurasyon nganha sa mga tinun-an ni Jesus, ug ngano?

¹² Tinuod, si Pedro di pa dugayng nagpamatuod nga si Jesus mao “ang Kristo, ang Anak sa Diyos nga buhi.” (Mateo 16:16) Apan handurawa lang nga makadungog mismo sa Diyos nga naghatag sa iyang pamatuod, nga gipaila ug gikompirmar ang papel sa iyang dinihogang Anak! Pagkamakapalig-on-sa-pagtuo nga kasinatian ang panan-awon sa transpigurasyon alang kang Pedro, Santiago, ug Juan! Kay napalig-on pag-ayo ang ilang pagtuo, sila mas andam na nianang tungora sa kon unsay anaa sa unahan ug sa ilang hinungdanong papel sa umaabot nga kongregasyon.

¹³ Ang mga tinun-an natandog gayod sa transpigurasyon. Kapin sa 30 ka tuig sa ulahi, si Pedro misulat: “[Si Jesus] nakadawat gikan sa Diyos nga Amahan ug dungog ug himaya, sa dihang ang mga pulong nga sama niini gipadangat kaniya pinaagi sa halangdong himaya: ‘Kini mao ang akong anak, ang akong hinigugma, kinsa akong giuyonan.’ Oo, kining mga pulonga among nadungog nga midangat gikan sa langit samtang kami didto uban kaniya sa balaang bukid.” (2 Pedro 1:17, 18) Natandog usab si Juan sa maong hitabo. Kapin sa 60 ka tuig human kana mahitabo, siya naghisgot niana sa dihang siya miingon: “Nakita nato ang iyang himaya, ang himaya nga ingon sa iya sa bugtong nga anak gikan sa amahan.” (Juan 1:14) Bisan pa niana, ang transpigurasyon dili mao ang kataposang panan-awon nga gipakita ngadto sa mga sumusunod ni Jesus.

Dugang Kalamdagan Alang sa mga Maunongon sa Diyos

14, 15. Sa unsang paagi si apostol Juan magpabilin hangtod sa pag-anhi ni Jesus?

¹⁴ Human sa iyang pagkabanhaw, si Jesus nagpakita sa iyang mga tinun-an diha sa daplin sa Dagat sa Galilea. Didto giingnan niya si Pedro: “Kon kabubut-on ko nga [si Juan] magpabilin hangtod sa akong pag-anhi, unsa may imong labot niana?” (Juan 21:1, 20-22, 24) Kini bang mga pulonga nagpasabot nga si apostol Juan mas dugayng mamatay kay sa ubang mga apostoles? Dayag nga mao kanay gipasabot, kay siya matinumanong nag-alagad kang Jehova duolan sa lain pang 70 ka tuig. Apan, dunay mas hinungdanong butang nga gipasabot si Jesus.

¹⁵ Ang ekspresyon nga “hangtod sa akong pag-anhi” magpahinumdom kanato sa paghisgot ni Jesus bahin sa “Anak sa tawo nga moabot diha sa iyang gingharian.” (Mateo 16:28) Si Juan magpabilin hangtod sa pag-anhi ni Jesus sa diwa nga si Juan gihatagan sa ulahi ug matagnaong panan-awon bahin sa pag-anhi ni Jesus ingong Hari sa Gingharian. Sa naghinapos na ang kinabuhi ni Juan, samtang nadestiyero sa isla sa Patmos, iyang nadawat ang Pinadayag uban sa tanan niining makapahingangha ug matagnaon nga mga ilhanan sa mga butang nga mahitabo panahon sa “adlaw sa Ginoo.” Natandog kaayo si Juan niining talagsaong mga panan-awon nga sa dihang miingon si Jesus: “Oo, ako moabot sa madali,” si Juan mipatugbaw: “Amen! Umari ka, Ginoong Jesus.”—Pinadayag 1:1, 10; 22:20.

16. Nganong hinungdanon nga kita magpadayon sa pagpalig-on sa atong pagtuo?

¹⁶ Ang mga tawong matinud-anog kasingkasing nga nabuhi sa unang siglo midawat kang Jesus ingong Mesiyas ug mituo kaniya. Tungod sa kaylap nga kawalay pagtuo sa mga tawo sa ilang palibot, sa buluhaton nga kinahanglang himoon nila, ug sa mga pagsulay nga anaa sa unahan, kadtong nahimong mga magtutuo kinahanglang palig-onon. Si Jesus naghatag ug daghang pamatuod sa iyang pagka-Mesiyas ug nagtagana ug matagnaong mga panan-awon nga naghatag ug kalamdagan aron madasig ang iyang maunongong mga sumusunod. Karon, anaa na kita sa hinapos nga bahin sa “adlaw sa Ginoo.” Sa dili madugay, laglagon ni Kristo ang enterong daotang sistema sa mga butang ni Satanas ug luwason ang katawhan sa Diyos. Kinahanglang palig-onon usab nato ang atong pagtuo pinaagi sa pagpahimulos pag-ayo sa tanang tagana ni Jehova alang sa atong espirituwal nga kaayohan.

Giluwas Latas sa Kangitngit ug Kasakitan

17, 18. Unsay klarong kalainan sa unang-siglong mga sumusunod ni Jesus ug niadtong misupak sa katuyoan sa Diyos, ug unsay gisangpotan sa matag grupo?

¹⁷ Human sa kamatayon ni Jesus, ang mga tinun-an maisogong mituman sa iyang sugo nga magpamatuod bahin kaniya “sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buhat 1:8) Bisan pa sa daghang paglutos, ang bag-ong natukod nga Kristohanong kongregasyon gipanalanginan ni Jehova ug espirituwal nga kalamdagan ug daghang bag-ong mga tinun-an.—Buhat 2:47; 4:1-31; 8:1-8.

¹⁸ Sa laing bahin, ang palaaboton niadtong misupak sa maayong balita mag-anam ka ngiob. “Ang dalan sa mga daotan ingon sa kangiob,” nag-ingon ang Proverbio 4:19. “Sila wala mahibalo kon unsa ang kanunayng nakapandol nila.” Ang “kangiob” misamot niadtong 66 K.P. sa dihang ang Romanong kasundalohan milikos sa Jerusalem. Human miatras sa makadiyot nga walay-tin-awng hinungdan, ang mga Romano namalik sa 70 K.P., ug nianang panahona ilang gilaglag ang siyudad. Sumala sa Hudiyong historyano nga si Josephus, kapin sa usa ka milyong Hudiyo ang nangamatay. Apan, ang matinumanong mga Kristohanon nakaikyas. Ngano? Tungod kay sa dihang miatras ang mga sundalo, ilang gituman ang sugo ni Jesus nga mokalagiw.—Lucas 21:20-22.

19, 20. (a) Nganong ang katawhan sa Diyos walay katarongan nga mahadlok samtang ang presenteng sistema nagkaduol sa kataposan niini? (b) Unsang talagsaong pagsabot ang gihatag ni Jehova sa iyang katawhan sa mga dekada una pa ang 1914?

¹⁹ Susama niana ang atong situwasyon. Ang nagsingabot nga dakong kasakitan magtapos sa enterong daotang sistema ni Satanas. Apan dili angayng mahadlok ang katawhan sa Diyos, kay si Jesus nagsaad: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:20) Aron mapalig-on ang pagtuo sa iyang unang mga tinun-an ug maandam sila sa mahitabo sa unahan, gihatagan sila ni Jesus ug panan-awon sa iyang langitnong himaya ingong Mesiyanikong Hari. Komosta karon? Sa 1914 ang maong panan-awon natuman. Ug ang maong katumanan makapalig-on gayod sa pagtuo sa katawhan sa Diyos! Kini naghatag ug katarongan nga molaom sa usa ka maanindot nga kaugmaon, ug ang mga alagad ni Jehova gihatagan ug nag-uswag nga pagsabot nianang maong katumanan. Taliwala sa nagakangiob nga kalibotan karon, “ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.”—Proverbio 4:18.

²⁰ Bisan sa wala pa ang 1914, usa ka gamayng grupo sa dinihogang mga Kristohanon ang nagsugod sa pagkasabot sa hinungdanong mga kamatuoran bahin sa pagbalik sa Ginoo. Pananglitan, ilang nasabtan nga kana dili makita, ingon sa gipasabot sa duha ka manulonda nga nagpakita sa mga tinun-an niadtong 33 K.P. samtang si Jesus mikayab sa langit. Human siya sakgawa sa panganod gikan sa panan-aw sa iyang mga tinun-an, ang mga manulonda miingon: “Kining maong Jesus nga gidawat sa itaas ngadto sa langit gikan kaninyo mobalik sa samang paagi nga inyong nakita siya nga misaka sa langit.”—Buhat 1:9-11.

21. Unsay hisgotan sa sunod nga artikulo?

²¹ Ang pagbiya ni Jesus nakita lamang sa iyang maunongong mga sumusunod. Sama sa transpigurasyon, walay publikong pasundayag; ang kalibotan sa katibuk-an wala gani mahibalo kon unsay nahitabo. Ingon usab niana sa dihang si Kristo mobalik aron maghari sa Gingharian. (Juan 14:19) Ang iyang matinumanong dinihogan nga mga tinun-an lamang ang makasabot nga siya naghari na. Sa sunod nga artikulo, atong tan-awon kon sa unsang paagi ang maong pagsabot makaapektar pag-ayo kanila, nga mosangko sa pagtigom sa milyonmilyon nga mahimong yutan-ong mga sakop ni Jesus.—Pinadayag 7:9, 14.

[Footnote]

Nahinumdom Ka Ba?

• Sa dihang giakusar si Jesus nga milapas sa Igpapahulay ug nagpasipala, unsang pamatuod ang iyang gihatag aron sa pagpakita nga siya mao ang Mesiyas?

• Sa unsang paagi ang unang mga tinun-an ni Jesus nakabenepisyo gikan sa transpigurasyon?

• Unsay gipasabot ni Jesus sa dihang siya miingon nga si Juan magpabilin hangtod sa iyang pag-anhi?

• Sa 1914, unsang panan-awon ang natuman?

[Mga hulagway sa panid 10]

Naghatag si Jesus ug mga pamatuod nga siya mao ang Mesiyas

[Hulagway sa panid 12]

Ang panan-awon sa transpigurasyon makapalig-on sa pagtuo

[Hulagway sa panid 13]

Si Juan magpabilin hangtod sa “pag-anhi” ni Jesus