‘Pagkaplag Pahulay Alang sa Inyong mga Kalag’

“Umari kanako, kamong tanan nga nabudlayan ug nabug-atan, . . . ug makakaplag kamog pahulay alang sa inyong mga kalag. Kay masayon ang akong yugo ug magaan ang akong luwan.”​—MATEO 11:28-30.

1, 2. Unsay kahimtang sa tawhanong pamilya sulod sa daghang kasiglohan, ug sa unsang paagi kini lahi sa katuyoan sa Diyos sa sinugdan?

“KITA nahibalo nga ang tibuok kabuhatan nanagduyog sa pag-agulo ug nagabatig kasakit hangtod karon.” Mao kanay gisulat sa usa ka tawo ngadto sa mga higala sa Roma sa kasiglohang milabay. (Roma 8:22) Sa mga katuigan sukad niadto, ang pag-agulo ug ang kasakit sa tawhanong pamilya sa katibuk-an misamot lang hinoon. Ang pagpihig, kakabus, krimen, ug kagutom nakakuhag makalilisang kapildihan bisan asa. Ang dili-timbang ekonomikanhong sistema nagapugos sa minilyon nga mawad-an ug mga trabaho ug bisan ilang mga balay, ug ang satanasnong impluwensiya nakahatag kadaot sa mga paningkamot sa pagmatuto sa mga anak sa paagi nga angay nilang pagalaktan.

² Apan tingali ang labing makalilisang nga trahedya mahitabo kon ang balatian, sakit, o pagkatigulang magakuha sa mga tawo sa ilang kusog ug sakmiton diha kanila ang ilang dignidad samtang sila nagakaniwang nga dili sama sa ilang panglawas niadto. Ang makalilisang nga kasakit ug pag-antos, nga kasagaran molungtad ug daghang semana, mga bulan, ug usahay mga tuig pa ngani, mohatag kasakit sa kasingkasing nga mopagawas ug mga daligdig sa mga luha. Pagkamakapasubong asoy bahin sa kinabuhi! Mahitungod sa kahimtang sa tawo, ang maalamong hari sa dugay nang katuigan kanhi miingon: “Ang tanan niyang mga adlaw sa iyang kinabuhi maoy kasakit ug kagul-anan lamang.” (Ecclesiastes 2:23; 4:1) Ang kinabuhi karong adlawa sa pagkamatuod dili gayod maoy katuyoan sa Diyos sa sinugdan!​—Genesis 2:8, 9.

3. Uban sa unsang potensiyal nga gilalang sa Diyos ang tawo, ug sa unsang paagi kini natuman sa limitado nga sukod?

³ Gilalang ni Jehova nga Diyos ang tawo nga hingpit, nga may potensiyal nga makatagamtam gayod sa kinabuhi. (Deuteronomio 32:4, 5) Hunahunaa lang ang kalipay sa pagtilaw sa usa ka lamiang pagkaon, sa paghingos sa makapalagsik hinlo nga hangin, o sa pagtan-aw sa matahom nga pagsalop sa adlaw! “Nakita ko ang buluhaton nga gihatag sa Diyos sa mga anak sa mga tawo nga ilang pagakapulikian,” miingon ang mao gihapong maalamong hari sa dugay nang katuigan kanhi. “Gihimo niya ang tanang butang nga matahom sa iyang panahon. . . . Ako nasayod nga walay lain nga maayo alang kanila kay sa pagkalipay ug sa pagbuhat sa maayo samtang sila buhi pa; ug nga ang tagsatagsa ka tawo usab mokaon ug moinom, ug maglipay pag-ayo sa tanan niyang hinagoan. Kay kini gasa sa Diyos.”​—Ecclesiastes 3:10-13.

4. (a) Sumala sa gipakita sa mga kasinatian ni Jesus, unsa ang makasubong kahimtang sa daghan kaayo? (b) Unsang makapalipay sa kasingkasing nga pagdapit ang gitanyag ni Jesus, ug unsang mga pangutana ang gibangon niini?

⁴ Apan, pagkadiyutay lamang ang nagatagamtam sa maayong mga butang nga gimbut-an sa Diyos alang kanato! Si Jesu-Kristo nakamatikod sa alaot, makaluluoy nga kahimtang sa katawhan. “Miduol kaniya ang daghang panon sa katawhan,” nagaingon ang Bibliya, “nga nanagdalag mga tawong bakol, mga kimay, mga buta, mga amang, ug daghan pang uban, ug ilang gibutang sila sa iyang tiilan.” Pagkadako sa kaluoy ni Jesus sa alaot nga mga tawo! (Mateo 9:36; 15:30) Diha sa usa ka okasyon, siya mihatag sa makapalipay sa kasingkasing nga pagdapit: “Umari kanako, kamong tanan nga nabudlayan ug nabug-atan, ug papahulayon ko kamo. Isangon ninyo ang akong yugo ug pagtuon kamo gikan kanako, kay ako maaghop ug mapaubsanon sa kasingkasing, ug makakaplag kamog pahulay alang sa inyong mga kalag. (Mateo 11:28, 29) Sa pagkamatuod, kini maoy nagapadasig sa paglaom nga mga pulong! Apan unsang kapahulayan ang gihisgotan ni Jesus? Ug sa unsang paagi atong makaplagan kana?

Ang Kamatuoran nga Nagahatag Kapahulayan

5. Sa unsang paagi gitudlo ni Jesus ang dalan sa matuod nga kagawasan ug kapahulayan sa atong mga kalag?

⁵ Sa dihang mitambong si Jesus sa Piyesta sa mga Balongbalong sa mga unom ka bulan sa wala pa siya mamatay, iyang gipunting ang dalan aron mahimong gawasnon ug busa makadawat ug kapahulayan. Mipahayag ngadto sa mga mituo kaniya, siya miingon: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magahatag kaninyog kagawasan.” (Juan 8:31, 32) Unsang kamatuorana ang gihisgotan ni Jesus? Gikan sa unsa nga kita igapahigawas? Sa unsang paagi ang iyang mga mamiminaw naulipon?

6. (a) Unsang pagtutol ang gibangon sa relihiyosong mga magsusupak, ug ngano? (b) Sa unsang paagi kitang tanan mga ulipon?

⁶ Ang relihiyosong mga magsusupak mibalda kang Jesus, nga nagaingon: “Mga kaliwat kami ni Abraham ug wala gayod kami maulipon ni bisan kinsa. Nganong nakaingon ka man, ‘Kamo makabaton ug kagawasan’?” Kadtong Hudiyohanong mga magsusupak magarbohon sa ilang kagikan. Bisan pa nga ang nasod makadaghan nang nailalom sa langyaw nga pagmando, ang mga Hudiyo midumili nga tawgong mga ulipon. Apan gipakita ni Jesus kon sa unsang paagi nga sila mga ulipon, nga nagaingon: “Sa pagkamatuod magaingon ako kaninyo, Ang tanang magapakasala ulipon sa sala.” Oo, ang tanan sa iyang mga mamiminaw ‘nanagpakasala,’ sama kanatong tanan karong adlawa. Tungod kini kay ang tanan kanato nakapanunod sa sala gikan sa atong orihinal nga mga ginikanan. Apan si Jesus misaad: “Kon ang Anak magahatag kaninyog kagawasan, kamo mahimo gayod nga mga tawong gawas.”​—Juan 8:33-36; Roma 5:12.

7. Sa unsang paagi makab-ot ang matuod nga kagawasan, ug unsa nga kamatuoran ang makapagawas kanato?

⁷ Busa ang tinuod nga kagawasan makab-ot lamang pinaagi sa Anak sa Diyos, si Jesu-Kristo, kinsa mihatag sa iyang hingpit tawhanong kinabuhi ingong halad lukat. Kini nga halad ang nakapagawas kanato gikan sa makamatay nga sala ug nagapaposible kanato sa pagtagamtam sa kinabuhing dayon uban ang hingpit nga panglawas ug kalipay diha sa matarong bag-ong kalibotan sa Diyos. (Juan 3:16; 1 Juan 4:10) Busa, ang kamatuoran nga nagapahigawas kanato mao ang kamatuoran maylabot kang Jesu-Kristo ug sa iyang papel sa katumanan sa mga katuyoan sa Diyos. Ang Gingharian, uban kang Kristo ingong Hari, maoy motuman sa kabubut-on sa Diyos alang sa yuta, ug si Jesus padayong nagapamatuod mahitungod niini nga kamatuorana.​—Juan 18:37.

Kon sa Unsang Paagi ang Kamatuoran Nagahatag Kapahulayan

8. Sa unsang paagi ikailustrar ang dalan sa kamatuoran nga mohatag kapahulayan?

⁸ Ang paagi nga nagahatag kapahulayan ang kamatuoran ikailustrar sa usa ka babaye nga gisultihan nga siya dunay kusog nga nagkatay nga matang sa kanser. Ang kabug-at sa pagkahibalo niana nakahugno kaniya samtang iyang gipalandong ang masakit, lagmit makalilisang nga mga resulta. Apan, sa ulahi, mikonsulta siyag laing doktor ug nagpakuhag dugang eksamin sa sakit. Sa dihang ang mga resulta sa mga eksamin sa sakit nasusihan nga sayop ang unang paghiling sa sakit o kaha siya sa pagkatagsaon naulian, imong mahanduraw ang matahom nga pagbati sa kahupayan nga iyang nasinatian. Pagkadako nga kapahulayan kini sa iyang kalag!

9. Sa unsang paagi nakahatag si Jesus ug kahupayan pinaagi sa pagtudlo sa mga tawo sa kamatuoran?

⁹ Sa susama, sa dihang mianhi si Jesus sa yuta, ang mga tawo nabug-atan sa walay kapuslanang tradisyonal nga mga sistema sa maong panahon. Mahitungod sa mga eskriba ug sa mga Pariseo nga maoy responsabli, si Jesus miingon: “Nagabugkos silag mga luwan nga mabug-at pas-anon ug ila kining gibutang sa mga abaga sa mga tawo, apan sila mismo dili gani molihok niini bisan pinaagi na lang sa ilang tudlo.” (Mateo 23:4; Marcos 7:2-5) Pagkadakong kahupayan sa dihang mihatag si Jesus sa mga tawo sa kamatuoran nga nagapahigawas kanila gikan sa mauliponon nga mga tradisyon! (Mateo 15:1-9) Walay kalainan kini usab karong adlawa.

10. Unsang makakuha sa kalipay nga mga palas-anon ang gipas-an sa kadaghanan, ug unsay bation sa usa ka tawo kon kini mawala ingong resulta sa iyang pagkat-on sa kamatuoran?

¹⁰ Tingali usa ikaw kinsa, tungod sa mabug-at nga palas-anon sa bakak relihiyosong mga pagtulon-an, nagakinabuhi sa kahadlok nga mag-antos sa kasakit diha sa impiyerno o sa purgatoryo inigkamatay. O sa dihang mamatay ang usa ka minahal, hayan nahugno ka sa dihang gisultihan ka sa usa ka klero nga gikuha sa Diyos ang imong pinalanggang anak tungod kay Siya nagkinahanglan ug laing anghel​—ingon nga daw ang Diyos nagakinahanglan sa imong anak labaw kay kanimo. Usahay sultihan usab sa mga klero ang mga tawo kinsa nag-antos sa usa ka sakit nga kini maoy tunglo gikan sa Diyos. Dili ba makahatag tinuod nga kapahulayan ang pagkahibalo sa mga kamatuoran sa Bibliya nga makahupay sa mga tawo gikan sa maong mabug-at relihiyosong mga kabakakan? Pagkadakong kahupayan ang mahatag niini!​—Ecclesiastes 9:5, 10; Ezekiel 18:4; Juan 9:2, 3.

11. (a) Unsa ang usa sa labing mabug-at nga mga palas-anon, ug sa unsang paagi kini makuha? (b) Unsang kapahulayan ang gihatag ni Jesus sa mga makasasala samtang dinhi pa siya sa yuta?

¹¹ Ang usa sa labing dakong mga palas-anon nga pas-anon mao kanang pagbati sa pagkasad-an tungod sa mga sala nga atong nahimo. Kahupayan ang pagkasayod nga tungod sa bili sa halad lukat ni Kristo, kining mga salaa mawala. ‘Ang dugo ni Jesus nagahinlo kanato gikan sa tanang kasal-anan,’ nagpasalig kanato ang Bibliya. (1 Juan 1:7) Bisan pa sa bisan unsang makalilisang nga mga butang nga atong mabuhat, kon kita tinuod nga maghinulsol ug magbag-o sa atong mga dalan, atong matagamtam ang makapalagsik nga kahupayan sa usa ka mahinlong konsensiya ug ang pasalig nga dili na hinumdoman pa sa Diyos ang atong kasal-anan. (Salmo 103:8-14; 1 Corinto 6:9-11; Hebreohanon 10:21, 22) Pagkadakong kapahulayan ang gidala ni Kristo alang niadtong nabug-atan sa sala, sama sa daotang mga babaye ug sa mga maniningil sa buhis sama kang Zaqueo! Gilipay sila ni Jesus pinaagi sa kamatuoran sa Bibliya samtang siya nakigsalo sa pangaon uban nila.​—Lucas 5:27-32; 7:36-50; 19:1-10.

12. (a) Unsang makasubong mga kahimtang sa mga tawo nga nagahatag kapahulayan si Jesus? (b) Sa unang siglo, ngadto kang kinsa nagpakita si Jesus sa katingalahang paagi nga siya mao “ang dalan ug ang kamatuoran ug ang kinabuhi”?

¹² Daghan pang ubang mga tawo nagapas-an sa mabug-at nga mga palas-anon sa sakit ug balatian, grabeng depresyon, ug sa makalilisang nga kaguol nga modangat tungod sa kamatayon sa usa ka minahal. Si Jesus, hinunoa, naghatag kapahulayan kanilang tanan kinsa “nabudlayan ug nabug-atan.” (Mateo 4:24; 11:28, 29) Iyang giayo ang usa ka babaye kinsa sa pagkapakyas nangayog tabang gikan sa mga doktor sulod sa 18 ka tuig. Giayo usab ni Jesus ang usa ka tawo nga nagkasakit sulod sa 38 ka tuig, ug lain kinsa natawo nga buta. Imo bang mahanduraw ang ilang kapahulayan sa dihang giayo sila ni Jesus? (Lucas 13:10-17; Juan 5:5-9; 9:1-7) Ang kamatuoran mao nga ang tanan niadtong kinsa miduol kang Jesus nga may pagtuo miduol sa tuboran sa kamatuoran, sa matuod nga kapahulayan, ug kinabuhi. Alang sa usa ka babayeng balo kinsa nakadawat sa iyang bugtong anak ug balik gikan sa kamatayon ug ang mga ginikanan kansang patayng anak nga babaye nga 12-anyos gibalik kanila nga buhi, si Jesus tinuod gayod nga nakamapatuod sa katingalahang paagi nga siya mao “ang dalan ug ang kamatuoran ug ang kinabuhi.”​—Juan 14:6; 17:3; Lucas 7:11-17; 8:49-56.

13. Ngadto kang kinsa kita gitudloan ni Jesus nga atong kapangayoan ug tabang, ug unsay mahitabo kon atong ipadapat ang iyang tambag?

¹³ Piho nga may mga panahon nga ikaw nakaatubang ug mga problema nga dako kaayo kay sa imong maatiman. Gitudloan kita ni Jesus sa pagdangop kang Jehova alang sa tabang, sama sa iyang gihimo mismo. (Lucas 22:41-44; Hebreohanon 5:7) Kon regular kitang modangop sa Diyos diha sa pag-ampo, kita makadangat sa pag-ambit sa pagbati sa salmista kinsa misulat: “Dalayegon si Jehova, nga nagapas-an sa atong palas-anon, ang matuod nga Diyos sa atong kaluwasan.” (Salmo 55:22; 68:19) Oo, ang pagkahibalo sa kamatuoran tinuod nga mohatag kapahulayan. Kini mopasuod kanato kang Jehova ug motabang kanato sa pag-apresyar nga uban sa iyang tabang posible ang pag-atiman bisan sa labing malisod nga mga kahimtang sa kinabuhi nga malamposon.

Nakabatog Kapahulayan Pinaagi sa Paglaom sa Gingharian

14. Unsay nakapalig-on ni Jesus diha sa iyang mga pagsulay, ug unsa ang hinungdanon kon buot kitag kapahulayan sa atong mga kalag?

¹⁴ Aron makakaplag matuod nga kapahulayan alang sa atong mga kalag, kita kinahanglan dunay malig-on nga paglaom. Ang paglaom maoy nakalig-on kang Jesus. Ang Bibliya nag-ingon: “Tungod sa kalipay nga gibutang sa iyang atubangan miantos siya sa kahoy sa pagsakit, sa walay pagsapayan sa pagkamakauulaw niini, ug karon nagalingkod sa tuo nga kamot sa trono sa Diyos.” (Hebreohanon 12:2) Ang malipayong paglaom nga nakahatag kalig-on ni Jesus mao kanang pag-amot sa pagbalaan sa ngalan sa iyang Amahan pinaagi sa paghupot sa integridad, ug sa pagpamatuod nga takos sa pagmando ingong Hari sa Gingharian sa Diyos. Ang paghupot ug tin-aw nga panan-awon sa atong paglaom, kon kauban mang magmamando ni Kristo sa langit o ingong usa sa iyang mga ginsakopan nga magapuyo sa Paraiso sa yuta, makalig-on usab kanato sa pag-alagad sa Diyos. Matuod, kanang maong paglaom hinungdanon sa pagkaplag kapahulayan alang sa atong mga kalag.​—Roma 12:12.

15. Unsay atong umaabot nga kinabuhi kon walay paglaom sa Gingharian?

¹⁵ Palandonga ang atong umaabot nga kinabuhi nga walay paglaom sa Gingharian. Ang malarawanong gitas-on sa kinabuhi maoy 70 o posible 80 lamang ka tuig. Ug kadtong mga adlawa kusog kaayong modagan, nga maoy isulti kanimo sa tawong nagakatigulang na! Oo, ang Bibliya matinuoron nga nagaingon mahitungod sa kinabuhi: “Kini kalit lamang nga moagi, ug kita manglupad.” (Salmo 90:10) Bisan pa, gusto kita nga magpadayon ang atong mga adlaw. Gusto kita nga mabuhi. Daghan kaayo ang mga butang pagabuhaton ug tagamtamon.

16. Aron makakaplag kapahulayan ang atong mga kalag, unsay kinahanglan natong buhaton?

¹⁶ Busa, pagkahinungdanon, nga kita makadangat sa pagtuo kang “Kristo Jesus, ang atong paglaom”! (1 Timoteo 1:1) Sama sa iyang gipamulong: “Mao kini ang kabubut-on sa akong Amahan, nga ang matag usa nga makakita sa Anak ug motuo kaniya makabaton ug kinabuhing dayon.” (Juan 6:40, 51) Nagtuo ba kita niana? Aron makakaplag kapahulayan ang atong mga kalag, kita kinahanglan gayod. Kita dili makatigayon kon wala kana. Sa pagkamatuod, kinahanglan atong isul-ob “ingong salokot ang paglaom sa kaluwasan.” (1 Tesalonica 5:8; itandi ang Hebreohanon 6:19.) Kana nga paglaom kinahanglan maoy mobantay sa atong hunahuna, sa atong kaisipan. Kay kon dili, kita mabug-atan sa mga palas-anon ug mga suliran nga sa ingon mohunong kita ug mawad-an sa kinabuhing dayon. Busa, aron makatagamtam ug kapahulayan ang inyong kalag, seguroha nga padayong malig-on ang inyong paglaom sa Gingharian.

Kapahulayan Gikan sa Pagbuhat sa Buluhaton sa Diyos

17. (a) Aron makabaton ug kapahulayan, unsa ang gikinahanglan, ug nganong dili kini paghingapin ra alang kanato? (b) Unsay nalangkit sa pagdawat sa yugo ni Kristo?

¹⁷ Apan aron mabatonan kana nga kapahulayan, dugang ang gikinahanglan kay sa yano nga pagduol kang Jesus. Siya midugang: “Isangon ninyo ang akong yugo diha kaninyo [o, “Magpailalom kamo sa akong yugo”] ug pagtuon kamo gikan kanako, kay ako maaghop ug mapaubsanon sa kasingkasing, ug makakaplag kamog pahulay alang sa inyong mga kalag. Kay masayon ang akong yugo ug magaan ang akong luwan.” (Mateo 11:29, 30, New World Translation Reference Bible, potnot) Ang pagsangon sa yugo nagkahulogan ug trabaho. Apan matikdi nga wala mohangyo si Jesus kanato sa pagsangon sa yugo diha sa atong kaugalingon ug mag-inusarang buhaton ang tanang buluhaton. Kita gisugo nga magpailalom sa yugo uban niya. Niining kasoha, ang pagdawat sa yugo nga gitanyag ni Kristo naglangkit sa pagpahinungod sa Diyos, simbolohan kini pinaagi sa bawtismo sa tubig, ug dayon dawaton ang responsabilidad sa pagkahimong usa ka disipulo ni Kristo. Apan sa unsang paagi ang yugo sa pagkahimong disipulo makahatag kapahulayan?

18. (a) Nganong ang pagdawat sa yugo ni Jesus makahatag kapahulayan? (b) Sa unsang paagi ang buluhatong pagwali mohatag kanatog kalipay ug kapahulayan?

¹⁸ Ang pagdawat sa yugo ni Kristo mohatag kapahulayan tungod kay si Jesus maaghop ug mapainubsanon sa kasingkasing. Sanglit siya makataronganon, makahatag kapahulayan ang pagtrabaho uban niya ilalom sa samang yugo. Iyang ginatagad ang atong mga limitasyon ug mga kahuyangan. Kay sama sa iyang giingon, “Masayon ang akong yugo.” Matuod, ang yugo sa pagkadisipulo nagalangkit ug trabaho, ang samang buluhaton sa pagwali ug pagpanudlo nga gihimo ni Jesus ug nga alang niini iyang gibansay ang iyang unang mga sumusunod. (Mateo 28:19, 20; Buhat 1:8) Bisan pa, unsa ka makapalagsik nga buluhaton ang pagsugilon sa uban bahin sa atong mahigugmaong Diyos, sa iyang Anak, ug sa Gingharian! Unsa ka makapalagsik ang pagsulti sa mga tawo kon sa unsang paagi sila mahimong mabuhi sa walay kataposan diha sa Paraiso! Ug kon sila mosanong sa makahatag-kinabuhi nga balita sa Gingharian ug moduyog uban nato sa pag-alagad kang Jehova nga Diyos, pagkadako sa atong kalipay!​—1 Timoteo 4:16.

19. Nganong ang tambag sa ugangan ni Moises bililhon alang sa mga ansiano sa kongregasyon karong adlawa?

¹⁹ Sa mga katuigang dili pa dugay, minilyon ang nakadangat sa organisasyon ni Jehova kinsa nagkinahanglag tabang sa pagdawat sa yugo ni Kristo, ug kini ang nakapadako sa luwan sa buluhaton sa mga magmamantala sa Gingharian ug niadtong nagabantay kanila. Alang niining espirituwal nga mga magbalantay, ang tambag nga nadawat ni propetang Moises gikan sa iyang ugangan bililhon. Iyang gihatagan si Moises niining tambaga: “Ang butang nga imong gihimo dili maayo. Sa pagkamatuod, abuton ka ug kaluya, ikaw ug kining katawhan nga uban kanimo, kay kini nga buluhaton mabug-at ra kaayo nga luwan alang kanimo. Dili ka makahimo niini nga mag-inusara.” Busa iyang gitambagan si Moises sa pagpilig laing mga lalaki nga may katakos sa pagtabang sa buluhaton sa pagkamagbalantay sa mga tawo. Ang pagsunod niining tambaga napamatud-ang malamposon. (Exodo 18:17-27) Karong adlawa, ang padayong pagbansay mopatunghag mga tawong may katakos, “mga gasa sa mga tawo,” kinsa makaambit sa pagbantay sa panon aron ang mga ansiano sa kongregasyon dili maluya.​—Efeso 4:8, 16.

20. Unsay gipangayo ni Jesu-Kristo ug sa iyang Amahan gikan nato?

²⁰ Bisan pa nga gitambagan ni Kristo ang iyang mga sumusunod nga sila magmakugihon, siya ug ang iyang Amahan wala magkinahanglan nga ang bisan kinsa kanato mohimo ug labaw kay sa makataronganon. Kas-a, sa dihang gisaway sa uban si Maria nga igsoon ni Lazaro ang iyang paningkamot alang kang Jesus, iyang gibadlong sila, nga nagaingon: “Pasagdi siya. . . . Gihimo niya ang maarangan niya sa paghimo.” (Marcos 14:6-8; Lucas 13:24) Ug kana ang gilaoman kanatong tanan​—buhaton ang atong labing maarangan. Kining Kristohanong kalihokan dili palas-anon kondili makahatag pahulay. Ngano? Tungod kay kini mohatag matuod nga katagbawan karon ug seguradong paglaom sa walay kataposang mga kaayohan sa umaabot.

21. (a) Unsa ang magaan nga luwan ni Kristo, ug unsay nakapalisod sa buluhatong pagsangyaw? (b) Unsa ang atong malig-on nga hukom, ug uban sa unsang seguradong palaabuton?

²¹ Matuod, tinoon ni Satanas nga kita malutos, sama sa atong kayugo, si Jesu-Kristo, niadto. (Juan 15:20; 2 Timoteo 3:12) Apan hinumdomi nga dili ang magaan nga luwan ni Kristo ang mabug-at. Hinunoa, ang pagsupak ni Satanas ug sa iyang mga ahente maoy nagpahimo sa atong buluhaton nga malisod. Ang luwan ni Kristo naglangkit lamang sa yanong pagkinabuhi sa mga kinahanglanon sa Diyos, ug kini dili mabug-at. (1 Juan 5:3) Hinaot, nga kita magpadayon nga magpabilin ilalom sa yugo ni Jesu-Kristo uban niya, magmakugihon kita sa buluhaton sa pagwali ug sa pagpanudlo, sama sa iyang gihimo. Sa pagbuhat niini kita, sumala sa iyang gisaad, ‘makakaplag kapahulayan alang sa atong mga kalag.’

Unsay Imong Tubag?

◻ Sumala sa Roma 8:22, unsa ang kahimtang sa katawhan?

◻ Sa unsang paagi ang kahibalo sa kamatuoran mohatag kapahulayan?

◻ Nganong ang paglaom sa Gingharian makahatag dakong kapahulayan?

◻ Unsa ang yugo ni Jesus, ug nganong kini masayon?

◻ Ang pagpas-an sa unsang luwan ang mohatag kanatog kapahulayan?