Kon sa Unsang Paagi ang Kamatuoran Nagpagawas Kanato
1 Sa usa ka higayon, giingnan ni Jesus ang mga Hudiyo nga mituo kaniya: “Kamo mahibalo sa kamatuoran, ug ang kamatuoran magpagawas kaninyo.” (Juan 8:32) Naghisgot siya sa kagawasan nga labaw pa kay sa sibil nga mga kagawasan lamang, usa ka kagawasan nga mabatonan sa tanan—dato o kabos, edukado o dili edukado. Si Jesus nagtudlo ug kamatuoran nga maghatag ug kagawasan gikan sa pagkaulipon sa sala ug kamatayon. Sama sa gipatin-aw ni Jesus, “ang matag mamumuhat sa sala maoy ulipon sa sala.” (Juan 8:34) Gipangandoy gayod nato ang panahon sa dihang ang tanang masinugtanong katawhan “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos”!—Roma 8:21.
2 Ang kamatuoran bahin kang Jesus ug sa iyang papel sa pagpalampos sa katuyoan sa Diyos magahatag sa maong kagawasan. Kini naglakip sa kahibalo bahin sa halad lukat nga iyang gihatag alang kanato. (Roma 3:24) Bisan karon, ang pagdawat ug ang masinugtanong pagpasakop sa kamatuoran sa Bibliya magpaarang kanato sa pagtagamtam ug usa ka sukod sa kagawasan gikan sa kahadlok, kawalay paglaom, ug sa tanang matang sa makadaot nga mga binuhatan.
3 Kagawasan Gikan sa Kahadlok ug Kawalay Paglaom: Kita dili angayng mawad-ag paglaom bisan pa sa mga kahimtang sa kalibotan tungod kay atong nasabtan kon nganong naglungtad ang pagkadaotan ug atong nahibaloan nga kini mahanaw sa dili madugay dinhi sa yuta. (Sal. 37:10, 11; 2 Tim. 3:1; Pin. 12:12) Dugang pa, ang kamatuoran nagpagawas kanato gikan sa bakak nga mga pagtulon-an bahin sa kahimtang sa mga tawong patay. Kita nahibalo nga ang mga patay dili makaunsa kanato, nga sila wala mag-antos sa walay-kataposang pagsakit, ug nga ang Diyos wala magkuha sa mga tawo pinaagi sa kamatayon aron mahiuban lamang kaniya didto sa langit.—Eccl. 9:5; Buh. 24:15.
4 Ang maong kamatuoran nagpalig-on sa usa ka amahan ug inahan sa dihang ang ilang anak namatay gumikan sa aksidente. “Adunay kahaw-ang sa among kinabuhi nga dili mahulipan hangtod nga among makita pag-usab ang among anak lalaki pinaagi sa pagkabanhaw,” nag-ingon ang inahan. “Apan kami nasayod nga ang among kasakit maoy temporaryo lamang.”
5 Kagawasan Gikan sa Makadaot nga mga Binuhatan: Ang kamatuoran sa Bibliya makausab sa panghunahuna ug kinaiya sa usa ka tawo, nga mosangpot sa kagawasan gikan sa malikayang mga suliran. (Efe. 4:20-24) Ang pagkamatinud-anon ug pagkakugihan makatabang nga mamenosan ang kakabos. (Prov. 13:4) Ang pagpakitag nagasakripisyo-sa-kaugalingon nga gugma makapauswag sa relasyon sa ubang mga tawo. (Col. 3:13, 14) Ang pagtahod sa Kristohanong pagkaulo makapamenos sa mga kalisdanan sa pamilya. (Efe. 5:33–6:1) Ang paglikay sa paghuboghubog, seksuwal nga imoralidad, tabako, ug makagiyan nga mga droga makapauswag sa maayong panglawas.—Prov. 7:21-23; 23:29, 30; 2 Cor. 7:1.
6 Usa ka batan-ong lalaki wala makaarang sa paghunong sa iyang siyam-ka-tuig nga pagkagiyan sa droga. Usa ka adlaw iyang nahibalag ang usa ka magmamantala nga nagsangyaw diha sa kadalanan. Iyang gidawat ang literatura, ug gihimo ang mga kahikayan aron maduaw siya sa iyang balay. Nasugdan ang usa ka pagtuon sa Bibliya. Duha ka bulan sa ulahi ang maong tawo mihunong na gayod sa paggamit ug droga, ug human sa walo ka bulan nga pagtuon, siya nabawtismohan. Kay nakakita kaniya nga nakalingkawas gikan sa iyang pagkagiyan, natukmod ang iyang igsoong lalaki ug iyang bayaw nga babaye nga mosugod sa pagtuon sa Bibliya.
7 Tabangi ang Uban nga Maangkon ang Kagawasan: Kadtong naulipon sa tibuok nilang kinabuhi sa bakak nga mga pagtulon-an mahimong malisdan sa pagsabot sa kagawasan nga gitanyag sa Pulong sa Diyos. Ang pag-abot sa ilang kasingkasing mahimong nagkinahanglan ug linaing kakugi ug maayong pagpangandam sa bahin sa magtutudlo. (2 Tim. 4:2, 5) Dili karon panahon sa paghinayhinay diha sa atong buluhaton sa “pagmantala ug kagawasan niadtong mga gidalang binihag.” (Isa. 61:1) Bililhon ang Kristohanong kagawasan. Ang pag-angkon niana nagkahulogan ug kinabuhing walay kataposan.—1 Tim. 4:16.