Si Satanas sa Luyo sa Maskara
KARONG adlawa, si Satanas nakadawat ug tibuok-kalibotan nga pagtagad. Palid-palid sa mga papel ang nasulat diha sa mga peryodiko, sa mga magasin, ug relihiyosong mga tract mahitungod kaniya. Ang mga programa sa radyo ug telebisyon gigugol sa relihiyon nga nagadala sa iyang ngalan.
Ang “Satanas,” nga gisulat paabante ug paatras, makita diha sa mga lingkoranan sa publiko, ginapintura diha sa mga taytayan ug sa mga bungbong sa guba nga mga tinukod ug sa mga entrada sa mga tindahan, ug gisulat diha sa bildong mga bintana. Ang pangabig ug ang pagbitik sa mga tawo, ilabina sa mga batan-on, ngadto sa relihiyon nga nagadala sa ngalang Satanas nahimong katingad-anan.
Ugaling, bisan pa sa kaylap nga publisidad, dunay nagkalainlaing mga opinyon mahitungod kon kinsa, o unsa, gayod si Satanas. Alang sa kadaghanan, apil sa labing debotadong mga sumusunod, si Satanas gilikban sa pagkatinago. “Kini malukopon,” miingon ang usa ka propesor sa relihiyon, “gikan sa mga tawo nga nagtuo ug usa ka literal nga tawo nga mao si Satanas ngadto sa pikas bahin niadtong nagtuo nga kini maoy usa ka simbolo sa pulong-pasumbingay ug niadtong uban nga sa yano nagasalikway sa ideya.”
Sa dihang ang laing propesor sa relihiyon sa teolohikanhong seminaryo sa Baptist nagpaila kang Satanas ingong ‘alagad sa Diyos,’ inay Iyang dakong-kaaway, kini nakapukaw ug relihiyosong kasuko. Daghang tawag sa telepono ug mga sulat sa kompaniya sa tig-imprinta sa simbahan ang miprotesta niini nga interpretasyon. “Kon si Satanas dawaton ingong alagad sa Diyos,” miingon ang usa ka konserbatibong ministro sa Baptist, “nan kana nagpahimo sa Diyos nga atong kaaway.” Apan, laing ministro ug propesor sa relihiyon sa Baptist mitubag pinaagi sa pag-ingon nga ang mga membro sa hunta sa Baptist “wala maghimog surbi sa pagsusi kon unsay opisyal nga baroganan sa Baptist” mahitungod kang Satanas.
Sa pagkatinuod, ang mga sakop sa daghang simbahan wala gayod masayod kon unsay ginatudlo sa ilang relihiyon mahitungod kang Satanas. Ang usa ka magsusulat sa peryodiko miingon: “Pipila lang ka simbahan ang dunay doktrina nga nagapahayag kon unsay angay tuohan sa ilang mga sakop mahitungod kang Satanas, busa ang ulohan nahimong personal kaayo.” Ang uban nagtudlo pa gani nga ang Yawa sa yano naghawas sa daotan nga anaa mismo kanato. Pananglitan, ang Presbyterian nga ministro nga si A. D. Ellison miangkon nga gisulayan si Jesus diha sa desiyerto, dili sa usa ka labaw-tawhanon sataniko nga persona, kondili sa iyang pagkamakikaugalingon mismo.
Dili ikahibulong nga ang mga sakop sa simbahan nagduhaduha sa ilhanan ni Satanas, sanglit ang ilang mga lider sa relihiyon nagduhaduha man usab.
Kinsa Siya?
Ang Kasulatan, hinunoa, klaro ug malutawon sa pagpaila kon kinsa si Satanas. Ang Diyos nga Labing Makagagahom naglalang ug daghang espiritu nga mga linalang nga makaduol kaniya sa mga langit ug kinsa iyang mga alagad. Ang Bibliya nagpadayag nga sa dihang ang Diyos “nagtukod sa yuta,” gilalang kini aron pagapuy-an sa mga tawo sa umaabot, “ang tanang mga anak sa Diyos [manulonda nga espiritu nga mga linalang] misugod sa pagsinggit sa kalipay.” (Job 38:4, 7) Sa ulahi, ang usa niining mga manulonda mialsa batok sa iyang Maglalalang, nahimong rebelde, usa ka magsusupak.
Kining unang magsusupak, o Satanas (nagkahulogang “Tigsukol”), mao ang usa nga migamit ug bitin ingong tigpamaba sa dihang nakigsulti kang Eva sa paghaylo kaniya sa pagsupak sa Diyos. (Genesis 3:1-6) Maoy hinungdan nga siya usab gitawag “ang orihinal nga serpenti.” (Pinadayag 12:9) Si Jesus mismo miingon mahitungod kang Satanas: “Siya maoy usa ka mamumuno sukad pa sa sinugdan, ug siya walay labot sa kamatuoran kay ang kamatuoran wala man diha kaniya.” (Juan 8:44; 1 Juan 3:8) Busa gipaila ni Jesus si Satanas ingong usa kinsa kaniadto nagpahimulos sa pag-uyon sa Diyos apan mirebelde batok kang Jehova nga Diyos.
Bisan pa nga ang uban moingon nga ang Yawa sa yano maoy usa ka hunahuna lamang nga prinsipyo sa daotan, ang mga hiyas ug mga lihok nga giingon nga iya ni Satanas diha sa Bibliya ikaingon nga iya lamang sa usa ka persona. Sa pagkamatuod, ang Bibliya nagpakita nga si Satanas maoy usa ka tinuod, dili-makitang espiritu nga persona kansang gipadayag nga katuyoan mao ang pagpalayo sa katawhan gikan sa pag-alagad sa Maglalalang, si Jehova nga Diyos. Sa dihang gisulayan ni Satanas si Jesus sa kamingawan, si Jesus dili mahitabong gisulayan sa usa ka yanong hiyas sa daotan o sa ‘iyang pagkamakikaugalingon mismo.’ Kay ang daotan, o pagkahakog, dili man makapuyo sulod kang Jesus, sanglit gitin-aw sa Bibliya nga si Jesus “walay sala, walay lama, linain gikan sa mga makasasala.”—Hebreohanon 7:26; Lucas 4:1-13.
Pagpangagpas ug Gahom
Si Satanas mirebelde batok sa Diyos diha sa usa ka pagpangagpas ug gahom, tungod sa tinguha sa pagmando ibabaw sa uban, nga mahimong ilang diyos, nga pagasimbahon. (2 Corinto 4:4) Alang kang Adan ug Eva siya mitanyag ug gahom ug kagawasan—“nga mahisama sa Diyos” nga makahimo sa ilang kaugalingong mga desisyon kon unsa ang maayo ug unsa ang daotan. (Genesis 3:5) Ang gahom ug kagawasan mao gihapon ang gitanyag ni Satanas sa iyang mga magsisimba.
Busa, ang usa ka tin-edyer nga Satanista nga ginganlag Sean, kinsa bag-o pang nakapatay sa iyang mga ginikanan ug sa ikatulong biktima, misulat: “Ako may kagawasan na. Ako makahimo sa pagpatay nga walay pagbasol.” Sa laing higayon siya misulat sa iyang kaugalingong dugo: “Gisalikway ko ang Diyos, gisalikway ko si Kristo, si Satanas lamang ang akong alagaran . . . Maghimaya ka Satanas.”
Si Randy Shores, usa ka tin-edyer ug membro niadto sa kulto sa sataniko miasoy: “Lalim kaayo kadto, nga nabatonan nimo kanang tanang gahom.” Gipasiugda ni Shores nga ang ‘gahom mao ang paon, ang gahom nga nagagikan sa grupo nga mopanalipod kanimo, gikan sa mga rituwal ug sa mga paglamat nga himoon aron sa pagdaot ug tawo, ug gikan sa pagkahimong tinagoan.’
Oo, dunay pagtuo nga taliwala sa daghang magsisimba ni Satanas nga siya mohatag ug gahom niadtong mosunod sa iyang mga pagtulon-an. Ug ang pagsabot sa ubang sataniko nga mga magsisimba mao nga kini nagkahulogang gahom sa pagpatay nga walay silot. Ang gibantog nga mga pagpatay nga gihimo sa mga magsisimba ni Satanas nagbutyag nga sila nagtuo gayod nga pinaagi sa pagpatay sila makapahimuot sa Yawa. Busa dunay panginahanglan sa seryosong pagtagad sa nagdakong kapeligrohan sa satanikong pagsimba.
Ayaw Palimbong
Hinumdomi, si Satanas tinuod. Siya dili bunga sa handurawan sa usa ka tawo. Ang iyang dakong kalipay mao ang pagpasipala sa Diyos ug sa Iyang Pulong, ang Bibliya, ug sa pagbitik ug daghan kutob sa iyang mahimo diha sa iyang lit-ag sa kalaglagan. Apan ang Diyos nakasugod na ug lihok batok kang Satanas, nagtugot sa pagtambog kaniya gikan sa langit dinhi sa dapit a yuta. Ang pagkatambog ni Satanas sa yuta sa walay duhaduha maoy hinungdan sa pagbalik karon sa Satanismo.—Pinadayag 12:7-12.
Ang mga ginikanan kinahanglang magmaalinggaton. Diha sa daghang kaso sa dihang dawaton sa mga bata ang Satanismo, kini maoy tungod kay sila wala hatagi sa ilang mga ginikanan ug gugma ug pagtagad nga ilang gikinahanglan. Ang mga bata masuko nga daw gipasagdan ug daling mabiktima sa mga tigpangabig sa satanismo.
Apan, makalilipay, ang kataposan ni Satanas ug ang iyang impluwensiya duol na. Sa dili madugay siya ug ang tanan niyang mga sumusunod mag-antos sa kapildihan ug sa bug-os nga kalaglagan. Ang dakong Diyos, si Jehova, nga mapasigarbohong gipasipad-an ni Satanas ug sa iyang mga demonyo, mogamit sa iyang Manggugubat-Hari, si Jesu-Kristo, sa paglaglag niining mga tawong daotan. (1 Juan 3:8; Pinadayag 20:1-3, 10) Kasamtangan, hinaot nga usa ikaw sa mosukol ni Satanas ug makakaplag panalipod diha sa mahigugmaong panag-igsoonay sa organisadong mga magsisimba sa matuod nga Diyos, si Jehova.
[Kahon sa panid 9
Tuboran sa Matuod nga Panalipod
Diha sa usa ka sulat ngadto sa The Times Herald Record sa Middletown, New York, gibatbat sa usa ka tawo kon sa unsang paagi nalangkit siya sa pagpangitag gahom sa okulto. Siya nabihag sa mga sinulat sa duha ka psychotherapist kinsa nakahimog paagi nga mahuptan kining mga gahoma. “Maikagon nakong gisunod ang paagi,” siya miasoy, “apan gibayran kana ug unom ka semana sa kalisang matag gabii.
“Sa pagkabulahan,” siya mipadayon, “gitambagan ako sa duha [ka] [m]ga Saksi ni Jehova, apil sa ubang mga butang, sa pag-ampo kang Jehova ug gihimo ko kini kada gabii sa dihang mosugod ako sa pagsinati ug katingalahang mga pagbati.” Unsa man ang mga resulta?
“Sa kataposang gabii sa kalisang,” siya miingon, “kon unsa may migahom nako mibuhi sa iyang paghawid . . . Human niadto, wala na akoy mangil-ad nga mga eksperyensiya.” Kining tawhana nakakat-on, sa nagsulat siya sa peryodiko, nga “hukman sa Diyos ang mga entrante sa mga buhat sa okulto (Deuteronomio 18:10-13).”—Pebrero 27, 1988.
Ang ibabaw nga kasulatan nag-ingon sa lakbit: “Kinahanglan dili hikaplagan diha kanimo . . . ang bisan kinsa nga nagagamit sa pagtagna, o salamangkero o nagapangitag mga tilimad-on o diwatahan, o mga lumayan o magpakitambag ug mga espiritista o mananagna o kang bisan kinsa nga nagapangutana sa mga patay. Kay dulumtanan kang Jehova ang bisan kinsa nga nagabuhat niining mga butanga.”
[Kahon sa panid 10]
Mga Ginikanan, Pagbantay sa mga Ilhanan
Tungod sa kamadanihon sa pagsimba sa Yawa diha sa mga batan-on, ang mga ginikanan kinahanglan igmat sa mga ilhanan nga basin nalangkit ang ilang mga anak. Ang usa ka awtoridad mahitungod sa mga kulto sa satanismo, si Evon Peterson, mitambag:
“Sila (mga batan-on) nagkinahanglag usa nga motuo kanila. . . . Sila nagapangitag usa nga mohatag kanilag pagtagad . . . nga mamati kanila. Ang mga kulto maayo kaayong mamati. Kon dili mamati ang mga ginikanan, ang mga kultista mamati.”
Si Angelo Pierri, usa ka magtatambag sa New Jersey, mipasidaan: “Nahibalo ako nga malagmit moingon ka, ‘uso lang kana,’ apan mao gayod kanay ipatuo kanimo sa mga satanista. Sila dili gustong maladlad. Sila dili gusto nga mahibaloan ang ilang mga kalihokan.”
Ilabinang hinungdanon ang pagpaniid sa musika nga ginapamatian sa mga batan-on. Ang kadaghan sa heavy metal rock nga musika natuhop sa satanismong mga mensahe ug mga simbolismo. “Hilabihan kini ka ngil-ad,” miingon si Peterson, “may mga mensahe sa pagpatay ug sa pagsakit. Kini nagapuno sa panginahanglan sa mga batan-on sa paglihok tungod sa kabangisan.”
Sa miaging tuig gidunggab sa usa ka 14-anyos nga batan-on sa New Jersey ang iyang inahan hangtod nga namatay ug unya gipatay ang iyang kaugalingon. Napuno sa mga poster sa musikero sa heavy metal rock ang iyang kuwarto. Ang amahan sa batan-on miingon human niadto: “Sultihi ang mga ginikanan sa pagbantay sa musika nga ginapamatian sa ilang mga anak.” Siya miingon nga sa tibuok semana human sa mga pagpatay, gikanta sa iyang anak ang musikang rock “mahitungod sa dugo ug sa pagpatay sa imong inahan.”
Sa pagkamatuod, ang Satanismo maoy usa ka makuyaw, nagdakong kapeligrohan. Ang unang lakang sa pakigbugno niini mao ang pagbaton ug kahibalo. Unya atubanga kini. Oo, ang Bibliya tukma sa dihang kini nag-ingon nga kita dunay pakigbugno “batok sa daotang espiritu nga mga panon.” (Efeso 6:12) Si Satanas ug ang iyang mga demonyo tinuod gayod nga naglungtad, ug sila ang nagpaluyo sa tanan niining yawan-ong mga buhat.