Mga Pangutana Gikan sa mga Magbabasa
◼ Si Jesus miingon, “Kon buta pa kamo, wala unta kamoy sala.” (Juan 9:41) Gipasabot ba niya nga ang pila ka tawo walay sala?
Wala, ang tanang tawo karong adlawa maoy mga makasasala, sama ra sa tanan sa unang siglo, gawas kang Jesus mismo. Niining mga pulong gikan sa Juan 9:41, si Jesus nagtumong sa usa ka linaing matang sa sala.
Ang atong komun nga ginikanan si Adan nagpabug-at sa tanan niyang mga anak sa sala. Si Adan gilalang nga hingpit, walay sala. (Deuteronomio 32:4; 2 Samuel 22:31) Sa dihang siya misupak sa paninugdang mga tugon ni Jehova, si Adan nahimong dili hingpit. Ang pagkasala nagkahulogan sa panguna nga “masipyat sa tumong.” Kana gayod ang gihimo ni Adan. Busa pinaagi sa paglapas sa sugo sa Diyos, si Adan nahimong makasasala.
Kitang tanan naapektahan tungod kay kitang tanan naggikan kang Adan. Ikailustrar nimo kini niining paagiha: Ang usa ka tawong natawong may dakong depektong genetikanhon nga magpasa niana sa tanan niyang anak; ilang mapanunod ang samang depekto. Ang mga siyentipiko karon makatino kon kaha nagalungtad ang pila ka depekto sa chromosome diha sa usa ka binhi sa tiyan o sa bag-ong natawo, apan labaw niana ang mahimo ni Jehova. Gipadayag niya nga ang grabeng depekto mitungha diha kang Adan ug kini nahipasa kanatong tanan. Kining depektoha mao ang sala. “Pinaagi sa usa ka tawo [Adan] ang sala misulod sa kalibotan ug ang kamatayon tungod sa sala, ug busa ang kamatayon mikuyanap sa tanang tawo tungod kay silang tanan nakasala man.” (Roma 5:12) Tungod niining makasasalang kahimtang ang mga tawo nahimong kabatok sa Maglalalang, dugang pa sa pagpatungha diha kanila sa sakit ug sa kamatayon. Walay tawo gawas kang Jesus ang hingpit ug nahigawas sa tunglo sa kamatayon.—Roma 5:18-21; 6:23; 2 Cronicas 6:36.
Ugaling, sa Bibliya ang mga tawo usahay nganlang “mga makasasala” tungod kay ilado sa pagkamamumuhat sa sala o sa usa ka dayag nga matang sa sala. (Lucas 19:2-7; Marcos 2:16, 17; 14:41) Kana, hinuon, wala magpasabot nga ang ubang katawhan hingpit, walay sala. Kon sila hingpit, walay sala, sila dili unta matigulang ug sa kataposan mamatay.
Ang asoy sa Juan kapitulo 9 naglangkit sa usa ka tawo nga natawong buta apan kansang panan-aw gipasig-uli ni Jesus. Ang tawo wala makabasa sa personal sa Kasulatan, apan siya may diyutayng kahibalo. Siya nahibalo nga ang Diyos dili magdungog sa mga hangyo sa tinuyong mga makasasala. Ang paghatag ni Jehova kang Jesus ug gahom aron sa paghimo sa milagro sa pagpasig-uli sa panan-aw nagpamatuod nga si Jesus maoy usa ka manalagna. Hinuon, ang magarbohong mga Pariseo wala motuo sa makataronganong pamatuod sa maong tawo, ug ilang gilabog siya sa gawas.—Juan 9:13-17, 26-34.
Tapos niadto, si Jesus miingon: “Alang niini nga paghukom ako mianhi niining kalibotana: aron kadtong dili makakita makakita ug kadtong makakita mahimong buta.” (Juan 9:39) Oo, pinasukad sa iyang pagwali, ubang mga kalihokan, ug papel diha sa mga katuyoan sa Diyos, ang mga tawo makaangkon sa espirituwal nga panan-aw ug makalakaw diha sa kahayag, o maanaa sa espirituwal nga kangitngitan. (Isaias 9:1, 2; 42:6, 7; Mateo 4:13-17; 6:23; 2 Pedro 1:9; 2 Corinto 4:4) Kon ang relihiyosong mga pangulo mao lamay walay-kabangkaagang mga Hudiyo nga may kasagarang palas-anon sa tawhanong sala, ang dili nila pagdawat sa Mesiyas tingali mapasaylo. Apan sila, kinsa nag-angkon nga “makakita,” o makasabot, ilabinang salawayon tungod kay sila may labaw nga kahibalo sa Kasugoan ug sa matagnaong Pulong sa Diyos. Busa ang ilang pagsalikway kang Jesus maoy usa ka seryosong sala nga naghukom kanila nga labaw pa kay sa ilang kasagarang tawhanong pagkadili-hingpit ug sala. Busa, gisultihan ni Jesus ang mga Pariseo: “Kon buta pa kamo, wala unta kamoy sala. Apan karon kamo nagaingon, ‘Kami makakita.’ Ang inyong sala nagapabilin.”—Juan 9:41.