Usa ka Dakong Panon sa Matuod nga mga Magsisimba​—Diin Sila Gikan?

“Tan-awa! usa ka dakong panon, . . . gikan sa tanang kanasoran ug mga tribo ug katawhan ug mga dila, nga nagbarog atubangan sa trono ug atubangan sa Kordero.”​—PINADAYAG 7:9.

 1. Nganong ang matagnaong mga panan-awon sa Pinadayag makapaikag kaayo kanato karong adlawa?

SA HINAPOS sa unang siglo K.P., si apostol Juan nakakitag mga panan-awon sa kahibulongang mga panghitabo bahin sa katuyoan ni Jehova. Nagakatuman karon mismo ang pipila sa mga butang nga nakita niya sa panan-awon. Sa dili madugay ang uban pagatumanon pa. Nasentro kining tanan sa kulbahinam nga tayuktok sa dakong katuyoan ni Jehova nga balaanon ang iyang ngalan atubangan sa tanang linalang. (Ezekiel 38:23; Pinadayag 4:11; 5:13) Dugang pa, ang mga palaaboton sa kinabuhi sa matag usa kanato nalambigit niini. Sa unsang paagi matuod kana?

 2. (a) Unsay nakita ni apostol Juan sa iyang ikaupat nga panan-awon? (b) Unsang mga pangutana mahitungod niining panan-awona ang atong hisgotan?

² Sa ikaupat sa serye sa mga panan-awon sa Pinadayag, si Juan nakakitag mga manulonda nga nagpugong sa mga hangin sa kalaglagan hangtod “ang mga ulipon sa atong Diyos” matimrihan diha sa ilang mga agtang. Unya nakita niya ang labing makapaukyab nga hitabo​—“usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga dila,” nahiusa sa pagsimba kang Jehova ug sa pagpasidungog sa iyang Anak. Kini sila, giingnan si Juan, maoy mga tawo nga manggula sa dakong kasakitan. (Pinadayag 7:1-17) Kinsa ba ang gibatbat ingong “mga ulipon sa atong Diyos”? Ug kinsay maglangkob sa “dakong panon” sa mga maluwas sa kasakitan? Ikaw ba mahiapil kanila?

Kinsa “ang mga Ulipon sa Atong Diyos”?

 3. (a) Sa Juan 10:1-18, giunsa pag-ilustrar ni Jesus ang iyang relasyon ngadto sa iyang mga sumusunod? (b) Unsay gihimong posible ni Jesus alang sa iyang mga karnero pinaagi sa iyang haladnong kamatayon?

³ Mga upat ka bulan una sa iyang kamatayon, si Jesus naghisgot sa iyang kaugalingon ingong “ang maayong magbalantay” ug sa iyang mga sumusunod ingong “mga karnero” nga alang kanila itugyan niya ang iyang kinabuhi. Ilabinang gihisgotan niya ang mga karnero nga nakaplagan niya sulod sa usa ka masambingayong toril ug human niadto gihatagan niyag espesyal nga pag-atiman. (Juan 10:1-18)a Sa pagkamahigugmaon, si Jesus nagtugyan sa iyang kalag alang sa iyang mga karnero, nga mitagana sa bili sa lukat nga gikinahanglan aron sa pagpahigawas kanila gikan sa sala ug kamatayon.

 4. Kinsa ang unang gitigom ingong karnero sumala sa gihisgotan dinhi ni Jesus?

⁴ Apan, sa wala pa niya buhata kana, ingong ang Maayong Magbalantay si Jesus personal nga nagtigom ug mga tinun-an. Ang unang mga tinun-an gipailaila kaniya ni Juan nga Bawtista, ang “magbalantay sa ganghaan” sa ilustrasyon ni Jesus. Si Jesus nangita sa mga tawo nga paborableng mosanong sa kahigayonan nga mahimong bahin sa daghag-sakop nga ‘binhi ni Abraham.’ (Genesis 22:18; Galacia 3:16, 29) Iyang giugmad diha sa ilang mga kasingkasing ang apresasyon alang sa Gingharian sa mga langit, ug iyang gipasaligan sila nga magaandam siyag dapit alang kanila diha sa balay sa iyang langitnong Amahan. (Mateo 13:44-46; Juan 14:2, 3) Sa pagkahaom siya miingon: “Sukad sa mga adlaw ni Juan nga Bawtista hangtod karon ang gingharian sa mga langit mao ang tumong nga paingon niana nagapakigbisog ang mga tawo, ug ang mga nagapakigbisog ngadto niana nanagpangsakgaw niini.” (Mateo 11:12) Kini sila nga misunod kaniya aron makab-ot ang maong tumong napamatud-ang nasulod sa toril nga gihisgotan ni Jesus.

 5. (a) Kinsa “ang mga ulipon sa atong Diyos” nga gitumong sa Pinadayag 7:3-8? (b) Unsay nagpakita nga daghan pa ang moduyog sa pagsimba uban sa espirituwal nga mga Israelinhon?

⁵ Sa Pinadayag 7:3-8, kadtong malamposong nagpakigbisog sa unahan alang nianang langitnong tumong gitawag usab “ang mga ulipon sa atong Diyos.” (Tan-awa ang 1 Pedro 2:9, 16.) Kinaiyanhon ba lamang nga mga Hudiyo ang 144,000 nga gihisgotan dinha? Kadtong nasulod sa masambingayong toril sa ilustrasyon ni Jesus mga Hudiyo ba lamang? Dili gayod; sila mga sakop sa espirituwal nga Israel sa Diyos, nga silang tanan maoy mga kauban ni Kristo sa espirituwal nga binhi ni Abraham. (Galacia 3:28, 29; 6:16; Pinadayag 14:1, 3) Siyempre, sa kadugayan ang panahon moabot ra sa dihang ang tinong gidaghanon makompleto na. Unya unsa may mahitabo? Sumala sa gitagna sa Bibliya, ang uban pa​—nga usa ka dakong panon kanila​—moduyog niining espirituwal nga mga Israelinhon sa pagsimba kang Jehova.​—Zacarias 8:23.

Ang “Ubang mga Karnero”​—Hentil ba Sila nga mga Kristohanon?

 6. Unsang panghitabo ang gipunting sa Juan 10:16?

⁶ Human sa paghisgot sa usa ka toril sa Juan 10:7-15, gilakip ni Jesus ang laing pundok sa kinatibuk-ang mga panghitabo, nga miingon: “Ako adunay ubang mga karnero, nga wala niining torila; sila usab kinahanglang akong dad-on, ug sila mamati sa akong tingog, ug sila mahimong usa ka panon, usa ka pastol.” (Juan 10:16) Kinsa ba ang maong “ubang mga karnero”?

 7, 8. (a) Nganong ang ideya nga ang ubang mga karnero maoy Hentil nga mga Kristohanon gipasukad sa sayop nga pasikaranan? (b) Unsang mga kamatuoran mahitungod sa katuyoan sa Diyos alang sa yuta ang angay nga adunay kalabotan sa atong pagkasabot kon kinsa ang ubang mga karnero?

⁷ Ang mga komentarista sa Kakristiyanohan kasagarang naghunahuna nga kining ubang mga karnero maoy Hentil nga mga Kristohanon ug nga kadtong anaa sa toril nga naunang gihisgotan maoy mga Hudiyo, kadtong nailalom sa tugon sa Kasugoan, ug ang duha ka grupo moadto sa langit. Apan si Jesus natawo nga Hudiyo ug tungod sa iyang nasyonalidad nailalom sa tugon sa Kasugoan. (Galacia 4:4) Dugang pa, kadtong naghunahuna nga ang ubang mga karnero maoy Hentil nga mga Kristohanon nga gantihan ug kinabuhi sa langit napakyas sa pagtagad sa usa ka bililhong bahin sa katuyoan sa Diyos. Sa gilalang ni Jehova ang unang mga tawo ug gibutang sila sa tanaman sa Eden, iyang gitin-aw nga ang iyang katuyoan mao nga ang yuta pagapuy-an, nga mahimong paraiso ang kinatibuk-an niini, ug ang mga tawo nga tig-atiman niini magtagamtam sa kinabuhi sa walay kataposan​—sa kondisyon nga sila motahod ug mosunod sa ilang Maglalalang.​—Genesis 1:26-28; 2:15-17; Isaias 45:18.

⁸ Sa dihang si Adan nakasala, ang katuyoan ni Jehova wala mapakyas. Sa pagkamahigugmaon ang Diyos mihimog tagana aron ang mga kaliwat ni Adan makabaton ug kahigayonan sa pagpahimulos kon unsay wala pabilhi ni Adan. Si Jehova mitagna nga ipatungha niya ang usa ka manluluwas, usa ka binhi, nga pinaagi niya ang mga panalangin mahimong mabatonan sa tanang nasod. (Genesis 3:15; 22:18) Kanang maong saad wala magpasabot nga ang tanang maayong tawo sa yuta dad-on sa langit. Si Jesus nagtudlo sa iyang mga sumusunod sa pag-ampo: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Dili pa dugay una niya hisgoti ang ilustrasyong nahitala sa Juan 10:1-16, gisultihan ni Jesus ang iyang mga tinun-an nga igahatag sa iyang Amahan ang langitnong Gingharian ngadto lamang sa usa ka “gamayng panon.” (Lucas 12:32, 33) Busa inigkabasa nato sa ilustrasyon ni Jesus nga siya ang Maayong Magbalantay nga magtugyan sa iyang kalag alang sa iyang mga karnero, sayop kon dili ilakip ang kinabag-an sa mga dad-on ni Jesus ilalom sa mahigugmaon niyang pag-atiman, sila nga mahimong yutan-ong mga sakop sa iyang langitnong Gingharian.​—Juan 3:16.

 9. Ingon ka sayo sa 1884, unsay nasabtan sa mga Estudyante sa Bibliya kon kinsa ang ubang mga karnero?

⁹ Ingon ka sayo sa 1884, gipaila sa Watch Tower ang ubang mga karnero ingong ang katawhang hatagan ug higayon sa pagkinabuhi niining yutaa ubos sa mga kahimtang nga katumanan sa unang katuyoan sa Diyos. Kadtong unang mga Estudyante sa Bibliya nakaamgo nga pipila nianang ubang mga karnero maoy mga tawo nga nabuhi ug namatay sa wala pa ang yutan-ong ministeryo ni Jesus. Hinuon, may pila ka detalyeng wala nila hisabti sa tukmang paagi. Pananglitan, naghunahuna sila nga ang pagpanigom sa ubang mga karnero mahitabo human sa pagkadawat sa tanang dinihogan sa ilang langitnong ganti. Bisan pa niana, sila nakaamgo gayod nga ang ubang mga karnero maoy dili lamang Hentil nga mga Kristohanon. Ang higayon sa pagkahimong usa sa ubang mga karnero maoy abli alang sa mga Hudiyo ug sa mga Hentil, alang sa katawhan sa tanang nasod ug mga rasa.​—Itandi ang Buhat 10:34, 35.

10. Aron kita mahimong kadtong tinuod nga giisip ni Jesus nga iyang ubang mga karnero, unsay kinahanglang matuod bahin kanato?

¹⁰ Aron mohaom sa kahubitan nga gihatag ni Jesus, ang ubang mga karnero kinahanglang maoy katawhan si kinsa, walay sapayan sa rasanhon o etnikong kagikan, magaila kang Jesu-Kristo ingon nga ang Maayong Magbalantay. Unsay nalakip niana? Kinahanglang sila magpadayag sa kaaghop ug kaandam nga pagagiyahan, nga ang maong mga hiyas maoy kinaiya sa mga karnero. (Salmo 37:11) Ingon nga matuod sa gamayng panon, kinahanglang sila “makaila sa tingog [sa maayong magbalantay]” ug dili motugot nga sila pagagiyahan sa uban nga tingali magtinguha nga mag-impluwensiya kanila. (Juan 10:4; 2 Juan 9, 10) Kinahanglang ilang pabilhan ang kabililhon sa gibuhat ni Jesus sa pagtugyan sa iyang kalag alang sa iyang mga karnero ug ipakita ang bug-os nga pagtuo sa maong tagana. (Buhat 4:12) Kinahanglang sila “mamati” sa tingog sa Maayong Magbalantay inig-awhag niya kanila sa paghatag ug balaang pag-alagad kang Jehova lamang, sa pagpadayon pagpangita pag-una sa Gingharian, sa pagpabiling bulag gikan sa kalibotan, ug sa pagpakitag nagasakripisyo-sa-kaugalingon nga gugma alang sa usag usa. (Mateo 4:10; 6:31-33; Juan 15:12, 13, 19) Mohaom ka ba sa maong kahubitan sa mga giisip ni Jesus nga iyang ubang mga karnero? Gusto ba nimong mohaom ka? Pagkabililhon sa relasyon nga mabatonan sa tanan nga mahimong tinuod nga ubang mga karnero ni Jesus!

Pagtahod sa Awtoridad sa Gingharian

11. (a) Sa ilhanan sa iyang pagkaanaa, unsay giingon ni Jesus mahitungod sa mga karnero ug sa mga kanding? (b) Kinsa ang mga igsoon nga gitumong ni Jesus?

¹¹ Ubay-ubayng mga bulan human niya ihatag ang ilustrasyon sa ibabaw, didto na usab si Jesus sa Jerusalem. Samtang naglingkod sa Bukid sa mga Olibo nga nag-umbaw sa dapit sa templo, iyang gihatag sa iyang mga tinun-an ang mga detalye bahin sa ‘ilhanan sa iyang pagkaanaa ug sa katiklopan sa sistema sa mga butang.’ (Mateo 24:3) Siya mihisgot na usab bahin sa pagpanigom sa mga karnero. Lakip sa uban pang mga butang, siya miingon: “Sa dihang moabot ang Anak sa tawo diha sa iyang himaya, ug ang tanang anghel uban kaniya, niana siya molingkod sa iyang mahimayaong trono. Ug ang tanang kanasoran tigomon atubangan niya, ug siya maglain sa katawhan gikan sa usag usa, maingon sa usa ka pastol nga nagalain sa mga karnero gikan sa mga kanding. Ug iyang ibutang ang mga karnero sa iyang tuong kamot, apan ang mga kanding sa iyang wala.” Niining sambingaya, si Jesus nagpadayag nga kadtong sa ingon hatagag pagtagad sa Hari pagahukman sumala sa ilang tinagdan sa iyang “mga igsoon.” (Mateo 25:31-46) Kinsa ba ang maong mga igsoon? Sila mao ang gianak-sa-espiritung mga Kristohanon nga sa ingon maoy “mga anak sa Diyos.” Si Jesus ang panganay nga Anak sa Diyos. Busa, sila mga igsoon ni Kristo. Sila mao “ang mga ulipon sa atong Diyos” nga gihisgotan sa Pinadayag 7:3, ang mga gipili gikan sa taliwala sa katawhan aron makaambit uban ni Kristo diha sa iyang langitnong Gingharian.​—Roma 8:14-17.

12. Nganong ang paagi sa pagpakiglabot sa katawhan sa mga igsoon ni Kristo hinungdanon kaayo?

¹² Ang paagi sa pagpakiglabot sa ubang mga tawo niining mga manununod sa Gingharian maoy hinungdanon kaayo. Sila ba imong giisip nga sama sa pag-isip ni Jesu-Kristo ug ni Jehova? (Mateo 24:45-47; 2 Tesalonica 2:13) Ang tinamdan sa usa ka tawo ngadto niining mga dinihogan mobanaag sa iyang tinamdan kang Jesu-Kristo mismo ug sa iyang Amahan, ang Unibersohanong Soberano.​—Mateo 10:40; 25:34-46.

13. Sa unsang gidak-on nasabtan sa mga Estudyante sa Bibliya niadtong 1884 ang sambingay sa mga karnero ug mga kanding?

¹³ Sa iyang isyu sa Agosto 1884, ang Watch Tower tukmang mipunting nga ang “mga karnero” sa maong sambingay maoy mga tawo nga sa ilang atubangan gibutang ang palaaboton nga hingpit nga kinabuhi sa yuta. Nasabtan usab nga ang sambingay mapadapat gayod inigmando na ni Kristo gikan sa iyang mahimayaong trono sa langit. Hinuon, niadtong panahona sila wala makasabot sa tin-aw kon kanus-a niya sugdi ang paglain nga buluhaton nga gihubit dinha o kon unsa ang gidugayon niana.

14. Sa unsang paagi ang usa ka diskurso sa kombensiyon niadtong 1923 nakatabang sa mga Estudyante sa Bibliya sa pag-ila kon kanus-a matuman ang matagnaong sambingay ni Jesus?

¹⁴ Bisan pa niana, niadtong 1923, sa usa ka diskurso sa kombensiyon, si J. F. Rutherford, niadtong panahona presidente sa Watch Tower Society, nagpatin-aw sa panahon nga matuman ang sambingay sa mga karnero ug mga kanding. Ngano man? Sa bahin, tungod kay gipakita sa sambingay nga ang mga igsoon sa Hari​—labing menos ang pipila kanila—​anaa pa sa yuta. Taliwala sa mga tawo, ang gianak-sa-espiritu nga mga sumusunod niya lamang ang tinuod matawag nga iyang mga igsoon. (Hebreohanon 2:10-12) Kini sila wala na unya sa yuta sa tibuok Milenyo, nga maghatag ug higayon sa katawhan sa pagbuhat ug maayo ngadto kanila sa mga paaging gibatbat ni Jesus.​—Pinadayag 20:6.

15. (a) Unsang mga panghitabo ang nakatabang sa mga Estudyante sa Bibliya sa pag-ila sa tukma sa mga karnero sa sambingay ni Jesus? (b) Sa unsang paagi ang mga karnero naghatag ug pamatuod sa ilang pagpabili sa Gingharian?

¹⁵ Sa maong diskurso sa 1923, gipaningkamotan ang pag-ila niadtong mohaom sa kahubitan sa Ginoo bahin sa mga karnero ug sa mga kanding, apan kinahanglang hisabtan ang ubang mga butang una pa ang bug-os nga kahulogan sa sambingay mahimong tin-aw. Sa misunod nga katuigan, anam-anam nga gipaila ni Jehova sa iyang mga alagad kanang hinungdanong mga detalye. Kini naglakip sa tin-awng pagkasabot, niadtong 1927, nga “ang matinumanon ug maalamong ulipon” mao ang tibuok nga lawas sa dinihogan-sa-espiritung mga Kristohanon sa yuta; sa pagpabili usab, niadtong 1932, sa panginahanglan nga maisogong magpaila sa kaugalingon nga kauban sa dinihogang mga alagad ni Jehova, sama sa gibuhat ni Jonadab kang Jehu. (Mateo 24:45; 2 Hari 10:15) Niadtong panahona, pinasukad sa Pinadayag 22:17, ang maong karnerohong mga tawo ilabinang gidasig sa pagpakig-ambit sa pagdala sa mensahe sa Gingharian ngadto sa uban. Ang ilang pagpabili sa Mesiyasnong Gingharian magtukmod kanila dili lamang sa pagpakitag makitawhanong kalulot ngadto sa mga dinihogan sa Ginoo kondili sa pagpahinungod sa ilang mga kinabuhi kang Jehova pinaagi ni Kristo ug suod nga makig-uban sa iyang mga dinihogan, nga makig-ambit nga masiboton sa buluhaton nga ilang ginabuhat. Ginabuhat ba nimo kana? Ngadto niadtong nagabuhat niana, ang Hari magaingon: “Umari, kamong mga gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan.” Anaa sa ilang atubangan ang maanindot nga palaaboton nga walay-kataposang kinabuhi diha sa kahingpitan sa yutan-ong dominyo sa Gingharian.​—Mateo 25:34, 46.

Ang “Dakong Panon”​—Asa Sila Moadto?

16. (a) Unsang sayop nga mga pagtuo ang nabatonan sa unang mga Estudyante sa Bibliya mahitungod sa ilhanan sa dakong pundok, o dakong panon, sa Pinadayag 7:9? (b) Kanus-a ug sa unsang pasikaranan gitul-id ang ilang pagtuo?

¹⁶ Sulod sa usa ka panahon ang mga alagad ni Jehova nagtuo nga ang dakong pundok (o, dakong panon) sa Pinadayag 7:9, 10 maoy lahi sa ubang mga karnero sa Juan 10:16 ug sa mga karnero sa Mateo 25:33. Tungod kay ang Bibliya nag-ingon nga sila “nagbarog atubangan sa trono,” gihunahuna nga sila atua sa langit, dili anaa sa mga trono, ingong kaubang mga manununod ni Kristo, apan diha sa ikaduhang dapit atubangan sa trono. Giisip sila nga mga Kristohanong may menos nga pagkamatinumanon, ang mga wala magpakitag espiritu sa tinuod nga pagsakripisyo-sa-kaugalingon. Niadtong 1935 kanang pagtuoha gitul-id.b Ang usa ka pagsusi sa Pinadayag 7:9 sa kahayag sa mga teksto sama sa Mateo 25:31, 32 nagtin-aw nga ang mga tawo dinhi sa yuta mahimong anaa sa “atubangan sa trono.” Gipunting usab nga ang Diyos walay duha ka batakan sa pagkamatinumanon. Ang tanang makaangkon sa iyang pag-uyon kinahanglang padayong maghupot sa integridad kaniya.​—Mateo 22:37, 38; Lucas 16:10.

17, 18. (a) Unsa ang hinungdan nga miuswag pag-ayo, sukad sa 1935, ang gidaghanon niadtong nagpaabot ug kinabuhing dayon sa yuta? (b) Sa unsang hinungdanong buluhaton kadtong membro sa dakong panon masibotong nagapakig-ambit?

¹⁷ Sulod sa daghang tuig ang katawhan ni Jehova naghisgot sa mga saad sa Diyos bahin sa yuta. Tungod sa gilaoman nilang mahitabo sa katuigang 1920, ilang gimantala nga “Minilyong Buhi Karon Dili na Gayod Mamatay.” Apan wala moabot ug minilyon ang midawat sa mga tagana sa Diyos alang sa kinabuhi niadtong panahona. Sa kinabag-ang midawat sa kamatuoran, ang balaang espiritu nagpaturok sa paglaom sa langitnong kinabuhi. Bisan pa niana, ilabina human sa 1935 ang usa ka iladong kausaban nahitabo. Dili kay wala tagda sa The Watchtower ang paglaom sa kinabuhing dayon sa yuta. Sa tinagpulo ka tuig gihisgotan kini sa mga alagad ni Jehova ug gipangita kadtong mohaom sa kahubitan sa Bibliya. Hinuon, sa gitakdang panahon ni Jehova iyang gitino nga sila magpadayag sa ilang kaugalingon.

¹⁸ Ang mga talaan sa tumatambong nagpakita nga sulod sa daghang tuig ang kadaghanang tumatambong sa Memoryal miambit sa mga emblema. Apan sulod sa 25 ka tuig human sa 1935, ang tumatambong sa tinuig nga Memoryal sa kamatayon ni Kristo misulbong ngadto sa kapin sa usa ka gatos ka pilo sa gidaghanon niadtong miambit. Kinsa man kadtong uban pa? Ang umaabot nga mga membro sa dakong panon. Tin-aw, ang panahon ni Jehova miabot na nga tigomon sila ug iandam sila aron maluwas sa dakong kasakitan nga anaa lang sa unahan. Sumala sa gitagna, sila nanggula “gikan sa tanang kanasoran ug mga tribo ug katawhan ug mga dila.” (Pinadayag 7:9) Sila masibotong nagapakig-ambit sa buluhaton nga gitagna ni Jesus sa miingon siya: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.”​—Mateo 24:14.

[Footnote]

Unsa ang Imong Komento?

◻ Nganong ang panan-awon sa Pinadayag kapitulo 7 ilabinang makaiikag?

◻ Nganong ang ubang mga karnero sa Juan 10:16 dili limitado sa Hentil nga mga Kristohanon?

◻ Kinahanglang unsay tinuod niadtong mohaom sa kahubitan sa Bibliya sa ubang mga karnero?

◻ Sa unsang paagi ang sambingay sa mga karnero ug mga kanding nagpasiugda sa pagtahod alang sa awtoridad sa Gingharian?

◻ Unsay nagpaila nga miabot na ang panahon ni Jehova sa pagtigom sa dakong panon sa Pinadayag 7:9?