LEKSIYON 29

Unsay Mahitabo Dihang ang Tawo Mamatay?

Giimprenta nga Edisyon

Nakasulay na ba ka nga mamatyag minahal? Nianang lisod nga panahon, tingali makahunahuna ka: ‘Unsay mahitabo dihang mamatay ta? Naa bay paglaom nga makita nato pag-usab ang atong mga minahal?’ Niini nga leksiyon ug sa sunod, sayra ang makapahupay nga mga tubag sa Bibliya.

1. Unsay mahitabo dihang ang tawo mamatay?

Gikomparar ni Jesus ang kamatayon sa hinanok nga pagkatulog. Ang tawong nahinanok wala mahibalo kon unsay nagakahitabo sa iyang palibot. Nganong ang kamatayon nahisama sa pagkatulog? Dihang ang usa mamatay, dili na siya mobatig kasakit. Dili siya mingawon, bisan pag gimahal niya pag-ayo ang iyang mga higala ug pamilya. Ang Bibliya nag-ingon: “Ang mga patay walay nahibaloan nga bisan unsa.”—Basaha ang Ecclesiastes 9:5.

2. Unsay kaayohan kon nahibalo ta sa kamatuoran bahin sa kamatayon?

Daghang tawo ang mahadlok mamatay, ug mahadlok pa gani sila sa patay! Pero mahupay ka sa giingon sa Bibliya bahin sa kamatayon. Si Jesus miingon: “Ang kamatuoran magpahigawas kaninyo.” (Juan 8:32) Ang ubang relihiyon nagtudlo nga ang tawo naay kalag nga magpabiling buhi inigkamatay niya, pero dili kana ang gitudlo sa Bibliya. Busa dili mag-antos ang tawo dihang mamatay. Dugang pa, kay ang mga patay wala nay nahibaloan, dili sila makahimog kadaot nato. Busa dili kinahanglang simbahon ang mga patay o mohimo tag mga butang para nila aron dili sila masuko nato, ug dili kinahanglang moampo ta para nila.

Ang uban moingon nga makahimo sila sa pagpakig-estorya sa mga patay. Pero imposible na. Sa ato nang nahisgotan, ang mga patay “walay nahibaloan nga bisan unsa.” Kadtong naghunahuna nga naestorya nila ang ilang mga minahal nga namatay, sa pagkatinuod, nakig-estorya sa mga demonyo nga nagpakaaron-ingnong sila ang tawo nga namatay. Busa ang pagkahibalo sa kamatuoran bahin sa kamatayon naghatag natog proteksiyon batok sa mga demonyo. Gipasidan-an ta ni Jehova bahin sa pagpakig-estorya sa mga patay kay nahibalo siya nga ang pagpakiglabot sa mga demonyo makadaot nato.—Basaha ang Deuteronomio 18:10-12.

TUN-IG DUGANG

Sayrag dugang ang giingon sa Bibliya bahin sa kamatayon, ug palig-ona ang imong pagtuo sa mahigugmaong Diyos kinsa dili magpaantos niadtong mga namatay.

Usa ka lalaki ug iyang duha ka anak nga naglingkod panahon sa haya sa iyang asawa ug sa mama sa mga bata. Ang mga higala ug paryente kauban nila aron hupayon sila ug suportahan.

3. Sayra ang tinuod nga kahimtang sa mga patay

Sa tibuok kalibotan, ang mga tawo lainlain ug gituohan kon unsay mahitabo dihang mamatay ta. Siyempre, dili tanang gituohan sa mga tawo tinuod.

Unsay kasagarang gituohan sa mga tawo sa inyong lugar bahin sa kahimtang sa mga patay?

Aron imong mahibaloan ang gitudlo sa Bibliya, i-play ang VIDEO.

VIDEO: Unsa ang Kahimtang sa mga Patay?—Excerpt (1:19)

Collage: Mga esena sa video nga ‘Unsa ang Kahimtang sa mga Patay?—Excerpt.’ 1. Patayng lawas diha sa higdaanan sa ospital. 2. Lalaki nga natulog nga gipatung-an sa duha ka tawo samtang nagbiyahe sa tren.

Basaha ang Ecclesiastes 3:20, ug dayon hisgoti kini nga mga pangutana:

Base sa teksto, unsay mahitabo dihang mamatay ang tawo?
Naa bay magpabiling buhi sa tawo dihang mamatay siya?

Ang Bibliya naghisgot bahin sa kamatayon ni Lazaro, ang suod nga higala ni Jesus. Samtang imong basahon ang Juan 11:11-14, matikdi kon unsay giingon ni Jesus sa kahimtang ni Lazaro. Dayon hisgoti kini nga mga pangutana:

Sa unsa gikomparar ni Jesus ang kamatayon?
Base sa giingon ni Jesus, unsay atong makat-onan bahin sa kahimtang sa mga patay?
Unsay imong hunahuna sa giingon sa Bibliya bahin sa kamatayon?

4. Ang kamatuoran bahin sa kamatayon makatabang nato

Ang pagkahibalo sa kamatuoran bahin sa kamatayon motabang nga dili na ta mahadlok sa mga patay. Basaha ang Ecclesiastes 9:10, ug dayon hisgoti kini nga pangutana:

Ang mga patay ba makahimog kadaot nato?

Kay nahibalo na ta sa kamatuoran sa Bibliya, dili na ta motuo nga kinahanglang naa tay himoon aron ang patay dili masuko nato o nga ang patay kinahanglang simbahon. Basaha ang Isaias 8:19 ug Pinadayag 4:11, ug dayon hisgoti kini nga pangutana:

Unsa kahay pagbati ni Jehova sa usa ka tawo nga mosimba o magpatabang sa usa nga namatay?

Collage: Mga tradisyon nga nagpasidungog sa patay. 1. Tawo nga nagluhod ug nag-ampo atubangan sa lapida ug naghalad ug pagkaon. 2. Tulo ka nitibo nga nagsayaw nga nag-costume. 3. Parada sa mga tawo nga nagmaskara ug kalabera ug nagdalag dagkong kalabera sa Adlaw sa mga Patay. — Dihang mahibalo ta sa kamatuoran bahin sa kamatayon, mahigawas ta sa mga tradisyon nga dili makapalipay kang Jehova

5. Ang kamatuoran bahin sa kamatayon makapahupay nato

Daghan ang gitudloan nga dihang mamatay sila, mag-antos sila tungod sa ilang nangaging binuhatan. Pero makapahupay ang pagkahibalo nga dili mag-antos ang tawo dihang mamatay siya, bisan pag nakahimo siyag daotan kaayong buhat. Basaha ang Roma 6:7, ug dayon hisgoti kini nga pangutana:

Ang Bibliya nag-ingon nga kon ang usa ka tawo mamatay, siya gipagawas na, o gipasaylo na, sa Diyos sa iyang mga sala. Busa para nimo, ang namatay nag-antos pa ba tungod sa iyang nangaging mga sala?

Kon mas mailhan nato si Jehova, mas masabtan nato nga dili gyod niya paantoson ang namatay. Basaha ang Deuteronomio 32:4 ug 1 Juan 4:8, ug dayon hisgoti kini nga mga pangutana:

Base sa maong mga teksto, ang Diyos nindot kaayog mga hiyas. Busa paantoson kaha niya ang namatay?
Para nimo, makapahupay ba ang kamatuoran bahin sa kamatayon? Ngano?

ANG UBAN MOINGON: “Nahadlok ko kon unsay mahitabo nako kon mamatay ko.”