Unsay Gitudlo sa Bibliya Bahin sa Milagrosong Pagsultig Lainlaing Pinulongan?

Ang pipila sa unang mga Kristohanon milagrosong makasultig laing pinulongan bisag wala nila kini tun-i. (Buhat 10:46) Gani masabtan dayon sila sa mga tawo nga nagsulti sa maong mga pinulongan. (Buhat 2:4-8) Ang katakos sa pagsultig lainlaing pinulongan maoy usa sa mga gasa sa balaang espiritu nga gihatag sa Diyos sa pipila ka Kristohanon sa unang siglo.​—Hebreohanon 2:4; 1 Corinto 12:4, 30.

• Asa ug kanus-a nagsugod ang milagrosong pagsultig lainlaing pinulongan?

• Unsay katuyoan sa milagrosong pagsultig lainlaing pinulongan?

• Magpadayon ba ang milagrosong pagsultig lainlaing pinulongan?

• Kanus-a natapos ang milagrosong pagsultig lainlaing pinulongan?

• Komosta kadtong milagrosong nagsultig lainlaing pinulongan karon?

• Sa unsang paagi mailhan ang tinuod nga mga Kristohanon?

Kini nga milagro unang nahitabo sa Jerusalem sa buntag sa Hudiyohanong Pista sa Pentekostes 33 C.E. Mga 120 ka tinun-an ni Jesus ang nagtigom dihang “silang tanan napuno sa balaang espiritu ug misugod sa pagsulti sa lainlaing mga pinulongan.” (Buhat 1:15; 2:1-4) Dihay dakong panon sa mga tawo “gikan sa matag nasod” ang nanugok, ug “ang matag usa nakadungog kanilang nagasulti sa iyang kaugalingong pinulongan.”​—Buhat 2:5, 6.

1. Aron ipakita nga ang Diyos maoy nagpaluyo sa mga Kristohanon. Sa unang panahon, ang Diyos nagpadalag milagrosong mga ilhanan aron pamatud-an nga siyay nagpaluyo sa matinumanong mga tawo sama ni Moises. (Exodo 4:1-9, 29-31; Numeros 17:10) Kana sab ang katuyoan sa milagrosong pagsultig lainlaing pinulongan, aron ipakita nga gipaluyohan sa Diyos ang bag-ong natukod nga Kristohanong kongregasyon. Si apostol Pablo misulat: “Ang pagsultig lainlaing mga pinulongan maoy usa ka ilhanan, dili [para] sa mga magtutuo, kondili [para] sa mga dili-magtutuo.”​—1 Corinto 14:22.

2. Aron ang mga Kristohanon makahatag ug bug-os nga pamatuod. Kadtong nakadungog sa mga sumusunod ni Jesus sa adlaw sa Pentekostes miingon: “Atong nadungog sila nga nagasulti diha sa atong mga pinulongan bahin sa halangdong mga butang sa Diyos.” (Buhat 2:11) Busa ang laing importanteng katuyoan niini nga milagro maoy aron ang mga Kristohanon ‘makahatag ug bug-os nga pamatuod’ ug ‘makahimog mga tinun-an sa katawhan sa tanang kanasoran,’ sumala sa gisugo ni Jesus kanila. (Buhat 10:42; Mateo 28:19) Mga 3,000 sa nakakita sa maong milagro ug naminaw sa pagsangyaw ang nahimong mga tinun-an niadto mismong adlawa.​—Buhat 2:41.

Dili. Ang mga gasa sa balaang espiritu, nga naglakip sa milagrosong pagsultig lainlaing pinulongan, maoy temporaryong probisyon. Ang Bibliya nagtagna: “Kon aduna may mga gasa sa pagpanagna, kini sila wagtangon ra; kon aduna may pagsultig lainlaing mga pinulongan, kini sila mohunong.”​—1 Corinto 13:8.

Ang mga gasa sa balaang espiritu sagad ginapasa ngadto sa ubang Kristohanon dihang presente ang mga apostoles, nga sagad pinaagi sa pagpatong sa mga apostoles sa ilang mga kamot diha sa ulo sa mga isigkamagtutuo. (Buhat 8:18; 10:44-46) Ug base sa mga teksto, kadtong mga nakadawat sa mga gasa sa espiritu pinaagi sa mga apostoles wala magpasa niini ngadto sa uban. (Buhat 8:5-7, 14-17) Sa pag-ilustrar, ang usa ka opisyal sa gobyerno mahimong mohatag sa usa ka tawo ug lisensiya sa pagdrayb, pero ang tawo nga gihatagan ug lisensiya walay legal nga katungod sa paghatag ug lisensiya sa uban. Dayag nga ang milagrosong pagsultig lainlaing pinulongan natapos dihang namatay ang mga apostoles ug kadtong personal nilang gihatagan niini nga gasa.

Ang gasa sa milagrosong pagsultig lainlaing pinulongan dayag nga natapos sa hinapos sa unang siglo C.E. Walay bisan kinsa karon ang tinuod nga makapangangkon nga sila nagsultig lainlaing pinulongan pinaagi sa gahom sa Diyos.a

Si Jesus miingon nga ang gugma nga andam mosakripisyo maoy magpaila sa iyang mga tinun-an. (Juan 13:34, 35) Si apostol Pablo nagtudlo sab nga ang gugma maoy permanenteng ilhanan sa tinuod nga mga Kristohanon. (1 Corinto 13:1, 8) Iyang gipakita nga ang espiritu sa Diyos magpatunghag mga hiyas diha sa mga Kristohanon nga gitawag sa katibuk-an ingong “ang bunga sa espiritu,” nga ang unang hiyas mao ang gugma.​—Galacia 5:22, 23.