SOSTENES

[gikan sa lintunganayng mga pulong nga nagkahulogang “luwas” ug “kusog”].

Ang nagadumalang opisyal sa sinagoga sa Corinto sa panahon sa pagduaw ni Pablo sa Corinto; lagmit ang manununod ni Crispo, kinsa nahimong Kristohanon. Sa dihang si Prokonsul Galio midumili sa paghusay sa sumbong sa mga Hudiyo batok sa relihiyosong pagtulon-an ni Pablo, ang panon sa katawhan nagdakop kang Sostenes ug nagbun-og kaniya. Ang pipila ka manuskrito nag-ingon nga ang panon sa katawhan gilangkoban sa batok-Hudiyong “mga Grego”; ang uban naghubad niini nga “mga Hudiyo.” Apan, kining duha maoy pulos mga sinal-ot, sanglit ang tulo ka labing karaang mga manuskrito wala mag-asoy kanato kon unsa nga grupo ang miatake kang Sostenes.​—Buh 18:​8, 12-17.

Posible nga kining dili-maayong kasinatian nga naagoman ni Sostenes mitultol sa pagkakabig kaniya sa Kristiyanidad ug sa ulahing pagpakig-uban kang Pablo didto sa Efeso, kay diha sa mga pangomosta sa sinugdanan sa iyang unang sulat ngadto sa mga taga-Corinto, si Pablo naglakip sa usa ka Sostenes (usa ka dili-kaayo komon nga Gregong ngalan), nga naghisgot kaniya nga “atong igsoon.”​— 1Co 1:1.