QUIO

Usa sa dakodakong mga pulo sa Dagat Aegean ug giulang gikan sa K nga kabaybayonan sa Asia Minor pinaagi sa usa ka dagat nga ang gilapdon maoy 8 km (5 mi) o kapin pa. Ang sukod sa pulo maoy mga 50 km (30 mi) ang gitas-on (A ngadto sa H) ug tali sa 13 ug 29 km (8 ngadto sa 18 mi) ang gilapdon (S ngadto sa K).

Ang Quio gihisgotan diha sa asoy sa Buhat 20 maylabot sa pagpauli ni Pablo sa Jerusalem pagkatapos sa iyang ikatulong misyonaryong panaw niadtong mga 56 K.P. Ang barko nga gisakyan ni Pablo mibiya sa Mitilene (Buh 20:14) nga mga 100 km (60 mi) dapit sa AS, tingali sa kabuntagon, ug “miabot sa atbang sa Quio” (Buh 20:15), lagmit sa pagsalop sa adlaw. Dayon, sa pagkasunod adlaw, mipadayon ang biyahe paingon sa Samos, nga mga 100 km (60 mi) ang gilay-on ubay sa baybayon.

Sa panahon sa pagpanaw ni Pablo, ang Quio gituohan nga usa ka gawasnon nga siyudad-estado sa Romanhong lalawigan sa Asia, usa ka kahimtang nga nahuptan niini hangtod sa paghari ni Emperador Vespasian (69-79 K.P.). Ang pulo ug ang pangunang siyudad niini karong adlawa gitawag ug Khios sa mga Grego ug Scio sa mga Italyano.