MITILENE

Ang pangunang siyudad sa Lesbos, usa ka pulo sa Dagat Aegean atbang sa K nga baybayon sa Asia Minor. Samtang nagpaingon sa Jerusalem niadtong mga 56 K.P., si apostol Pablo milawig ngadto sa Mitilene gikan sa Asos, usa ka dunggoanan sa yuta sa Asia Minor nga mga 45 km (28 mi) dapit sa AAK. (Buh 20:14) Sanglit wala hisgoti nga mikawas si Pablo didto, kini lagmit nagpasabot nga ang barko mieskala lamang sa Mitilene, tingali tungod kay mihinay ang hangin gikan sa A nga gikinahanglan aron makalawig. Pagkasunod adlaw ang barko mipadayon paglawig sa HHK paingon sa Quio.​—Buh 20:15.

Gituohan nga ang Mitilene sa sinugdan nag-okupar sa usa ka gamayng pulo atbang sa sidlakang baybayon sa Lesbos. Apan sa dihang midako ang siyudad kini lagmit gidugtong sa Lesbos pinaagig usa ka gipalapaw-sa-tubig nga agianan ug gipalapad ubay sa baybayon. Tungod niini nahimo ang mga dunggoanan sa A nga kiliran ug usab sa H nga kiliran sa gipalapaw-sa-tubig nga agianan. Ang siyudad gibantog ingong sentro sa pagtuon sa mga sinulat ug sa arkitektural nga katahom sa mga tinukod niini.