Pagpanudlo sa Publiko ug Gikan sa Balay ug Balay
“Ako wala misibog gikan . . . sa pagpanudlo kaninyo sa publiko ug gikan sa balay ug balay.”—BUHAT 20:20, “Byington.”
1. Sa unsang paagi mikomento ang usa ka pari nga Katoliko sa pagkaepektibo sa balay-ug-balay nga ministeryo sa mga Saksi ni Jehova?
“ANG mga Katoliko Nagdala sa Ebanghelyo sa Ganghaan ug Ganghaan.” Matud pa sa ulohan sa The Providence Sunday Journal sa Oktubre 4, 1987. Ang mantalaan nagtaho nga usa ka pangunang tumong niining maong buluhaton mao ang “pagdapit sa uban nilang dili-aktibong mga parokyano sa pagbalik ngadto sa mas aktibong parokyang kinabuhi.” Ang paring si John Allard, direktor sa Office for Evangelization in the Diocese of Providence, gikutlo nga nag-ingon: “Oo, siguradong adunay daghang pagduhaduha. Ang mga tawo nagaingon nga, ‘Anaa sila, sama sa mga Saksi ni Jehova.’ Apan ang mga Saksi ni Jehova epektibo, dili ba? Seguro ko nga kon moadto ka sa bisan hain nga Kingdom Hall sa estado [sa Rhode Island, T.B.A.,] ug makakitag mga kongregasyon nga napuno kanhi sa mga Katoliko.”
2. Unsang pangutana ang tukmang gibangon?
2 Oo, ang mga Saksi ni Jehova ilado sa ilang epektibong balay-ug-balay nga ministeryo. Apan nganong sila moadto sa balay ug balay?
Ang Apostolikanhong Paagi
3. (a) Unsang sugo ang gihatag ni Jesu-Kristo sa iyang mga disipulo? (b) Sa unsang pangunang paagi nga ang unang mga sumusunod ni Kristo nagtuman sa ilang komisyon?
3 Si Jesu-Kristo mihatag sa iyang mga sumusunod niining makahuloganong sugo: “Busa panglakaw kamo ug himoa ninyong mga tinun-an ang tanang kanasoran, sa pagbawtismo kanila sa ngalan sa Amahan ug sa Anak ug sa espiritu santo, nagapanudlo kanila sa pagtuman sa tanan nga akong gisugo kaninyo. Ug, tan-awa! ako magauban kaninyo sa kanunay hangtod sa kataposan sa sistema sa mga butang.” (Mateo 28:19, 20) Ang pangunang paagi nga kanang buluhatona pagabuhaton nadayag dihadiha dayon human sa adlaw sa Pentekostes 33 K.P. “Sa tanang adlaw sa templo ug gikan sa balay ug balay sila wala mag-undang sa pagpanudlo ug sa pagwali sa maayong balita mahitungod kang Kristo, Jesus.” (Buhat 5:42) Mga 20 ka tuig sa ulahi, ang apostol Pablo nagahimo sa balay-ug-balay nga ministeryo, kay siya nagpahinumdom sa Kristohanong mga ansiano gikan sa siyudad sa Efeso: “Wala ako maglilong sa bisan unsa sa inyong kaayohan o sa pagpanudlo kaninyo sa publiko ug sa balay ug balay.”—Buhat 20:20.
4. Nganong makasulti kita nga ang Buhat 5:42 ug Buhat 20:20 nagkahulogan nga ang pagsangyaw sa mga sumusunod ni Jesus maoy binahinbahin gikan sa balay ug balay?
4 Sa Buhat 5:42 ang mga pulong “gikan sa balay ug balay” gihubad gikan sa kat’ oiʹkon. Dinhi ang ka·taʹ gigamit sa usa ka “distributive” o binahinbahin nga diwa. Busa, ang pagsangyaw sa mga disipulo gibahinbahin gikan sa usa ka balay ngadto sa lain. Nagkomento sa Buhat 20:20, si Randolph O. Yeager nagsulat nga si Pablo nagtudlo “sa publikong mga asembliya [de·mo·siʹa] ug gikan sa balay ug balay (distributo [ka·taʹ] uban sa akusatibo). Si Pablo migugol ug tulo ka tuig sa Efeso. Siya mibisita sa matag balay, o sa labing menos siya misangyaw sa tanang mga tawo (bersikulo 26). Ania ang kasulatanhong pamatuod alang sa balay ug balay nga pag-ebanghelyo sama sa ginahimo sa publikong mga panagkatigom.”
5. Sa Buhat 20:20, nganong si Pablo wala magtumong lamang sa sosyal nga pagbisita sa mga ansiano o sa mga pagduaw isip magbalantay?
5 Ang susama nga paggamit sa ka·taʹ makita sa Lucas 8:1, nga naghisgot sa pagsangyaw ni Jesus “sa kalungsoran ug kabalangayan.” Si Pablo migamit sa plural nga porma kat’ oiʹkous sa Buhat 20:20. Dinhi daghang hubad sa Bibliya mabasa “sa inyong mga balay.” Apan ang apostol wala magtumong lamang sa sosyal nga pagbisita sa mga ansiano o sa mga pagduaw isip magbalantay diha sa mga balay sa mga isigkamagtutuo. Ang iyang sunod nga mga pulong nagpakita nga siya nagasulti mahitungod sa binalaybalay nga ministeryo taliwala sa mga dili-magtutuo, kay siya miingon: “Apan ako bug-os nga nanghimatuod sa mga Hudiyo ug sa mga Grego mahitungod sa paghinulsol ngadto sa Diyos ug sa pagtuo sa atong Ginoong Jesus.” (Buhat 20:21) Ang isigkamagtutuo naghinulsol na ug mipakita ug pagtuo kang Jesus. Busa, ang Buhat 5:42 ug Buhat 20:20 naglangkit sa pagsangyaw sa mga dili-magtutuo “gikan sa balay ug balay,” o gikan sa ganghaan ug ganghaan.
Walay Kapuli Alang Niana
6. Unsay gikaingon mahitungod sa kinaiyahan sa buluhatong pagsangyaw ni Pablo sa Efeso?
6 Nagakomento sa mga pulong ni Pablo sa Buhat 20:20, sa 1844 si Abiel Abbot Livermore misulat: “Siya dili lamang kontento nga mohatag ug mga diskurso sa publikong asembliya, ug paggamit sa ubang mga pamaagi, apan sa masiboton nagpadayon sa iyang dakong buluhaton sa pribado, gikan sa balay ug balay, ug sa literal gidala sa balay ang kamatuoran sa langit ngadto sa mga abohan ug mga kasingkasing sa mga taga Efeso.” Sa mas bag-o pa, kini namatikdan: “Ang balay ug balay nga pagpalaganap sa ebanghelyo mipaila sa unang-siglong mga Kristohanon gikan sa sinugdan (cf. Buhat 2:46; 5:42). . . . [Si Pablo] sa bug-os mibuhat sa iyang responsabilidad ngadto sa mga Hudiyo ug mga Gentil sa Efeso, ug sila walay ikapasangil kon sila mawagtang tungod sa ilang mga sala.”—The Wesleyan Bible Commentary, Tomo 4, panid 642-3.
7. Nganong ikaingon nga ang Diyos nagauyon sa balay-ug-balay nga ministeryo sa mga Saksi ni Jehova?
7 Bisag ang publikong pagpahayag adunay luna sa pagmantala sa maayong balita, kini dili kapuli alang sa personal nga pakigkontak sa ganghaan. Bahin niini, ang eskolar nga si Joseph Addison Alexander miingon: “Ang simbahan walay naimbento nga ihulip sa lugar o ikatandi sa epekto sa simbahan o sa pagsangyaw sa balay.” Sama sa giingon sa eskolar nga si O. A. Hills: “Ang publiko ug balay-ug-balay nga pagpanudlo kinahanglang manag-uban.” Ang mga Saksi ni Jehova nagatagana ug instruksiyon pinaagi sa mga diskurso sa ilang senemanang Publikong mga Tigom. Sila usab adunay tin-aw nga ebidensiya nga ang apostolikanhong paagi sa pagpalaganap sa kamatuoran sa Bibliya gikan sa balay ug balay epektibo. Ug si Jehova siguradong nagauyon niini, tungod kay ang resulta sa maong ministeryo, gipahinabo niyang linibo ang maganayan ngadto sa iyang tinuboy nga pagsimba matag tuig.—Isaias 2:1-4; 60:8, 22.
8. (a) Unsay ginaingon bahin sa katarongan kon nganong ang balay-ug-balay nga pagsangyaw epektibo? (b) Sa unsang paagi ang mga Saksi ni Jehova maitandi kang Pablo sa ganghaan nga pagsangyaw ug sa ubang pagpanaksi?
8 Ang laing awtoridad nag-ingon: “Bation nga sayong hinumdoman sa mga tawo ang pagpanudlo diha sa ilang mga pultahan kay sa simbahan.” Bueno, si Pablo sa regular anaa sa mga pultahan, nagpahimutang ug maayong panig-ingnan ingong usa ka ministro. “Siya dili kontento sa pagtudlo ug pagdiskurso sa sinagoga ug sa taboan,” misulat ang eskolar sa Bibliya nga si Edwin W. Rice. “Siya makugihon gayod sa ‘pagtudlo’ ‘gikan sa balay ug balay.’ Usa kadto ka balay-ug-balay, kamot-ug-kamot, nawong-sa-nawong nga pakigsangka sa daotan, ug sa pagdaog sa mga tawo ngadto kang Kristo, nga iyang gipakigbugno sa Efeso.” Ang mga Saksi ni Jehova nakaamgo nga ang tawo-sa-tawo nga mga panaghisgot diha sa pultahan maoy epektibo. Dugang pa, sila mihimog mga pagbalik duaw ug malipay sa pagpakig-estorya bisan sa mga magsusupak kon kini nga mga indibiduwal motugot nga himoon ang makataronganong mga panaghisgot. Pagkasusama gayod kang Pablo! Kon bahin niya, si F. N. Peloubet misulat: “Ang buluhaton ni Pablo dili lamang sa mga tigom. Walay duhaduha siya sa personal mibisita sa daghang mga tawo sa ilang mga balay bisan asa siya mahibalo nga adunay nangutana, o interesado kaayo o bisan misupak apan buot nga makighisgot sa relihiyon.”
Ang mga Ansiano Manguna
9. Unsang ehemplo ang gipakita ni Pablo alang sa mga isigka-ansiano?
9 Unsang panig-ingnan ang gipahimutang ni Pablo alang sa mga isigka-ansiano? Iyang gipakita nga sila kinahanglang magmaisogon ug dili maluya sa balay-ug-balay nga mga magmamantala sa maayong balita. Sa 1879, si J. Glentworth Butler misulat: “[Ang taga-Efeso nga mga ansiano] nahibalo nga sa pagsangyaw [ni Pablo] siya wala gayod maapektohi sa paghunahuna ug kapeligrohan sa personal o popularidad; nga wala siya maghikaw sa gikinahanglang kamatuoran; nga wala siya, nga may pinalabi, naghisgot sa talagsaon o sa bag-ong mga aspekto sa kamatuoran; apan nag-awhag lamang ug sa tanan nga maoy makaayo ‘sa pagmatuto,’ o sa pagpalig-on: ang tibuok tambag sa Diyos sa pagkaputli ug sa pagkabug-os niini! Ug kining matinumanong ‘pasundayag,’ kining masibotong ‘pagpanudlo’ sa Kristohanong kamatuoran maoy iyang ginabuhat, dili lamang sa eskuelahan sa Tyrannus ug sa ubang tigomanang lugar sa mga disipulo, apan sa tanang maabot nga panimalay. Gikan sa balay ug balay, ug gikan sa kalag ug kalag, sa adlaw-adlaw iyang gisangyaw ang malipayong balita uban sa samag-Kristong tinguha ug pangandoy. Sa tanang matang ug rasa, ngadto sa masupakong Hudiyo ug sa matamayong Grego, ang iyang bugtong tema—nga, sa bug-os ikapatin-aw, naglakip sa tanang ubang kinahanglanon sa nagaluwas nga mga kamatuoran—maoy paghinulsol ngadto sa Diyos, ug pagtuo ngadto sa atong Ginoong Jesu-Kristo.”
10, 11. (a) Kon mahitungod sa Kristohanong ministeryo, unsa ang gidahom ni Pablo sa mga ansiano sa Efeso? (b) Sama kang Pablo, unsang matanga sa pagsangyaw ang gibuhat sa mga Saksi ni Jehova, apil ang mga ansiano?
10 Nan, sa lintunganay, unsay gidahom ni Pablo sa taga-Efeso nga mga ansiano? Ang eskolar nga si E. S. Young nagsubli sa mga pulong sa apostol niining paagiha: “Ako wala lamang magsangyaw sa publiko, kondili nagsangyaw gikan sa balay ug balay, uban sa tanang matang, sa Hudiyo ug sa mga Gentil. Ang tema sa akong ministeryo sa tanang matang maoy ‘paghinulsol ngadto sa Diyos ug pagtuo sa atong Ginoong Jesu-Kristo.’” Naghisgot sa mga pulong ni Pablo sa laing paagi, si W. B. Riley misulat: “Ang yano nga kahulogan mao: ‘Gidahom ko nga inyong ipadayon ang akong gisugdan, sa pagbuhat ug sa pagtudlo ug gidahom ko kaninyo nga kamo molahutay sama nga ako milahutay; sa pagtudlo sa pribado ug sa publiko sama sa akong gihimo sa kadalanan ug gikan sa balay ug balay, sa pagpanaksi usab sa mga Hudiyo ug sa mga Grego sa paghinulsol ngadto sa Diyos ug pagtuo sa atong Ginoong Jesu-Kristo, kay kini mao ang mga kinahanglanon!’”
11 Tin-aw, sa Buhat kapitulo 20, si Pablo nagpakita sa mga isigka-ansiano nga sila gidahom nga mahimong mga Saksi ni Jehova sa balay-ug-balay. Niining paagiha, ang unang-siglong mga ansiano nanguna, sa pagpahimutang sa hustong panig-ingnan alang sa ubang mga membro sa kongregasyon. (Itandi Hebreohanon 13:17.) Nan, sama kang Pablo ang mga Saksi ni Jehova nagasangyaw gikan sa balay ug balay, naghisgot sa katawhan sa tanang kanasoran mahitungod sa Gingharian sa Diyos, sa paghinulsol ngadto Kaniya, ug pagtuo kang Jesu-Kristo. (Marcos 13:10; Lucas 24:45-48) Ug sa maong balay-ug-balay nga buluhaton, ang tinudlong mga ansiano taliwala sa modernong-adlawng mga Saksi maoy gidahom nga manguna.—Buhat 20:28.
12. Unsay gidumilian nga buhaton sa kanhi mga ansiano, apan diha sa unsang buluhatona manguna ang mga ansiano karong adlawa?
12 Sa 1879, si Charles Taze Russel misugod sa pagmantala sa Zion’s Watch Tower and Herald of Christ’s Presence, karon gitawag The Watchtower Announcing Jehovah’s Kingdom. Si Russell ug ang ubang mga estudyante sa Bibliya nagmantala sa mensahe sa Gingharian diha sa apostolikanhong paagi. Sa ulahing mga tuig, hinunoa, ang pipila ka mga ansiano sa kongregasyon wala motuman sa ilang pagpanaksi nga mga responsabilidad. Pananglitan, usa ka Saksi ang misulat: “Ang tanan wala ra magpakabana hangtod miabot ang pahibalo nga ang tanan makig-ambit sa balay-ug-balay nga pagsangyaw uban ang literatura ug ilabina ang balay-ug-balay nga buluhaton sa Dominggo—kini sa 1927. Ang among napiling mga ansiano misupak ug misulay sa pagpabugnaw sa tibuok klase sa pagpakig-ambit o sa pagbuhat sa bisan unsang bahin sa maong buluhaton.” Sa ngadto-ngadto, ang mga lalaki nga dili makigbahin sa balay-ug-balay nga pagsangyaw wala na hatagi ug pribilehiyo nga mag-alagad ingong mga ansiano. Karong adlawa, usab, kadtong nagaalagad ingong ansiano ug ministeryal nga mga alagad gidahom nga manguna diha sa balay-ug-balay nga pagsangyaw ug uban pang mga bahin sa Kristohanong ministeryo.
Matag usa Saksi
13. (a) Unsay atong himoon bisan kon ang mga tawo dili maminaw sa mensahe sa Gingharian? (b) Sa unsang paagi gitandi si Pablo kang Ezekiel?
13 Uban sa tabang ni Jehova, ang mga Kristohanon kinahanglang magpahayag sa mensahe sa Gingharian gikan sa balay ug balay, bisan kon kini wala dawata uban ang apresasyon. Ingong magbalantay sa Diyos, si Ezekiel nagpahibalo sa katawhan kon kaha sila maminaw ug dili. (Ezekiel 2:5-7; 3:11, 27; 33:1-6) Gitandi si Ezekiel ug Pablo, si E. M. Blaiklock misulat: “Gikan [sa pakigpulong ni Pablo sa Buhat kapitulo 20] motungha ang usa ka tin-aw nga hulagway sa ministeryo sa Efeso. Matikdi ang mosunod: Una, ang dinaliang pagkamatinumanon ni Pablo. Wala niya pangitaa ang popularidad ug pag-uyon sa publiko. Sama sa buluhaton ni Ezekiel nga magbalantay, iyang gituman ang iyang katungdanan uban ang matinud-anong kasibot ug batasan nga mopaluyo sa iyang gipanulti. Ikaduha, ang iyang mahigugmaong simpatiya. Siya dili usa ka tawo nga mosulti sa mga pulong sa kadaotan nga walay emosyon. Ikatulo, ang iyang walay kaluyang pag-ebanghelyo. Sa publiko ug gikan sa balay ug balay, sa siyudad ug sa tibuok probinsiya, iyang gisangyaw ang ebanghelyo.”
14. Nganong ang pagpanaksi kaakohan sa matag usa nga mihimog dedikasyon kang Jehova nga Diyos diha sa pag-ampo pinaagi kang Jesu-Kristo?
14 Ang dagayang panalangin sa Diyos diha sa iyang presenteng-adlaw nga mga alagad walay duhaduha nga siya nahimuot nga pagadalhon nila ang ngalang mga Saksi ni Jehova. (Isaias 43:10-12) Dugang pa, sila mga Saksi ni Kristo usab, kay si Jesus miingon sa iyang mga sumusunod: “Kamo makadawat ug gahom sa diha nga kakunsaran na kamo sa Espiritu Santo, ug kamo mao unya ang akong mga Saksi sa Jerusalem ug sa tibuok Judea ug Samaria ug hangtod sa kinalay-ang bahin sa yuta.” (Buhat 1:8) Busa ang pagpanaksi maoy kaakohan sa matag usa kinsa mihimog dedikasyon kang Jehova nga Diyos diha sa pag-ampo pinaagi kang Jesu-Kristo.
15. Unsay ikasulti mahitungod sa buluhatong pagsangyaw sa unang mga Kristohanon?
15 Gikaingon mahitungod sa pagpanaksi: “Kini naglangkob sa tibuok simbahan. Ang misyonaryong buluhaton sa unang simbahan dili maoy responsabilidad sa Women’s Missionary Society o sa Foreign Mission Board. Ang buluhatong pagpanaksi wala itugyan ngadto lamang sa mga propesyonal sama sa mga ansiano, mga deakono, o bisan pa sa mga apostol. . . . Sa unang mga adlaw ang simbahan mao ang misyon. Ang misyonaryong programa sa unang simbahan gipasukad sa duha ka pasalig: (1) Ang pangunang tahas sa simbahan mao ang pag-ebanghelyo sa kalibotan. (2) Ang responsabilidad sa pagpatuman niining maong tahas nahasandig sa tibuok Kristohanong katilingban.”—J. Herbert Kane.
16. Bisan ang mga manunulat sa Kakristiyanohan miangkon sa unsa bahin sa mga Kristohanon ug pagpanaksi?
16 Bisan pa kon ang modernong-adlaw nga mga magsusulat sa Kakristiyanohan wala mouyon sa mensahe sa Gingharian, gidawat sa pipila nga ang mga Kristohanon adunay obligasyon sa pagpanaksi. Pananglitan, diha sa librong Everyone a Minister, si Oscar E. Feucht miingon: “Walay pastor ang makatuman sa ministeryo nga gihatag sa Diyos sa matag usa ka magtutuo. Ikasubo kasiglohan sa sayop nga panghunahuna sa simbahan naghimo sa tahas sa 500 ka parokyano nga tahas sa usa ka pastor. Dili ingon niini ang unang simbahan. Silang mituo nanglakaw sa pagsangyaw sa Pulong.”
17. Unsay ikasulti bahin sa dapit sa pagpanaksi diha sa mga kinabuhi sa unang mga Kristohanon?
17 Ang pagpanaksi maoy nangibabaw sa mga kinabuhi sa unang mga Kristohanon, maingon man taliwala sa katawhan ni Jehova karong adlawa. “Sa katibuk-an,” misulat si Edward Caldwell Moore sa Harvard University, “ang unang tulo ka siglo sa Kristohanong kalihokan nailhan sa dakong kadasig sa pagpalaganap sa pagtuo. Ang Kristohanong kasibot mao ang pag-ebanghelyo, ang pagsulti sa mensahe sa pagtubos. . . . Ang pagkaylap sa impluwensiya ug mga pagtulon-an ni Jesus maoy, hinunoa, sa pinakasayong yugto, tungod sa gamay nga bahin sa mga lalaking ingnon ta mga misyonaryo. Kadto maoy kalamposan sa mga lalaki sa tanang pangita ug trabaho ug sa tanang hut-ong sa katilingban. Gidala [nila] ngadto sa kinalay-ang mga utlanan sa [Romanong] empiryo kanang tinagoan sa kinabuhi, kanang bag-ong tinamdan ngadto sa kalibotan, nga diha sa ilang kasinatian nagdalag kaluwasan. . . . [Ang unang Kristiyanidad] dulot nga nakombensir sa nagakaduol nga kataposan sa presenteng kahimtang sa kalibotan. Kini gituohan diha sa kalit ug milagrosong pagkatukod sa usa ka bag-ong kahimtang sa kalibotan.”
18. Unsang dakong paglaom ang molabaw pa sa mga damgo sa politikanhong mga pangulo?
18 Diha sa balay-ug-balay nga pagpanaksi ug sa ubang mga bahin sa ilang ministeryo, ang mga Saksi ni Jehova malipayong nagpunting sa ilang mga mamiminaw ngadto sa gisaad nga bag-ong kalibotan sa Diyos. Ang gitagnang mga panalangin sa walay kataposang kinabuhi molabaw pa sa mithianong mga damgo kunohay sa mga magtutukod sa usa ka bag-ong kahikayan sa kalibotan karong adlawa. (2 Pedro 3:13; Pinadayag 21:1-4) Bisan kon mopatim-aw nga ang matag usa buot nga mabuhi sa kahibulongang bag-ong kalibotan sa Diyos, dili kana mao ang kahimtang. Hinunoa, atong tagdon sa sunod ang pipila ka epektibong mga paagi diin ang mga alagad ni Jehova makatudlo niadtong nagapangita sa kinabuhing dayon.
Unsaon Nimo sa Pagtubag?
◻ Nganong makasulti kita nga ang Buhat 5:42 ug Buhat 20:20 nagkahulogan nga ang mga sumusunod ni Jesus kinahanglang magasangyaw gikan sa balay ug balay?
◻ Sa unsang paagi atong mahibaloan nga ang Diyos nagauyon sa balay-ug-balay nga ministeryo sa mga Saksi ni Jehova?
◻ Bahin sa ministeryo, unsay ginapangayo sa mga ansiano ug ministeryal nga mga alagad?
◻ Ang pagpanaksi kinahanglang adunay unsang dapit diha sa kinabuhi sa usa ka Kristohanon?
[Hulagway sa panid 10]
Sa 33 K.P., ang mga disipulo ni Jesus nanaksi gikan sa balay ug balay nga walay hunong
[Hulagway sa panid 13]
Si Pablo nanudlo “gikan sa balay ug balay.” Kining matanga sa ministeryo maoy ginahimo sa mga Saksi ni Jehova karong adlawa