Si Jehova Mao ang Among Magmamando!
“Pagasugton namo ang Diyos ingong magmamando inay ang mga tawo.”—BUHAT 5:29.
1, 2. Unsang apostolikanhong baroganan ang ginakuha sa mga Saksi ni Jehova sa dihang ang tawhanong mga mando mahisupak sa kabubut-on sa Diyos?
GITUGOT ni Jehova nga Diyos nga ang 12 ka tawo taralon atubangan sa usa ka hataas nga hukmanan. Ang tuig maoy 33 K.P., ug ang hukmanan mao ang Hudiyohanong Sanhedrin. Ang mga apostoles ni Jesu-Kristo ang pagahusayon. Pamati! ‘Among gimando nga dili na kamo magapanudlo pinasukad niining ngalana,’ matud sa hataas nga saserdote, ‘apan inyong gipuno ang Jerusalem sa inyong pagtulon-an.’ Niana, si Pedro ug ang ubang apostoles mipahayag: “Pagasugton namo ang Diyos ingong magmamando inay ang mga tawo.” (Buhat 5:27-29) Sa pagkamatuod, sila miingon: “Si Jehova mao ang among Magmamando!”
2 Oo, si Jehova mao ang Magmamando sa matuod nga mga sumusunod ni Jesus. Kini gitin-aw diha sa basahon sa Bibliya nga Buhat sa mga Apostoles, nga gisulat sa Roma sa mga 61 K.P. ni “Lucas ang hinigugmang mananambal.” (Colosas 4:14) Sama sa mga apostoles, ang katawhan ni Jehova karong adlawa nagasugot sa ilang langitnong Magmamando sa dihang ang tawhanong mga sugo mahisupak sa iyang kabubut-on. Apan unsa pay atong makat-onan gikan sa Mga Buhat? (Sa personal nga pagtuon, gisugyot namo nga imong basahon ang mga tekstong gikutlo nga boldfaced.)
Gisugo ni Jesus ang mga Saksi
3. Sa dihang ang mga sumusunod ni Jesus “nabawtismohan sa balaang espiritu,” unsa ang ilang pangunang kabalaka?
3 Ang mga apostoles malig-ong nakabarog dapig sa Diyos tungod kay sila napalig-on sa espirituwal. Si Kristo namatay sa kahoy sa pagsakit, apan nasayod sila nga siya nabanhaw. (1:1-5) Si Jesus “nagpakita nga siya buhi” ug nanudlo sa mga kamatuoran sa Gingharian diha sa nagmateryalisar nga mga lawas sa tanang 40 ka adlaw. Giingnan usab niya ang iyang mga tinun-an sa paghulat sa Jerusalem alang sa bawtismo “sa balaang espiritu.” Ang pagsangyaw sa ingon maoy ilang pangunang kabalaka, maingon nga kini mao usab alang sa mga Saksi ni Jehova karong adlawa.—Lucas 24:27, 49; Juan 20:19–21:24.
4. Unsay mahitabo inig-abot sa balaang espiritu diha sa mga sumusunod ni Jesus?
4 Kay wala pa mabawtismohi sa balaang espiritu, ang mga apostoles sayop naghunahuna nga ang yutan-ong pagmando maoy magtapos sa Romanhong paggahom sa dihang sila nangutana: “Ginoo, imo bang ipasig-uli ang gingharian sa Israel karong panahona?” (1:6-8) Sa pagkamatuod, si Jesus miingong dili, kay ‘dili ilaha ang pagkasayod sa mga panahon ug mga hugna sa panahon.’ ‘Inig-abot sa balaang espiritu diha kanila,’ kini maghatag kanilag gahom sa pagpamatuod mahitungod sa langitnong Gingharian sa Diyos, dili gingharian niining yutaa. Sila magawali sa Jerusalem, sa Judea, ug sa Samaria, “ug sa kinalay-ang bahin sa yuta.” Sa tabang sa espiritu, ang mga Saksi ni Jehova nagahimo sa maong buluhaton sa tibuok nga yuta niining kataposang mga adlaw.
5. Sa unsang paagi si Jesus moanhi sa samang paagi sa iyang pagbiya?
5 Bag-o pa lang gihatag ni Jesus kanang tibuok-kalibotan nga komisyon sa pagwali sa dihang mikayab siya ngadto sa langit. Ang maong pagkayab nagsugod uban sa pagpataas nga pahilayo sa iyang mga tinun-an, ug sa ulahi si Jesus misulod sa presensiya sa iyang langitnong Magmamando ug ngadto sa buluhaton diha sa kalibotan sa mga espiritu. (1:9-11) Tapos hisalipdi sa panganod nga dili na makita sa mga apostoles ni Jesus, gihukas niya ang iyang unodnong lawas. Duha ka manulonda mipakita ug miingon nga siya ‘moanhi sa samang paagi.’ Ug kana mao ang kahimtang. Ang mga tinun-an lamang ni Jesus ang nakakita kaniya nga milakaw, maingon nga mga Saksi ni Jehova lamang ang makaila sa iyang dili-makitang pagbalik.
Si Jehova Nagpili
6. Giunsa pagpili ang kapuli ni Judas Iskariote?
6 Sa wala madugay ang mga apostoles nahibalik sa Jerusalem. (1:12-26) Sa usa ka lawak sa itaas (tingali sa balay sa inahan ni Marcos, si Maria), ang 11 ka maunongong apostoles milahutay sa pag-ampo uban sa mga igsoon ni Jesus sa inahan, sa iyang ubang mga tinun-an, ug sa iyang inahan, si Maria. (Marcos 6:3; Santiago 1:1) Apan kinsay modawat sa “katungdanan sa pagkamagtatan-aw” ni Judas? (Salmo 109:8) Mga 120 ka tinun-an ang presente sa dihang gipili sa Diyos ang usa ka tawo aron mopuli sa miluib kang Jesus, si Judas, ug ipasig-uli ang gidaghanon sa mga apostoles ngadto sa 12. Ang pagapilion kinahanglang usa nga tinun-an na panahon sa ministeryo ni Jesus ug saksi sa iyang pagkabanhaw. Hinuon, ang tawo kinahanglang moila kang Jehova ingong iyang Magmamando. Tapos sa pag-ampo, gihimo ang ripa tali kang Matias ug Jose Barsabas. Gipahinabo sa Diyos nga maripahan si Matias.—Proverbio 16:33.
7. (a) Sa unsang paagi nahitabo nga si Judas “nagpalit sa usa ka yuta pinaagi sa bayad sa pagkadaotan”? (b) Sa unsang paagi namatay si Judas?
7 Si Judas Iskariote tinong wala mag-ila kang Jehova ingong iyang Magmamando. Aw, giluiban niya ang Anak sa Diyos ilis sa 30 ka buok nga salapi! Giuli ni Judas ang salapi ngadto sa pangulong mga saserdote, apan si Pedro miingon nga ang maluibon “mipalit ug usa ka yuta pinaagi sa bayad sa pagkadaotan.” Sa unsang paagi? Aw, gitagana niya ang salapi ug hinungdan sa pagpalit sa “Yuta nga Dugoon,” sumala sa pagtawag niana. Kini giila nga mao ang patag nga yuta sa habagatang kiliran sa Walog sa Hinnom. Kay ang iyang relasyon uban sa langitnong Magmamando bug-os nga nadaot, si Judas “nagbitay sa kaugalingon.” (Mateo 27:3-10) Mahimong nabali ang pisi o sanga sa kahoy, mao nga siya ‘nahulog nga nag-una ang ulo, nga nayagyag ang iyang ginhawaan’ sa dihang siya nahulog sa gansangong kabatoan. Hinaot untang walay usa nato ang mahimong usa ka igsoon nga mini!
Napuno sa Balaang Espiritu!
8. Kanus-a mabawtismohi ang mga tinun-an ni Jesus sa balaang espiritu, ug unsay epekto?
8 Komosta ang gisaad nga bawtismo sa balaang espiritu? Nahitabo kadto sa Pentekostes 33 K.P., napulo ka adlaw tapos sa pagkayab ni Jesus. (2:1-4) Kulbahinam kaayong hitabo ang maong bawtismo! Handurawa ang talan-awon. Mga 120 ka tinun-an ang didto sa itaas nga lawak sa dihang ‘sa kalit gikan sa langit ang kalangas nga sama sa mihuros nga hangin milukop sa balay.’ Kadto dili hangin, apan maorag hangin nga paminawon. Ang usa ka dila “nga sama sa kalayo” mitugdong sa matag tinun-an ug apostol. “Silang tanan napuno sa balaang espiritu ug misugod sa pagsulti sa nagkalainlaing pinulongan.” Sa dihang nahitabo ang maong bawtismo, sila gipanganak usab sa balaang espiritu, nga gidihogan, ug gitimrihan ingon nga timaan sa espirituhanong panulondon.—Juan 3:3, 5; 2 Corinto 1:21, 22; 1 Juan 2:20.
9. Mahitungod sa unsa nagpahayag ang mga tinun-an nga napuno sa espiritu?
9 Kini nga hitabo nakaapektar sa mga Hudiyo ug mga proselita sa Jerusalem gikan sa ‘tanang nasod sa silong sa langit.’ (2:5-13) Kay natingala, sila nangutana: ‘Naunsa ba nga ang tagsatagsa kanato nakadungog man sa pinulongan nga iyang natawhan?’ Kini mahimong ang pinulongan sa mga dapit sama sa Media (silangan sa Judea), Prigia (sa Asia Minor), ug sa Roma (sa Uropa). Samtang ang mga tinun-an nagsulti sa lainlaing mga pinulongan “mahitungod sa hamiling mga butang sa Diyos,” daghang namati ang natingala, apan ang mga matamayon misugyot nga sila nangahubog.
Si Pedro Mihatag ug Makapatandog nga Pamatuod
10. Ang hitabo sa Pentekostes 33 K.P. nagtuman sa unsang tagna, ug kini ba may modernong-adlawng katumbas?
10 Si Pedro misugod sa pagpamatuod pinaagi sa pagpakita nga ang alas nuybe sa buntag sayo ra kaayo aron mahubog. (2:14-21) Hinuon, kining hitaboa maoy katumanan sa saad sa Diyos nga ibubo ang balaang espiritu sa ibabaw sa iyang katawhan. Gidasig sa Diyos si Pedro sa pagpunting sa atong panahon pinaagi sa pagdugang sa mga pulong “sa kataposang mga adlaw” ug “sila managna.” (Joel 2:28-32) Si Jehova maghatag ug mga tilimad-on sa langit ug mga ilhanan sa yuta una pa sa iyang dakong adlaw, ug kadto lamang magatawag sa iyang ngalan diha sa pagtuo ang mamaluwas. Ang susamang pagbubo sa espiritu diha sa mga dinihogan ang nakapaarang nila sa “pagtagna” uban ang dakong kaabtik ug kahanas karong adlawa.
11. Mahitungod kang Jesus, unsay gibuhat sa mga Hudiyo ug sa Diyos?
11 Dayon gipaila ni Pedro ang Mesiyas. (2:22-28) Gipamatud-an sa Diyos ang Pagkamesiyas ni Jesus pinaagi sa pagpahimo niyag gamhanang mga buhat, mga ilhanan, ug mga tilimad-on. (Hebreohanon 2:3, 4) Apan gipalansang siya sa mga Hudiyo sa usa ka kahoy “pinaagi sa kamot sa malapasong mga tawo,” ang mga Romano nga wala magsunod sa kasugoan sa Diyos. Si Jesus “gitugyan sa natino nga tambag ug unang kahibalo sa Diyos” sa pagkaaging kadto mao ang balaang kabubut-on. Bisan pa niana, gibanhaw sa Diyos si Jesus ug gihipos ang iyang tawhanong lawas sa paagi nga wala makaagom sa pagkadunot.—Salmo 16:8-11.
12. Unsay napanan-aw daan ni David, ug sa unsa nagaagad ang kaluwasan?
12 Ang Mesiyanikong tagna dugang gipasiugda samtang nagpadayon ang pagpamatuod ni Pedro. (2:29-36) Siya miingon nga nakita daan ni David ang pagkabanhaw sa iyang labing bantogang anak, si Jesus ang Mesiyas. Gikan sa binayaw nga dapit sa tuong kamot sa Diyos sa langit, gibubo ni Jesus ang balaang espiritu nga nadawat gikan sa iyang Amahan. (Salmo 110:1) Ang mga mamiminaw ni Pedro ‘nakakita ug nakadungog’ sa paglihok niini diha sa pagkakita sa mga dila nga daw kalayo sa ibabaw sa mga ulo sa mga tinun-an ug pagkadungog sa langyawng mga pinulongan nga ilang gisulti. Gipakita usab niya nga ang kaluwasan nagadepende sa pag-ila kang Jesus ingong Ginoo ug Mesiyas.—Roma 10:9; Filipos 2:9-11.
Si Jehova Naghatag sa Pag-uswag
13. (a) Aron mabawtismohan sa tukma, unsay kinahanglang pagailhon sa mga Hudiyo ug sa mga proselita? (b) Pila ang nabawtismohan, ug unsay epekto sa Jerusalem?
13 Pagkaepektibo ang mga pulong ni Pedro! (2:37-42) Ang iyang mga mamiminaw gisakitan sa kasingkasing tungod sa pag-uyon sa pagpatay sa Mesiyas. Busa siya miawhag: “Paghinulsol kamo, ug pasagding ang matag usa kaninyo mabawtismohan sa ngalan ni Jesu-Kristo sa kapasayloan sa inyong mga sala, ug inyong madawat ang walay bayad nga gasa sa balaang espiritu.” Ang mga Hudiyo ug mga proselita nagdawat na kang Jehova ingon nga Diyos ug sa panginahanglan nila sa iyang espiritu. Karon gikinahanglan nga sila maghinulsol ug magdawat kang Jesus ingong ang Mesiyas aron mabawtismohan diha sa ngalan (pag-ila sa katungdanan o obra) sa Amahan, sa Anak, ug sa balaang espiritu. (Mateo 28:19, 20) Pinaagi sa pagwali ngadto niadtong mga Hudiyo ug mga proselita, gigamit ni Pedro ang unang espirituwal nga yawi nga gihatag kaniya ni Jesus aron sa pag-abli sa ganghaan sa kahibalo ug kahigayonan aron ang matinuohong mga Hudiyo makasulod sa langitnong Gingharian. (Mateo 16:19) Niadtong usa ka adlaw, 3,000 ang nabawtismohan! Handurawa ang maong daghang saksi ni Jehova nga nagwali sa gamayng teritoryo sa Jerusalem!
14. Ngano ug sa unsang paagi “gipanag-usahan sa mga magtutuo ang tanang butang”?
14 Daghan gikan sa lagyong mga dapit ang nakulangan sa mga pagkaon alang sa dugayng pagpuyo apan gustong masayod sa dugang pa mahitungod sa bag-o nilang pagtuo ug pagwali ngadto sa uban. Busa ang unang mga sumusunod ni Jesus mahigugmaong nagtinabangay sa usag usa, sama sa ginabuhat sa mga Saksi ni Jehova karong adlawa. (2:43-47) Temporaryong “gipanag-usahan ang tanang butang” sa mga magtutuo. Gibaligya sa pipila ang yuta, ug ang salapi gihatag ngadto kang bisan kinsang nanginahanglan. Tungod niadto maayo ang pagsugod sa kongregasyon samtang ‘gidugang kanila ni Jehova ang mga ginaluwas sa matag adlaw.’
Pagpanambal ug Sangpotanan Niini
15. Unsay nahitabo sa pagsulod ni Pedro ug Juan sa templo, ug unsay sanong sa katawhan?
15 Gipaluyohan ni Jehova ang mga sumusunod ni Jesus pinaagi sa “mga ilhanan.” (3:1-10) Busa, sa pagsulod ni Pedro ug Juan sa templo sa alas 3:00 s.h. alang sa takna sa pag-ampo nga nalangkit sa halad sa gabii, ang usa ka tawong bakol sukad sa pagkatawo diha sa duol sa Matahom nga Ganghaan nga nangayog “mga limos.” ‘Ako walay salapi ug bulawan,’ matud ni Pedro, ‘apan ang ania kanako hatagan ko ikaw: Sa ngalan ni Jesu-Kristo nga Nasareno, lumakaw ka!’ Ang tawo naayo dihadiha! Sa iyang pagsulod sa templo “nga naglakaw ug naglukso ug nagdayeg sa Diyos,” ang mga tawo ‘napuno sa labihang kalipay.’ Tingali ang pipila nahinumdom sa mga pulong: “Ang bakol mokatkat sama sa usa ka laking osa.”—Isaias 35:6.
16. Sa unsang paagi ang mga apostoles nakaayo sa usa ka tawong bakol?
16 Ang natingalang mga tawo nagtigom sa portico ni Solomon, usa ka may-atop nga portico sa silangang kilid sa templo. Didto si Pedro mihatag ug usa ka pamatuod. (3:11-18) Iyang gipakita nga ang Diyos mihatag sa mga apostoles ug gahom sa pag-ayo sa tawong bakol pinaagi sa Iyang hinimayang Alagad, si Jesus. (Isaias 52:13–53:12) Gisalikway sa mga Hudiyo “kanang balaan ug matarong nga usa”; bisan pa niana, gibanhaw siya ni Jehova. Bisan pag ang mga tawo ug ilang mga magmamando wala masayod nga ilang gipapatay ang Mesiyas, ang Diyos sa maong paagi nagtuman sa matagnaong mga pulong nga “ang iyang Kristo magaantos.”—Daniel 9:26.
17. (a) Unsang lihok ang kinahanglang himoon sa mga Hudiyo? (b) Unsay nahitabo sukad sa ‘pagpadala kang Kristo’ sa atong adlaw?
17 Tungod sa ilang pagtratar sa Mesiyas, gipakita ni Pedro kon unsay pagabuhaton sa mga Hudiyo. (3:19-26) Kinahanglang sila “maghinulsol,” o mobatig pagbasol tungod sa ilang mga sala, ug “magbag-o,” o makombertir, nga mokuha sa atbang nga dalan. Kon motuo sila kang Jesus ingong ang Mesiyas, nga modawat sa lukat, ang kahayahay moabot kanila gikan kang Jehova sama niadtong gipasaylo sa mga sala. (Roma 5:6-11) Ang mga Hudiyo gipahinumdoman nga sila mga anak sa pakigtugon nga gihimo sa Diyos uban sa ilang mga katigulangan, nga nagsulti kang Abraham: “Sa imong binhi ang tanang banay sa yuta pagapanalanginan.” Busa gipadala sa Diyos ang iyang Mesiyanikong Alagad sa pagluwas sa mahinulsolong mga Hudiyo. Makaiikag, sukad sa ‘pagpadala kang Kristo’ diha sa langitnong gahom sa Gingharian sa 1914, dihay makapahayahay nga pagpasig-uli sa mga kamatuoran ug teokratikanhong organisasyon taliwala sa mga Saksi ni Jehova.—Genesis 12:3; 18:18; 22:18.
Sila Dili Mohunong!
18. Unsang “bato” ang gisalikway sa Hudiyonhong “mga magtutukod,” ug diha lamang kang kinsa nga adunay kaluwasan?
18 Kay nasuko nga gipahayag ni Pedro ug ni Juan ang pagkabanhaw ni Jesus, ang pangulong mga saserdote, kapitan sa templo, ug mga Saduseo nagdakop kanila. (4:1-12) Ang mga Saduseo dili motuo sa pagkabanhaw, apan daghan nga uban nahimong mga magtutuo, nga ang mga lalaki lamang mikabat ug mga 5,000. Sa gisukitsukit atubangan sa hataas nga hukmanan sa Jerusalem, si Pedro miingon nga ang tawong bakol giayo “sa ngalan ni Jesu-Kristo nga Nasareno,” nga gilansang nila apan gibanhaw sa Diyos. Ang maong “bato” nga gisalikway sa Hudiyong “mga magtutukod” nahimong “ang ulo sa batong pamag-ang.” (Salmo 118:22) “Dugang pa,” matud ni Pedro, “walay kaluwasan diha sa lain.”
19. Sa gimandoan nga mohunong sa pagwali, unsay gitubag sa mga apostoles?
19 May paningkamot sa pagpahunong sa maong mga sulti. (4:13-22) Kay diha man ang tawong giayo, imposible ang paglimod sa maong “iladong ilhanan,” apan si Pedro ug Juan gipinahan ‘nga dili mosulti o magtudlo sa bisan diin pinasukad sa ngalan ni Jesus.’ Ilang tubag? ‘Dili kami makahunong sa pagsulti mahitungod sa among nakita ug nadungog.’ Gisugot nila si Jehova ingong ilang Magmamando!
Mga Pag-ampo Gitubag!
20. Alang sa unsa nag-ampo ang mga tinun-an, ug unsay sangpotanan?
20 Maingon nga ang mga Saksi ni Jehova nagaampo sa mga tigom, busa ang mga tinun-an miampo sa dihang ang gibuhiang mga apostoles mitaho kon unsay nahitabo kanila. (4:23-31) Namatikdan nga ang mga magmamandong si Herodes Antipas ug si Poncio Pilato, uban sa Hentil nga mga Romano ug katawhan sa Israel, nagkatigom sa pagsupak sa Mesiyas. (Salmo 2:1, 2; Lucas 23:1-12) Ingong tubag sa pag-ampo, gipuno ni Jehova sa balaang espiritu ang mga tinun-an, mao nga sila misulti sa pulong sa Diyos nga maisogon. Ang ilang Magmamando wala hangyoa sa pagtapos sa paglutos apan sa paghatag nilag katakos sa pagwali nga maisogon bisan pa sa paglutos.
21. Kinsa si Bernabe, ug unsang mga hiyas ang iyang nabatonan?
21 Padayong gipanag-usahan sa mga magtutuo ang tanang butang, ug walay mausa ang nagkinahanglan. (4:32-37) Usa nga tig-amot mao ang Levihanong si Jose sa Cipro. Gihatagan siya sa mga apostoles sa anggang Bernabe, nga nagkahulogan “Anak sa Paghupay,” lagmit tungod kay siya matinabangon ug masadyaon sa kasingkasing. Sa pagkamatuod, kitang tanan buot mahimong ingon nga matang sa tawo.—Buhat 11:22-24.
Mga Bakakon Giyagyag
22, 23. Unsa ang sala ni Ananias ug Sapira, ug sa unsang paagi kita makabatog kaayohan gikan sa ilang kasinatian?
22 Hinuon, si Ananias ug iyang asawa, si Sapira mihunong sa pag-ila kang Jehova ingong ilang Magmamando. (5:1-11) Gibaligya nila ang usa ka yuta ug gitagoan ang bahin sa salapi samtang nagpakaaron-ingnon nga naghatag sa mga apostol sa tanan niana. Ang kahibalo nga gihatag sa espiritu sa Diyos nakapaarang kang Pedro sa pag-ila sa ilang kasalingkapaw, nga misangpot sa ilang kamatayon. Dako gayod nga pasidaan alang niadtong si kinsa ginatental ni Satanas nga mahimong malinglahon!—Proverbio 3:32; 6:16-19.
23 Tapos niadtong hitaboa, walay mausang may daotang mga motibo ang may kaisog sa pagduyog sa mga tinun-an. Ang uban nahimong mga magtutuo. (5:12-16) Dugang pa, samtang ang masakiton ug kadtong gisamok sa mahugawng mga espiritu nagbutang ug pagtuo sa gahom sa Diyos, ‘ang tanan nangaayo.’
Sugta ang Diyos Inay mga Tawo
24, 25. Nganong gilutos sa Hudiyonhong mga pangulo ang mga apostoles, apan unsang sukdanan ang gihatag sa maong mga matinumanon alang sa tanang alagad ni Jehova?
24 Ang hataas nga saserdote ug ang mga Saduseo karon misulay sa pagpugong sa kahibulongang pag-uswag pinaagi sa pagbilanggo sa tanang apostoles. (5:17-25) Apan niadtong gabhiona gibuhian sila sa manulonda sa Diyos. Ug sa pagbanagbanag sa adlaw sila nanudlo na sulod sa templo! Ang paglutos dili makapahunong sa mga alagad ni Jehova.
25 Bisan pa niana, gihimo ang pagpiit sa gidala ang mga apostoles sa atubangan sa Sanhedrin. (5:26-42) Hinunoa, sa gibaoran nga mohunong sa pagpanudlo sila miingon: “Pagasugton namo ang Diyos ingong magmamando inay ang mga tawo.” Kadto naghatag ug sumbanan alang sa mga tinun-an ni Jesus, nga maoy gisunod sa mga Saksi ni Jehova karong adlawa. Tapos sa usa ka pasidaan gikan sa magtutudlo sa Kasugoan nga si Gamaliel, ang mga pangulo nagbunal sa mga apostoles, nga nagbaod nila sa paghunong sa pagwali, ug nagpagawas kanila.
26. Itandi ang ministeryo sa mga apostoles sa iya sa mga Saksi ni Jehova karong adlawa?
26 Ang mga apostoles nagmapasalamaton nga sila giisip nga takos nga pakaulawan tungod sa ngalan ni Jesus. “Ug sa matag adlaw sa templo ug sa balay-balay sila nagpadayon nga walay hunong sa pagpanudlo ug pagpahayag sa maayong balita.” Oo, sila maoy balay-balay nga mga ministro. Mao usab ang modernong-adlaw nga mga Saksi sa Diyos, kinsa nakadawat usab sa iyang espiritu tungod kay sila nagasugot kaniya ug nagaingon, “Si Jehova mao ang among Magmamando!”
Unsay Imong Tubag?
◻ Unsang sugo ang pagatumanon sa mga sumusunod ni Jesus, sa nangagi ug sa karon?
◻ Unsay nahitabo sa adlaw sa Pentekostes 33 K.P.?
◻ Kanus-a ug giunsa paggamit ni Pedro ang unang espirituwal nga yawi nga gihatag kaniya ni Jesus?
◻ Unsay atong makat-onan gikan sa kasinatian ni Ananias ug Sapira?
◻ Sa gimandoan sa paghunong sa pagwali, unsang sukdanan ang gihatag sa mga apostoles alang sa tanang Saksi ni Jehova?