BERNICE

[gikan sa lintunganayng pulong nga nagkahulogang “modaog”].

Anak nga babaye ni Herodes Agripa I pinaagi sa iyang asawa nga si Cypros; natawo sa mga 28 K.P.; igsoon ni Mariamne III, Drusila, ug Herodes Agripa II. (Tan-awa ang HERODES Num. 4.) Si Bernice ug ang iyang igsoong lalaki nga si Agripa miduaw kang Gobernador Festo sa Cesarea niadtong 58 K.P., diin silang duha, nga giimbitar ni Festo, “miabot uban ang mapagarbohong pasundayag ug misulod sa lawak sa mga mamiminaw uban sa mga komandante militar maingon man sa mga tawong halangdon sa siyudad.” Dayon ang binilanggong si Pablo gidala sa sulod ug gitugotan sa paghatag sa iyang puwersado ug makapakombinsir nga depensa atubangan niining tanan nga kadagkoan.​—Buh 25:​13, 23; 26:1-30.

Sa batan-on pa kaayo, siya naminyo kang Marcus nga anak ni Alejandro Lysimachus. Human mamatay si Marcus, siya naminyo sa iyang uyoan nga si Herodes nga hari sa Chalcis. Pinaagi kaniya siya nanganak ug duha ka anak nga lalaki sa wala pa mamatay si Herodes niadtong 48 K.P. Dayon siya mipuyo uban sa iyang igsoong lalaki hangtod nga nabaniog ang mga tabitabi nga kadto maoy usa ka insestong relasyon. Sa ulahi siya naminyo kang Polemo nga hari sa Cilicia, human kini mouyon nga makabig ngadto sa Judaismo. Apan, sa wala madugay iyang gibiyaan si Polemo ug nakig-ipon pag-usab sa iyang igsoon. Mao kadtong panahona nga siya ug si Agripa miduaw sa Cesarea.

Niadtong 65 K.P. gipameligro ni Bernice ang iyang kinabuhi sa pagpanalipod sa mga Hudiyo batok kang Florus, kinsa nag-aghat sa pag-ulag dugo ug nagmugnag kagubot didto sa Jerusalem. Sa ulahi siya ug ang iyang igsoong lalaki, sama sa daghang uban pa, nanumpa nga magmaunongon ngadto sa Romanong emperador nga si Vespasian. Gani ang anak sa emperador nga si Tito nagdala kang Bernice ngadto sa Roma aron mahimong iyang asawa, bisan tuod si Bernice mas magulang ug napulo ka tuig kay kaniya. Apan, tungod sa pagprotesta sa Romanong katawhan sa pagkakitang sila makabaton diay ug usa ka rayna nga Hudiyo, giputol ni Tito ang relasyon.