Paglakaw Uban sa Diyos—Nga Anaa sa Hunahuna ang Walay Kataposan
“Kita . . . magalakaw sa ngalan ni Jehova nga atong Diyos sa panahong walay-katinoan, bisan hangtod sa kahangtoran.”—MIQUEAS 4:5.
1. Nganong si Jehova matawag nga ‘Hari sa walay kataposan’?
SI Jehova nga Diyos walay sinugdanan. Siya tukmang gitawag nga “ang Karaan sa mga Adlaw,” sanglit ang iyang paglungtad naglugway pa nga walay kataposan ngadto sa nangagi. (Daniel 7:9, 13) Tagamtamon usab ni Jehova ang walay kataposang umaabot. Siya lamang ang ‘Hari sa walay-kataposan.’ (Pinadayag 10:6; 15:3) Ug sa iyang mga mata, ang usa ka libo ka tuig “nahisama lamang sa kagahapon sa diha nga kini molabay na, ug ingon sa pagtukaw sa kagabhion.”—Salmo 90:4.
2. (a) Unsa ang katuyoan sa Diyos alang sa masinugtanong mga tawo? (b) Asa nato angay isentro ang atong mga paglaom ug mga plano?
2 Sanglit ang Maghahatag ug kinabuhi walay kataposan, siya nakatanyag sa unang tawhanong paris, si Adan ug Eva, ug umaabot nga walay kataposang kinabuhi diha sa Paraiso. Apan, tungod sa pagdili-masinugtanon, giwala ni Adan ang katungod nga dumalayong kinabuhi, nga nagpasa sa sala ug kamatayon ngadto sa iyang mga kaliwat. (Roma 5:12) Bisan pa, ang pagsukol ni Adan wala makababag sa orihinal nga katuyoan sa Diyos. Kabubut-on ni Jehova nga mabuhi hangtod sa hangtod ang mga tawo, ug iyang tumanon ang iyang katuyoan nga walay-pagkapakyas. (Isaias 55:11) Nan, pagkatukma nga atong isentro ang atong mga paglaom ug mga plano sa pag-alagad kang Jehova nga anaa sa hunahuna ang walay kataposan. Samtang buot natong ibutang kanunay sa hunahuna “ang adlaw ni Jehova,” hinungdanong hinumdoman nga ang atong tumong mao ang paglakaw uban sa Diyos hangtod sa kahangtoran.—2 Pedro 3:12.
Si Jehova Molihok sa Iyang Tinudlong Panahon
3. Sa unsang paagi kita nahibalo nga si Jehova adunay “tinudlong panahon” sa pagtuman sa iyang mga katuyoan?
3 Sama niadtong naglakaw uban sa Diyos, kita interesado kaayo sa pagtuman sa iyang kabubut-on. Kita nahibalo nga si Jehova mao ang Dakong Tigbantay sa Oras, ug kita makasalig nga dili gayod niya pakyason pagtuman ang iyang mga katuyoan sa iyang tinudlong panahon. Pananglitan, “sa dihang ang bug-os nga kinutoban sa panahon miabot, ang Diyos nagpadala sa iyang Anak.” (Galacia 4:4) Gisultihan si apostol Juan nga dihay “tinudlong panahon” alang sa katumanan sa matagnaong mga butang nga iyang nakita pinaagig mga ilhanan. (Pinadayag 1:1-3) Adunay “tinudlong panahon nga hukman ang mga patay.” (Pinadayag 11:18) Kapin sa 1,900 ka tuig kanhi, gidasig si apostol Pablo sa pag-ingon nga ang Diyos “nakatakda na ug adlaw nga iyang ginatuyo nga hukman ang gipuy-ang yuta sa pagkamatarong.”—Buhat 17:31.
4. Sa unsang paagi kita nahibalo nga si Jehova nagtinguha sa paglaglag niining daotang sistema sa mga butang?
4 Laglagon ni Jehova kining daotang sistema sa mga butang, kay ang iyang ngalan gipanamastamasan sa karon nga kalibotan. Ang daotan milambo. (Salmo 92:7) Pinaagi sa ilang mga pulong ug mga buhat, ilang giinsulto ang Diyos, ug sakit alang kaniya ang pagtan-aw sa iyang mga alagad nga gibiaybiay ug gilutos. (Zacarias 2:8) Dili ikahibulong nga nakahukom si Jehova nga ang tibuok nga organisasyon ni Satanas sa dili madugay pagalaglagon! Gitino na sa Diyos kon kanus-a gayod kini mahitabo, ug ang katumanan sa mga tagna sa Bibliya nagpatin-aw nga kita karon nagkinabuhi na “sa panahon sa kataposan.” (Daniel 12:4) Siya sa dili madugay molihok sa pagpanalangin sa tanang nahigugma kaniya.
5. Unsay panglantaw ni Lot ug Habacuc sa mga kahimtang nga naglibot kanila?
5 Ang mga alagad ni Jehova sa nangagi nangandoy nga makakita sa kalaglagan sa pagkadaotan. Ang matarong nga si Lot “nasakit pag-ayo gumikan sa pagpatuyang sa mga masupilon-balaod nga katawhan diha sa malaw-ayng panggawi.” (2 Pedro 2:7) Naguol sa mga kahimtang nga naglibot kaniya, ang manalagnang Habacuc nangaliyupo: “Hangtod kanus-a, Oh Jehova, ang akong pagtuaw, ug ikaw dili mamati? Hangtod kanus-a nga ako mangayo kanimo ug tabang batok sa kapintasan, ug ikaw dili moluwas? Nganong gipakita mo kanako ang makapasakit, ug nagtan-aw ka lang sa kagubot? Ug nganong ang kalaglagan ug kabangis ania sa akong atubangan, ug nganong adunay panag-away, ug nganong may panagbingkil?”—Habacuc 1:2, 3.
6. Unsay gisulti ni Jehova sa pagtubag sa pag-ampo ni Habacuc, ug unsay atong makat-onan gikan niini?
6 Sa lakbit, gitubag ni Jehova si Habacuc niining mga pulonga: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan kini malangan, paabota kini; kay kini moabot gayod. Kini dili maglangan.” (Habacuc 2:3) Busa gipadayag sa Diyos nga siya molihok “sa tinudlong panahon.” Bisan pag daw may pagkalangan kini, tumanon ni Jehova ang iyang katuyoan—nga walay pagkapakyas!—2 Pedro 3:9.
Pag-alagad nga May Malahutayong Kadasig
7. Bisan pag si Jesus wala mahibalo kon kanus-a gayod moabot ang adlaw ni Jehova, sa unsang paagi niya gihimo ang iyang mga buluhaton?
7 Ang pagkahibalo ba sa eksaktong panahon ni Jehova sa mga hitabo gikinahanglan aron kita makalakaw uban sa Diyos nga madasigon? Dili, dili kinahanglan. Palandonga ang pipila ka pananglitan. Si Jesus maikagon kaayo sa panahon kon kanus-a matuman ang kabubut-on sa Diyos dinhi sa yuta maingon man sa langit. Sa pagkatinuod, gitudloan ni Kristo ang iyang mga sumusunod sa pag-ampo: “Amahan namo sa mga langit, balaana ang imong ngalan. Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Bisan tuod si Jesus nahibalo nga kining hangyoa pagatubagon, siya wala mahibalo sa eksaktong panahon sa mga butang. Diha sa iyang dakong tagna mahitungod sa kataposan niining sistema sa mga butang, siya nag-ingon: “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.” (Mateo 24:36) Sanglit si Jesu-Kristo mao ang labing hinungdanon sa katumanan sa mga katuyoan sa Diyos, siya direktang malangkit sa paglaglag sa mga kaaway sa iyang langitnong Amahan. Apan, sa dinhi pa si Jesus sa yuta, bisan siya wala mahibalo kon kanus-a molihok ang Diyos. Nakapaluya ba kana kaniya sa pag-alagad kang Jehova? Wala gayod! Sa pagkakita nga madasigong gihinloan ni Jesus ang templo, “nahinumdoman sa iyang mga tinun-an nga kini nahisulat: ‘Ang kasibot alang sa imong balay magalamoy kanako.’” (Juan 2:17; Salmo 69:9) Si Jesus puliki kaayo sa buluhaton nga gisugo kaniya nga pagabuhaton, ug iyang gihimo kini nga may malahutayong kadasig. Siya nag-alagad usab sa Diyos nga anaa sa hunahuna ang walay kataposan.
8, 9. Sa dihang nangutana ang mga tinun-an bahin sa pagpasig-uli sa Gingharian, unsa ang gisulti ngadto kanila, ug unsay ilang pagsanong?
8 Tinuod usab kini sa mga tinun-an ni Kristo. Si Jesus nakigkita kanila una pa siya misaka sa langit. Ang asoy nag-ingon: “Karon, sa dihang sila nagkatigom na, sila nangutana kaniya: ‘Ginoo, ipasig-uli mo ba ang gingharian sa Israel niining panahona?’” Sama sa ilang Agalon, sila nangandoy sa pag-abot sa Gingharian. Bisan pa niana, si Jesus mitubag: ‘Dili inyoha ang pagbatog kahibalo sa mga panahon o mga yugto sa panahon nga gibutang sa Amahan sa iyang kaugalingong kamandoan; apan kamo magadawat ug gahom sa dihang ang balaang espiritu moabot nganha kaninyo, ug kamo mahimong mga saksi nako sa Jerusalem ug sa tibuok Judea ug Samaria ug ngadto sa kinalay-ang dapit sa yuta.’—Buhat 1:6-8.
9 Walay timailhan nga ang mga tinun-an nangalugda niining tubaga. Hinunoa, sila madasigong nagmaokupado sa buluhaton sa pagsangyaw. Sulod sa pipila ka semana, ilang napuno ang Jerusalem sa ilang pagpanudlo. (Buhat 5:28) Ug sulod sa 30 ka tuig, ilang napadako ang ilang buluhatong pagsangyaw nga tungod niini si Pablo nakaingon nga ang maayong balita gikawali “diha sa tibuok kalalangan ilalom sa langit.” (Colosas 1:23) Bisan tuod ang Gingharian wala ‘mapasig-uli ngadto sa Israel’ ingon sa sayop nga gidahom sa mga tinun-an ug kini wala matukod sa langit sa panahon sa ilang tibuok kinabuhi, sila nagpadayon sa pag-alagad kang Jehova nga madasigon nga anaa sa hunahuna ang walay kataposan.
Pagsusi sa Atong mga Motibo
10. Ang pagkawalay-kasayoran kon kanus-a laglagon sa Diyos ang sistema ni Satanas nagtugot kanato sa pagpamatuod sa unsa?
10 Ang modernong-adlawng mga alagad ni Jehova nangandoy usab nga makakita sa kalaglagan niining daotang sistema sa mga butang. Ang atong pangunang kabalak-an, hinunoa, dili ang atong kaluwasan ngadto sa gisaad sa Diyos nga bag-ong kalibotan. Buot natong makita nga ang ngalan ni Jehova mabalaan ug ang iyang pagkasoberano mabayaw. Tungod niini, kita malipay nga wala kita sultihi sa Diyos sa ‘adlaw o takna’ nga gitakda alang sa kalaglagan sa sistema ni Satanas. Kini nagtugot kanato sa pagpamatuod nga kita determinado sa paglakaw uban sa Diyos sa walay kataposan tungod kay gihigugma nato siya ug dili tungod kay kita adunay mubog-abot, hakog nga mga tumong.
11, 12. Sa unsang paagi gihagit ang integridad ni Job, ug sa unsang paagi nalangkit kita nianang hagita?
11 Ang paghupot sa atong integridad sa Diyos makatabang usab sa pagpamatuod nga sayop ang Yawa sa dihang siya nangakusar nga ang matarong nga si Job—ug sa ingon ang mga tawo nga sama kaniya—nag-alagad sa Diyos tungod sa kaugalingong-kaayohan. Human gihubit ni Jehova ang iyang alagad nga si Job ingong matarong, matul-id, mahinadlokon-sa-Diyos nga tawo, si Satanas madinaotong nangakusar: “Mahadlok ba lamang si Job sa Diyos sa walay hinungdan? Dili ba imo mang gipanalipdan ang iyang palibot ug ang palibot sa iyang balay ug ang palibot sa tanang butang nga iyang nabatonan sa tibuok palibot? Gipanalanginan mo ang buhat sa iyang mga kamot, ug ang iyang mga panon sa kahayopan nagadugang sa ibabaw sa yuta. Apan, ingong kausaban, bakyawa karon ang imong kamot, palihog, ug tandoga ang tanan nga iyang nabatonan ug tan-awa kon dili ka ba niya pasipalahan sa atubangan sa imong nawong.” (Job 1:8-11) Pinaagi sa paghupot sa iyang integridad ilalom sa pagsulay, napamatud-an ni Job nga bakak kining madaotong pangangkon.
12 Pinaagi sa samang paghupot sa dalan sa integridad, kita makapamatuod nga bakak ang tanang satanikong sumbong nga kita nag-alagad lamang sa Diyos tungod kay kita nahibalo nga haduol na ang ganti. Ang pagkawalay-kasayoran sa eksaktong panahon nga ipahamtang sa Diyos ang panimalos diha sa daotan naghatag kanato ug higayon sa pagpamatuod nga ato gayod nga gihigugma si Jehova ug buot maglakaw sa iyang mga dalan hangtod sa hangtod. Kini nagpakita nga kita maunongon sa Diyos ug may pagsalig sa iyang paagi sa pag-atiman sa mga butang. Dugang pa, ang pagkawalay-kasayoran sa adlaw ug takna nagtabang kanato sa pagpabiling mabinantayon ug matukawon sa espirituwal tungod kay kita nahibalo nga ang kataposan mahimong moabot sa bisan unsang panahon, sama sa usa ka kawatan sa kagabhion. (Mateo 24:42-44) Pinaagi sa paglakaw adlaw-adlaw uban kang Jehova, atong ginahimo ang iyang kasingkasing nga malipayon ug makahatag ug tubag sa Yawa, nga nagbiaybiay kaniya.—Proverbio 27:11.
Pagplano Alang sa Walay Kataposan!
13. Unsay gipakita sa Bibliya bahin sa pagplano sa umaabot?
13 Kadtong nagalakaw uban sa Diyos nahibalo nga maalamong magplano alang sa umaabot. Nahibalo sa mga problema ug mga limitasyon sa pagkatigulang, daghang tawo maningkamot sa pagpahimulos sa ilang pagkabatan-on ug kalig-on aron inigkatigulang na nila may pinansiyal sila nga kasegurohan. Nan, komosta ang atong mas hinungdanong espirituwal nga umaabot? Ang Proverbio 21:5 nag-ingon: “Ang mga plano sa kugihan mohatag gayod ug kaayohan, apan ang tagsatagsa ka madalidalion nagapaingon gayod sa kawalad-on.” Ang pagplanong daan nga anaa sa hunahuna ang walay kataposan tinuod nga adunay kaayohan. Sanglit kita wala mahibalo sa eksaktong panahon kon kanus-a moabot ang kataposan niining sistema, kinahanglang atong hatagan ug pagpamalandong ang atong umaabot nga mga panginahanglan. Apan kita kinahanglang magmatimbang ug ibutang pag-una diha sa kinabuhi ang intereses sa Diyos. Ang mga tawong walay pagtuo tingali mohinapos nga ang pagsentro sa intereses sa usa sa pagtuman sa kabubut-on sa Diyos mubog-panan-aw. Apan tinuod ba?
14, 15. (a) Unsang ilustrasyon ang gihisgotan ni Jesus bahin sa mga plano alang sa umaabot? (b) Nganong ang tawong dato sa ilustrasyon ni Jesus mubog-panan-aw?
14 Si Jesus naghisgot bahin sa usa ka ilustrasyon nga makapalamdag sa hunahuna niining bahina. Siya nag-ingon: “Ang yuta sa usa ka datong tawo nagpatungha ug maayong abot. Tungod niini siya misugod pagpangatarungan sulod sa iyang kaugalingon, nga nag-ingon, ‘Unsay akong pagabuhaton, karon nga wala na akoy katigoman sa akong mga abot?’ Busa siya miingon, ‘Buhaton ko kini: Akong gub-on ang akong mga balay-tipiganan ug magtukod ug mas dagko, ug didto akong tigomon ang tanan kong mga lugas ug ang tanan kong maayong mga butang; ug ako moingon sa akong kalag: “Kalag, aduna kay daghang maayong mga butang nga natigom sa daghang katuigan; pagpahayahay, kaon, inom, maglipay sa imong kaugalingon.”’ Apan ang Diyos miingon kaniya, ‘Usa nga dili-makatarunganon, niining gabhiona sila mapugsanong mangayo sa imong kalag gikan kanimo. Nan, kinsa ang mobaton sa mga butang nga imong gitigom?’ Maingon man usab niana ang tawo nga nagatigom ug bahandi alang sa iyang kaugalingon apan dili dato ngadto sa Diyos.”—Lucas 12:16-21.
15 Mao bay gipunting ni Jesus nga ang tawong dato dili unta angay mangamas aron makabaton ug materyal nga kasegurohan sa umaabot? Dili, kay ang Kasulatan nagdasig kanato nga magkugi. (2 Tesalonica 3:10) Ang sayop sa tawong dato mao nga wala niya buhata ang gikinahanglan aron mahimong “dato ngadto sa Diyos.” Bisan pag nakapahimulos siya sa iyang materyal nga bahandi sa daghang tuig, siya mamatay ra gihapon sa ngadtongadto. Siya mubog-panan-aw, wala maghunahuna bahin sa walay kataposan.
16. Nganong kita makasalig gayod kang Jehova alang sa usa ka may kasegurohang umaabot?
16 Ang paglakaw uban kang Jehova nga anaa sa hunahuna ang walay kataposan praktikal ug layog-panan-aw. Kini mao ang labing maayong paagi sa pagplano alang sa umaabot. Samtang maalamon ang paghimog praktikal nga mga plano labot sa pag-eskuyla, trabaho, ug mga responsibilidad sa pamilya, angay natong hinumdoman kanunay nga si Jehova dili gayod mobiya sa iyang maunongong mga alagad. Si Haring David miawit: “Nabata ako kaniadto, ug karon ako tigulang na, apan wala ako makakita ug matarong nga bug-os nga gibiyaan, ni nagpangitag tinapay ang iyang kaliwat.” (Salmo 37:25) Si Jesus samang naghatag ug pasalig nga ang Diyos motagana alang sa tanang nangita pag-una sa Gingharian ug nagalakaw diha sa matarong nga mga dalan ni Jehova.—Mateo 6:33.
17. Sa unsang paagi kita nahibalo nga haduol na ang kataposan?
17 Bisan tuod kita nag-alagad sa Diyos nga anaa sa hunahuna ang walay kataposan, ibutang gayod nato gihapon sa hunahuna ang adlaw ni Jehova. Ang katumanan sa tagna sa Bibliya tin-awng nagpamatuod sa pagkaduol nianang adlawa. Kining sigloha gitiman-an sa mga gubat, mga kamatay, mga linog, ug mga kakulang sa pagkaon, uban sa paglutos sa matuod nga mga Kristohanon ug sa tibuok-kalibotang pagsangyaw sa maayong balita sa Gingharian sa Diyos. Kining tanan maoy mga bahin sa panahon sa kataposan niining daotang sistema sa mga butang. (Mateo 24:7-14; Lucas 21:11) Ang kalibotan puno sa mga tawong “mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Niining kritikal nga kataposang mga adlaw, ang kinabuhi malisod alang kanato ingong mga alagad ni Jehova. Nangandoy gayod kita sa adlaw sa dihang pagalaglagon sa Gingharian ni Jehova ang tanang pagkadaotan! Kasamtangan, magmadeterminado kita sa paglakaw uban sa Diyos nga anaa sa hunahuna ang walay kataposan.
Pag-alagad nga Anaa sa Hunahuna ang Kinabuhing Walay Kataposan
18, 19. Unsay nagpakita nga ang mga matinumanon sa kakaraanan nag-alagad sa Diyos nga anaa sa hunahuna ang walay kataposan?
18 Samtang maglakaw kita uban kang Jehova, ibutang nato sa hunahuna ang pagtuo ni Abel, Enoch, Noe, Abraham, ug Sara. Human sa paghisgot kanila, si Pablo nagsulat: “Diha sa pagtuo ang tanan kanila namatay, bisan tuod sila wala makabaton sa katumanan sa mga saad, apan ilang nakita kini sa halayo ug nanaghangop niini ug mipahayag sa dayag nga sila mga estranyo ug temporaryong mga pumoluyo sa yuta.” (Hebreohanon 11:13) Kadtong maong mga matinumanon “nagapangab-ot alang sa usa ka mas maayo nga dapit, nga mao, usa nga iya sa langit.” (Hebreohanon 11:16) Pinaagi sa pagtuo, sila nagpaabot sa usa ka mas maayong dapit ilalom sa pagmando sa Mesiyanikong Gingharian sa Diyos. Kita makaseguro nga pagagantihan sila sa Diyos ug kinabuhing walay kataposan diha nianang mas maayong dapit—ang yutan-ong Paraiso ilalom sa pagmando sa Gingharian.—Hebreohanon 11:39, 40.
19 Ang manalagnang Miqueas nagpahayag sa determinasyon sa katawhan ni Jehova sa pagsimba sa Diyos sa walay kataposan. Siya nagsulat: “Ang tanang katawhan, sa ilang bahin, magalakaw ang matag usa sa ngalan sa ilang diyos; apan kita, sa atong bahin, magalakaw sa ngalan ni Jehova nga atong Diyos sa panahong walay kataposan, bisan hangtod sa kahangtoran.” (Miqueas 4:5) Hangtod sa iyang kamatayon, si Miqueas maunongong nag-alagad kang Jehova. Sa pagkabanhaw diha sa bag-ong kalibotan, sa walay duhaduha ang maong manalagna magpadayon sa paglakaw uban sa Diyos hangtod sa walay kataposan. Pagkamaayong panig-ingnan kini alang kanato karon nga nagkinabuhi sa halawom nga panahon sa kataposan!
20. Unsa ang angay natong tinguhaon?
20 Si Jehova nagpabili sa gugma nga atong gipakita alang sa iyang ngalan. (Hebreohanon 6:10) Siya nahibalo nga malisod alang kanato ang paghupot sa integridad kaniya niining kalibotan nga gimandoan sa Yawa. Samtang ‘ang kalibotan mahanaw,’ hinunoa, “siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:17; 5:19) Nan, pinaagi sa tabang ni Jehova, tinguhaon nato nga makalahutay sa mga pagsulay nga atong maatubang sa matag adlaw. Hinaot ang atong panghunahuna ug dalan sa kinabuhi nahasentro sa katingalahang mga panalangin nga gisaad sa atong mahigugmaong langitnong Amahan. Kini atong maangkon kon kita magpadayon sa paglakaw uban sa Diyos nga anaa sa hunahuna ang walay kataposan.—Judas 20, 21.
Unsay Imong Tubag?
◻ Unsa ang katuyoan sa Diyos alang sa mga tawong masinugtanon?
◻ Nganong si Jehova wala pa molihok sa paglaglag sa dili-diyosnong kalibotan?
◻ Nganong ang pagkawalay-kasayoran kon kanus-a gayod molihok ang Diyos dili makapaluya sa atong kadasig?
◻ Unsa ang pipila ka mga kaayohan sa paglakaw uban sa Diyos nga anaa sa hunahuna ang walay kataposan?
[Hulagway sa panid 17]
Ang paglakaw uban sa Diyos nagkinahanglan nga kita mag-alagad kaniya nga madasigon ingon sa gibuhat sa unang mga tinun-an ni Kristo