NIDO

Usa ka siyudad nga nahimutang sa Peninsula sa Resadiye, nga miabot gikan sa HK nga bahin sa Asia Minor ngadto sa Dagat Aegean, taliwala sa mga pulo sa Rodas ug Cos.

Bisan tuod ang Nido wala hinganli niini nga mga higayon, si apostol Pablo lagmit miagi sa maong siyudad sa iyang pagpauli gikan sa iyang ikaduhang misyonaryong panaw, niadtong mga 52 K.P. (Buh 18:​21, 22), ug ingon man sa naghinapos ang iyang ikatulong panaw, niadtong mga 56 K.P., sa dihang ang barko nga iyang gisakyan midunggo sa Rodas ug Cos. (Buh 21:1) Apan, espesipiko kining gihisgotan sa Buhat 27 maylabot sa panaw ni Pablo niadtong mga 58 K.P. aron moatubang kang Emperador Nero didto sa Roma. Sa pagbiya sa Mira, ang barko nga gisakyan ni Pablo ug sa ubang mga binilanggo midunggo sa Nido. (Buh 27:​5-7) Kon pabor ang hangin, kini nga panaw nga mga 240 km (150 mi) tingali mokabat lamang ug usa ka adlaw, apan kay sungsongon ang hangin nga gihisgotan sa asoy mao nga gidangtan ug “ubay-ubayng mga adlaw” ang maong pagbiyahe. Ang ilang gisakyan nga “sakayan gikan sa Alejandria” maoy kargahanag mga lugas, tingali usa sa daghang sakayan nga kanunayng nagdala ug mga abot sa uma gikan sa Ehipto paingon sa Roma ug lagmit kanunayng naglawig sa usa ka mas direktang ruta gikan sa Alejandria tabok sa Dagat Mediteranyo paingon sa Roma. (Buh 27:38) Apan, tungod sa kusog nga hangin nga gihisgotan sa mga bersikulo 4 ug 7 lagmit napugos ang sakayan nga motipas ug modunggo sa Mira. Ang usa ka dako, lisod manehoon nga sakayan nga puno sa mga lugas hinay gayod modagan diha sa sungsongon nga hangin, ug mao nga kini sa kataposan nakaabot sa Nido “nga naglisod.” Ang dili pa dugayng mga pagpangubkob sa maong dapit nagpadayag ug daghang butang mahitungod niining dapita. Ang The Interpreter’s Dictionary of the Bible, Suplementaryo nga Tomo, p. 169, naghubit niini nga dapit: “Ang usa ka ubos ug hiktin nga yuta . . . nagdugtong sa pangunang bahin sa peninsula sa Nido ngadto sa usa ka hataas nga yuta nga nagsalipod sa duha ka maayong pantalan diha sa isigkakilid niining hiktin nga yuta. Ang mas dakong pantalan sa H lagmit mao ang pantalan alang sa negosyo diin ang mga barko nga paingon sa kasadpan o amihanan sama sa gisakyan ni Pablo (Buhat 27:7) magpalurang sa dili maayong panahon una pa mopadayon sa ilang panaw saylo sa punta nga apupa sa hangin. Sa mga tampi sa mga pantalan adunay mga pondohanan sa barko; mga bodega . . . , mga tiyanggihan; gagmayng mga teatro; ug usa ka templo ni Dionysus.”​—Giedit ni K. Crim, 1976.

Human hisgoti ang pag-abot sa Nido, ang rekord nag-ingon nga “tungod kay ang hangin wala man motugot kanamo sa pagpadayon sa unahan, milawig kami nga salipod sa Creta sa Salmone.” (Buh 27:7) Mopatim-aw nga sila dili ‘makapadayon’ sa ilang giplanong ruta sa pagtabok sa Dagat Aegean agi sa habagatang tumoy sa Gresya ug dayon ngadto sa Roma, kay ang sungsongon nga hangin nagpugos kanila nga magpahabagatan paingon sa Creta ug molawig nga salipod sa kabaybayonan niini. Ingon sa gipakita sa Buhat 27:​9, kadto maoy panahon sa tinghunlak, ug ang mga nagdumala sa sakayan tinong nag-apura nga makapadayon sa pagpanaw una pa moabot ang mga kahimtang sa panahon nga mas peligroso ang paglawig.