Duna Ka bay “Kagawasan sa Pagsulti”?

KAPIG unom ka milyong tawo diha sa 235 ka nasod nagpahimulos sa gitawag sa Bibliya ug “kagawasan sa pagsulti.” Ang pamulong makitag 16 ka beses diha sa teksto sa Kristohanon Gregong Kasulatan sa Bag-ong Kalibotang Hubad sa Balaang Kasulatan. (Filipos 1:20; 1 Timoteo 3:13; Hebreohanon 3:6; 1 Juan 3:21) Unsay ipasabot sa “kagawasan sa pagsulti”? Unsay makatabang kanato sa pagbaton niana? Sa unsang mga higayon sa komunikasyon nga posible kitang mopahayag ug walay-babag nga pagpanulti tungod sa maong kagawasan?

Sumala sa Vine’s Expository Dictionary of Old and New Testament Words, ang Gregong termino alang sa pamulong “kagawasan sa pagsulti” nagpasabot nga “kagawasan sa sinultihan, pagkawalay-pagpanuko sa paglitok, . . . pagkawalay-kahadlok sa pagsulti uban ang kaisog; busa, pagkamasaligon, mangayaong kalig-on, pagkamaisogon, nga dili kanunayng nalangkit sa pagsulti.” Hinuon, ang maong walay-lipudlipod nga pagsulti dili saypon sa pagkahait o pagkabastos nga manulti. “Himoa ang inyong sinultihan nga kanunayng madanihon,” nag-ingon ang Bibliya. (Colosas 4:6) Ang kagawasan sa pagsulti nagpasabot nga magpabiling mataktikanhon samtang dili tugotan ang makapaguol nga mga kahimtang o pagkahadlok sa tawo nga makapugong sa atong pagsulti.

Ato bang kinaiyanhong katungod ang kagawasan sa pagsulti? Tagda kon unsay gisulat ni apostol Pablo ngadto sa mga Kristohanon sa Efeso. Siya miingon: “Nganhi kanako, usa ka tawong ubos pa kay sa labing ubos sa tanang balaan, kining dili-takos nga kalulot gihatag, aron ipahayag ko ngadto sa kanasoran ang maayong balita bahin sa dili-matugkad nga bahandi ni Kristo.” Si Pablo midugang nga pinaagi ni Jesu-Kristo “kita nakabaton niining kagawasan sa pagsulti ug pagduol uban ang pagsalig pinaagi sa atong pagtuo kaniya.” (Efeso 3:8-12) Imbes usa ka kinaiyanhong katungod, ang kagawasan sa pagsulti maoy resulta hinuon sa atong relasyon kang Jehova nga Diyos nga gipasukad sa pagtuo kang Jesu-Kristo. Atong tan-awon kon unsay makatabang kanato aron mabatonan ang maong kagawasan ug kon sa unsang paagi atong ikapadayag kini sa dihang kita magasangyaw, magatudlo, ug magaampo.

Unsay Makatabang Kanato sa Pagsangyaw Uban ang Kaisog?

Si Jesu-Kristo mao ang kinalabwang panig-ingnan sa usa nga migamit sa kagawasan sa pagsulti. Ang iyang kasibot nagdasig kaniya sa pagpahimulos sa mga kahigayonan sa pagsangyaw. Bisan kon siya nagpahulay, nagkaon diha sa balay sa laing tawo, o naglakaw sa dalan, wala gayod niya palabya ang kahigayonan sa pagsulti bahin sa Gingharian sa Diyos. Ang pagbiaybiay o laktod nga pagsupak wala makapahilom kang Jesus. Hinunoa, siya maisogong nagyagyag sa mga pangulo sa bakak nga relihiyon sa iyang adlaw. (Mateo 23:13-36) Bisan pa sa panahong siya gidakop ug gihusay, si Jesus misulting walay kahadlok.—Juan 18:6, 19, 20, 37.

Ang mga apostoles ni Jesus nakabaton sa samang kaprangka. Sa Pentekostes 33 K.P., si Pedro walay lipudlipod nga misulti atubangan sa panon sa kapig 3,000 ka tawo. Mamatikdan nga sayosayo pa niana, nahadlok siya sa dihang nailhan sa usa ka sulugoong babaye. (Marcos 14:66-71; Buhat 2:14, 29, 41) Sa dihang gitaral atubangan sa relihiyosong mga pangulo, si Pedro ug Juan wala mangurog sa kahadlok. Sa walay pagpanuko, maisogon silang nagpamatuod mahitungod sa nabanhaw nga si Jesu-Kristo. Sa pagkamatuod, tungod sa walay-lipudlipod nga pagsulti ni Pedro ug Juan ang relihiyosong mga pangulo nakaila nga sila mga kauban diay ni Jesus. (Buhat 4:5-13) Nganong nakahimo man sila sa pagsulti uban ang dakong kaisog?

Si Jesus misaad sa iyang mga apostoles: “Sa dihang sila magtugyan kaninyo, ayaw kabalaka bahin sa kon unsaon o kon unsay inyong igasulti; kay ang inyong igasulti igahatag kaninyo nianang taknaa; kay dili lamang kamo ang magasulti, kondili ang espiritu sa inyong Amahan mao ang magasulti pinaagi kaninyo.” (Mateo 10:19, 20) Ang balaang espiritu mitabang kang Pedro ug sa uban pa sa pagbuntog sa kamaulawon o kahadlok nga makababag unta sa ilang pagsulti nga walay lipudlipod. Ang impluwensiya sa maong kusganong puwersa makatabang usab kanato.

Dugang pa, si Jesus mihatag sa iyang mga sumusunod sa ilang buluhaton sa paghimog mga tinun-an. Nahiangay kadto, sanglit Siya mao ang gihatagan sa “tanang awtoridad . . . sa langit ug sa yuta.” Ug ‘siya magauban kanila.’ (Mateo 28:18-20) Kay nahibalo sa pagpaluyo ni Jesus, ang unang mga tinun-an nagmasaligon samtang giatubang nila ang mga awtoridad nga determinado sa pagbabag sa ilang pagsangyaw. (Buhat 4:18-20; 5:28, 29) Ang maong kahibalo makahatag usab kanatog pagsalig.

Sa pagpaila sa lain pang hinungdan sa ilang pagsulti nga walay lipudlipod, gilangkit ni Pablo ang paglaom uban sa “dakong kagawasan sa pagsulti.” (2 Corinto 3:12; Filipos 1:20) Sanglit ang mensahe bahin sa paglaom maoy kahibulongan kaayo nga dili nila mahimong tagoan sa kaugalingon, ang mga Kristohanon kinahanglang mosulti niana sa uban. Sa pagkatinuod, ang atong paglaom maoy usa ka hinungdan nga atong gamiton ang kagawasan sa pagsulti.—Hebreohanon 3:6.

Pagsangyaw Uban ang Kaisog

Sa unsang paagi makasangyaw kita uban ang kaisog bisan ubos sa lagmit makahahadlok nga mga kahimtang? Tagda ang panig-ingnan ni apostol Pablo. Samtang usa ka binilanggo sa Roma, iyang gihangyo ang iyang mga isigkamagtutuo nga mag-ampo aron ‘ang katakos sa pagsulti ihatag kaniya sa pagbuka sa iyang baba, aron siya makasulti uban ang kaisog sa paagi nga angay niyang isulti.’ (Efeso 6:19, 20) Gitubag ba ang maong mga pag-ampo? Oo! Samtang nabilanggo, si Pablo padayong “nagwali sa gingharian sa Diyos . . . uban ang labing dakong kagawasan sa pagsulti, nga walay babag.”—Buhat 28:30, 31.

Ang pagpahimulos sa mga kahigayonan sa pagsangyaw diha sa trabahoan, sa tunghaan, o samtang magbiyahe mahimong mosulay sa atong kagawasan sa pagsulti. Tungod sa pagkamaulawon, kahadlok sa reaksiyon nga mahimo natong masinati, o kakulang sa pagsalig sa atong katakos, basin magpakahilom lang kita. Si apostol Pablo dinhi naghatag na usab ug maayong panig-ingnan. “Kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog,” misulat siya. (1 Tesalonica 2:2) Tungod lamang kay siya misalig kang Jehova nga si Pablo nakahimo sa butang nga sa iyang kaugalingon dili niya mabuhat.

Ang pag-ampo nakatabang sa usa ka babaye nga ginganlag Sherry nga magmaisogon sa dihang may kahigayonan alang sa dili-pormal nga pagsangyaw. Usa ka adlaw samtang nagpaabot sa iyang bana gikan sa usa ka kasabotan, iyang namatikdan ang usa ka babaye nga naghulat usab. “Tungod kay ginerbiyos kaayo ako,” matod ni Sherry, “miampo ako kang Jehova alang sa kaisog.” Sa pagduol ni Sherry sa babaye, miabot ang usa ka ministro nga Baptist. Wala magdahom si Sherry nga makahibalag ug usa ka ministro. Bisan pa niadto, siya miampo na usab ug nakahimo sa pagpamatuod. Nakapahimutang siyag literatura sa babaye ug mihimog mga kahikayan nga mobalik-duaw. Sa dihang pahimuslan nato ang kahigayonan sa pagsangyaw, makasalig kita nga ang pagsalig lamang kang Jehova makatabang kanato sa pagsulti uban ang kaisog.

Sa Dihang Manudlo

Ang kagawasan sa pagsulti suod nga nalangkit sa pagpanudlo. Mahitungod sa “mga tawo nga mag-alagad sa maayong paagi” diha sa kongregasyon, ang Bibliya nag-ingon: “[Sila] nagbaton sa ilang kaugalingon ug maayong pagbarog ug dakong kagawasan sa pagsulti diha sa pagtuo maylabot kang Kristo Jesus.” (1 Timoteo 3:13) Sila makabaton sa maong kagawasan sa pagsulti pinaagi sa pagpadapat sa ilang kaugalingon kon unsay ilang gitudlo sa uban. Ang ilang pagbuhat niana manalipod ug makapalig-on sa kongregasyon.

Kon kita adunay kagawasan sa pagsulti niining paagiha, ang atong tambag mas epektibo ug mas lagmit sundon. Imbes maluya tungod sa dili-maayong panig-ingnan, ang mga mamiminaw madasig sa pagkakitag praktikal nga pagpadapat sa butang nga gitudlo kanila. Tungod sa maong kagawasan kadtong adunay espirituwal nga mga katakos ‘makapasibo sa ilang igsoon’ sa dili pa mograbe ang usa ka suliran. (Galacia 6:1) Sa kasukwahi, ang tawo nga naghatag ug dili-maayong panig-ingnan mahimong magpanuko sa pagtambag, kay mobati nga siya walay katungod sa pagtambag. Ang paglangan sa paghatag ug gikinahanglang tambag mahimong moresulta sa daotang mga sangpotanan.

Ang atong pagsulti uban ang kaisog wala magpasabot sa pagkahimong hinawayon, dogmatiko, o pagkagahig-ulo. Gitambagan ni Pablo si Filemon “pinasukad sa gugma.” (Filemon 8, 9) Ug ang mga pulong sa apostol lagmit nga giangayan. Sa pagkatinuod, ang gugma angayng magpaluyo sa bisan unsang tambag nga ihatag sa usa ka ansiyano!

Ang kagawasan sa pagsulti hinungdanon gayod sa dihang mohatag ug tambag. Hinungdanon usab kini sa ubang mga higayon. Si Pablo misulat ngadto sa kongregasyon sa Corinto: “Ako adunay dakong kagawasan sa pagsulti kaninyo. Ako adunay dakong pagpanghambog labot kaninyo.” (2 Corinto 7:4) Si Pablo wala magpugong sa pagdayeg sa iyang mga kaigsoonan sa dihang nahiangay kadto. Ang gugma nagtukmod kaniya sa paghatag ug pagtagad sa maayong mga hiyas sa iyang mga isigkamagtutuo, bisan pag nahibalo siya sa ilang mga kahuyangan. Ang Kristohanong kongregasyon karon susamang mapalig-on sa dihang ang mga ansiyano dili magpanuko sa pagdayeg ug magdasig sa ilang kaigsoonan.

Aron mahimong epektibo sa ilang pagpanudlo, ang tanang Kristohanon kinahanglang adunay kagawasan sa pagsulti. Si Sherry, nga gihisgotan nga sayosayo, gustong modasig sa iyang mga anak sa pagsangyaw diha sa tunghaan. “Bisan pag ako gipadako sa kamatuoran,” siya miangkon, “talagsa ra akong mosangyaw sa tunghaan. Ug dili gayod ako mosangyaw sa dili-pormal nga paagi. Gisukna ko ang akong kaugalingon, ‘Unsang matanga sa panig-ingnan ang akong ginahatag alang sa akong mga anak?’” Kadto maoy midasig kang Sherry nga mas maningkamot sa pagsangyaw sa dili-pormal nga paagi.

Oo, mapanid-an sa uban ang atong mga buhat ug sila makamatikod kon dili kita magbuhat kon unsay atong gitudlo. Nan, batonan nato ang kagawasan sa pagsulti pinaagi sa pagpaningkamot nga ang atong mga lihok mahiuyon sa atong mga pulong.

Diha sa Pag-ampo

Ang kagawasan sa pagsulti hinungdanon ilabina kon bahin na sa atong mga pag-ampo kang Jehova. Sa walay pagpanuko, kita makahaw-as kon unsay anaa sa atong mga kasingkasing ngadto kang Jehova uban ang pagsalig nga siya mamati sa atong mga pag-ampo ug tubagon kana. Sa ingon nga paagi atong mapahimuslan ang mainiton, suod nga relasyon uban sa atong langitnong Amahan. Dili gayod kita angayng magpanuko sa pagduol kang Jehova, kay naghunahuna nga kita dili bililhon. Komosta man kon tungod sa pagbating sad-an gumikan sa usa ka kahuyangan o sala mapugngan ang atong kinasingkasing nga mga pagpahayag? Makaduol ba gihapon kita nga walay pagpanuko sa Soberano sa uniberso?

Ang binayaw nga posisyon ni Jesus ingong Hataas nga Saserdote mohatag ug dugang pasikaranan sa pagsalig diha sa pag-ampo. Sa Hebreohanon 4:15, 16, atong mabasa: “Ang atong hataas nga saserdote, dili usa nga dili mobati sa atong mga kaluyahon, kondili usa nga nasulayan sa tanang paagi sama kanato, apan walay sala. Busa, uban ang kagawasan sa pagsulti manuol kita sa trono sa dili-takos nga kalulot, aron makadawat kita ug kaluoy ug makakaplag ug dili-takos nga kalulot ingong tabang sa hustong panahon.” Ingon niana ka bililhon ang kamatayon ni Jesus ug ang iyang papel ingong Hataas nga Saserdote.

Kon kita maikagong magtinguha sa pagsugot kang Jehova, kita adunay bug-os nga katarongan sa pagdahom nga kita iyang dunggon. Si apostol Juan misulat: “Mga hinigugma, kon ang atong mga kasingkasing wala maghukom kanato, kita adunay kagawasan sa pagsulti ngadto sa Diyos; ug bisan unsay atong pangayoon atong madawat gikan kaniya, tungod kay atong ginabantayan ang iyang mga sugo ug ginabuhat ang mga butang nga makapahimuot sa iyang mga mata.”—1 Juan 3:21, 22.

Ang gawasnong pagduol kang Jehova diha sa pag-ampo nagpasabot nga kita makasulti kaniya ug bisan unsa. Bisan unsa ang atong mga kahadlok, bisan unsa ang atong mga gihunahuna, mga kabalaka, o mga pagduhaduha nga nagsakit kanato, ikasulti nato kana kang Jehova, kay masaligon nga siya mamati kanunay sa atong sinserong mga pag-ampo. Bisan pa kon nakahimo kitag grabeng sala, ang pagbati sa pagkasad-an dili angayng magbabag sa atong mga pagpahayag diha sa pag-ampo kon kita sinserong naghinulsol.

Bililhon gayod ang dili-takos nga gasa sa kagawasan sa pagsulti. Tungod niana kita makadayeg sa Diyos diha sa atong kalihokan sa pagsangyaw ug pagtudlo ug mas masuod kita kaniya diha sa pag-ampo. Dili nato ‘wad-on ang atong kagawasan sa pagsulti, nga may dakong ganti nga ibayad niini.’—ang ganti nga walay-kataposang kinabuhi.—Hebreohanon 10:35.

[Hulagway sa panid 13]

Si apostol Pablo misulti uban ang kaisog

[Mga hulagway sa panid 15]

Ang epektibong pagpanudlo nagkinahanglag kagawasan sa pagsulti

[Hulagway sa panid 16]

Kinahanglanon ang kagawasan sa pagsulti diha sa pag-ampo