Sa Unsang Paagi si Jesu-Kristo Usa ka Manalagna nga Sama Kang Moises?

SI Jehova nga Diyos dili magabakak. (Tito 1:2; Hebreohanon 6:18) Busa, ang mga tagna sa iyang Pulong, ang Bibliya, kasaligan ug matuod. Kini tinong matuman.

Lakip niining dinasig sa Diyos nga mga tagna mao ang usa nga girekord sa Hebreohanong propeta nga si Moises mahitungod sa Mesiyas. Sa pagkutlo kang Jehova, si Moises miingon: “Magapatindog ako alang kanila [mga Israelinhon] sa taliwala sa ilang mga igsoon ug usa ka manalagna, nga sama kanimo [Moises]; ug igabutang ko ang akong mga pulong diha sa iyang baba, ug siya magasulti ngadto kanila sa tanan nga igasugo ko kaniya.”​—Deuteronomio 18:17, 18.

Gipadapat ni apostol Pedro kining tagnaa ngadto kang Jesu-Kristo sa dihang siya miingon: “Si Moises miingon, ‘si Jehova nga Diyos magapatindog alang kaninyo ug usa ka manalagna nga gikan sa inyong kaigsoonan nga sama kanako. Kinahanglang magapatalinghog gayod kamo kaniya sumala sa tanang mga butang igasulti niya kaninyo.’” (Buhat 3:22) Sa pagkamatuod, si Jesus mismo miingon: “Kon kamo nagtuo kang Moises angay nga motuo kamo kanako, kay siya misulat mahitungod kanako.” (Juan 5:46) Diha sa unsang mga paagi nga si Jesus ug Moises managsama?

Managsama sa Ilang Unang mga Karera

Si Moises ug Jesus nakalingkawas sa pagpatay sa bata pa kaayong mga anak nga lalaki. Ang batang si Moises gitagoan diha sa mga tangbo sa mga daplin sa Subang Nilo ug busa nakalingkawas sa pagpatay sa Israelinhong mga batang lalaki sumala sa gimando ni Paraon sa Ehipto. Sa bata pa, si Jesus usab nakalingkawas sa pagpatay sa mga batang lalaki nga may panuigong hangtod sa dos anyos sa Bethlehem ug sa mga distrito niini. Kini nga pagpatay gimando ni Haring si Herodes nga Bantogan, kinsa, sama kang Paraon, maoy usa ka kaaway sa Diyos ug sa Iyang katawhan.​—Exodo 1:22–​2:10; Mateo 2:13-18.

Ang malumong-kinaiya, o maaghop, mao ang espiritu nga gipakita ni Moises ug Jesus. Bisag siya gipadako ingong usa ka anak nga lalaki sa panimalay sa usa ka gamhanang hari sa Ehipto, si Moises mao ang “labing mapainubsanon sa tanang mga tawo sa ibabaw sa yuta.” (Numeros 12:3) Ikatandi, si Jesus nakaalagad ingong gamhanang prinsipe nga si Miguel sa langit apan mapaubsanong mianhi sa yuta. (Daniel 10:13; Filipos 2:5-8) Dugang pa, si Jesus naluoy sa katawhan ug nakaingon: “Isangon ninyo ang akong yugo diha kaninyo ug pagtuon kamo gikan kanako, kay ako malumog-kinaiya ug mapaubsanon sa kasingkasing, ug kamo makakaplag kapahulayan sa inyong mga kalag.”​—Mateo 11:29; 14:14.

Alang sa pag-alagad kang Jehova, gitalikdan ni Moises ug Jesus ang prominenting mga posisyon ug dakong bahandi. Aron makaalagad kang Jehova ug sa Iyang katawhan, gitalikdan ni Moises ang mga bahandi ug halangdong dapit sa Ehipto. (Hebreohanon 11:24-26) Sa susama, gibiyaan ni Jesus ang hamili kaayong posisyon ug mga bahandi sa langit aron sa pag-alagad sa Diyos ug sa Iyang katawhan sa yuta.​—2 Corinto 8:9.

Si Moises ug Jesus nahimong mga dinihogan sa Diyos. Ang manalagnang Moises nag-alagad ingong dinihogang usa ngadto sa nasod sa Israel. Sama sa giingon ni apostol Pablo, si Moises “nag-isip sa pasipala sa [pagkahimong] Kristo [Usa nga dinihogan] ingong bahandi nga labaw pa kay sa mga bahandi sa Ehipto.” (Hebreohanon 11:26; Exodo 3:1–​4:17) Kanus-a nahimong Kristo si Jesus, o Usa nga dinihogan? Kini nahitabo sa dihang siya gidihogan sa balaang espiritu sa Diyos, o aktibong gahom, sa dihang gibawtismohan. Diha sa Samarianhong babaye sa atabay ni Jacob sa Sicar ug atubangan sa hataas nga saserdote sa Israel sa dihang gihusay, gipamatud-an ni Jesus nga siya ang Mesiyas, o ang Kristo.​—Marcos 14:61, 62; Juan 4:25-26.

Si Moises ug Jesus nagpuasa sulod sa 40 ka adlaw. Sayo pa sa iyang karera ingong tigpamaba sa Diyos, si Moises nagpuasa sulod sa 40 ka adlaw samtang didto sa bukid sa Sinai. (Exodo 34:28) Si Jesus nagpuasa sulod sa 40 ka adlaw sa kamingawan ug unya gisuklan ang tintasyon ni Satanas sayo pa sa iyang karera ingong gisaad nga Mesiyas.​—Mateo 4:1-11.

Silang Duha Naghimaya Kang Jehova

Gigamit ni Jehova si Moises ug Jesus sa pagbayaw sa Iyang balaang ngalan. Gisugo sa Diyos si Moises sa pag-adto sa mga Israelinhon sa ngalan ‘ni Jehova ang Diyos sa ilang mga amahan.’ (Exodo 3:13-16) Si Moises naghawas sa Diyos atubangan kang Paraon, kinsa gipapadayong buhi aron ang gahom ni Jehova ikapasundayag ug ang Iyang ngalan madeklarar sa tibuok nga yuta. (Exodo 9:16) Si Jesus usab mianhi sa ngalan ni Jehova. Pananglitan, si Kristo miingon: “Ako mianhi sa ngalan sa akong Amahan, apan kamo wala modawat kanako.” (Juan 5:43) Gihimaya ni Jesus ang iyang Amahan, gipaila ang ngalan ni Jehova ngadto sa mga tawong gihatag sa Diyos kaniya, ug gipaila kini sa yuta.​—Juan 17:4, 6, 26.

Pinaagi sa balaang gahom, si Moises ug Jesus mihimog mga milagro nga nagahimaya sa Diyos. Si Moises mihimog mga milagro aron pamatud-an nga siya gisugo ni Jehova nga Diyos. (Exodo 4:1-31) Sa tibuok niyang karera, si Moises, nga gigamit sa Diyos sa pagbahin sa Pulang Dagat, nagpadayon sa paghimog mga milagro nga naghimaya kang Jehova nga Diyos. (Exodo 5:1–​12:36; 14:21-31; 16:11-18; 17:5-7; Salmo 78:12-54) Sa susama, si Jesus naghimaya sa Diyos pinaagi sa paghimog daghang milagro. Daghan gayod ang samang mga kahimtang nga si Jesus nakaingon: “Tuohi ako ninyo nga ako nahiusa sa Amahan ug nga ang Amahan nahiusa kanako; o, kondili man, tuohi ako ninyo tungod sa maong mga buhat.” (Juan 14:11) Lakip sa iyang mga milagro mao ang pagpalurang sa mapintas nga unos, aron molinaw ang Dagat sa Galilea.​—Marcos 4:35-41; Lucas 7:18-23.

Ubang Hinungdanong mga Kaamgiran

Si Moises ug Jesus nalangkit uban sa milagrosong pagkataganang pagkaon. Si Moises maoy propeta ni Jehova sa dihang gitagana ang milagrosong pagkaon sa mga Israelinhon. (Exodo 16:11-36) Sa susama, sa duha ka okasyon sa rekord sa Bibliya, milagrosong gipakaon ni Jesus ang panon sa mga tawo sa materyal nga pagkaon.​—Mateo 14:14-21; 15:32-38.

Ang tinapay nga gikan sa langit gilangkit uban sa pag-alagad ni Moises ug Jesus. Si Moises maoy nanguna sa mga Israelinhon sa dihang sila gihatagan ug tinapay gikan sa langit, pagaingnon pa. (Exodo 16:11-27; Numeros 11:4-9; Salmo 78:25) Sa kaamgid apan hinungdanon kaayo nga paagi, gitagana ni Jesus ang iyang kaugalingong lawas ingong tinapay nga gikan sa langit alang sa kinabuhi sa masinugtanong katawhan.​—Juan 6:48-51.

Giagak ni Moises ug Jesus ang katawhan gikan sa kaulipnan ngadto sa kagawasan. Gigamit sa Diyos si Moises sa pag-agak sa mga Israelinhon gikan sa pagkaulipon sa mga Ehiptohanon ngadto sa kagawasan ingong Iyang katawhan. (Exodo 12:37-42) Sa susama, si Jesu-Kristo maoy nagaagak sa iyang mga sumusunod ngadto sa kagawasan. Si Kristo magatultol pa sa masinugtanong katawhan ngadto sa kagawasan gikan sa pagkaulipon sa organisasyon ni Satanas nga Yawa, ug sa sala ug kamatayon.​—1 Corinto 15:24-26; Colosas 1:13; 1 Juan 5:19.

Si Moises ug Jesus nahimong tigpataliwala sa mga pakigtugon. Si Moises mao ang tigpataliwala sa pakigtugon sa Kasugoan, tali kang Jehova nga Diyos ug sa mga Israelinhon. (Exodo 19:3-9) Si Jesus maoy tigpataliwala sa bag-ong pakigtugon, tali sa Diyos ug sa espirituwal nga Israel.​—Jeremias 31:31-34; Lucas 22:20; Hebreohanon 8:6-13.

Ang pagpanghukom gitugyan kang Moises ug kang Jesu-Kristo. Si Moises nag-alagad ingong maghuhukom ug maghahatag ug balaod sa unodnong Israel. (Exodo 18:13; Malaquias 4:4) Si Jesus nagaalagad ingong maghuhukom ug nagahatag sa espirituwal nga “Israel sa Diyos” ug mga balaod niini ug mga kasugoan. (Galacia 6:16; Juan 15:10) Si Kristo mismo miingon: “Ang Amahan dili magahukom kang bisan kinsa, hinunoa ang tanang pagpanghukom gitugyan niya ngadto sa Anak, aron ang tanang tawo magapasidungog sa Anak maingon sa ilang pagpasidungog sa Amahan. Ang wala magpasidungog sa Anak wala magpasidungog sa Amahan nga maoy nagpadala kaniya.”​—Juan 5:22, 23.

Si Moises ug Jesus gisaligan sa pagdumala ibabaw sa panimalay sa Diyos. Si Moises matinumanon ingong ulo ibabaw sa panimalay sa Diyos sa karaang Israel. (Numeros 12:7) Ikatandi, si Jesus gihimong Ulo sa espirituwal nga balay sa mga anak ni Jehova ug napamatud-ang matinumanon ibabaw niana. Sa pagkamatuod, si Jesus “matinumanon ngadto sa Usa nga nagtudlo kaniya, maingon nga si Moises usab nagmatinumanon diha sa tibuok balay nianang Usa. Ang naulahi naisip nga labaw pa ug himaya kay kang Moises, maingon nga ang magtutukod sa balay labaw pa ug dungog kay sa balay. . . . Si Moises ingon nga sulogoon matinumanon diha sa tibuok balay sa Usa sa pagpamatuod labot sa mga butang nga sa ulahi iyang igapamulong, apan si Kristo matinumanon ingong Anak ibabaw sa balay sa maong Usa. Kita ang balay nianang Usa, kon atong huptang malig-on ang atong kagawasan sa pagpanulti ug ang atong pagpasigarbo sa paglaom hangtod sa kataposan.”​—Hebreohanon 3:2-6.

Bisan hangtod sa kamatayon, si Moises ug Jesus managsama. Sa unsang paagi? Buweno, gikuha ni Jehova ang lawas ni Moises, sa ingon nagpugong sa mga tawo sa pagpasipala, o sa pagsimba niini. (Deuteronomio 34:5, 6; Judas 9) Sa susama, gikuha sa Diyos ang lawas ni Jesus, wala magtugot nga kini makaagi ug pagkadunot ug busa nagpugong nga mahimong kapangdolan kini sa pagtuo.​—Salmo 16:10; Buhat 2:29-31; 1 Corinto 15:50.

Hatagig Pagtagad ang Tagna

Kini maoy mga paagi diin si Jesu-Kristo namatud-ang usa ka manalagna nga sama kang Moises. Pagkakahibulongan ang mga pulong sa Diyos ngadto kang Moises mahitungod sa pag-abot sa maong propeta nga natuman!

Walay duhaduha nga gituman ni Jehova ang iyang matagnaong saad sa pagpatindog ug usa ka propeta nga sama kang Moises. Ang mga pulong sa Deuteronomio 18:18 natuman diha sa kinabuhi ug mga kasinatian ni Jesu-Kristo. Ug ang maong katumanan naghatag kanato ug katarongan sa pagsalig sa laing matagnaong mga bahin sa Pulong sa Diyos. Busa, hatagan nato ug pagtagad kanunay ang tagna sa Bibliya.