LEKSIYON 21
Sa Unsang Paagi Gisangyaw ang Maayong Balita?
Pinaagi sa Gingharian ni Jehova, wagtangon niya sa di madugay ang tanan natong problema. Maayo kaayo na nga balita nga kinahanglang mahibaloan sa tanan. Gusto ni Jesus nga kini nga mensahe isangyaw sa iyang mga sumusunod ngadto sa tanan! (Mateo 28:19, 20) Sa unsang paagi gituman sa mga Saksi ni Jehova ang sugo ni Jesus?
1. Sa unsang paagi nagakatuman karon ang Mateo 24:14?
Si Jesus nagtagna: “Kining maayong balita sa Gingharian isangyaw sa tibuok yuta.” (Mateo 24:14) Ang mga Saksi ni Jehova malipayong nakigbahin niining importanteng buluhaton. Gisangyaw namo ang maayong balita sa tibuok kalibotan diha sa kapig 1,000 ka pinulongan! Kining dako kaayong buluhaton nagkinahanglag dakong paningkamot ug kinahanglang himoon sa organisadong paagi. Dili ni mahimo kon wala ang tabang ni Jehova.
2. Unsang paningkamot ang among ginahimo aron masangyawan ang mga tawo?
Mosangyaw mi bisan asa nga naay tawo. Sama sa mga Kristohanon sa unang siglo, mosangyaw mi “sa balay ug balay.” (Buhat 5:42) Tungod niining sistematiko nga paagi, minilyong tawo ang among masangyawan kada tuig. Kay ang mga tawo dili pirmeng maabtan sa balay, mosangyaw pod mi sa daghang publikong lugar. Kanunay ming mangitag kahigayonan nga isulti sa uban ang bahin kang Jehova ug sa iyang katuyoan.
3. Kang kinsang responsibilidad ang pagsangyaw sa maayong balita?
Responsibilidad sa tanang Kristohanon nga isangyaw ang maayong balita ngadto sa uban. Giisip namo nga seryoso ni nga responsibilidad. Mosangyaw mi kutob sa among maarangan kay nahibalo mi nga makaluwas ni sa kinabuhi sa mga tawo. (Basaha ang 1 Timoteo 4:16.) Wala mi suweldohi niini nga buluhaton, kay ang Bibliya nag-ingon: “Kamo nakadawat nga walay bayad, panghatag nga walay bayad.” (Mateo 10:7, 8) Dili tanan ang modawat sa among mensahe. Pero mopadayon mi sa pagsangyaw kay bahin ni sa among pagsimba ug makapalipay ni kang Jehova.
TUN-IG DUGANG
Sayrag dugang ang bahin sa paningkamot sa mga Saksi ni Jehova sa pagsangyaw sa tibuok kalibotan, ug tan-awa kon giunsa mi pagtabang ni Jehova.
Pagsangyaw sa tibuok kalibotan: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Kami naningkamot nga masangyawan ang tanang tawo
Ang mga Saksi ni Jehova naningkamot pag-ayo nga isangyaw ang maayong balita ngadto sa mga tawo bisan asa pa sila. I-play ang VIDEO, ug dayon hisgoti ang mosunod nga pangutana:
Unsay ganahan nimo sa paningkamot sa mga Saksi ni Jehova sa pagsangyaw?
Basaha ang Mateo 22:39 ug Roma 10:13-15, ug dayon hisgoti kini nga mga pangutana:
Nganong ang among ministeryo nagpakita nga gihigugma namo ang among isigkatawo?
Unsay pagbati ni Jehova niadtong nagsangyaw sa maayong balita?—Tan-awa ang bersikulo 15.
5. Kami mga isigkamagbubuhat sa Diyos
Gipakita sa daghang eksperyensiya nga gigiyahan ni Jehova ang among buluhaton. Pananglitan, usa ka hapon didto sa New Zealand, naestorya sa brader nga si Paul ang usa ka babaye samtang namalaybalay. Sa buntag nianang adlawa, ang babaye nag-ampo gamit ang ngalan sa Diyos nga Jehova ug mihangyo siya nga naa untay moduaw niya. Si Paul miingon: “Paglabay sa tulo ka oras, ako miabot sa iyang balay.”
Basaha ang 1 Corinto 3:9, ug dayon hisgoti kini nga pangutana:
Sa unsang paagi ang mga eksperyensiya nga sama nianang sa New Zealand nagpakita nga gigiyahan ni Jehova ang buluhatong pagsangyaw?
Basaha ang Buhat 1:8, ug dayon hisgoti kini nga pangutana:
Nganong gikinahanglan namo ang tabang ni Jehova sa paghimo sa among ministeryo?
Nahibalo ba ka?
Kada semana sa among midweek nga tigom, makadawat mig pagbansay nga makatabang namo sa pagsangyaw. Kon nakatambong na ka sa usa niini nga mga tigom, unsay imong ikasulti niini nga pagbansay?
6. Kami nagtuman sa sugo sa Diyos nga mosangyaw
Sa unang siglo, ang mga magsusupak naningkamot nga pugngan ang mga sumusunod ni Jesus sa pagsangyaw. Gidepensahan sa unang mga Kristohanon ang ilang katungod sa “pagsangyaw sa maayong balita sa legal nga paagi.” (Filipos 1:7) Kana pod ang ginahimo sa mga Saksi ni Jehova karon.a
Basaha ang Buhat 5:27-42, ug dayon hisgoti kini nga pangutana:
Nganong dili mi mohunong sa pagsangyaw?—Tan-awa ang bersikulo 29, 38, ug 39.
KON NAAY MANGUTANA: “Nganong ang mga Saksi ni Jehova mosangyaw sa balay ug balay?”
Unsay imong itubag?
SUMARYO
Gisugo ni Jesus ang iyang mga sumusunod nga isangyaw ang maayong balita ngadto sa tanang kanasoran. Gitabangan ni Jehova ang iyang katawhan sa paghimo niini nga buluhaton.
Review
Sa unsang paagi ang maayong balita gisangyaw sa tibuok kalibotan?
Sa unsang paagi ang among ministeryo nagpakita nga gihigugma namo ang among isigkatawo?
Sa imong hunahuna, makapalipay ba ang buluhatong pagsangyaw? Ngano?
SUSIHA
Tan-awa kon sa unsang paagi ang mga Saksi ni Jehova nagsangyaw diha sa dagkong siyudad.
Unsay gihimo sa mga Saksi ni Jehova aron tabangan ang mga bakwet?
Pagtagana sa Espirituwal nga Panginahanglan sa mga Bakwet (5:59)
Tan-awa kon nganong malipayon ang usa nga naggamit sa iyang kinabuhi para sa buluhatong pagsangyaw.
Sayra ang bahin sa dagkong kadaogan sa korte nga nakatabang sa pagsangyaw sa maayong balita.
“Mga Magwawali sa Gingharian Midangop sa Hukmanan” (Gingharian sa Diyos Nagmando Na!, kapitulo 13)
a Ang Diyos ang nagsugo namo nga himoon ang among ministeryo. Busa ang mga Saksi ni Jehova wala magkinahanglag permiso gikan sa tawhanong mga awtoridad sa pagsangyaw sa maayong balita.