Ika-127 nga Graduwasyon sa Gilead

Mga Misyonaryo Gipadala “sa Kinalay-ang Dapit sa Yuta”

GISUGO ni Jesus ang iyang mga tinun-an nga mahimong mga saksi hangtod “sa kinalay-ang dapit sa yuta.” (Buhat 1:8) Gituman gayod sa mga Saksi ni Jehova kanang sugoa.

Gani, sa kapin nag 65 ka tuig, ang mga misyonaryo nga gibansay sa Watchtower Bible School of Gilead dakog natabang sa pagpalampos sa buluhatong pagsangyaw sa kapig 200 ka kayutaan. Sa Sabado, Septiyembre 12, 2009, laing 56 ka eksperyensiyadong ministro ang migraduwar human sa lima ka bulang pagbansay sa misyonaryong tunghaan didto sa Patterson, New York, U.S.A.

Ang Gahom sa Imahinasyon

Si Stephen Lett, usa ka membro sa Nagamandong Lawas sa mga Saksi ni Jehova ug tsirman sa programa sa graduwasyon, naghisgot sa temang “Gamitang Maalamon ang Imong Imahinasyon.” Una, iyang gipasidan-an ang mga graduwado sa upat ka sayop nga paagi sa paggamit sa imahinasyon. Ang unang tulo mao: (1) Dili sila maghunahuna nga ang materyal nga mga butang makahatag ug tinuod nga proteksiyon; (2) dili sila maghanduraw sa imoral nga mga buhat; ug (3) likayan ang sobrang kabalaka, nga maghunahuna kon unsa kaha ka lisod ang mga kahimtang sa umaabot. (Proverbio 18:11; Mateo 5:28; 6:34) Maylabot sa ikatulong punto, ang mamumulong miingon nga tiponon sa tawong sobra ka mabalak-on ang mga kabalaka sa miagi ug sa umaabot uban sa presenteng mga kabalaka. “Bug-at kaayo kanang pas-anon,” matod pa ni Brader Lett. Unsa ang ikaupat? Ang mga misyonaryo gipasidan-an nga dili maghanduraw nga mas maayo ang kahimtang sa ilang kinabuhi sa wala pa sila mahimong misyonaryo. Kini makapawala sa ilang kalipay diha sa ilang asaynment.

Dayon gidasig ni Brader Lett ang mga misyonaryo sa paggamit sa ilang imahinasyon sa upat ka positibong paagi. Siya miingon: (1) Hunahunaa daan ang mga situwasyon nga magpahinabog espirituwal o pisikal nga kadaot, ug likayi kana; (2) handurawa ang mga kahimtang nga imong mabasa sa Bibliya, nga daw atua ka didto; (3) isipa ang matag tawo nga imong makaestorya diha sa imong bag-ong asaynment ingong potensiyal nga magsisimba ni Jehova; ug (4) ugmara ang pagkamabination pinaagi sa paghanduraw nga ikaw anaa sa kahimtang niadtong imong gisangyawan.—Proverbio 22:3.

Hinungdanon ang Pagbansay sa Uban

Si David Splane, usa ka membro sa Nagamandong Lawas, nagpakigpulong sa temang “Kining mga Butanga Ipiyal sa Matinumanong mga Tawo,” nga gipasukad sa 2 Timoteo 2:2. Sa dihang gisugo ni apostol Pablo si Timoteo nga bansayon ang matinumanong mga lalaki, ang tuyo ni Pablo mao nga si Timoteo dili lamang magtudlo kanila bahin sa kamatuoran kondili magdasig usab kanila sa pagbansay sa uban. Giingnan sa mamumulong ang mga misyonaryo nga dunay dakong panginahanglan sa mga lalaki nga maoy manguna sa Kristohanong mga buluhaton. Kanus-a ug sa unsang paagi sila bansayon? Si Brader Splane nag-agda sa mga misyonaryo sa pagbansay kanila sukad gayod sa pagsugod sa pagtuon sa Bibliya uban kanila.

Sa unsang paagi mabansay sa mga misyonaryo ang mga estudyante sa Bibliya aron mahimong maayong panig-ingnan sa uban? Ang mamumulong naghisgot ug pipila ka paagi. Angayng bansayon sila sa mga misyonaryo sa pagpangandam pag-ayo sa pagtuon sa Bibliya. Dayon, sa dihang mosugod na silag tambong sa mga tigom sa kongregasyon, sila kinahanglang tudloan kon unsaon pag-andam ang binase-sa-Bibliya nga mga tun-anan nga hisgotan sa mga tigom. “Kon ang usa dili makamaong motuon sa Bibliya,” matod pa sa mamumulong, “dili gayod siya makahimo sa pagtudlo sa uban.” Si Brader Splane miingon usab nga angayng bansayon sa mga misyonaryo ang mga bag-ohan sa pag-abot ug sayo alang sa Kristohanong mga kalihokan, sa pagsuportar sa pagsangyaw pinaagig pag-amot ug salapi, ug sa pagsunod niadtong mga nagapanguna. Siya miingon nga ang labing maayong paagi sa pagtudlo niini mao ang pagpakitag maayong panig-ingnan.

Pribilehiyo nga Mahimong mga Saksi

Si Guy Pierce, nga membro usab sa Nagamandong Lawas, mihisgot sa tema nga gipasukad sa mga pulong ni Jesus nga natala sa Buhat 1:8, “Kamo Mahimong Akong mga Saksi.” Iyang gipahinumdoman ang mga misyonaryo nga sa unang siglo C.E., ang nasod sa Israel nawad-an sa pribilehiyo nga mahimong mga saksi ni Jehova. Kana nga pribilehiyo gihatag ngadto sa nasod nga nagpatunghag mga bunga sa Gingharian. (Mateo 21:43) Kanang nasora napamatud-an nga mao ang kongregasyon sa dinihogang mga Kristohanon. Ang mamumulong mikutlo kang apostol Pedro kinsa miingon nga ang “balaang nasod” sa dinihogang mga Kristohanon ‘kaylap nga mopahayag’ sa mga kahamili ni Jehova. (1 Pedro 2:6-9) Busa si Jesus wala moingon nga ang mga Kristohanon maoy mga saksi lamang niya ug dili na mga saksi ni Jehova. Gani, si Jesus gitawag nga “ang Matinumanong Saksi.” (Pinadayag 1:5; 3:14) Siya mao ang kinalabwang Saksi ni Jehova ug ang ehemplo nga atong ginasunod.—1 Pedro 2:21.

Sa atong panahon, matod pa sa mamumulong, ang mga pulong ni Jesus sa Buhat 1:8 dunay mas dakong kahulogan. Ngano? Tungod kay ang hinungdanong tagna nga narekord sa Pinadayag 11:15 natuman. Ang Mesiyanikong Gingharian sa Diyos natukod na. Karon, aktuwal nang gihimo ang buluhatong pagpanaksi hangtod “sa kinalay-ang dapit sa yuta.” (Buhat 1:8) Gipasiugda ni Brader Pierce nga ang mga misyonaryo mohatag ug pamatuod bahin kang Jehova ug sa iyang Gingharian, dili sa ilang kaugalingon o sa ilang kanhing kahimtang sa kinabuhi, kultura, ug nasod. Iyang gidasig sila nga tudloan “ang daghan kutob sa maarangan sulod sa nahibiling panahon.”

Uban Pang mga Bahin sa Programa

Si Alex Reinmueller, usa ka kaabag sa Publishing Committee, mihisgot sa temang “Si Jehova Maghimo Kaninyong Maisogon.” Siya miingon nga kon ang mga misyonaryo mosalig sa gahom ni Jehova, Iyang tabangan sila sa pag-ila sa ilang mga katakos, pagdawat sa ilang mga kahuyangan, pagbuntog sa ilang mga gikahadlokan, ug sa paghatag sa Diyos sa ilang kinamaayohan.

Duha sa mga instruktor sa Theocratic Schools Department, si Sam Roberson ug William Samuelson, mihatag usab ug pakigpulong. Si Brader Roberson mihisgot sa ulohang “Ako Uban Kanimo,” nga gipasukad sa Isaias 41:10. Siya miingon nga ang mga misyonaryo makatagamtam ug daghang kalipay. Apan sila usab makasinatig mga problema. Sila makalahutay kon ilang sundogon si Haring David kinsa mituaw sa iyang mahigugmaong Amahan diha sa pag-ampo. (Salmo 34:4, 6, 17, 19) Ang pakigpulong ni Brader Samuelson nagpasiugda sa panginahanglan nga padayong ugmaron ang katakos sa panghunahuna. Kon maugmad kana sa mga misyonaryo, ilang malikayan ang negatibong reaksiyon sa dihang makadungog silag masakit nga mga pulong ug sila dili daling masilo.—Proverbio 2:10, 11.

Si Jim Mantz, usa ka kaabag sa Writing Committee, miinterbiyo ug usa ka membro sa Branch Committee sa Republika sa Georgia ug ingon man gikan sa Honduras, ug sa usa ka membro sa Country Committee sa Republika sa Tajikistan. Kining eksperyensiyadong mga igsoon mihatag ug tambag sa mga misyonaryo kon unsaon sa pagpakighigala sa lagmit masinupakon nga mga tawo pinaagi sa ‘pagdaog sa daotan pinaagi sa maayo.’ (Roma 12:21) Si Mark Noumair, laing instruktor sa klase, nagdumala sa usa ka bibo nga panaghisgot bahin sa kasinatian sa mga estudyante sa ilang pagsangyaw samtang nagtungha sa Gilead. Ang maong bahin adunay makapukaw sa hunahuna nga ulohan, “Aduna ba Koy Ikatabang?”

Gitapos sa tsirman ang programa pinaagi sa pagkutlo sa liriko sa bag-ong awit nga “Tan-awa Dihang ang Tanan Bag-o Na.” Ang 6,509 nga mitambong namauli nga mas determinado nga magpamatuod bahin kang Jehova ug sa iyang Anak hangtod “sa kinalay-ang dapit sa yuta.”

[Chart/Mapa sa panid 31]

ESTADISTIKA SA KLASE

8 nasod nga gihawasan

56 mga estudyante

28 mga magtiayon

33.6 aberids nga edad

18.3 aberids nga katuigan sa kamatuoran

13.6 aberids nga katuigan sa bug-os panahong pag-alagad

[Mapa]

(Alang sa aktuwal nga pagkahan-ay, tan-awa ang publikasyon)

Ang mga misyonaryo giasayn sa 22 ka nasod nga gipakita sa ubos

MGA NASOD DIIN GIASAYN ANG MGA MISYONARYO

JAMAICA

NICARAGUA

COSTA RICA

PANAMA

PERU

CHILE

HAITI

CURAÇAO

GUYANA

CÔTE D’IVOIRE

BOLIVIA

PARAGUAY

SERBIA

ALBANIA

CONGO, DEM. REP.

MOLDOVA

UGANDA

BURUNDI

TANZANIA

MOZAMBIQUE

NEPAL

CAMBODIA

[Hulagway sa panid 31]

Ika-127 nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.

(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.

(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.

(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.

(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.

(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.

(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.