Pagpadayon Paghupot sa Panag-uyon Tali sa mga Ansiano ug Ministeryal nga mga Alagad

WALA magdugay human sa Pentekostes 33 K.P., mitungha ang usa ka emerhensiya diha sa bag-ong natukod nga Kristohanong kongregasyon. Ang kahikayan gihimo sa pag-atiman sa nanginahanglang mga babayeng balo. Apan wala magdugay “may nahitabong pagbagulbol sa kabahin sa mga Gregog-sinultihang mga Hudiyo batok sa nagasultig-Hebreo nga mga Hudiyo, tungod kay ang ilang mga babayeng balo nataligam-an man sa adlaw-adlaw nga pagpang-apod-apod.”​—Buhat 6:1.

Kini nga mga pagbagulbol nakaabot sa mga dalunggan sa mga apostoles. “Busa ang napulog-duha nagtawag sa panon sa mga tinun-an ngadto kanila ug miingon: ‘Dili makapahimuot alang kanamo nga biyaan ang pulong sa Diyos aron mag-apod-apod ug pagkaon nganha sa mga lamesa. Busa, mga igsoon, pangita alang sa inyong kaugalingon ug pito ka napanghimatud-ang mga lalaki taliwala kaninyo, nga puno sa espiritu ug kaalam, aron among ikatudlo sila ibabaw niining gikinahanglang atimanonon.’”​—Buhat 6:2, 3.

Kini nagailustrar sa usa ka hinungdanong prinsipyo sa organisasyon sulod sa Kristohanong kongregasyon. Giatiman sa pipila ka may-kaakohang mga lalaki ang naandang mga butang, samtang giatiman sa uban ang mas mabug-at nga mga butang maylabot sa espirituwal. Kini dili kay walay pasikaranan. Sa karaang Israel, si Aaron ug ang iyang mga kaliwat gitudlo sa pag-alagad ingong mga saserdote aron sa pagtanyag ug mga halad ngadto sa Diyos. Apan, gisugo ni Jehova ang mga Levihanon sa pagtabang kanila pinaagi ‘sa pag-atiman sa tanang galamiton sa balong-balong nga pagatigoman.’ (Numeros 3:5-10) Sa susama, ang mga magtatan-aw karong adlawa ginatabangan sa ministeryal nga mga alagad.

Ang Papel sa mga Ansiano ug Ministeryal nga mga Alagad

Ang Kasulatan naglatid ug hataas nga mga kuwalipikasyon alang sa mga ansiano ug ministeryal nga mga alagad. (1 Timoteo 3:1-10, 12, 13; Tito 1:6-9) Sila dili mga kaindig kondili nagabuhat sa samang tumong​—ang pagpalig-on sa kongregasyon. (Itandi ang Efeso 4:11-13.) Bisan pa, adunay pila ka kalainan sa buluhaton nga ilang ginabuhat diha sa kongregasyon. Diha sa 1 Pedro 5:2, ang mga magtatan-aw gisultihan: “Magpastol kamo sa panon sa Diyos nga anaa sa inyong pag-atiman, dili sa pinugos, apan sa kinabubut-on; ni tungod sa gugma sa limbong nga kinitaan, kondili sa pagkamaikagon.” Sila maoy manubag sa Diyos kon sa unsang paagi ilang ginatuman kining balaang katungdanan.​—Hebreohanon 13:17.

Unsay ikasulti bahin sa ministeryal nga mga alagad? Wala kinahanglana sa Kasulatan nga sila sama ka kuwalipikado sa ilang katakos sa pagtudlo. Ang ilang katungdanan may pagkalahi gikan nianang sa mga ansiano. Sa unang siglo K.P., tino nga dihay daghang materyal, rotina, o mekanikal nga mga butang nga nagkinahanglag pagtagad, tingali lakip ang pagpalit ug mga gamit sa pagkopya sa Kasulatan o bisan sa pagkopya mismo niana.

Karong adlawa, ang ministeryal nga mga alagad padayong nagabuhat ug nagkadaiyang hinungdanong mga buluhaton sulod sa kongregasyon, sama sa pag-atiman sa kuwenta sa kongregasyon ug sa mga teritoryo, sa pag-apod-apod sa mga magasin ug mga libro, ug sa pagmentinar sa Kingdom Hall. Ang pipila ka ministeryal nga mga alagad kinsa adunay katakos mahimong gamiton gani sa pagtudlo, usahay sa pagdumala sa mga Pagtuon sa Kongregasyon sa Libro, pagdumala sa mga bahin sa mga Tigom sa Pag-alagad, ug sa paghatag ug mga pakigpulong publiko.

Kon ang mga ansiano ug ministeryal nga mga alagad hiusang magabuhat nga may panag-uyon, ang mga panginahanglan sa kongregasyon​—sa espirituwal ug sa organisasyonal​—maatiman sa timbang nga paagi. Sa ingon ang mga membro sa kongregasyon magmalipayon, malig-on, ug mabungahon sa espirituwal. Hinumdomi ang gisulat ni Pablo ngadto sa mga dinihogan sa Efeso: “Kay takdo nga pagkadugtong ug gipanagtambayayongay pinaagi sa matag lutahan nga nagahatag sa kon unsa ang gikinahanglan, sumala sa paglihok sa matag usa ka sangkap sa angay nga sukod, nagapatubo sa lawas alang sa pagpalig-on sa kaugalingon niini diha sa gugma.”​—Efeso 4:16.

Ang mga ansiano ug ministeryal nga mga alagad kinahanglang maningkamot sa pag-ugmad sa samang panag-uyonay, sa ato pa, pagsinabtanay, panagkaangay, kooperasyon, ug panaghiusa. Ugaling, ang maong panag-uyonay dili moabot nga awtomatiko. Kini kinahanglang pagaugmaron ug ampingan pag-ayo.

Kon Unsay Mahimo sa mga Ansiano

Usa ka hinungdanong lakang mao ang pag-ila nga ang relasyon sa usa ka ansiano ug ministeryal nga alagad dili sama nianang sa usa ka agalon ngadto sa usa ka ulipon o sa usa ka amo ngadto sa usa ka trabahante. Kon adunay tinuod nga panag-uyonay, lantawon sa mga ansiano ang ministeryal nga mga alagad ingong isigka-ministro sa Diyos. (Itandi ang 1 Corinto 3:6-9.) “Sa pagpakitag pasidungog sa usag usa manguna,” nag-ingon ang Roma 12:10. Busa likayan sa mga ansiano ang pagtratar sa ministeryal nga mga alagad nga daw menos o ubos. Sila nagadasig, imbes nagapaluya, sa maayong buhat nga nahimo. Ang matinahorong pagtratar sa ministeryal nga mga alagad mopalambo sa labing maayong mga hiyas nga anaa kanila ug makatabang kanila sa pagkalipay sa ilang buluhaton diha sa kongregasyon.

Kinahanglang isilsil usab sa hunahuna sa mga ansiano nga ang ilang buluhaton sa pagbantay sa panon sa Diyos nga gisalig diha kanila nagalakip sa mga igsoong lalaki nga nagaalagad ingong ministeryal nga mga alagad. Matuod, ang maong responsableng mga lalaki ginalaoman nga hamtong nga mga Kristohanon. Bisan pa, sama sa uban diha sa panon, sila nagkinahanglag personal nga pagtagad sa matag karon ug unya. Ang mga ansiano kinahanglang magpakita gayod ug dulot nga kaikag sa ilang espirituwal nga kaugmaran.

Pananglitan, sa dihang nahibalag ni apostol Pablo ang batan-ong si Timoteo, iyang nasabtan dayon ang natagong katakos ni Timoteo ug ‘mipahayag sa tinguha alang niining tawhana nga ikauban niya.’ (Buhat 16:3) Si Timoteo nag-alagad ingong kauban sa biyahe ni Pablo, nga nakadawat sa hinungdanong pagbansay ingong resulta. Ngani, sa paglabay sa mga tuig si Pablo nakasulat sa mga Kristohanon sa Corinto: “Akong gipadala si Timoteo nganha kaninyo, ingong siya ang akong hinigugma ug kasaligang anak diha sa Ginoo; ug iyang ibutang sa inyong hunahuna ang akong mga pamaagi may kalabotan kang Kristo Jesus”!​—1 Corinto 4:17.

Mga ansiano, gisugdan na ba ninyo paggamit ang bug-os natagong katakos sa ministeryal nga mga alagad diha sa inyong kongregasyon? Ginatabangan ba ninyo sila nga mouswag pinaagi sa paghatag kanila ug personal nga pagbansay diha sa pakigpulong publiko ug sa pagpanukiduki sa Bibliya? Nadapit na ba ninyo ang may mga katakos sa pag-uban kaninyo sa mga pagduaw isip mga magbalantay? Nakig-uban ba kamo kanila diha sa pag-alagad sa kanataran? Diha sa sambingay ni Jesus bahin sa mga talento, gisultihan sa agalon ang iyang matinumanong mga alagad: “Maayong pagkabuhat, maayo ug kasaligan nga ulipon!” (Mateo 25:23) Kamo ba usab madagayaon sa inyong pagdayeg ug komendasyon ngadto sa ministeryal nga mga alagad kinsa sa kamapaubsanon nagatuman sa ilang tinudlong mga buluhaton sa maayong paagi? (Itandi ang Proverbio 3:27.) Kon wala, gibati ba nila nga ang ilang buluhaton wala pabilhi?

Ang komunikasyon sa ingon hinungdanon sa pag-alagad nga may malinawong relasyon. (Itandi ang Proverbio 15:22.) Ang mga buluhaton dili angayng itudlo ni kuhaon sa binuotbuot o dinalidali nga paagi. Kinahanglang mainampoong hisgotan sa mga ansiano kon sa unsang paagi ang katakos sa usa ka igsoong lalaki magamit sa labing maayong paagi diha sa kongregasyon. (Itandi ang Mateo 25:15.) Kon adunay itudlo nga buluhaton, ang usa ka igsoong lalaki kinahanglang bug-os tudloan kon unsa gayoy gikinahanglan kaniya. “Kon walay binatid nga pagtultol,” nagpasidaan ang Proverbio 11:14, “ang mga tawo mangapukan.”

Dili maayong sultihan lamang ang usa ka igsoon sa pagdumala sa departamento sa kuwenta, sa mga magasin, o sa literatura gikan sa laing alagad. Usahay ang usa ka bag-ong tinudlo nga alagad makapanunod ug daghang dili-tukma o dili-kompletong mga rekord. Pagkamakapaluya! “Ipahinabo ang tanang butang nga may kahapsay ug pinaagig kahikayan,” nagsugo ang 1 Corinto 14:40. Ang mga ansiano ang kinahanglang maoy mohimog lakang sa pagbansay sa mga igsoong lalaki, tudloan sila sa mga pamaagi sa kongregasyon ug magpakita ug panig-ingnan mismo sa pagsunod sa mga pamaagi. Pananglitan, hikayon sa mga ansiano nga maawdit ang kuwenta sa kongregasyon matag tulo ka bulan. Ang pagkalimot sa maong hinungdanong kahikayan mohatag ug mga suliran ug magdaot sa pagtahod sa ministeryal nga mga alagad alang sa mga instruksiyon sa organisasyon.

Apan komosta kon ang usa ka igsoong lalaki daw mapasagaron sa pagdumala sa partikular nga asaynment? Imbes magdali sa pagtangtang kaniya sa iyang asaynment, kinahanglang pakigsultihan siya sa mga ansiano bahin sa maong mga butang. Tingali ang suliran maoy kulang lang sa pagbansay. Kon ang igsoon padayong naglisod sa pagdumala sa iyang asaynment, tingali mas maayo ang mahimo niya sa laing asaynment.

Ang mga ansiano makapalambo usab sa panag-uyonay pinaagi sa pagpakitag pagkamapainubsanon. Ang Filipos 2:3 nagdasig sa mga Kristohanon nga “dili magabuhat ug unsa man tungod sa pagkamatigion o tungod sa pagpakaimportante sa kaugalingon, hinuon uban sa pagpaubos sa hunahuna magaisip nga ang uban labaw kay kaninyo.” Sa ingon ang usa ka ansiano maningkamot sa pagkooperar kon itudlo siya sa usa ka atendant sa paglingkod diha sa usa ka dapit diha sa tigomanan, dili mangatarongan nga tungod kay siya ansiano, siya dili kinahanglang mosunod. Tingali ang atendant yanong nagtuman lamang sa sugyot sa paglingkod diha sa nagkalainlaing seksiyon sa tigomanan, hinuon angay niyang hinumdoman nga walay lagda nga ang tanan kinahanglang mobuhat niana.a Ang ansiano maglikay sa wala kinahanglanang pagsupak sa mga desisyon labot sa mga butang nga gikatudlo na ngadto sa usa ka ministeryal nga alagad.

Ministeryal nga mga Alagad Nagabuhat Alang sa Panag-uyon

“Ang ministeryal nga mga alagad sa sama usab angay nga magmaugdang,” matud ni Pablo. (1 Timoteo 3:8) Ang ilang maugdang nga paglantaw sa mga asaynment​—ingong bahin sa ilang balaang pag-alagad—​dakog mahimo sa pagsanta sa mga tensiyon nga motungha. Kon ikaw usa ka ministeryal nga alagad, ginabuhat mo ba ang imong mga buluhaton nga may kadasig? (Roma 12:7, 8) Ginasunod mo ba ang mga instruksiyon aron mahimong batid sa pagdumala sa imong mga buluhaton? Ikaw ba kasaligan ug kapiyalan? Nagapakita ka ba ug mainandamong espiritu kon bahin sa mga asaynment? Usa ka ministeryal nga alagad diha sa usa ka nasod sa Aprika nagadumalag tulo ka nagkalainlaing asaynment sa kongregasyon. Unsa ang iyang tinamdan? “Aw, kini yanong nagpasabot ug dugang nga pagkugi,” matud niya, “ug ang pagkugi dili makamatay nimo.” Sa pagkatinuod, kadtong kinsa nagahatag sa ilang kaugalingon makatagamtam sa labing dakong kalipay.​—Buhat 20:35.

Dako usab ang imong mahimo sa pagpalambo sa panag-uyon pinaagi sa bug-os nga pakigtambayayong sa mga ansiano. “Magmasinugtanon kamo kanilang nagapanguna taliwala kaninyo ug magmapinasakopon,” nag-ingon ang Hebreohanon 13:17, “kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.” Matuod, ang mga ansiano maoy mga tawong dili-hingpit, ug tingali sayon lang ang pagkakitag sayop kanila. Bisan pa ang hinawayon nga tinamdan mopatunghag kawalay pagsalig. Makadaot kini sa imong kalipay ug makaapekto kini sa uban diha sa kongregasyon. Busa si apostol Pedro naghatag niining tambaga: “Kamong bata-bata nga mga lalaki, magpasakop kamo sa gulang-gulang nga mga lalaki. Apan baksi ninyong tanan ang inyong kaugalingon sa pagkamapaubsanon sa hunahuna ngadto sa usag usa . . . Busa, ipaubos ang inyong kaugalingon ilalom sa gamhanang kamot sa Diyos, aron nga iya kamong bayawon sa takdang panahon.”​—1 Pedro 5:5, 6.

Ang maong tambag ilabinang tukma kon gibati nimo nga gilaktawan ka sa mga pribilehiyo sa pag-alagad. Tingali ikaw “nagapangab-ot sa katungdanan sa pagkamagtatan-aw,” apan wala pay pagtudlo ang gihimo. (1 Timoteo 3:1) Ang pagpaubos sa hunahuna motabang kanimo sa paghupot sa “usa ka mahulatong tinamdan.” (Lamentaciones 3:24) Inay kay mobatig kayugot sa mga ansiano​—nga tinong makadaot sa imong maayong relasyon—​pangutan-a sila kon aduna bay mga dapit nga ikaw makahimog pagpauswag. Ang imong tiunay nga pagkamainandamon sa pagdawat ug pagpadapat sa tambag sa walay duhaduha makita ingong pamatuod sa espirituwal nga pag-uswag.

Ang diyosnong pagpaubos ug pagkamakasaranganon makatabang sa usa ka ministeryal nga alagad nga makapabiling timbang kon siya may talagsaong mga katakos o edukasyonal ug sosyal nga mga bentaha. Basin dakong tentasyon alang kaniya ang pagsulay sa pagpalabaw sa mga ansiano o magpakuhag pagtagad sa iyang kaugalingong mga katakos! Ang Proverbio 11:2 nagpahinumdom kanato nga “ang kaalam nagauban sa mga mapainubsanon.” Ang usa ka mapainubsanong igsoon nahibalo sa iyang mga limitasyon. Siya andam nga magtrabaho sa hilom ug sa paggamit sa iyang mga katakos sa pagpaluyo sa mga ansiano. Ang pagkamakasaranganon motabang usab kaniya sa pagkaamgo nga samtang siya tingali daghag nahibaloan sa kalibotanong paagi, siya hayan kulang gihapon sa hinungdanong mga bahin sa espirituwal nga kaalam ug pagsabot​—mga hiyas nga tingali nanglabaw ang mga ansiano.​—1 Corinto 1:26–2:13; Filipos 1:9.

Tin-aw, ang mga ansiano ug ministeryal nga mga alagad adunay hinungdanong mga katungdanan. Sa tingob sila dakog mahimo sa pagpalig-on sa tanan diha sa kongregasyon. Apan aron mahimo kana, sila kinahanglang hiusang magabuhat nga may panag-uyon, “uban ang bug-os nga pagpaubos sa hunahuna ug kalumo, uban ang taas-nga-pailob, nga mag-inantosay sa usag usa diha sa gugma, matinuorong magapanlimbasog nga mosunod sa pagkausa sa espiritu diha sa nagahiusang bugkos sa pakigdait.”​—Efeso 4:2, 3.

[Footnote]

[Hulagway sa panid 27]

Lantawon sa mga ansiano ang ministeryal nga mga alagad, dili ingong ubos, kondili ingong isigka-ministro sa Diyos