BETFAGE

[gikan sa Heb., lagmit nagkahulogang “Balay sa Sayo nga mga Igos”].

Gihisgotan ang Betfage diha sa asoy sa pagpaingon ni Jesus sa Jerusalem ug ingong dapit nga didto gisugo ni Jesus ang iyang mga tinun-an sa pagkuha ug asno nga iyang kasakyan panahon sa iyang madaogong pagsulod sa Jerusalem niadtong Nisan 9 sa tuig 33 K.P. (Mat 21:​1, 2; Mar 11:​1, 2; Luc 19:​29, 30) Ang mga reperensiya nagpakita nga kini nahimutang sa ibabaw sa Bukid sa mga Olibo, duol sa Jerusalem, ug duol usab sa Betania. Bisan tuod giisip sa pipila nga ang Betfage nahimutang sa tabok sa lugot dapit sa HS sa Betania diha sa presenteng-adlaw nga Abu Dis, ang naandang dapit nga gituohang nahimutangan niini maoy tali sa Betania ug Jerusalem didto sa et-Tur, sa HS nga bakilid sa Bukid sa mga Olibo. Gikan niining dapita, kini duol ra sa usa sa mga tayuktok sa Bukid sa mga Olibo. Kon molugsong gikan didto, tatawng makita sa usa ang tibuok siyudad sa Jerusalem.​—Itandi ang Luc 19:​37, 41.

Ang mga paghisgot sa Talmud bahin sa Betfage nagpakita nga kini gituohang nahimutang sa utlanan sa gilatid nga dapit sa igpapahulay palibot sa siyudad sa Jerusalem.​—Babilonyanhong Talmud, Menahot 78b; itandi ang Buh 1:​12, ftn sa Rbi8.