Nahibalag ni Saulo ang Iyang Kanhing mga Higala ug mga Kaaway

SI Saulo, nga sa ulahi nailhang si apostol Pablo, medyo nahadlok sa pagbalik sa Jerusalem sa unang higayon sukad nga siya nahimong Kristohanon.a Tulo ka tuig kanhi, siya mibiya sa siyudad nga nanghulga gayod sa pagpatay sa mga tinun-an ni Jesus. Siya gimandoan sa pagdakop ni bisan kinsang Kristohanon nga iyang makaplagan sa Damasco.—Buhat 9:1, 2; Galacia 1:18.

Sa dihang siya nahimong Kristohanon, si Saulo maisogong nagpahayag sa iyang pagtuo sa nabanhaw nga Mesiyas. Tungod niadto, gusto siyang patyon sa mga Hudiyo sa Damasco. (Buhat 9:19-25) Makadahom kaha siya nga mahinangop ang iyang kanhing Hudiyong mga higala sa Jerusalem? Apan ang mas hinungdanon kang Saulo mao ang pagpakigkita sa mga sumusunod ni Kristo sa Jerusalem. Dili kadto sayon.

“Sa pag-abot sa Jerusalem naningkamot siya nga moduyog sa mga tinun-an; apan silang tanan nangahadlok kaniya, tungod kay wala man sila motuo nga siya usa ka tinun-an.” (Buhat 9:26) Imong masabot kana kay ilang nailhan siya nga usa ka bangis nga maglulutos kaniadto. Ang iyang pangangkon nga siya Kristohanon basig panglansis lamang aron daoton ang kongregasyon. Busa gilikayan siya sa mga Kristohanon sa Jerusalem.

Apan dihay mitabang kang Saulo. Ang Bibliya nag-ingon nga gidala ni Bernabe ang maglulutos kanhi “ngadto sa mga apostoles,” nga lagmit nagtumong kang Pedro (Cefas) ug Santiago, ang igsoon sa Ginoo, nga nagpahibalo kanila bahin sa pagkahimong Kristohanon ug sa pagsangyaw ni Saulo didto sa Damasco. (Buhat 9:27; Galacia 1:18, 19) Wala na masulat kon nganong si Bernabe misalig kang Saulo. Kaila kaha sila mao nga si Bernabe misukitsukit kang Saulo aron pamatud-an ang iyang pagkasinsero? May mga kaila ba si Bernabe nga mga Kristohanon sa Damasco mao nga iyang nahibaloan ang pagbag-o ni Saulo? Bisan unsa pay kahimtang, nahanaw ang tanang katahap bahin kang Saulo tungod kang Bernabe. Human niadto, si Saulo miestar uban kang apostol Pedro sulod sa 15 ka adlaw.

Kinse ka Adlaw Uban Kang Pedro

Si Jesus direktang nagtudlo kang Saulo busa di na kinahanglang awtorisahan pa siyag mga tawo, sama sa iyang gipasiugda sa mga taga-Galacia. (Galacia 1:11, 12) Apan sa walay duhaduha nasabtan ni Saulo nga hinungdanong siya mahibalo pag-ayo bahin sa ministeryo ni Jesus. Ang iyang pag-estar uban kang Pedro maghatag kaniyag igong kahigayonan sa paghimo niana. (Lucas 24:12; 1 Corinto 15:3-8) Lagmit nga si Saulo daghag gipangutana kang Pedro ug Santiago, ug lagmit nga sila nangutana usab kang Saulo bahin sa iyang panan-awon ug sa sugo nga iyang nadawat ingong ministro.

Sa Unsang Paagi si Saulo Naluwas Gikan sa Kanhi Niyang mga Higala?

Si Esteban gitawag nga unang Kristohanong martir. Kadtong gikalalis kanhi ni Esteban mao ang mga sakop sa “Sinagoga sa mga Tawong Gipagawas, ug sa mga taga-Cirene ug mga taga-Alejandria ug sa mga taga-Cilicia ug Asia.” Niadtong higayona si Saulo “nakiglantugi sa nagsultig-Grego nga mga Hudiyo,” nga maisogong nagsangyaw kanila. Ang ilang sanong? Buot nila siyang patyon.—Buhat 6:9; 9:28, 29.

Siyempre gusto gayod unta ni Saulo nga isaysay kanila ang dakong kausaban sa iyang kinabuhi ug tudloan ang kanhi niyang mga higala bahin sa Mesiyas. Apan ang maong mga Hudiyo nga nagsultig Grego nasuko pag-ayo kaniya nga ilang giisip siya nga usa ka traydor.

Nasabtan kaha ni Saulo kon unsa ka peligroso ang iyang kahimtang? Atong mabasa nga samtang siya nag-ampo didto sa templo, siya napunawan ug iyang nakita si Jesus nga miingon kaniya: “Magdali ka ug gula dayon sa Jerusalem, tungod kay sila dili mouyon sa imong ipamatuod mahitungod kanako.” Si Saulo mitubag: “Ginoo, sila nahibalo pag-ayo nga sa matag sinagoga akong gipangbilanggo ug gipamunalan ang mga nanagpanuo kanimo; ug sa dihang giula ang dugo ni Esteban nga imong saksi, ako usab nagbarog sa duol ug miuyon.”—Buhat 22:17-20.

Gisabot sa uban nga ang tubag ni Saulo nagpasabot nga siya nahibalo sa kapeligrohan. Ang uban naghunahuna nga siya miingon: ‘Maglulutos ako kaniadto, ug sila nahibalo niana. Siyempre dili nila yagayagaan ang akong pagkahimong Kristohanon. Basig matabangan pa nako sila.’ Bisan pa niana, si Jesus nahibalo nga kadtong mga Hudiyoha dili gayod manumbaling sa pamatuod sa usa ka tawo nga giisip nilang apostata. Iyang giingnan si Saulo: “Lakaw, tungod kay ipadala ko ikaw ngadto sa kanasoran sa halayo.”—Buhat 22:21, 22.

Sa dihang naamgohan sa iyang kaubang mga Kristohanon ang kapeligrohan, ila dayong gihatod si Saulo ngadto sa pantalan sa Cesarea ug gipagikan siya paingon sa Tarso, ang siyudad niyang natawhan nga biyaheon pag 500 kilometros. (Buhat 9:30) Milabay una ang daghang katuigan ayha pa mibalik si Saulo sa Jerusalem.

Ang maong dinaliang pagbiya nakapanalipod sa Kristohanong kongregasyon. Mameligro gayod unta sila kon wala pa mobiya ang kanhing maglulutos. Sa pagbiya ni Saulo, “ang kongregasyon sa tibuok nga Judea ug Galilea ug Samaria nakabaton ug yugto sa kalinaw, nga napalig-on; ug samtang kini naglakaw diha sa kahadlok kang Jehova ug diha sa paghupay sa balaang espiritu kini padayong midaghan.”—Buhat 9:31.

Mga Leksiyon Bahin sa Pagkamabinantayon

Mahimong adunay mga kahimtang usab karon nga sama sa unang siglo nga kita kinahanglang magbantay. Dili man tingali maayong magmatahapon na lang gayod kita sa mga estranghero. Apan, usahay dunay mga tawong daotag hunahuna nga gustong mopahimulos sa katawhan ni Jehova, aron sila makasapi o di ba kaha aron ilang daoton ang kongregasyon. Busa magmabinantayon kita aron dili mabiktima sa mga panglimbong sa mga impostor.—Proverbio 3:27; 2 Timoteo 3:13.

Ang panghunahuna ni Saulo bahin sa iyang pagsangyaw sa Jerusalem nagpadayag ug laing kahimtang nga ang mga Kristohanon mahimong magmabinantayon. Ang pagsangyaw sa tinong mga lugar o sa pipila ka tawo, lakip na sa kanhing mga higala, mahimong peligroso sa pisikal, sa espirituwal, o kaha sa moral. Mas maayo gayod nga managana, nga magmapilion sa oras ug dapit.—Proverbio 22:3; Mateo 10:16.

Makasalig kita nga ang maayong balita sa Gingharian sa Diyos ikasangyaw sa dili pa matapos kining daotang sistema. Pagkamaayong panig-ingnan ang gipakita ni Saulo bahin niini, “nga nagsulti nga maisogon sa ngalan sa Ginoo” bisan sa iyang kanhing mga higala ug mga kaaway!—Buhat 9:28.

[Footnote]

[Hulagway sa panid 16]

Sa iyang pag-abot sa Jerusalem, maisogong gisangyawan ni Saulo ang mga Hudiyo nga nagsultig Grego