DORCAS
[Gasela].
Usa ka Kristohanong babaye sa kongregasyon sa Jope nga tugob sa “maayong mga buhat ug mga gasa sa kaluoy,” nga dayag nga lakip niini ang paghimog pang-ilalom ug panggawas nga mga besti alang sa kabos nga mga babayeng balo. (Buh 9:36, 39) Ang “Dorcas” maoy katumbas sa Aramaikong “Tabitha,” ug kining duha ka ngalan parehong nagkahulogang “Gasela.” Lagmit si Dorcas nailhan niining duha ka ngalan, kay kasagaran kaniadto sa mga Hudiyo, ilabina niadtong nagpuyo duol sa usa ka dunggoanan sama sa Jope nga may nagkasagol nga populasyon sa mga Hudiyo ug mga Hentil, ang pagbaton ug usa ka Hebreohanong ngalan ingon man Grego o Latin nga ngalan. O, lagmit gihubad ni Lucas ang maong ngalan alang sa kaayohan sa Hentil nga mga magbabasa. Si Dorcas lamang ang babaye nga gihisgotan sa Kasulatan nga gigamitan ug feminine nga porma sa pulong nga “tinun-an.” Apan, kini wala magkahulogan nga siya nakabaton ug linaing katungdanan sa kongregasyon, kay sa pagkatinuod ang tanang Kristohanon maoy mga tinun-an ni Jesu-Kristo. (Mat 28:19, 20) Sa pagkamatay ni Dorcas niadtong 36 K.P. hilabihang nagbangotan ang mga babayeng balo nga hayan nakapahimulos gayod sa iyang pagkamaluloton, apan sanglit wala man hisgoti nga adunay bana nga nagmasulub-on, kini nagpakita nga si Dorcas dili minyo niadtong panahona.
Sa iyang pagkamatay ang mga tinun-an sa Jope nag-andam kaniya alang sa paglubong ug, sa pagkahibalo nga si Pedro didto sa Lida, mga 18 km (11 mi) sa HS sa Jope, ilang gipasugoan siya. Walay duhaduha nga sila nakadungog bahin sa pag-ayo didto ni Pedro sa paralisado nga si Eneas, ug kini lagmit ang naghatag kanila ug pasukaranan sa paghunahuna nga tingali mabanhaw sa apostol si Dorcas. Sa laing bahin, sila tingali midangop lamang kang Pedro alang sa paghupay.—Buh 9:32-38.
Sa pagsunod sa pamaagi sama niadtong gihimo ni Jesus sa pagbanhaw sa anak nga babaye ni Jairo (Mar 5:38-41; Luc 8:51-55), si Pedro, human nagpagawas sa tanan gikan sa itaas nga lawak, miampo ug dayon miingon: “Tabitha, bangon!” Gibuka ni Dorcas ang iyang mga mata, milingkod, ug migunit sa kamot ni Pedro aron motindog. Kini ang unang gitaho nga pagkabanhaw nga gibuhat sa usa ka apostol, nga misangpot sa daghan nga nahimong mga magtutuo sa tibuok Jope.—Buh 9:39-42.