ITALYANHONG PUNDOK

Usa ka yunit sa Romanhong kasundalohan nga niana si Cornelio sa Cesarea nag-alagad ingong senturyon. Sa bugtong paghisgot niini sa Bibliya, si Cornelio giingong “usa ka opisyal sa kasundalohan sa Italyanhong pundok, ingon sa pagtawag niini.” (Buh 10:1) Lagmit usa kini ka dibisyon nga ginganlan niana aron mapalahi gikan sa regular nga Romanhong mga lehiyon. Ang usa ka dibisyon nga bug-os ang puwersa gilangkoban ug mga 600 ka sundalo, buot ingnon, mga ikanapulong bahin sa gidak-on sa usa ka lehiyon. Ingon sa gipasabot sa ngalan niini, kini nga dibisyon lagmit gilangkoban sa mga boluntaryo nga natigom didto sa Italya, nga nakabaton ug Romanong pagkalungsoranon sukad sa pagkatawo o kaha ingong mga tawong gipagawas.

Ang kasulatan wala mag-ingon nga kining Italyanhong pundok gipapuwesto sa Cesarea. Kini nag-ingon lamang nga si Cornelio, nga usa sa mga opisyal sa kasundalohan niini, may balay didto sa Cesarea.​—Buh 10:​1, 2, 22, 24.

Si Cornelio, nga tinong usa ka Italyano ug opisyal sa kasundalohan sa “Italyanhong pundok,” adunay balay sa Cesarea. (Buh 10:1) Didto sa Cesarea nga si Pablo, sa iyang husay atubangan ni Festo, miapelar sa iyang kaso ngadto kang Cesar. Unya gidala siya sa usa ka sakayan paingon sa Mira, diin kauban sa ubang mga binilanggo, siya gibalhin ngadto sa usa ka sakayan nga kargahanag mga lugas gikan sa Alejandria nga milawig paingon sa Italya. (Buh 25:​6, 11, 12; 27:​1, 5, 6) Tungod sa pagkalunod, sila nagpalabay sa tingtugnaw didto sa pulo sa Malta. Unya lagmit nga sa tingpamulak sa 59 K.P., si Pablo unang mitaak sa yuta sa Italya didto sa Regio sa samag “tudlo sa tiil” sa Italya, ug wala madugay human niadto siya mikawas sa Puteoli sa Luok sa Pozzuoli (Naples). Dinhi, kapin sa 160 km (100 mi) sa H sa Roma, si Pablo miestar ug usa ka semana sa lokal nga kongregasyon una pa mopadayon ngadto sa Roma agi sa Apyanhong Dalan, nga diha niana, “sa Tiyanggihan sa Apio ug sa Tulo ka Abotanan,” siya gisugat sa mga igsoon gikan sa Roma. (Buh 28:11-16) Lagmit sa naghinapos ang unang pagkabilanggo ni Pablo didto sa Roma, o wala madugay human siya makagawas niadtong mga 61 K.P., iyang gisulat ang basahon sa Mga Hebreohanon samtang didto pa sa Italya.​—Heb 13:24.