Nahibalo Ka Ba?

Duna bay linaing kahulogan ang pag-estar ni apostol Pedro sa usa ka magtitinag-panit sa wala pa siya paadtoa kang Cornelio?

▪ Ang asoy sa Buhat nag-ingon nga si Pedro nagpabilin ‘sulod sa ubay-ubayng mga adlaw sa Jope uban sa usa ka tawong ginganlag Simon, nga usa ka magtitinag-panit,’ nga may “balay daplin sa dagat.” (Buhat 9:43; 10:6) Alang sa mga Hudiyo, ang trabaho sa usa ka magtitinag-panit giisip nga mahugaw ug talamayon. Sa Talmud, giisip ang mga magtitinag-panit nga mas hugaw pa kay sa mga tigkolektag kinalibang. Tungod sa trabaho ni Simon siya kanunayng makahikap sa patayng mga hayop, maong siya kanunayng anaa sa seremonyal nga kahugawan. (Levitico 5:2; 11:39) Sumala sa ubang mga reperensiya, si Simon tingali migamit ug tubig sa dagat sa iyang pagtina, ug ang iyang tinaanan nahimutang sa gawas sa lungsod kay “baho nga proseso” ang pagtina.

Bisan pa niini, tatawng wala magpanuko si Pedro sa pag-estar sa balay ni Simon. Kini nagpakita nga, sama kang Jesus una pa niini, wala usab uyoni ni Pedro ang pagpihig nga gihimo sa mga Hudiyo sa mga tawong giisip nga mahugaw.—Mateo 9:11; Lucas 7:36-50.

Unsa ang kahulogan sa mga pulong ni Jesus nga “ikaw mismo ang nag-ingon niini”?

▪ Sa dihang si Jesus gipatug-an ni Caifas, ang hataas nga saserdote sa mga Hudiyo, kon siya mao ba ang Kristo nga Anak sa Diyos, siya mitubag: “Ikaw mismo ang nag-ingon niini.” (Mateo 26:63, 64) Unsay iyang gipasabot?

Wala maglikay si Jesus sa pangutana ni Caifas. Ang mga pulong nga “ikaw mismo ang nag-ingon niini” mopatim-awng usa ka komon nga panultihon sa mga Hudiyo nga tinuod ang usa ka pahayag. Pananglitan, ang Talmud sa Jerusalem, usa ka relihiyosong basahon nga nahipos sa ikaupat nga siglo C.E., naghisgot bahin sa tubag sa usa ka tawong gisukna kon ang usa ba ka rabbi namatay: “Ikaw mismo nag-ingon niini.” Kini maoy pamatuod nga tinuod nga namatay ang rabbi.

Giila ni Jesus ang awtoridad sa hataas nga saserdote sa pagpanumpa kaniya sa pagsulti sa kamatuoran. Dugang pa, kon siya magpabiling maghilom, kini mahimong sabton nga siya milimod nga siya mao ang Kristo. Busa ang tubag ni Jesus nga “Ikaw mismo ang nag-ingon niini” maoy apirmatibong tubag ngadto sa hataas nga saserdote. Sa samang asoy ni Marcos, sa dihang siya direktang gihagit ni Caifas sa pagtug-an kon Siya mao ba ang Mesiyas, si Jesus maisogong mitubag: “Ako mao.”—Marcos 14:62; tan-awa usab ang Mateo 26:25 ug Marcos 15:2.

[Hulagway sa panid 18]

Usa ka tinaanan sa Fez, Morocco