JESE

[pinamubo sa Isias, nga nagkahulogang “Kalimtan ni Jehova”; o, lagmit, usa ka pinamubo sa Abisai].

Amahan ni Haring David sa tribo ni Juda; apo ni Ruth ug Boaz ug usa ka dugtong sa linya sa mga kagikan gikan kang Abraham hangtod kang Jesus. (Ru 4:​17, 22; Mat 1:​5, 6; Luc 3:​31, 32) Si Jese nanganak ug walo ka anak nga lalaki, nga ang usa lagmit namatay nga wala pay anak, maoy hinungdan nga wala na iapil ang iyang ngalan sa mga talaan sa kagikan diha sa Mga Cronicas. (1Sa 16:​10, 11; 17:12; 1Cr 2:12-15) Ang duha ka igsoong babaye ni David nga si Abigail ug Zeruia wala gayod tawga nga mga anak nga babaye ni Jese, apan ang usa gitawag nga “anak nga babaye ni Nahas.” (1Cr 2:​16, 17; 2Sa 17:25) Lagmit si Nahas maoy bana kanhi sa asawa ni Jese, nga naghimo sa iyang mga anak nga babaye nga igsoon sa inahan sa mga anak nga lalaki ni Jese, gawas kon ang Nahas maoy laing ngalan ni Jese, o kaha ngalan sa iyang asawa, ingon sa gipahayag sa uban.

Si Jese maoy tag-iyag mga karnero nga nagpuyo sa Betlehem. Human motalikod si Haring Saul gikan sa matuod nga pagsimba, gipadala ni Jehova si Samuel ngadto sa balay ni Jese aron dihogan ang usa sa iyang mga anak nga lalaki ingong hari. Gitawag ni Jese ang iyang pito ka anak nga lalaki, apan sa dihang walay gipili si Jehova kanila napugos si Jese sa pagtawag sa iyang kamanghorang anak nga si David gikan sa pagpasibsib sa mga karnero; kini nga anak ang gipili ni Jehova.​—1Sa 16:1-13.

Sa dihang gipatawag ni Saul si David aron sa pagpatokar sa makapahupayng tugtog sa alpa alang kaniya, ang tigulang nga si Jese nagpadala ug daghang gasa ug sa ulahi nagtugot kang David nga magpabilin ug pipila ka panahon sa pag-alagad sa palasyo ni Saul. (1Sa 16:17-23; 17:12) Sa ulahi, sa dihang mipatim-aw nga si David nahibalik na usab sa pag-atiman sa mga karnero, gisugo siya ni Jese sa pagdalag mga pagkaon alang sa iyang tulo ka kamagulangang mga anak nga lalaki, nga kauban sa kasundalohan ni Saul. (1Sa 17:​13, 15, 17, 18, 20) Sa panahong si David ginukod ni Saul, si Jese ug ang iyang asawa gipapuyo sa Moab.​—1Sa 22:​3, 4.

Si David sagad gitawag nga “anak ni Jese” sa matamayong paagi sa mga tawong sama ni Saul, Doeg, Nabal, ug Sheba (1Sa 20:​27, 30, 31; 22:7-9, 13; 25:10; 2Sa 20:1; 1Ha 12:16; 2Cr 10:16), apan sa ubang mga higayon sa mas matinahorong paagi, pananglitan, ni David mismo, Esdras, ug ni Jehova nga Diyos.​—1Sa 16:18; 17:58; 2Sa 23:1; 1Cr 10:14; 12:18; 29:26; Sal 72:20; Luc 3:32; Buh 13:22.

Ang matagnaong saad nga ang “gamot ni Jese” “mobarog ingon nga usa ka timaan alang sa mga katawhan” ug maghukom sa pagkamatarong natuman diha kang Kristo Jesus, ang usa kinsa, tungod kay siya walay kamatayon, naghupot nga buhi sa linya sa mga kagikan ni Jese.​—Isa 11:1-5, 10; Rom 15:​8, 12.