Pagpabili sa Atong mga Igsoon
“Uban sa dili-salingkapaw inigsoong pagbati . . . , maghigugmaay kamo sa usag usa nga mainiton gikan sa kasingkasing.”—1 PEDRO 1:22.
1. Unsay nakapatuo sa daghang tawo nga ang mga Saksi ni Jehova nagatuman sa matuod nga Kristiyanidad?
ANG gugma mao ang timaan sa matuod nga Kristiyanidad. Panahon sa kataposang pangaon nga gikaon ni Jesus uban sa iyang mga apostoles, kini iyang gipasiugda, nga miingon: “Ako nagahatag kaninyo sa usa ka bag-ong sugo, nga kamo maghigugmaay sa usag usa; maingon nga ako nahigugma kaninyo, nga kamo maghigugmaay usab sa usag usa. Pinaagi niini ang tanan mahibalo nga kamo akong mga tonun-an, kon kamo may gugma sa inyong taliwala.” (Juan 13:34, 35) Daghang tawo unang nakatuo nga ginatuman sa mga Saksi ni Jehova ang matuod nga Kristiyanidad sa dihang mitambong silag usa ka tigom sa Kingdom Hall o sa dakodakong asembliya. Napanid-an nila ang gugma nga naglihok, ug tungod niadto sila nahibalong sila diha sa taliwala sa matuod nga mga tinun-an ni Kristo.
2. Unsay giingon ni apostol Pablo kon bahin sa gugma, ang linaing timaan sa Kristiyanidad?
2 Kitang tanan nagakalipay nga kining linaing timaan sa tinuod nga Kristiyanidad makita taliwala sa katawhan ni Jehova karong adlawa. Bisan pa niana, sama sa unang mga Kristohanon, atong naamgohan nga angay natong pangitaon kanunay ang dugang mga paagi sa pagpakitag pagpabili sa atong mga igsoon. Si Pablo misulat ngadto sa kongregasyon sa Tesalonica: “Hinaot nag Ginoo magapatubo, oo, magapadagaya kaninyo, sa gugma sa usag usa..” (1 Tesalonica 3:12) Sa unsang paagi kita makapatubo sa atong gugma sa usag usa?
Gugma ug Inigsoong Pagbati
3. Gawas pa sa pagkinabuhig hinlong kinabuhi, unsay giingon ni apostol Pedro nga kinahanglanon sa mga Kristohanon?
3 Sa usa ka katibuk-ang sulat nga gitumong sa Kristohanong mga kongregasyon sa Asia Minor, si apostol Pedro misulat: “Karon nga inyong giputli ang inyong mga kalag [o, mga kinabuhi] pinaagi sa inyong pagkamasinugtanon sa kamatuoran uban sa dili-salingkapaw nga inigsoong pagbati [phi·la·del·phiʹa] ingon ang sangpotanan, maghigugmaay [dagway sa a·ga·paʹo] sa usag usa nga mainiton gikan sa kasingkasing.” (1 Pedro 1:22) Gipakita ni Pedro nga dili igo nga atong putlion ang atong mga kinabuhi. Ang atong pagkamasinugtanon sa kamatuoran, apil sa bag-ong sugo, angay mosangpot sa dili-salingkapaw nga inigsoong pagbati ug mainitong gugma sa usag usa.
4. Unsang mga pangutana ang angay natong isukna, ug unsay giingon ni Jesus bahin niini?
4 Ang atong gugma ug pagpabili sa atong mga igsoon lagmit bang ipahayag lamang ngadto niadtong atong maangayan? Makiling ba kitang magmahinatagon kanila, nga piyongon ang atong mga mata sa ilang mga kahuyangan, samtang daling makamatikod sa mga sayop ug kahuyangan sa uban nga dili nato kaangayan? Si Jesus miingon: “Kon kamo mahigugma [dagway sa a·ga·paʹo] niadtong nahigugma kaninyo, unsang balos ang inyong maangkon? Dili ba ang mga maniningil ug buhis nagahimo usab sa ingon?”—Mateo 5:46.
5. Unsang kalainan ang ginahimo sa usa ka eskolar sa Bibliya tali sa Gregong pulong nga nagkahulogang “gugma” ug nianang nagkahulogang “pagbati”?
5 Sa iyang librong New Testament Words, si Propesor William Barclay nagapahayag sa mosunod nga mga komento bahin sa Gregong pulong nga gihubad “pagbati” ug nianang gihubad nga “gugma”: “Adunay nindot nga kainit bahin niining mga pulonga [phi·liʹa, nga nagkahulogang “pagbati,” ug ang may-kalabotan nga berbong phi·leʹo]. Kana nagkahulogan sa pag-isip sa usa uban ang mabinationg pagtagad. . . . Sa pagkakaron ang labing kasagarang B[ag-ong] T[estamento] nga mga pulong alang sa gugma mao ang nombreng agapē ug ang berbong agapan. . . . Ang philia maoy nindot nga pulong, apan kadto tinong usa ka pulong sa kainit ug kasuod ug pagbati. . . . Ang agapē may kalabotan hunahuan: kini dili lamang sa emosyonal nga motunghang kinaiyanhon sa atong mga kasingkasin; kini usa ka prinsipyo nga sa tinuyo atong ginasunod. Ang agapē labaw nga may kalabotan sa kabubut-on. Kini usa ka pagpukan, usa ka kadaogan, ug kahimoan. Walay kinaiyanhong nahigugma sa iyang mga kaaway. Ang paghigugma sa mga kaaway sa usa maoy usa ka pagpukan sa tanan natong kinaiyanhong hilig ug mga emosyon. Kining agapē . . . sa pagkamatuod mao ang gahom sa paghigugma sa dili hiligugmaon, sa paghigugma sa mga tawo nga dili nato maangayan.”
6. (a) Unsang mausisaong mga pangutana ang angay natong isukna sa atong kaugalingon? (b) Sumala ni Pedro, nganong kita dili makalimite sa atong inigsoong pagbato niadtong kinaiyanhong makadani kanato?
6 Sa pasumangil nga gitugot sa Kasulatan nga kita magbatog mas mainitong mga pagbati alang sa pila ka igsoon kay sa alang sa uban, makiling ba kita sa pagpakamatarong sa atong mga pagbati? (Juan 19:26; 20:2) Kita ba nagahunahuna nga makapahayag kitag mabugnaw, gihatag-katarongan nga “gugma” alang sa pipila tungod kay obligado kita, samtang atong itagana ang mainiton inigsoong pagbati alang niadtong makadani kanato? Kon mao, atong nasayloan ang punto sa tambag ni Pedro. Wala kita makaputli nga igo sa atong mga kalag pinaagi sa atong pagkamasinugtanon sa kamatuoran, kay si Pedro nagaingon: “Karon nga pinaagi sa pagkamasinugtanon sa kamatuoran inyong giputli ang inyong mga kalag hangtod nga mobati kamog tim-os nga pagbati ngadto sa inyong igsoong mga Kristohanon, maghigugmaay kamo sa usag usa nga bug-os kasingkasing uban sa tanan ninyong kusog.”—1 Pedro 1:22, The New English Bible.
“Dili-Salingkapaw Inigsoong Pagbati”
7, 8. Unsa ang sinugdanan sa pulong gihubad nga “dili-salingkapaw,” busa nganong gigamit ni Pedro kini nga pulong?
7 Si apostol Pedro milapaw pa. Siya miingon nga ang atong inigsoong pagbati kinahanglang dili salingkapaw. Ang pulong gihubad nga “dili-salingkapaw” nagagikan sa negatibong dagway sa usa ka Gregong pulong nga gigamit alang sa mga aktor sa entablado nga nagsulting tinabonag maskara ang ilang mga nawong. Kadto nakapaarang nila sa pagdula sa daghang lainlaing karakter panahon sa usa ka dula. Busa ang pulong nagbaton sa masambingayong pagbati sa kasalingkapaw, pagtakoban, o pagpakaaron-ingnon.
8 Sa atong kahiladman sa atong mga kasingkasing unsay atong pagbati sa pipila sa mga igsoong lalaki ug mga babaye sa kongregasyon? Gitimbaya ba nato sila panahon sa mga tigom uban sa pinugos nga pahiyom, nga modali sa paglingiw o molakaw dayon? Labi pang daotan, gisulayan ba nato ang paglikay nga timbayaon sila? Kon mao, unsay ikaingon sa atong “pagkamasinugtanon sa kamatuora” nga angay nagputli sa atong mga kalag sa punto nga atong bation ang tim-os nga pagbati sa atong isigka-Kristohanon? Pinaagi sa paggamit sa pulong “dili-salingkapaw,” si Pedro nagaingon nga ang atong pagbati alang sa atong mga igsoon kinahanglang dili pasundayag lamang. Kinahanglan kana tiunay, kinasingkasing.
“Mainiton nga Gikan sa Kasingkasin”
9, 10. Unsay gipasabot ni Pedro sa miingon siya nga angay kitang maghigugmaay sa usag usa “nga mainiton,” o “mainaton”?
9 Si Pedro midugang: “Maghigugmaay sa usag usa nga mainiton [sa literal, “mainaton”] nga gikan sa kasingkasing.” Dili kinahanglang inaton ang kasingkasing aron sa pagpakitag gugma niadtong si kinsa kinaiyanhon natong maangayan ug kinsa mobalos. Apan si Pedro nagsulti kanato sa paghigugma sa usag usa nga “mainaton.” Kon ipahayag taliwala sa mga Kristohanon, ang gugmang a·gaʹpe dili lamang ipasukad sa intelektuwal, gihatagag-katarongan nga gugma, sama sa angay natong batonan alang sa atong mga kaaway. (Mateo 5:44) Kini mainiton nga gug,a ug kinahanglag paningkamot. Naglangkit kini sa pag-inat sa atong mga kasingkasing, sa pagpadako niana aron makasakop kana sa mga tawo nga kasagarang dili makadani kanato.
10 Sa iyang Linguistic Key to the Greek New Testament, si Fritz Rienecker mikomento mahitungod sa pulong nga gihubad nga “mainiton,” o “mainaton,” sa 1 Pedro 1:22. Siya misulat: “Ang paninugdang nga ideya mao ang kaikag, kadasog (pagbuhat sa usa ka butang nga dili wala sa buot . . . apan samag uban ang pagpangusog) (Hort).” Ang pagpangusog nagkahulogan, apil sa ubang butang, “pag-inat abot sa kinalabwang maabot.” Ang paghigugma sa usag usa nga mainiton gikan sa kasingkasing sa ingon nagkahulogan sa pagpanlimbasog sa kinalabwan sa atong paningkamot sa pagbatog inigsoong pagbati alang sa tanan natong Kristohaong kauban. Ang pipila ba sa atong mga igsoong lalaki ug babaye walay dapit sa atong malumong mga pagbati? Kon mao, angay nga kita magpadako sa kasingkasing.
“Magpadako sa Kasingkasing”
11, 12. (a) Unsang tambag ang gihatag ni apostol Pablo ngadto sa mga Kristohanon? (b) Sa unsang paagi si Pablo mihatag ug maayong panig-ingnan niining bahina?
11 Lagmit gibati ni apostol Pablo ang panginahanglan niini sa kongregasyon sa Corinto. Siya misulat ngadto sa mga Kristohanon didto: “Ang among baba gibuksan alang kaninyo, mga taga-Corinto, ang among kasingkasing gipadako. Kamo wala makulangi ug dapit sa among kahiladman, apan kamo nakulangan ug dapit sa inyong kaugalingong malumong mga pagbati. Busa, ingon nga balos—ako nagasulti sama nga ngadto sa mga anak—magpadako usab kamo sa kasingkasing.”—2 Corinto 6:11-13.
12 Sa unsang paagi kita makapadako sa atong mga kasingkasing aron maapil ang tanan natong mga igsoong lalaki ug babaye? Gihatag ni Pablo ang maayong panig-ingnan niining bahina. Dayag gipangita niya ang labing maayo diha sa iyang mga igsoon, ug nahinumdom siya kaniya dili tungod sa ilang mga kahuyangan kondili tungod sa ilang maayong mga hiyas. Ang kataposang kapitulo sa iyang sulat ngadto sa mga Kristohanon sa Roma nagailustrar niini. Atong susihon ang Roma kapitulo 16 ug tan-awon kon sa unsang paagi kini nagabanaag sa positibong tinamdan ni Pablo bahin sa iyang mga igsoong lalaki ug babaye.
Mainitong Pagbati
13. Giunsa pagpahayag ni Pablo ang iyang pagpabili kang Febe, ug ngano?
13 Si Pablo misulat sa iyang sulat ngadto sa mga taga-Roma gikan sa Corinto sa mga tuig 56 C.E., panahon sa iyang ikatulong misyonaryong panaw. Lagmit iyang gisalit ang manuskrito ngadto sa usa ka Kristohanong babaye nga ginganlag Febe, usa ka membro sa haduol nga kongregasyon sa Cencrea, nga miadto sa Roma. (Basaha ang mga Rom 16 bersikulo 1, 2.) Matikdi kon unsa ka mainiton ang iyang pagrekomendar kaniya ngadto sa mga igsoon sa Roma. Sa usa o laing paagi, gilabanan niya ang daghang Kristohanon, apil si Pablo, tingali sa panahon sa ilang mga pagbiyahe agi sa puliki nga dunggoanan sa Cencrea. Tungod kay dili hingpit nga makasasala, sama sa tanan ubang tawo, pihong si Febe may mga kahuyangan. Apan inay sa pagpasidaan sa Romanhong kongregasyon batok sa mga kahuyangan ni Febe, gisultihan sila ni Pablo nga “abiabihon siya diha sa Ginoo sa paagi nga takos sa mga balaan.” Unsa ka maayo, positibong tinamdan!
14. Unsang malulutong mga butang ang giingon ni Pablo mahitungod kang Prisca ug Aquila?
14 Gikan sa Rom 16 bersikulo 3 hangtod bersikulo 15, si Pablo nagpadalag mga pangomosta ngadto sa kapin sa 20 ka Kristohanon nga gihisgotan sa ngalang ug sa daghan pang uban nga gihisgotang tinagsatagsa o tiningob. (Basaha ang mga bersikulo 3, 4.) Imo bang himatikdan ang inigsoong gugma nga gibati ni Pablo alang kang Prisca (o, Priscilla; itandi sa Buhat 18:2) ug kang Aquila? Kining magtiayona nagpameligro sa ilang kaugalingon alang kang Pablo. Karon iyang gipangomosta ang maong kaubang mga magbubuhat uban ang pagpasalamat ug gipadad-an silag pahayag sa mga pasalamat alang sa Hentil nga mga kongregasyon. Tinong nadasig kaayo si Aquila ug Priscilla sa maong kinasingkasing nga mga pangomosta!
15. Giunsa pagpakita ni Pablo ang iyang kamahinatagon ug kamapaubsanon sa nangomosta kang Andronico Junia?
15 Si Pablo nahimong usa ka debotadong Kristohanon lagmit sulod sa usa o duha ka tuig tapos mamatay si Kristo. Sa panahong iyang gisulat ang iyang sulat ngadto sa mga taga-Roma, siya gigamit ni Kristo ingong iladong apostol ngadto sa mga nasod sa daghang katuigan. (Buhat 9:15; Roma 1:1; 11:13) Bisan pa niana, matikdi ang iyang kamahinatagon ug kamapaubsanon. (Basaha ang Rom 16 bersikulo 7.) Iyang gipangomosta si Andronico ug Junia ingong “mga tawong ilado taliwala sa mga apostol [mga pinadala]” ug giangkon nga sila nag-alagad kang Kristo nga mas dugay kay kaniya. Walay timaan sa kasina niana!
16. (a) Sa unsang mahigugmaong mga pulong si Pablo naghisgot sa ubang mga Kristohanon nga nagpuyo sa Roma? (b) Nganong kita makaseguro nga kining mga pangomosta maoy mga pananglitan sa “dili-salingkapaw inigsoong pagbati”?
16 Kita diyutay ra o walay nasayraan sa unang mga Kristohanon sama kang Epeneto, Ampliato, ug Estaquis. (Basaha ang mga Rom 16 bersikulo 5, 8, 9.) Apan pinaagi lamang sa paagi sa pagpangomosta ni Pablo kanilang tulo, kita makatinong sila mga tawong matinuohon. Nahimo silang minahal kaayo ni Pablo sa iyang gitawag ang matag usa kanila “akong hinigugma.” Si Pablo usab may malulutong mga pulong alang kang Apeles ug Rufo, nga nagtawag kanila sa tinagsatagsa ingong “ang usang inuyonan diha kang Kristo,” ug “ang pinili diha sa Ginoo.” (Basaha ang mga Rom 16 bersikulo 10, 13.) Pagkanindot nga mga pagdayeg ang ginahatag sa maong duha ka Kristohanon! Ug kay nasayod sa pagkaprangka ni Pablo, kita makatinong kana dili lamang pormalidad. (Itandi sa 2 Corinto 10:18.) Lain pay ato, si Pablo wala malimot sa pagpangamosta sa inahan ni Rufo.
17. Giunsa ni Pablo pagpahayag ang halalom nga pagpabili sa iyang mga igsoong babaye?
17 Kana magdala kanato sa pagpabili ni Pablo sa iyang mga igsoong babaye. Gawas pa sa inahan ni Rufo, gihisgotan ni Pablo ang dili momenos unom ka ubang Kristohanong babaye. Nakita na nato unsa ka maluluton ang iyang paghisgot kang Febe ug Prisca. Apan matikdi nga mainiton kaayo ang inigsoong pagbati nga iyang gipangomosta si Maria, Trefina, Trifosa, ug Persida. (Basaha ang mga Rom 16 bersikulo 6, 12.) Mabatyagan sa usa nga ang iyang kasingkasing mibati niadtong kugihang mga igsoong lalaki ug babaye nga “naghimong daghang paghago” alang sa ilang mga igsoon. Makapalig-on gayod nga makita ang kinasingkasing nga pagpabili ni Pablo sa iyang mga igsoong lalaki ug babaye, bisan pa sa ilang mga pagkadili-hingpit!
Dili Matahapon sa mga Tuyo sa Atong mga Igsoon
18. Sa unsang paagi kita makapaningkamot sa pagsundog kang Pablo, apan unsa tingaliy kinahanglanon?
18 Nganong dili sundogon si Pablo ug sulayan ang pagpangitag maayong butang ikasulti bahin sa matag igsoong lalaki ug babaye sa kongregasyon? Alang sa pipila, ikaw wala gayoy suliran. Alang sa uban, kinahanglan tingali ang diyutayng pagsusi. Nganong dili sulayan ang paggugol ug diyutayng panahon uban kanila aron sila mas mailhan? Seguradong makakita kag hiligugmaong mga hiyas diha kanila, ug, kinsay nasayod, basin sila labawng magpabili kanimo kay sa nangagi.
19. Nganong angay dili kita matahap sa mga tuyo sa atong mga igsoon, ug sa unsang paagi si Jehova nagahatag kanatog maayong panig-ingnan sa gugma?
19 Angay dili kita matahap sa mga tuyo sa atong mga igsoon. Silang tanan nahigugma kang Jehova; kay kon dili pa sila dili unta magpahinungod sa ilang mga kinabuhi ngadto kaniya. Ug unsay makapugong nila sa pagbalik sa kalibotan, pagsunod sa esiesi nga mga paagi niini? Mao ang ilang gugma kang Jehova, sa iyang pagkamataraong, ug sa iyang Gingharian ilalom kang Kristo. (Mateo 6:33) Apan silang tanan, sa nagkalainlaing paagi, nagapakigbisog pag-ayo aron magpabiling matinumanon. Gihigugma sila ni Jehova tungod niini. (Proverbio 27:11) Iyang gidawat sila ingong iyang mga alagad bisan pa sa ilang mga depekto ug mga kahuyangan. Kay kini ang kahimtang, kinsa ba kita nga dili magpasulod nila sa atong malumong mga pagbati?—Roma 12:9, 10; 14:4.
20. (a) Sumala sa sulay ni Pablo ngadto sa mga taga-Roma, kang kinsa lamang kita magmatahapon, ug kansang sulundan kita luwas nga makasunod niining bahina? (b) Gawas niana kanila, unsaon nato pag-isip ang tanan natong mga igsoon?
20 Ang mga tawo lamang nga bahin kanila si Pablo nagapasidaan kanato nga matahap mao “kadtong nagahimog mga pagbahinbahin ug mga higayon sa pagkapandol,” ug kadtong nagalihok nga “supak sa pagtulon-an nga inyong nakat-onan.” Si Pablo nagasugo kanato sa pagbantay kanila ug sa paglikay kanila. (Roma 16:17) Ang mga ansiano sa kongregasyon nagsulay gayod sa pagtabang kanila. (Judas 22, 23) Busa kita makasalig sa mga ansiano nga magpahibalo kanato kon adunay kinahanglang likayan. Kon wala kana, angay natong isipon ang tanan natong igsoon ingong takos sa dili-salingkapaw inigsoong pagbati, ug angay makatuon kita sa paghigugma kanila nga mainiton gikan sa kasingkasing.
21, 22. (a) Unsa ang anaa sa atong unahan? (b) Unsang mga kahimtang ang tingali motungha, busa panahon na gayod sa pagbuhat sa unsa? (c) Unsay pagahisgotan sa sunod nga artikulo?
21 Si Satanas, iyang mga demonyo, ug iyang tibuok kalibotang sistema sa mga butang maoy supak kanato. Ang Har–Magedon anaa sa atong unahan. Kini mabikil sa pag-atake ni Gog sa Magog. (Ezekiel, mga kapitulo 38, 39) Nianang panahona, kinahanglan nato ang atong mga igsoon labaw kay sukad masukad. Basin kita magkinahanglag tabang niadtong si kinsa wala nato kaangayi ilabina. O sila basin magkinahanglan gayod sa atong panabang. Karon mao na ang panahon sa pagpadaki sa atong kasingkasing ug pagpauswag sa atong pagpabili sa tanan natong mga igsoon.
22 Siyempre, ang pagpabili sa atong mga igsoon nagaapil sa tukmang pagtahon sa mga ansiano sa kongregasyon. Niining bahina, ang mga ansiano angay nga maayong mga panig-ingnan sa pagpakitag tukmang pagpabili dili lamang sa ilang isigkaansiano apan sa tanang igsoon usab. Kining bahina sa ulohan pagahisgotan sa sunod nga artikulo.
Mga Punto Alang sa Pagsubli
□ Unsa ang linaing timaan sa matuod nga Kristiyanidad?
□ Nganong kinahanglanon ang gugma ug inigsoong pagbati?
□ Sa unsang paagi kita makahigugma sa usag usa nga “mainiton,” o “mainaton”?
□ Sa Roma kapitulo 16, giunsa pagpakita ni Pablo ang pagpabili sa iyang mga igsoong lalaki ug babaye?
□ Nganong angay kita dili matahap sa mga tuyo sa atong mga igsoon?
[Hulagway sa panid 12]
Sulayi ang pagdiskobreg hiligugmaong mga hiyas diha niadtong kinaiyanhong dili makadani kanato