Magmaisogon Kamo!

“Magmaisogon kamo ug moingon: ‘Si Jehova ang akong magtatabang.’”​—HEBREOHANON 13:6.

1. Unsang kaisog ang gipasundayag niadtong nakakat-on sa kamatuoran sa Diyos sa unang siglo K.P.?

KADTO maoy unang siglo sa atong Komong Panahon. Miabot na ang dugay-nang-gipaabot nga Mesiyas. Iya nang natudloan pag-ayo ang iyang mga tinun-an ug gilansad ang hinungdanong buluhaton sa pagwali. Panahon na nga ang mga tawo makabati sa maayong balita sa Gingharian sa Diyos. Busa, ang mga lalaki ug mga babayeng nasayod sa kamatuoran maisogong nagpahayag sa maong kahibulongang mensahe.​—Mateo 28:19, 20.

2. Nganong ang mga Saksi ni Jehova nagkinahanglag kaisog karong adlawa?

² Ang Gingharian wala pa matukod niadtong mga adlawa. Apan ang Tinudlong-Hari, si Jesu-Kristo, nagtagna mahitungod sa iyang umaabot dili-makitang presensiya uban ang gahom sa Gingharian. Pagatiman-an kana sa mga butang sama sa way-ingon nga paggubatay, kagutmanan, mga kamatay, mga linog, ug tibuok-kalibotang pagwali sa maayong balita. (Mateo 24:3-14; Lucas 21:10, 11) Ingon nga mga Saksi ni Jehova, kita nagkinahanglan ug kaisog sa pagsagubang niini nga mga kahimtang ug sa paglutos nga atong masinati. Busa mapuslanon nga tagdon ang mga asoy sa Bibliya mahitungod sa maisogon nga mga magmamantala sa Gingharian sa unang siglo K.P.

Kaisog sa Pag-awat Kang Kristo

3. Kinsay nagtagana sa labing maayong panig-ingnan sa kaisog, ug unsay gisulti bahin kaniya sa Hebreohanon 12:1-3?

³ Gihatag ni Jesu-Kristo ang labing maayong panig-ingnan sa kaisog. Human sa paghisgot sa ‘mabagang panganod’ sa maisogong una-Kristohanong mga saksi ni Jehova, si apostol Pablo nagtumong sa pagtagad ngadto kang Jesus pinaagi sa pag-ingon: “Tungod kay kita adunay mabagang panganod sa mga saksi nga nagalibot kanato, iwakli ta usab ang tanang kabug-at ug ang sala nga daling makasabod kanato, ug dalaganon ta nga malahutayon ang lumba nga gibutang sa atong atubangan, samtang magatutok kita sa Pangulong Ahente ug Maghihingpit sa atong pagtuo, si Jesus. Tungod sa kalipay nga gibutang sa iyang atubangan iyang giantos ang kahoy sa pagsakit, nga gitamay ang kaulawan, ug milingkod sa tuong kamot sa trono sa Diyos. Sa pagkamatuod, palandonga gayod ang usa nga miantos sa maong masupakong panulti sa mga makasasala batok sa ilang kaugalingong kaayohan, aron kamo dili kapoyon ug maluya sa inyong mga kalag.”​—Hebreohanon 12:1-3.

4. Sa unsang paagi si Jesus nagpasundayag sa kaisog sa gitental ni Satanas?

⁴ Human sa iyang bawtismo ug sa 40 ka adlaw nga pamalandong, pag-ampo, ug pagpuasa sa kamingawan, si Jesus maisogong misupak kang Satanas. Kay gitental sa Yawa nga himoong tinapay ang mga bato, si Jesus midumili tungod kay sayop ang paghimog milagro aron tagbawon ang kaugalingong tinguha. “Nahisulat na,” matud ni Jesus, “Ang tawo dili lamang mabuhi sa tinapay, apan sa matag pulong nga nagagula sa baba ni Jehova.” Sa gihagit siya ni Satanas nga molukso gikan sa tuktok sa templo, si Jesus midumili tungod kay sala unta nga pagapanulayon ang Diyos sa pagluwas kaniya gikan sa lagmit nga paghikog. “Nahisulat na usab,” mipahayag si Kristo, “Dili mo pagapanulayon si Jehova nga imong Diyos.” Si Satanas mitanyag kaniya sa tanang gingharian sa kalibotan ilis sa usa ka “buhat sa pagsimba,” apan si Jesus dili mobiya sa pagtuo ug mopaluyo sa pagtamay sa Yawa nga ang mga tawo dili magpabiling matinumanon sa Diyos ilalom sa pagsulay. Mao nga si Jesus mipahayag: “Pahilayo, Satanas! Kay nahisulat na, ‘Si Jehova nga imong Diyos mao lamang ang imong pagasimbahon, ug kaniya lamang ikaw magahatag ug balaang pag-alagad.’” Niana, ang Manunulay “mibiya kaniya hangtod sa laing angay nga panahon.”​—Mateo 4:1-11; Lucas 4:13.

5. Unsay makatabang kanato sa pagsukol sa tentasyon?

⁵ Si Jesus nagpasakop kang Jehova ug misupak kang Satanas. Kon kita susamang ‘magpasakop sa atong kaugalingon sa Diyos ug mosukol sa Yawa, siya mokalagiw gikan kanato.’ (Santiago 4:7) Sama kang Jesus, kita maisogong makasukol sa tentasyon kon atong ipadapat ang Kasulatan, nga tingali kutloon pa kini sa panahong kita tentalon sa pagbuhat sa usa ka sala. Lagmit ba nga kita madaog sa tentasyon sa pagpangawat kon nianang panahona sublion ta sa atong kaugalingon ang sugo sa Diyos: “Dili ka mangawat”? Ang duha ka Kristohanon ba lagmit makabuhat sa seksuwal nga imoralidad kon bisan usa kanila ang maisogong mokutlo sa mga pulong: “Dili ka manapaw”?​—Roma 13:8-10; Exodo 20:14, 15.

6. Sa unsang paagi si Jesus usa ka maisogong mananaog sa kalibotan?

⁶ Ingong mga Kristohanon nga gidumtan niining kalibotana, makalikay kita sa espiritu ug makasasalang gawi niini. Giingnan ni Jesus ang iyang mga sumusunod: “Sa kalibotan kamo adunay kasakitan, apan magmaisogon! Gidaog ko ang kalibotan.” (Juan 16:33) Gidaog niya ang kalibotan pinaagi sa pagkahimong dili sama niini. Ang iyang panig-ingnan ingong mananaog ug ang sangpotanan sa iyang dalan sa paghupot ug integridad makahupong kanato sa kaisog sa pag-awat kaniya pinaagi sa pagpabiling bulag niining kalibotana ug dili mahugawan niini.​—Juan 17:16.

Kaisog sa Pagpadayon sa Pagwali

7, 8. Unsay motabang kanato sa pagpadayon sa pagwali bisan pa sa paglutos?

⁷ Si Jesus ug ang iyang mga tinun-an mingsalig sa Diyos alang sa kaisog sa pagpadayon sa pagwali bisan pa sa paglutos. Si Kristo maisogong nagtuman sa iyang ministeryo bisan pa sa paglutos, ug human sa Pentekostes 33 K.P., ang gilutos nga mga sumusunod niya nagpadayon sa pagmantala sa maayong balita bisan pag ang Hudiyong relihiyosong mga pangulo misulay sa pagpahunong kanila. (Buhat 4:18-20; 5:29) Ang mga tinun-an miampo: “Jehova, hatagig pagtagad ang ilang mga panghulga, ug itugot nga ang imong mga ulipon magpadayon sa pagsulti sa imong pulong uban sa bug-os nga kaisog.” Ug unsay nahitabo? “Sa dihang sila nakapangaliya na, ang dapit diin sila nagtigom nauyog,” matud sa asoy, “ug silang tanan napuno sa balaang espiritu ug nagpahayag sa pulong sa Diyos uban sa kaisog.”​—Buhat 4:24-31.

⁸ Sanglit ang kinabag-an sa katawhan karong adlawa dili madinawaton sa maayong balita, ang kaisog sagad gikinahanglan aron magpadayon sa pagwali ngadto kanila. Ilabina sa dihang pagalutoson, ang mga alagad ni Jehova nagkinahanglan sa hinatag-sa-Diyos nga kaisog aron sa paghatag ug bug-os nga pamatuod. (Buhat 2:40; 20:24) Sa ingon ang maisogong magmamantala sa Gingharian nga si Pablo miingon sa usa ka batan-on, kulag-eksperyensiya nga kaubang magbubuhat: “Ang Diyos wala maghatag kanato sa espiritu sa katalaw, apan sa espiritu sa gahom ug sa gugma ug sa maayong hunahuna. Busa ayaw ikaulaw ang pagpamatuod mahitungod sa atong Ginoo, ni mahitungod kanako nga usa ka binilanggo tungod kaniya, apan dawata ang imong bahin sa pag-antos sa kadaotan tungod sa maayong balita sumala sa gahom sa Diyos.” (2 Timoteo 1:7, 8) Kon moampo kita alang sa kaisog, kita makaarang sa pagpadayon sa pagwali, ug bisan ang paglutos dili maghikaw sa atong kalipay ingong mga magmamantala sa Gingharian.​—Mateo 5:10-12.

Kaisog sa Pagdapig Kang Jehova

9, 10. (a) Unsay gibuhat sa unang-siglong mga Hudiyo ug mga Hentil aron mahimong bawtismadong mga sumusunod ni Kristo? (b) Nganong gikinahanglan ang kaisog aron mahimong usa ka Kristohanon?

⁹ Daghang unang-siglong mga Hudiyo ug mga Hentil maisogong mibiya sa dili-kasulatanhong mga tradisyon aron mahimong bawtismadong mga sumusunod ni Kristo. Wala madugay human sa Pentekostes 33 K.P., “ang mga tinun-an sa Jerusalem nagpadayon sa pagdaghan sa hilabihan gayod; ug ang usa ka dakong panon sa mga saserdote misugod sa pagkamasinugtanon sa pagtuo.” (Buhat 6:7) Kadtong mga Hudiyoha may kaisog sa pagbugto sa relihiyosong mga kalangkitan ug nagdawat kang Jesus ingong Mesiyas.

¹⁰ Sugod sa 36 K.P., daghang Hentil ang nahimong mga magtutuo. Sa dihang si Cornelio, mga sakop sa iyang banay, ug ubang mga Hentil nakadungog sa maayong balita, sila midawat dayon niana, nakadawat sa balaang espiritu, ug “nabawtismohan sa ngalan ni Jesu-Kristo.” (Buhat 10:1-48) Sa Filipos ang usa ka Hentil nga magbalantay sa bilanggoan ug iyang banay midawat gilayon sa Kristiyanidad, ug “siya ug iyang mga sakop nabawtismohan sa walay langan.” (Buhat 16:25-34) Ang kaisog gikinahanglan sa paghimo nianang mga lakanga tungod kay ang mga Kristohanon maoy ginalutos, dili-bantog nga minoriya. Kini matuod gihapon kanila karon. Apan kon ikaw wala pa makapahinungod sa Diyos ug nabawtismohan ingong usa sa mga Saksi ni Jehova, dili ba panahon na nga himoon nimo kining maisogong mga lakang?

Kaisog Diha sa Nabahing mga Panimalay

11. Si Eunice ug Timoteo mitagana sa unsang maayong mga panig-ingnan sa kaisog?

¹¹ Si Eunice ug ang iyang anak nga si Timoteo naghatag ug maayong mga panig-ingnan sa maisogong pagtuo diha sa panimalay nga nabahin sa relihiyon. Bisan pag si Eunice may bana nga pagano, gitudloan niya ang iyang anak lalaki sa “balaang mga kasulatan” sukad sa iyang pagkabata. (2 Timoteo 3:14-17) Sa pagkahimong Kristohanon, iyang gipadayag ang ‘pagtuo nga walay pagkasalingkapaw.’ (2 Timoteo 1:5) Siya usab may kaisog sa pagtudlo kang Timoteo sa Kristohanong pagtulon-an samtang nagpakitag pagtahod sa pagkaulo sa iyang dili-magtutuo nga bana. Segurado, ang iyang pagtuo ug kaisog gibaslan sa dihang ang iyang anak nga maayong pagkatudlo napili nga mokuyog kang Pablo sa mga misyonaryong panaw. Makapadasig gayod kini sa Kristohanong mga ginikanan nga anaa sa susamang mga kahimtang!

12. Nahimong unsang matang sa tawo si Timoteo, ug kinsa karon ang nagapamatuod nga sama kaniya?

¹² Bisan pag si Timoteo nagpuyo sa panimalay nga nabahin sa relihiyon, maisogon niyang gidawat ang Kristiyanidad ug nahimong usa ka tawong espirituwal nga bahin kaniya si Pablo nakaingon: “Ako nagalaom diha sa Ginoong Jesus sa pagpadala kang Timoteo nganha kaninyo [mga taga-Filipos] sa dili na madugay, aron ako unta mahimong masadyaong kalag inigkasayod ko bahin sa mga butang labot kaninyo. Kay wala akoy lain nga may kinaiya nga sama kaniya nga mag-atiman sa tininuod sa mga butang labot kaninyo. . . . Kamo nahibalo sa pamatuod nga iyang gihatag bahin sa iyang kaugalingon, nga sama sa usa ka anak uban sa usa ka amahan siya nagpaulipon kauban nako sa pagpauswag sa maayong balita.” (Filipos 2:19-22) Karong adlawa, daghang batang lalaki ug babaye diha sa nabahin sa relihiyon nga mga panimalay maisogong nagdawat sa matuod nga Kristiyanidad. Sama kang Timoteo sila nagahatag ug pamatuod sa ilang kaugalingon, ug pagkamasadyaon nato nga sila maoy bahin sa organisasyon ni Jehova!

Kaisog nga ‘Itahan ang Atong mga Liog’

13. Sa unsang paagi si Aquila ug Prisila nagpasundayag sa kaisog?

¹³ Si Aquila ug ang iyang asawa, si Prisila (Prisca), naghatag ug panig-ingnan pinaagi sa maisogong ‘pagtahan sa ilang mga liog’ alang sa kaubang magtutuo. Sila nagdawat kang Pablo sa ilang balay, nagtrabaho uban kaniya sa paggamag tolda, ug nagtabang niya sa pagtukod sa bag-ong kongregasyon sa Corinto. (Buhat 18:1-4) Sulod sa ilang 15-anyos nga panaghigala, ila ganing gipameligro ang ilang mga kinabuhi alang kaniya sa wala-ibutyag nga paagi. Sila niadto nagpuyo sa Roma sa dihang gisultihan niya ang mga Kristohanon didto: “Ipangomosta ako kang Prisca ug Aquila nga akong mga kaubang magbubuhat diha kang Kristo Jesus, kinsa nagtahan sa ilang mga liog alang sa akong kalag, kang kinsa dili lamang ako kondili ang tanan usab nga kongregasyon sa mga nasod magpasalamat.”​—Roma 16:3, 4.

14. Pinaagi sa pagtahan sa ilang mga liog alang kang Pablo, si Aquila ug Prisca naglihok nga nahiuyon sa unsang sugo?

¹⁴ Pinaagi sa pagtahan sa ilang mga liog alang kang Pablo, si Aquila ug Prisca milihok sumala sa mga pulong ni Jesus: “Ako nagahatag kaninyo ug usa ka bag-ong sugo, nga kamo mahigugma sa usag usa; maingon nga ako nahigugma kaninyo, aron kamo usab mahigugma sa usag usa.” (Juan 13:34) Kining sugoa maoy “bag-o” sa pagkaagi nga kini milabaw sa panginahanglan sa Moisesnong Kasugoan nga ang usa ka tawo mahigugma sa iyang silingan sama sa iyang kaugalingon. (Levitico 19:18) Kadto nangayog nagasakripisyo-sa-kaugalingong gugma nga moabot pa sa paghatag sa kinabuhi sa usa alang sa uban, sama sa gibuhat ni Jesus. Ang manunulat nga si Tertullian sa ikaduha ug ikatulong siglo K.P. nagkutlo sa mga pulong sa mga tawo sa kalibotan bahin sa mga Kristohanon sa misulat siya: “‘Tan-awa ra gud,’ sila nag-ingon, ‘nahigugma gayod sila sa usag usa . . . ug andam pa gani sila nga mamatay alang sa usag usa.’” (Apology, kapitulo XXXIX, 7) Ilabina taliwala sa paglutos nga kita unta mobating obligado sa pagpasundayag ug inigsoong gugma pinaagi sa maisogong pagtahan sa atong mga kinabuhi aron malikayan ang pagladlad sa kaubang mga magtutuo ngadto sa kabangisan o kamatayon diha sa mga kamot sa kaaway.​—1 Juan 3:16.

Kaisog Magdalag Kalipay

15, 16. Sumala sa gipakita sa Buhat kapitulo 16, sa unsang paagi nagkalambigit ang kaisog ug kalipay?

¹⁵ Si Pablo ug Silas mitaganag pamatuod nga ang pagpasundayag sa kaisog taliwala sa mga pagsulay makadalag kalipay. Tungod sa sugo sa sibil nga mga mahistrado sa siyudad sa Filipos, sila gibunalan pinaagi sa mga latigo ug gibutang sa sepohan. Bisan pa, sila wala mangahadlok. Bisan pa sa ilang masulayong mga kahimtang, sila nagbaton pa sa hinatag-sa-Diyos nga kaisog ug sa kalipay nga dala niini alang sa matinumanong mga Kristohanon.

¹⁶ Sa mga tungang gabii, si Pablo ug Silas nag-ampo ug nagdayeg sa Diyos pinaagi sa awit. Sa kalit, ang bilanggoan giuyog sa usa ka linog, nga nangabugkas ang ilang mga gapos, ug naabli ang mga pultahan. Ang nahadlok nga magbalantay sa bilanggoan ug iyang pamilya nahatagan ug maisogong pamatuod nga mitultol sa ilang bawtismo ingong mga alagad ni Jehova. Siya mismo “nalipay pag-ayo uban sa tibuok niyang panimalay karon nga siya nagtuo na sa Diyos.” (Buhat 16:16-34) Pagkadako gayod sa kalipay ni Pablo ug Silas tungod niadto! Kay nakahisgot na niini ug sa ubang Kasulatanhong mga panig-ingnan sa kaisog, sa unsang paagi makapabilin kitang maisogon ingong mga alagad ni Jehova?

Pagpadayon nga Magmaisogon

17. Sumala sa gipakita sa Salmo 27, sa unsang paagi ang paglaom kang Jehova nalangkit sa kaisog?

¹⁷ Ang paglaom kang Jehova motabang kanato sa pagpabiling maisogon. Si David miawit: “Paglaom kang Jehova; magmaisogon ug magmalig-on sa inyong kasingkasing. Oo, paglaom kang Jehova.” (Salmo 27:14) Ang Salmo 27 nagpakitang si David misalig kang Jehova ingong “ang kuta” sa iyang kinabuhi. (Bersikulo 1) Ang pagkakita kon unsay gibuhat sa Diyos sa mga kaaway ni David sa nangagi mihatag kaniyag kaisog. (Bersikulo 2, 3) Ang pagpabili sa sentro sa pagsimba ni Jehova maoy laing katarongan. (Bersikulo 4) Ang pagsalig sa tabang, panalipod, ug pagluwas ni Jehova naglig-on usab sa kaisog ni David. (Bersikulo 5-10) Nakatabang, usab, mao ang padayong instruksiyon sa mga prinsipyo sa matarong nga dalan ni Jehova. (Bersikulo 11) Ang masaligong pag-ampo alang sa kaluwasan gikan sa iyang mga kaaway, inubanan sa pagtuo ug paglaom, mitabang kang David nga magmaisogon. (Bersikulo 12-14) Makapalig-on kita sa atong kaisog sa susamang mga paagi, sa ingon nagapakita nga kita tinuod nga “nagalaom kang Jehova.”

18. (a) Unsay nagapakita nga ang regular nga pagpakig-uban sa kaubang mga magsisimba ni Jehova makatabang kanato sa pagpabiling maisogon? (b) Unsa ang bahin nga gidula sa Kristohanong mga tigom sa paglig-on sa kaisog?

¹⁸ Ang regular nga pagpakig-uban sa kaubang mga magsisimba kang Jehova makatabang kanato nga magpabiling maisogon. Sa dihang si Pablo miapelar kang Cesar ug nagbiyahe paingon sa Roma, gisugat siya sa kaubang mga magtutuo sa Tiyanggihan sa Appio ug sa Tres Tabernas. “Sa pagkakita kanila,” matud sa asoy, “si Pablo nagpasalamat sa Diyos ug nagmaisogon.” (Buhat 28:15) Samtang regular kitang nagatambong sa Kristohanong mga tigom, ginapamatian nato ang tambag ni Pablo: “Magdinasigay kita sa usag usa ngadto sa gugma ug sa maayong mga binuhatan, nga dili isalikway ang atong panagkatigom, sumala sa nabatasan sa uban, apan magdinasigay sa usag usa, ug ilabina na gayod samtang inyong makita nga nagakahiduol na ang adlaw.” (Hebreohanon 10:24, 25) Unsay kahulogan sa pagdinasigay sa usag usa? Ang pagdasig nagkahulogang “pagdasig pinaagi sa kaisog, espiritu, o paglaom.” (Webster’s Ninth New Collegiate Dictionary) Dako ang atong mahimo sa pagdasig sa ubang mga Kristohanon pinaagi sa kaisog, ug ang ilang pagdasig samang makapalig-on sa maong hiyas diha kanato.

19. Sa unsang paagi ang Kasulatan ug Kristohanong mga basahon nalangkit sa atong pagpabiling maisogon?

¹⁹ Sa pagpabiling maisogon, kinahanglang regular tang magtuon sa Pulong sa Diyos ug ipadapat ang tambag niini diha sa atong mga kinabuhi. (Deuteronomio 31:9-12; Josue 1:8) Ang atong regular nga pagtuon kinahanglang maglakip sa Kristohanong mga basahon nga gipasukad sa Kasulatan, kay ang maayong tambag nga gitagana sa maong paagi motabang kanato sa pagharong sa mga pagsulay sa pagtuo uban sa hinatag-sa-Diyos nga kaisog. Gikan sa mga asoy sa Bibliya, atong nakita kon sa unsang paagi ang mga alagad ni Jehova nagmaisogon sa lainlaing mga kahimtang. Sa pagkakaron, tingali wala kita mahibalo kon sa unsang paagi ang maong impormasyon makatabang kanato, apan ang Pulong sa Diyos adunay gahom, ug ang atong hikat-onan gikan niana sa kanunay makahatag kanatog kaayohan. (Hebreohanon 4:12) Pananglitan, kon ang kahadlok sa tawo mosugod sa pag-apektar sa atong ministeryo, kita mahimong maghinumdom kon sa unsang paagi si Enoch nagbaton sa kaisog sa pagpahayag sa mensahe sa Diyos ngadto sa mga dili-diyosnon.​—Judas 14, 15.

20. Nganong ikaingon nga ang pag-ampo bililhon aron kita magpabiling maisogon ingong mga alagad ni Jehova?

²⁰ Sa pagpabiling maisogon ingong mga alagad ni Jehova, kinahanglang molahutay kita sa pag-ampo. (Roma 12:12) Maisogong giantos ni Jesus ang iyang mga pagsulay tungod kay siya “mihimog mga pangaliya ug mga hangyo usab ngadto sa Usa nga nakaarang sa pagluwas kaniya gikan sa kamatayon, uban ang kusog nga mga pagtuaw ug mga luha, ug siya gidungog tungod sa iyang diyosnong kahadlok.” (Hebreohanon 5:7) Pinaagi sa pagpabiling suod sa Diyos diha sa pag-ampo, kita dili mahisama sa mga talawan nga kalibotanon nga makaagom gayod sa “ikaduhang kamatayon” nga gikan niana wala nay pagkabanhaw. (Pinadayag 21:8) Ang balaang panalipod ug kinabuhi sa bag-ong kalibotan sa Diyos maoy alang sa iyang maisogong mga alagad.

21. Nganong ang maunongong mga Saksi ni Jehova mahimong magmaisogon?

²¹ Ingong maunongong mga Saksi ni Jehova, kinahanglang dili kita mahadlok sa demonyohanon ug tawhanong mga kaaway, kay kita adunay pagpaluyo sa Diyos ug maisogong panig-ingnan ni Jesus ingong mananaog sa kalibotan. Ang makapalig-on sa espirituwal nga pakig-uban sa katawhan ni Jehova motabang usab kanato nga magmaisogon. Ang atong kaisog malig-on usab pinaagi sa giya ug tambag sa Kasulatan ug sa Kristohanong mga basahon. Ug ang mga asoy sa Bibliya bahin sa mga alagad sa Diyos sa nangagi motabang kanato sa paglakaw nga maisogon sa iyang mga dalan. Busa, niining lisod kataposang mga adlaw mopadayon kita sa unahan nga maisogon sa balaang pag-alagad. Oo, ang tanang katawhan ni Jehova angay nga magmaisogon!

Unsaon Nimo Pagtubag?

◻ Sa unsang paagi ang panig-ingnan ni Jesus makahupong kanato sa kaisog?

◻ Unsay mihatag ug kaisog kang Jesus ug sa iyang mga tinun-an sa pagpadayon sa pagwali?

◻ Nganong ang mga Hudiyo ug mga Hentil nagkinahanglan ug kaisog sa pagdapig kang Jehova?

◻ Unsang mga panig-ingnan sa kaisog ang gihatag ni Eunice ug Timoteo?

◻ Unsay ebidensiya nga ang kaisog magdalag kalipay bisan taliwala sa paglutos?

[Hulagway sa panid 18]

Sama kang Jesus, kita makasukol sa tentasyon kon atong ipadapat ug kutloon ang Kasulatan